LUCAS 3
3
Bautizaj Juanmi villajushca
(Mat. 3:1-12; Mar. 1:1-8; Juan 1:19-28)
1Tiberio César, chunga picha huatata mandajui huatapimi, Poncio Pilatoca, Judea llactata mandajurca. Herodesca, Galilea llactatami mandajurca. Paipaj huauqui Felipeca, Iturea, Traconite shuti llactacunatami mandajurca. Shinallata, Lisanias shuti runaca, Abilinia llactatami mandajurca. 2Anás shuti, Caifás shuti mandaj sacerdotecuna mandajui punllacunapimi, Zacariaspaj churi Juanga, jichushca pambapi causajurca. Chaipi causajujpimi Taita Diosca, Juanman rimamurca. 3Chaimandami Juanga, Jordán jatun yacu rijuj muyundi llactacunaman rirca. Chaicunapimi, “cangunapaj juchacunata Dios perdonachunga, juchayuj cashcamanda ninanda llaquirishpa, Diospajman tigrarishpa bautizarichi” nishpa villajurca. 4Profeta Isaías quilcashcapica, cashnami nijun:
“Jichushca pambapi caparij runaca, cashnami nin:
‘Mandaj Diosman ñanda alichipaichiyari.
Paiman, ñangunata alichipaichiyari.
5Pugru pambacunapipash, alpahuan jundachinami canguichi.
Lomacunatapash, allashpa ñanda ruranami canguichi.
Quingu ñangunatapash, alichinami canguichi.
Huagli ñangunatapash, alichinami canguichi.
6Tucui gentecunami, Taita Dios quishpichijta ricunajunga’ ninmi” nijurcami.
7Juan bautizachun shamushca ashtaca gentecunataca cashnami nijurca: “Cangunaca, culebrashna na ali gentecunapaj miraicunamari canguichi. ¿Pita cangunataca, ‘Dios ninanda fiñarishpa llaquichinamandaca pacajunguichillami’ nishpa yachachircayari? 8Cangunaca, tucui shunguhuan ninanda llaquirishcatami, grano fucujshna ricuchina canguichi. Cangunaca, na cangunapaj shungu ucupilla: ‘Abrahammi ñucanchi ñaupa taita’ ninajunachu canguichi. Cangunataca cashnami nini: Taita Diosca, cai rumicunatapash, Abrahambaj huahuacuna cachun tigrachi ushangallami. 9Quirucunapaj sapipica, hachata churashcallami tiyajun. Na ali fucuj tucui quirucunataca, hachahuan fitishpami ninapi shitanga” nircami.
10Shina nijpimi:
“¿Imatata rurana capanchi?” nishpa, gentecunaca tapunajurca.
11Shina tapujpimi Juanga, cashna nirca:
“Jahualla churajunata ishcaita charishpaca, shujtaca na charijman caranami canguichi. Micunata charishpapash, chashnallatami rurana canguichi” nircami.
12Shinallata impuestota japishpa causaj huaquin runacunapash, bautizaringapa shamushpami:
“Ñucanchica, ¿imatata rurana capanchi, Yachachij?” nishpa, Juandaca tapunajurca.
13Shina tapujpimi Juanga, cashna nirca:
“Impuestota japichun mandashcatalla japishpa, na yapalla japinachu canguichi” nirca.
14Shinallata, huaquin macanajuj runacunapash shamushpami:
“Ñucanchica, ¿imatata rurana capanchi?” nishpa, Juandaca tapunajurca.
Shina tapujpimi Juanga cashna nirca:
“Pitapash na imahuambash manllachishpa quichunachu canguichi. Pitapash na yangamanda juchachinachu canguichi. Canguna mashnaguta japinajushpapash, chaihuanllami cushijuna canguichi” nircami.
15Quishpichij shamunata shuyanajuj gentecunaca, Juanda ricushpami: “Caimi Cristo canga” yashpa tucuicuna ricunajurca. 16Juanga, tucuicunamanmi cashna nirca: “Ñucami cangunataca, yacupilla bautizajuni. Ashtahuangarin ñucatapash yali ushaita charijmi shamunga. Ñucaca, Paipaj chaquipi churajushpa huatarishcata pascaitallapash na ushanachu cani. Paimi cangunataca, Jucha Illaj Diospaj Espirituhuan, ninahuambash bautizanga. 17Paica, trigota huairachina palata chaririyajmi shayajun. Chaihuanmi, trillana pambapi jupata agllajshna trigota huairachinga. Shina huairachishpami, granota alichina huasipi trigota alichijshna alichinga. Jupataca, na huañushpa rupajun ninapimi rupachinga” nircami.
18Juanga cai shimicunahuambash, ashtahuan shuj shimicunahuambash alipacha yarichishpami, quishpirinamanda ali villanata gentecunaman villajurca. 19Mandaj Herodesca, paipaj huauqui Felipepaj Herodías shuti huarmihuanmi causajurca. Ashtahuan shuj na alicunatapash rurashpami causajurca. Chaimi Herodestaca, Juanga ninanda na alicachishpa rimajurca. 20Herodesca, chai tucui na alicunata rurashca jahuami Juandaca, prezuna huasipi vichachishpa ashtahuan na alita rurarca.
Jesusta bautizashcamanda
(Mat. 3:13-17; Mar. 1:9-11)
21Tucui gentecuna bautizarinajujpimi, Jesuspash bautizarishpa, Diosta mañajurca. Shina mañajujpimi, jahua pachaca ñapash pascarirca. 22Shina cajpimi, Jucha Illaj Diospaj Espirituca, shuj palomagushnalla Jesuspaj uma jahuaman urai shamurca. Jahua pachamandapash, cashna rimajmi uyarimurca: “Canga, Ñuca juyashca Churigumi cangui. Canmandami, ninanda cushijuni” nijmi uyarimurca.
Jesucristopaj ñaupa taitacunapaj shuticunamanda
(Mat. 1:1-17)
23Quimsa chunga huatatashna charishpami, Jesusca yachachi callarirca. Gentecunaca, “Josepaj churipachami” yashpami Jesustaca ricunajurca. Joseca, Elipaj churimi carca. 24Elica, Matat runapaj churimi carca. Matat runaca, Levipaj churimi carca. Levica, Melqui shuti runapaj churimi carca. Melqui runaca, Jana shuti runapaj churimi carca. Jana shuti runaca, Josepaj churimi carca. 25Joseca, Matatiaspaj churimi carca. Matatiasca, Amospaj churimi carca. Amosca, Nahumbaj churimi carca. Nahumga, Esli runapaj churimi carca. Esli runaca, Nagai shuti runapaj churimi carca. 26Nagai shuti runaca, Maat runapaj churimi carca. Maat runaca, Matatiaspaj churimi carca. Matatiasca, Semei runapaj churimi carca. Semei runaca, Josepaj churimi carca. Joseca, Judá runapaj churimi carca. 27Juda runaca, Joana shuti runapaj churimi carca. Joana shuti runaca, Resa shuti runapaj churimi carca. Resa shuti runaca, Zorobabelpaj churimi carca. Zorobabelca, Salatiel runapaj churimi carca. Salatiel runaca, Neri shuti runapaj churimi carca. 28Neri shuti runaca, Melqui shuti runapaj churimi carca. Melqui shuti runaca, Adi shuti runapaj churimi carca. Adi runaca, Cosam shuti runapaj churimi carca. Cosam shuti runaca, Elmodam runapaj churimi carca. Elmodam runaca, Er shuti runapaj churimi carca. 29Er shuti runaca, Josuepaj churimi carca. Josueca, Eliezerpaj churimi carca. Eliezerca, Jorimbaj churimi carca. Jorim shuti runaca, Matat runapaj churimi carca. 30Matat runaca, Levipaj churimi carca. Levica, Simeonbaj churimi carca. Simeonga, Judapaj churimi carca. Judaca, Josepaj churimi carca. Joseca, Jonán runapaj churimi carca. Jonán runaca, Eliaquim runapaj churimi carca. 31Eliaquim runaca, Melea shuti runapaj churimi carca. Melea shuti runaca, Mainán shuti runapaj churimi carca. Mainán shuti runaca, Matata shuti runapaj churimi carca. Matata shuti runaca, Natanbaj churimi carca. 32Natanga, Davidpaj churimi carca. Davidca, Isaipaj churimi carca. Isaica, Obedpaj churimi carca. Obedca, Booz runapaj churimi carca. Booz runaca, Salmón shuti runapaj churimi carca. Salmón shuti runaca, Naasón shuti runapaj churimi carca. 33Naasón runaca, Aminadabpaj churimi carca. Aminadabca, Aram runapaj churimi carca. Aram shuti runaca, Esrom runapaj churimi carca. Esrom runaca, Fares shuti runapaj churimi carca. Fares shuti runaca, Judá runapaj churimi carca. 34Judá runaca, Jacobpaj churimi carca. Jacobca, Isaacpaj churimi carca. Isaacca, Abrahambaj churimi carca. Abrahamga, Tarepaj churimi carca. Tareca, Nacorpaj churimi carca. 35Nacorca, Serug shuti runapaj churimi carca. Serug runaca, Ragau shuti runapaj churimi carca. Ragau runaca, Peleg shuti runapaj churimi carca. Peleg runaca, Heber shuti runapaj churimi carca. Heber runaca, Sala shuti runapaj churimi carca. 36Sala runaca, Cainán runapaj churimi carca. Cainán runaca, Arfaxad shuti runapaj churimi carca. Arfaxad runaca, Sembaj churimi carca. Semca, Noepaj churimi carca. Noeca, Lamecpaj churimi carca. 37Lamec runaca, Matusalenbaj churimi carca. Matusalenga, Enocpaj churimi carca. Enocca, Jaredpaj churimi carca. Jaredca, Mahalaleelpaj churimi carca. Mahalaleelca, Cainanbaj churimi carca. 38Cainanca, Enospaj churimi carca. Enosca, Setpaj churimi carca. Setca, Adanbaj churimi carca. Adanga, Taita Diospaj churimi carca.
လက်ရှိရွေးချယ်ထားမှု
LUCAS 3: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
