ମାଥିଉ 2
2
ଯୀଶୁଙ୍ଗ୍ ହୁଡ଼୍ଦେଙ୍ଗ୍ ପୁରୁବ୍ଦେସ୍ନି ପଣ୍ଡିତାର୍ ୱାତାର୍
1ଯୀଶୁ ଯିହୁଦା ଜିଲ୍ଲାନି ବେତଲିହିମ୍ ସହର୍ତାକେ ଜନମ୍ ଆତାନ୍। ହେପାଦ୍ନା ହେରୋଦ ରାଜା ଯିହୁଦା ଜିଲ୍ଲାତ ସାସନ୍ କିଜି ମାଚାନ୍। କେତ୍ଦିନ୍ ପାଚେ ପୁରୁବ୍ଦେସ୍ନି କେତ୍ଜାଣ୍ ଯଗ୍ ବାର୍ ହୁଡ଼୍ନି ପଣ୍ଡିତାର୍ ଯିରୁଶାଲାମ ସହର୍ତାକେ ୱାତାର୍, ଆରେ ହେୱାର୍ ମାନାୟାରିଙ୍ଗ୍ ୱେନ୍ବାତାର୍, 2“ଯିହୁଦିର୍ନି ରାଜା ଆଦେଙ୍ଗ୍ ଜନମ୍ ଆତି ହିମ୍ଣା ଇମ୍ଣି ବାହାତାକେ ମାନାନ୍? ଇନେସ୍କି ମା ଦେସ୍ତ ତା ଜନମ୍ ଆତି ହୁକା ହତ୍ତାକା ହୁଡ଼୍ଜି ଆପେଙ୍ଗ୍ ଯିରୁଶାଲାମ ସହର୍ତାକେ ହେୱାନିଙ୍ଗ୍ ଜୱାର୍ କିଦେଙ୍ଗ୍ ୱାତାପ୍ନା।
3ଯିହୁଦିର୍ନି ରାଜା ଜନମ୍ ଆତି କାତା ୱେନ୍ଞ୍ଜି ହେରୋଦ ରାଜା ଆରେ ଯିରୁଶାଲାମ ସହର୍ନି କେତେକ୍ ମାନାୟ୍ ୱିଜାକାର୍ ଚିନ୍ତା ଆତାର୍।” 4ହେଦାଙ୍ଗ୍ କାଜିଙ୍ଗ୍ ହେରୋଦ ରାଜା, ଈଶ୍ୱର ହେବାକିନି ମୁଡ଼୍ଦି ପୁଜାରିର୍, ଯିହୁଦି ଦରମ୍ନି ପଣ୍ଡିତାରିଙ୍ଗ୍ ରବେ କୁକ୍ଚି ୱେନ୍ବାତାନ୍, “ଖ୍ରୀଷ୍ଟ ଜନମ୍ ଆନି ବାହାନି କାତା ଈଶ୍ୱର ସାସ୍ତର୍ତାକେ ଇନେସ୍ ଲେକାଆତାତ୍ନା?”
5ହେୱାର୍ ହେୱାନିଙ୍ଗ୍ ୱେଚ୍ଚାର୍, “ଯିହୁଦା ଜିଲ୍ଲାନି ବେତଲିହିମ୍ ସହର୍ତାକେ ରକ୍ଷାକିଦ୍ନାକାନ୍ ଜନମ୍ ଆନାନ୍ ଇଞ୍ଜି ସାସ୍ତର୍ତାକେ ଲେକାଆତାତ୍ନା। ଇନେସ୍କି ଭବିଷ୍ଯତବକ୍ତାର୍ ଲେକିକିତାର୍ନା,
6‘ଏ! ଯିହୁଦା ଜିଲ୍ଲାନି ବେତଲିହିମ୍ ସହର୍ନି ମାନାୟାର୍, ମି ବିତ୍ରେତାଙ୍ଗ୍ ରକାନ୍ ସାସନ୍ କିନାକାର୍ ଆନାଦେର୍।
ହେୱାନ୍ ରକାନ୍ ର ମେଣ୍ଢା ହାରାଇ କିନିଲେକେ ନା ଇସ୍ରାଏଲନି ମାନାୟାରିଙ୍ଗ୍ ହାର୍ଦାଙ୍ଗ୍ ଜାତୁନ୍ ଅନାନ୍।’ ”
7ତାପାଚେ ହେରୋଦ ରାଜା ପୁରୁବ୍ଦେସ୍ନି ପଣ୍ଡିତାରିଙ୍ଗ୍ ଲୁକାମ୍ରେ ହିର୍ବି ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ହେ ହୁକାତିଙ୍ଗ୍ ଏଚେପାଦ୍ନା ହୁଡ଼୍ତାଦେର୍।” ଇନେସ୍କି ହେରୋଦ ରାଜା ହେ ହିମ୍ଣା ଜନମ୍ ଆତି କାତା ପୁଞ୍ଜେଙ୍ଗ୍ ଉପାୟ୍ କିଜି ମାଚାନ୍। 8ଆରେ ହେୱାନ୍ ଯଗ୍ ବାର୍ ହୁଡ଼୍ନି ପଣ୍ଡିତାରିଙ୍ଗ୍ ବେତଲିହିମ୍ ସହର୍ତାକେ ପକ୍ଚି ୱେଚ୍ଚାନ୍, “ଏପେଙ୍ଗ୍ ହାଲ୍ଜି ହେ ହିମ୍ଣାତିଙ୍ଗ୍ ହାର୍ଦାଙ୍ଗ୍ ଦାହାଟ୍, ଆରେ ହେୱାନିଙ୍ଗ୍ ଗାଟାଆତି ପାଚେ ନାବେ ୱାଜି ଏପେଙ୍ଗ୍ ନାଙ୍ଗେଙ୍ଗ୍ ୱେଚ୍ଚାଟ୍। ଇନେସ୍କି ଆନେଙ୍ଗ୍ ପା ହାଲ୍ଜି ତାଙ୍ଗେଙ୍ଗ୍ ପୁଜା କିନାଙ୍ଗ୍।”
9-10ହେବେତାଙ୍ଗ୍ ହେୱାର୍ ରାଜା ବେଣ୍ ୱେନ୍ଞ୍ଜି ହାଚାର୍, ଆରେ ହେୱାର୍ ହାନି ହାଜ୍ଦ ଆଗେ ପୁରୁବ୍ଦେସ୍ତ ହୁଡ଼୍ତି ହୁକାତିଙ୍ଗ୍ ଆରେରଗ ହୁଡ଼୍ତାର୍। ହେପାଦ୍ନା ହେ ହୁକାତିଙ୍ଗ୍ ହୁଡ଼୍ଜି ବେସି ୱାରିୟା ଆତାର୍। ଆରେ ହେ ହୁକା ହେୱାର୍ ଆଗେ-ଆଗେ ଆଜି ହେ ହିମ୍ଣା ମାନି ବାହାତ ଅସାହାଚାତ୍।
11ଆରେ ହେୱାର୍ ଇଲ୍ ବିତ୍ରେ ହାଲ୍ଜି ମେହିଙ୍ଗ୍ ତେହି ମରିୟମ ଡ୍ରକ୍ତାକା ହୁଡ଼୍ତାର୍, ଆରେ ତାଙ୍ଗେଙ୍ଗ୍ ଡାଣ୍ଡାହାରାଣ୍ ମାଗ୍ଜି ପୁଜା କିତାର୍। ଆରେ ଜାର୍-ଜାର୍ ପେଡ଼ିଜେସି ହନା, ଇନେସ୍କି ଇଦାଙ୍ଗ୍ ର ବାନି ବେସି ଦାମ୍ନି ବାସ୍ନା ଆନି ଦୁପ୍ନି ଆରେ ଅହ ଚିକାଣ୍ ଗନ୍ଦରାସ୍ ତାଙ୍ଗେଙ୍ଗ୍ ହିତାର୍। 12ମାତର୍ ଈଶ୍ୱର ହେ ପଣ୍ଡିତାରିଙ୍ଗ୍ ହେରୋଦ ରାଜା ଲାଗାୟ୍ ହାଲ୍ମାଟ୍ ଇଞ୍ଜି କେଚ୍କଣ୍ତ ଆଦେସ୍ ହିତାନ୍। ହେଦାଙ୍ଗ୍ କାଜିଙ୍ଗ୍ ହେୱାର୍ ହେରୋଦ ରାଜା ଲାଗାୟ୍ ହାଲ୍ୱାଦାଙ୍ଗ୍ ଜାର୍-ଜାର୍ ହାଜ୍ଦିଙ୍ଗ୍ ଜାର୍ ଦେସ୍ତ ହାଚାର୍।
ଯୀଶୁଙ୍ଗ୍ ତେହି-ଲାତ୍ରାହି ମିସର୍ ଦେସ୍ତ ଅସାହାଚାର୍
13ପଣ୍ଡିତାର୍ ବେତଲିହିମ୍ ସହର୍ତାଙ୍ଗ୍ ହାଚି ପାଚେ ଈଶ୍ୱରତି ରକାନ୍ ଦୁତ୍ କେଚ୍କଣ୍ତ ଯୋଷେପତିଙ୍ଗ୍ ଚଞ୍ଜିଆଆଜି ୱେଚ୍ଚାନ୍, “ନିଙ୍ଗା, ହିମ୍ଣା ଆରେ ତା ତେହିଙ୍ଗ୍ ଆସ୍ତି ମିସର୍ ଦେସ୍ତ ହାଲାଟ୍। ଆରେ ଏଚେପାଦ୍ନା ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ୱି ପାତେକ୍ ହେବେ ମାନାଟ୍। ଇନେସ୍କି ହେରୋଦ ରାଜା ହେ ହିମ୍ଣାଙ୍ଗ୍ ଅସ୍ତେଙ୍ଗ୍ ଦାହ୍ନାନା।” 14ଲାଗିଙ୍ଗ୍ ଯୋଷେପ ମିକାଲିଙ୍ଗ୍ ନିଙ୍ଗ୍ଞ୍ଜି ହିମ୍ଣାଙ୍ଗ୍ ଆରେ ତା ତେହିଙ୍ଗ୍ ଆସ୍ତି ମିସର୍ ଦେସ୍ତ ହାଞ୍ଜେଙ୍ଗ୍ ହତାର୍, 15ଆରେ ହେୱାର୍ ହେରୋଦ ରାଜା ହାଃନି ପାତେକ୍ ହେବେ ମାଚାର୍। ତା ଭବିଷ୍ଯତବକ୍ତାତାଙ୍ଗ୍ ଇନାକା ୱେଚ୍ଚି ମାଚାର୍, ହେଦାଙ୍ଗ୍ ପୁରା କିଦେଙ୍ଗ୍ ଇୱିଜୁ ଗଟାଆତାତ୍। ମାପୃ ଈଶ୍ୱର ୱେଚ୍ଚାନ୍, “ଆନେଙ୍ଗ୍ ନା ହିମ୍ଣାତିଙ୍ଗ୍ ମିସର୍ ଦେସ୍ତାଙ୍ଗ୍ ହସି ୱାଦେଙ୍ଗ୍ ୱେଚ୍ଚାତାନ୍ନା।”
ହେରୋଦ ରାଜା ବେତଲିହିମ୍ ସହର୍ତାକେ ହିମ୍ଣାକାଙ୍ଗ୍ ଅସ୍ତେଙ୍ଗ୍ ହାଚାନ୍
16ହେପାଦ୍ନା ହେରୋଦ ରାଜା ହୁଡ଼୍ତାନ୍ ଯେ, ପୁରୁବ୍ଦେସ୍ନି ଯଗ୍ ବାର୍ ହୁଡ଼୍ନି ପଣ୍ଡିତାର୍ ହେୱାନିଙ୍ଗ୍ ବକୁୱା କିତାର୍ନା। ହେୱାନ୍ ବେସି ରିସା ଆତାନ୍। ହେ ପଣ୍ଡିତାର୍ତାଙ୍ଗ୍ ହିମ୍ଣା ଜନମ୍ ଆତାକା ପୁନ୍ଞ୍ଜି ମାଚାନ୍। ହେଦାଙ୍ଗ୍ ଦୁଇ ବାର୍ହୁନି ତାରେନ୍ନି କାତା ଆଜି ମାଚିଲେ ହେୱାନ୍ ବେତଲିହିମ୍ ସହର୍ ଆରେ ତା ଲାଗାୟ୍ନି ସହର୍ନି ଦୁଇ ବାର୍ହୁ କି ତା ତାରେନ୍ନି ହିରୁ ହିମ୍ଣାକାଙ୍ଗ୍ ମାର୍ନେ ଅସ୍ତେଙ୍ଗ୍ ଆଦେସ୍ ହିତାନ୍। 17ହେପାଦ୍ନା ଯିରିମିୟ ଭବିଷ୍ଯତବକ୍ତା କାଜିଙ୍ଗ୍ ଇବେଣ୍ ପୁରା ଆତାତ୍,
18“ରାମା ସହର୍ତାକେ ର କାଟ୍ ୱେଚାର୍, ହେବେ ବେସି କାକୁଲ୍ତି ଆଜି ଆଡ଼୍ବାନାକା ୱେଚାର୍। ରାହେଲ୍ ତା ହିମ୍ଣାୱାକ୍ଡ଼ା କାଜିଙ୍ଗ୍ ଆଡ଼୍ବିସ୍ ମାଚାତ୍। ଆରେ ହେୱାର୍ ହିଲୁର୍ ଇଞ୍ଜି ପୁନ୍ଞ୍ଜି ହେଦେଲ୍ ବୁଜାଇକିନି କାତା ପା ମାନିକିୱାଦାଙ୍ଗ୍ ମାଚାତ୍।”
ଯୋଷେପ୍ ଆରେ ମରିୟମ ମିସର୍ ଦେସ୍ତାଙ୍ଗ୍ ନାଜରିତ ସହର୍ତାକେ ୱାତାର୍
19ହେରୋଦ ରାଜା ହାଃତି ପାଚେ ପା, ଯୋଷେପ ମିସର୍ ଦେସ୍ତ ବାହାକିଜି ମାଚାନ୍। ହେପାଦ୍ନା ପା କେଚ୍କଣ୍ତ ମାପୃ ଈଶ୍ୱରତି ରକାନ୍ ଦୁତ୍ ଯୋଷେପତିଙ୍ଗ୍ ଚଞ୍ଜିଆଆଜି ୱେଚ୍ଚାତ୍, 20“ନିଙ୍ଗା, ହିମ୍ଣାଙ୍ଗ୍ ଆରେ ତେହିଙ୍ଗ୍ ଆସ୍ତି ଇସ୍ରାଏଲନି ଦେସ୍ତ ହାଲା। ଇନେସ୍କି ଇମ୍ଣାକାର୍ ହିମ୍ଣାତିଙ୍ଗ୍ ମାର୍ନେ ଅସ୍ତେଙ୍ଗ୍ ଇଚାକିଜି ମାଚାର୍, ହେୱାର୍ ନଙ୍ଗୟ୍ ହାଃତାରେ।” 21ହେବେତାଙ୍ଗ୍ ଯୋଷେପ ନିଙ୍ଗ୍ଞ୍ଜି ହିମ୍ଣା ଆରେ ତା ତେହିଙ୍ଗ୍ ଆସ୍ତି ମିସର୍ ଦେସ୍ତିଙ୍ଗ୍ ପିସ୍ତି ଇସ୍ରାଏଲନି ଦେସ୍ତ ୱାତାର୍।
22ମାତର୍ ହେରୋଦ ରାଜା ହାଃତି ପାଚେ ତା ମାଜି ଆର୍ଖିଲାୟ୍ ଯିହୁଦା ଜିଲ୍ଲାନି ରାଜା ଆତାନ୍ନା ଇଞ୍ଜି ପୁନ୍ଞ୍ଜି ଯୋଷେପ ହେବେ ହାଞ୍ଜେଙ୍ଗ୍ ପାଣ୍ଡ୍ରା ଆତାନ୍। ମାତର୍ ଈଶ୍ୱରତାଙ୍ଗ୍ କେଚ୍କଣ୍ତ ଆଦେସ୍ ପାୟାଆଜି ଯୋଷେପ ଗାଲିଲୀ ଜିଲ୍ଲାତ ହାଚାନ୍। 23ହେୱାର୍ ନାଜରିତ ସହର୍ତାକେ ହାଲ୍ଜି ବାହାକିତାର୍। ହେଲେକେ ଭବିଷ୍ଯତବକ୍ତାର୍ତାଙ୍ଗ୍ ଇ କାତା ପୁରାଆନାତ୍, ହେୱାନ୍ ନାଜରିତିୟ ଇଞ୍ଜି ପୁନିୟାଆନାନ୍।
လက်ရှိရွေးချယ်ထားမှု
ମାଥିଉ 2: PEGNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
