MARCOS 15
15
Jesustaca, mandaj Pilatopaj ñaupajmanmi apashca
(Mat. 27:1-2,11-14; Luc. 23:1-5; Juan 18:28-38)
1Narapash ali punllayajpimi, sacerdotecunata mandajcunaca, mandaj ancianocunahuan, mandashca Shimita yachachijcunahuan, mandajpuralla tandanajushcacunahuan parlarinajurca. Chai jipami Jesustaca huatashpa mandaj Pilatopaj ñaupajpi saquingapa apanajurca. 2Chaipimi Pilatoca:
“¿Canllu judiocunata jatun Mandaj cangui?” nishpa tapurca.
Shina tapujpimi Jesusca:
“Canllatami ña chashna ningui” nirca.
3Shina nijpimi, sacerdotecunata mandajcunaca ninandapacha juchachishpa rimanajurca. 4Chashna cajpimi, Pilatoca cutin tapushpa cashna nirca:
“Ricui, canda cashnapacha juchachinajujpica, ¿nachu imatallapash tigrachina cangui?” nirca.
5Ashtahuangarin Jesusca, shina nijpipash imatapash na tigrachijpimi Pilatoca ninanda manllarijurca.
Jesusca huañunapacha cashcamanda
(Mat. 27:15-31; Luc. 23:13-25; Juan 18:38—19:16)
6Pascua cushijui punllapica, prezu tiyanajuncunamanda shujta cacharipai nishpa pipash mañajpica, cacharinllami carca. 7Chai punllacunapica Barrabasmi paipaj cumbacunandi prezu tiyanajurca. Paicunaca, fiñanajuita jatarichishpa huañuchishcamandami chashna tiyanajurca. 8Ashtahuangarin ashtaca gentecuna chayamushpaca: “Imashnami can ruranata yachangui, chashnallata cunanbash rurailla” nishpami mañanajurca.
9Shina mañajpimi Pilatoca:
“¿Judiocunapaj jatun Mandajtachu cacharichun munanguichi?” nijurca.
10Sacerdotecunata mandajcunaca, na ricunayachishpalla, paipaj ñaupajman apamushcatami paica yacharca. 11Ashtahuangarin sacerdotecunata mandajcunaca: “Barrabastarapash cacharipai” nishpa caparinajuchunmi, gentecunataca yachachinajurca. 12Chashna ninajujpi Pilato cutin tapushpaca:
“Cangunallatami judiocunapaj jatun Mandajmi ninajurcanguichi. ¿Paitaca imatata rurachun munanguichi?” nirca.
13Shina tapujpimi paicunaca:
“¡Chai runataca chacatailla!” nishpa, ninanda caparinajurca.
14Chashna caparinajujpimi Pilatoca:
“Cai runaca, ¿ima na alitata rurashcayari?” nishpa tapurca.
Shina tapujpicarin:
“¡Chai runataca chacatailla!” nishpami, ashtahuan ninanda caparinajurca.
15Shina cajpimi Pilatoca, gentecunata cushichingapa munashpa, Barrabastara cacharirca. Ashtahuangarin Jesustaca, ninanda astichishpami, chacatachun saquirca.
16Shina cajpimi chai macanajuj runacunaca, mandashpa tiyajuj huasi canlla jatun patioman Jesustaca apashpa, caishuj macanajuj runacunatapash cayachun cacharca. 17Paicunaca, Jesusman yana puca fachata fachalichishpami, umapipash cashata ahuashca coronata churachirca. 18Chashna churachishpami:
“¡Juyayai, judiocunata jatun Mandaj!” nishpa na alicachinajurca.
19Shina caparishpami Jesustaca, caspihuan umapi huajtashpa, t'ucashpa saquinajurca. Shinallata, Paipaj ñaupajpi cungurishpami, alicachij tucushpa asinajurca. 20Chashna ninanda na alicachishpa, asishca jipami, yana puca fachata llujchichishpa, paipaj churajunata cutin churachirca. Chashna rurashpami Jesustaca, chacatangapa llujchinajurca.
Jesustaca chacatashpami huañuchishca
(Mat. 27:32-56; Luc. 23:26-49; Juan 19:17-30)
21Cirene shuti pueblomanda Simondami, pambamanda tigramujunda tuparirca. Paica, Alejandropaj, Rufopaj taitami carca. Paitami, Jesuspaj cruzta aparichun, munai na munai mandanajurca.
22Shinallata, Gólgota shuti lomamanmi, Jesustaca apashpa rinajurca. Gólgota nishpaca: “Uma tullu” nijunmi. 23Chaiman chayashpa, mirrahuan, vinohuan chapushcata ufiachingapa munanajujpica, Jesusca na ufiarcachu. 24Jesusta chacatashpaca, paicunapurami pipaj urmajta ricungapa rurashpa, Paipaj churajunacunataca chaupirinajurca.
25Tutamanda ña iscun pacha cajpimi, Jesustaca chacatanajurca. 26Imamanda chacatashcatapash villashpami, quilcashcapica: “CAIMI JUDIOCUNATA JATUN MANDAJ” nijurca. 27Paitaca, ishcai shuhua runacunatapashmi, shujtaca aliman, shujtaca lluquiman churashpa chacatanajurca. 28Chashna cajpimi: “Na alita rurajcunahuanmi, tandachi tucunga” nishpa, quilcashcapash pactarca#15:28 (Cai versiculoca punda quilcashcapica na tiyanllu).
29Chaita yalijcunaca, umata muyuchishpami na alicachishpa cashna rimanajurca:
“¡Ja jai! Canga: ‘Diospaj huasita urmachishpapash, quimsa punllapilla shayachishallami’ nircanguica, 30cunanga, cruzmanda Canllata uriajushpa quishpiriyari” ninajurcami.
31Shinallatami, sacerdotecunata mandajcunapash, ninanda na alicachishpa, mandashca Shimita yachachijcunahuan parlarishpa caishuj, chaishuj cashna ninajurca:
“Shujcunataca quishpichircallami. Paillata quishpiritaca, na ushanllu. 32Israelcunata jatun Mandaj Cristotaca, cunanllata cruzmanda uriajunda ricushpami crinchiman” ninajurcami.
Jesushuan chacatariyanajuj runacunapash, chashnallatami na alicachishpa rimanajurca.
33Chaupi punllamanda, chishi quimsa pachacamanmi, cai pachaca tucuilla, yana yana tucurca. 34Ña quimsa pacha chishipimi Jesusca: “Eloi, Eloi, ¿lama sabactani?” nishpa ninanda caparirca. Cai shimicunaca: “Ñuca Taita Dioslla, Ñuca Taita Dioslla, ¿imashpata Ñucatalla saquihuanguiyari?” nijunmi.
35Chaipi shayanajujpuramanda huaquinguna uyashpaca:
“Ricuichi, profeta Eliastamari cayajun” ninajurcami.
36Chaipimi shuj runaca, vinagrepi esponjata mutiyachishpa, sucus pundapi churashpa, ufiachun shimipi churarca. Shina rurashpaca:
“Eliasca Paita uriajuchingapa shamunllu, imami ricushunchi” ninajurcami.
37Ashtahuangarin Jesusca, ninanda caparishpaca huañurcallami. 38Shina tucunhuanmi, Diospaj huasi ucupi huarcushpa quilpashca jatun fachaca, jahuamanda uraiman llujshijta chaupipi liquirirca. 39Jesús chacatariyajuj ñaupajpica, patsaj macanajuj runacunata mandajmi shayajurca. Paimi, Jesús imashna caparishpa huañuntapash ricujurca. Shina ricushpami:
“Cai runaguca, Taita Diospaj Churipachamari cashca” nijurca.
40Shinallata huaquin huarmicunapash, Jesustaca carumandallami ricunajurca. Chai huarmicunahuanga, Magdala shuti pueblomanda Mariapash, jipa Jacobopaj, Josepaj mama Mariapash, Salomé shuti huarmipashmi chaipi shayanajurca. 41Chai huarmicunami, Galilea llactapi Jesús purijujpica, Jesús ima nishcata pactachishpa purinajurca. Ashtahuan shuj huarmicunapashmi, Jerusalenman Jesús shamujujpica, catishpa vichai shamunajurca.
Jesusta pambashcamanda
(Mat. 27:57-61; Luc. 23:50-56; Juan 19:38-42)
42Ña tutayashcapimi, cayandipaca samana punlla cajpi, imatapash tucuita alichinajurca. 43Shina cajpimi, Arimatea shuti pueblomanda Joseca, Pilatopajman rirca. Paica, mandajpuralla tandanajushcapica alicachi tucushcami carca. Shina cashpami, Pilatotaca na manllashpa, Jesuspaj cuerpoguta mañangapa yaicurca. Shinallata, Taita Dios mandajpi causanata munashpami shuyajurca.
44Pilatoca Jesús huañushcata yachashpami ninanda manllarirca. Shina cashpami, Jesús huañushcata yachangapa munashpa, patsaj macanajuj runacunata mandajta cayachun cachashpa tapurca. 45Patsaj macanajuj runacunata mandaj ña villajpimi, Jesuspaj cuerpogutaca José pambachun curca.
46Joseca fachata randingapa rishpami, Jesusta uriajuchishpa chai fachahuan pilluchirca. Jesusta apashpaca, jaca rumipi utujushcapimi churarca. Huañushcata churana chai utuju pungutaca, shuj jatun rumita suchuchishpami taparca 47Shinallata, Magdala shuti pueblomanda Mariapash, Josepaj mama Mariapashmi, Jesusta maipi churanta ricunajurca.
လက်ရှိရွေးချယ်ထားမှု
MARCOS 15: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
