JUAN 1
1
Dios Rimashca Shimimi Aichayuj tucushca
1Callaripica, Dios Rimashca Shimimi ña tiyarca. Chai Rimashca Shimica, Taita Dioshuanmi carca. Chai Rimashca Shimica, Diosllatami carca. 2Callaripica, Paica ñami Dioshuan carca. 3Tucui ima tiyachumbash, Paillatami rurashca, shinallata, tucui imata rurashcapash, Paihuanllata rurashcami tiyajun. 4Paipimi causanaca tiyarca. Chai causaimi gentecunata punchayachij micha carca. 5Chai michami, yana yana tutacunataca punchayachijun. Chai yana yana tutacunaca, michataca na mishai usharcachu. 6Taita Diosca shuj runatami cachamurca, paipaj shutica Juanmi carca. 7Paimi chai michamanda villashpa ricuchingapa shamurca. Chai michataca tucuicuna crichunmi villajurca. 8Juanga na chai michachu carca, ashtahuangarin, paitaca michamanda villachun cachamushcami carca. 9Chai punchayachij michapachami, tucui gentecunata punchayachingapa cai pachaman chayamurca.
10Paica, cai pachapimi carca. Cai pachapash Paillata rurashcami carca. Ashtahuangarin, cai pachapi causajcunaca Paitaca na rijsircachu. 11Paipaj gentecunapajmanmi shamurca. Shina cajpipash, paicunaca na chasquircachu. 12Shinamandami, Paita chasquishpa, Paipaj shutita crijcunaman, Taita Diospaj huahuacuna cachun ushaita cararca. 13Paicunaca, yahuarmanda, aichamanda, runapaj munaimandaca na huacharishcachu. Ashtahuangarin, Diosmandami huacharirca.
14Chai Rimashca Shimimi, runa aichayuj tucushpa ñucanchihuan causajurca. (Taita Diospaj shujlla Churipaj punchapamba ninan ushaihuan cajtami Paitaca ricurcanchi). Paica, ninanda juyaj, napacha llullajmi carca. 15Juanga, Jesusmandami caparishpa cashna nishpa villajurca: “Paimandami cashna nijurcani: ‘Ñucapaj jipa shamujca, ñucapaj pundallatami causajurca. Paica ñucapaj pundami carca’ nircanimi” nishpami villajurca.
16Pai tucuita charishcamandami, tucuicuna japircanchi. Paipaj juyaitaca ashtahuan, ashtahuanmi chasquircanchi. 17Diosca mandashca shimicunataca ñucanchiman yachachichunmi Moisesman curca. Ashtahuangarin, Diospaj juyaipash, na llullaj shimipash, Jesucristomandami shamurca. 18Taita Diostaca pipash napacha ricushcachu. Taita Diospaj Shujlla Churillami, Diosllata cashpa, Dioshuan causajushpa, ñucanchiman rijsichirca.
Bautizaj Juanmi villajushca
(Mat. 3:11-12; Mar. 1:7-8; Luc. 3:15-17)
19Juanmi, paimandallata caitaca villashca. Mandaj judiocunami, Jerusalenmanda sacerdotecunata, levitacunata tapuchun cacharca, paicunaca:
“¿Canga pita cangui?” nishpami tapunajurca.
20Paica, na pacashpa villashpami:
“Ñucaca, na Cristochu cani” nishpa villajurca.
21Paicunaca, cashna nishpami tapunajurca:
“¿Pita cangui? ¿Canga Eliaschu cangui?” nijpimi.
“Na chaichu cani” nirca.
Paicuna cutin tapushpaca:
“¿Dios cachamusha nishca profetachu cangui?” ninajujpimi.
“Na chaichu cani” nishpa tigrachirca.
22Shina nijpica paicunaca:
“¿Shinaca pita canguiyari? Ñucanchita cachamujcunaman villagringapami tapunajunchi, ¿pipachata canguiyari?” ninajurcami.
23Shina nijpimi Juanga:
“Ñucaca, jichushca pambapi caparishpa villaj runami cani. ‘Jatun Diosman ñanda alichipaichi’ nishpa Profeta Isaías villashcashna villajmi cani” nijurca.
24Tapuchun cachajpi rishcacunaca, fariseopurami carca. 25Paicunami Juandaca, cashna nishpa tapunajurca:
“Canga, Cristopash, Eliaspash, Dios cachamushca profetapash na cashpaca ¿imashpata bautizajungui?” nishpami tapunajurca.
26Juanga, cashnami nirca:
“Ñucaca yacupillami bautizajuni. Ashtahuangarin, canguna na rijsishca shuj runagumi cangunapurapi causajun. 27Paica, ñucapaj jipa shamushca cashpapash, ñucapaj pundami causashca. Shinamandami, Paipaj chaquipi churajushpa huatarishcata pascangapallapash na ushana cani” nijurcami.
28Jordán yacu rijuj indi llujshimujman tiyaj, Betábara shuti pueblopimi, caicunaca cashna tucurca. Chaipimi Juanga bautizajurca.
Taita Diospaj Llamagumandami villajun
29Chai cayandi punllami, Jesús paipajman shamujujta ricushpa Juanga cashna nirca:
“Ricuichi, Taita Diospaj Llamaguca caipimi. Paimi, cai pachapi causajcunapaj juchacunataca anchuchinga. 30Paimanda villajushpami, cashna nijurcani: ‘Ñucapaj jipaca, shuj runagumi shamunga. Paica, ñucapaj ñaupariyajmi, Paica ñucapaj pundallatami ña causajurca’ nijurcanimi. 31Paitaca, Dios cachamushca cashcataca na yacharcanichu. Ashtahuangarin, Israelcuna rijsinajuchunmi, yacupi bautizangapa shamurcani” nircami.
32Shinallata Juanga, cashna nishpami villajurca:
“Jahua pachamanda Diospaj Espíritu, palomagushna urai shamushpa, Paipaj umapi tiyarishpa saquirijta ricurcani. 33Ñucapash, Paitaca Dios cachamushca cashcataca na yacharcanichu. Ashtahuangarin, yacupi bautizajuchun ñucata cachamuj Taita Diosmi, cashna nihuarca: ‘Ñucapaj Espíritu urai shamushpa, umapi tiyarijpica, jucha illaj Espirituhuan Pai bautizana cajtami yachangui’ nihuarcami. 34Chaitaca ñucami ricurcani. Shina cajpimi: ‘Caimi, Diospaj Churi’ nishpa villajuni” nircami.
Callari yachajujcunamandami villajun
35Chai cayandi punllami Juanga, paipaj ishcai yachajujcunahuan cutin chaipillata shayajurca. 36Jesús chaita yalijujta ricushpami Juanga:
“Ricuichi, Paimi Taita Dios cachamushca Llamagu” nijurca.
37Shina nijta uyashpami, chai ishcai yachajujcunaca, Jesusta catishpa rinajurca. 38Paicuna catishpa rinajujpi, Jesús tigrarishpa ricushpami:
“¿Imatata mascanguichi?” nirca.
Shina nijpimi paicunaca:
“Rabí, ¿maipita causajungui?” ninajurca.
(Rabí nishpaca: Yachachij nijunmi).
39Shina tapujpimi Jesusca:
“Shamuichi ricunguichi” nirca.
Shina nijpi rishpami, Pai maipi causajujtaca rijsinajurca. Paicunaca chai punllapica ña chishi cajpimi, Jesushuan chaipi saquirirca.
40Chai ishcaipuramanda shujca, Simón Pedropaj huauqui Andresmi carca. Paicunami, Juan chashna villajujta uyashpa, Jesusta catishpa rinajushca carca. 41Paimi, paipaj huauqui Simonda punda tuparishpaca cashna nirca:
“Mesiashuanga ñami tuparircanchi” nircami.
(Mesías nishpaca, Cristo nijunmi).
42Andresca, paipaj huauquita tuparishpaca, Jesuspajmanmi pushamurca. Jesús paita ricushpami, cashna nirca:
“Canga, Jonaspaj churi Simonmi cangui. Cunanmandaca, Cefas shutimi cangui” nircami.
(Cefas nishpaca, Pedro nijunmi).
Felipetapash, Natanaeltapash Jesús cayashcamanda
43Chai cayandi punllami Jesusca, Galilea llactaman ringapa munarca. Felipeta tuparishpaca:
“Ñucata catihuai” nircami.
44Felipeca, Betsaida pueblomandami carca. Andrespash, Pedropash chai pueblomandallatami carca. 45Natanaelca, Felipeta tuparishpami cashna nirca:
“Moisés mandashpa quilcashcapi, profetacuna quilcashcapi nishcashnami tuparishcanchi. Paica: Nazaret pueblomanda Josepaj churi Jesusmi” nijurcami.
46Shina nijpimi Natanaelca cashna nirca:
“Nazaret pueblomandaca, ¿ima alipash llujshingachu?” nijpimi, Felipeca:
“Shamui ricungui” nirca.
47Jesusca, Natanael Paipajman shamujujta ricushpami:
“Ricuichi cai runaca, Israelpacha cashpami, umachinataca na yachan” nijurca.
48Shina nijpimi, Natanaelca:
“¿Ñucataca maipita rijsihuarcangui?” nirca.
Shina nijpimi Jesusca, cashna nishpa tigrachirca:
“Felipepash canda nara jacu nijpillatami, higo yura ucupi tiyajujta candaca ricurcani” nircami.
49Shina nijpimi Natanaelca, cashna nirca:
“Rabí, canga Taita Diospaj Churimi capangui. Canga, Israelcunata Jatun Mandajmi capangui” nijurcami.
50Shina nijpimi Jesusca, cashna nirca:
“Candaca: ‘Higo yura ucupi tiyajujtami ricurcani’ ¿nijpillachu crihuangui? Na caitalla ricunguichu, ashtahuan caitapash yali imata rurajtapash ricunguirami. 51Napacha llullashpami, cangunataca cashna nini: Cunanmandapachami, jahua pacha pascarishcata ricunguichi. Shinallata, Runa Aichayuj tucushca Ñucapaj jahuapi, Taita Diospaj angelcuna jahuaman rinajujta, uraiman shamunajundapashmi ricunguichi” nijurcami.
လက်ရှိရွေးချယ်ထားမှု
JUAN 1: QVI16
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
