योहान 4
4
सामरिया राज्येमता मुरतळ येसुंक कलियता
1येसु योहानुंकन्ना एक्को मंदिक बापतिस्मा हीसंतोर, योहानुंकन्ना एक्को मंदितुन ओना सिस्युल्क कीसंतोर, इंचि परिसिल्कुंक तेळियता. 2(निजम हूळते, येसु कुद्दु बापतिस्मा हियाकोंदुर, ओना सिस्युल्क बापतिस्मा हियुंदुर.) 3इद पोल्ले सामिंक तेळियतस्के ओर यहुदिया राज्येमतुन होळसि, मर्रा गालिल राज्येम होनालय पेय्सतोर. 4गानि इंदके ओन्क सामरिया#4:4 सामरिया इद उंदि राज्येम पोरोल आंदु. इद राज्येमते मनानोर्कुन यहुदि लोकुल्क सिन्नगा हूळंतुर, ओरा नीळागुडा यहुदिल्क दाटुर. इनना राज्येमताल होनापीता.
5इल्हा येसु सामरिया राज्येमते मनना सुकर इनना सहरते एवतोर. ई सुकर सहर, एनकटा यहुदिल्कुना मातिर दादल याकोब ओना मर्रि योसेपुंक हीता जेगाक दग्गेरा मत्ता. 6अगा याकोबुना कुहि मत्ता. वेल्लेन लक्कुनाल ताकसि वाताहेंका नेरबळसि येसु, आ कुहिता पक्काते उद्तोर. अस्केळ्क पिय्यल आसि मत्ता. 7-8अस्के तिननाहाटीं बतलन्ना तर्रालय येसुना सिस्युल्क नाटेंक होंचि मत्तुर. अदे वेलाते उंदि सामरिया मुरतळ#4:7-8 सामरिया मुरतळ सामरिया एरियाते मनना मुरतटुन सामरि मुरतळ इंतुर. एतुक वाता. अय्ते येसु, “उनालय नाकु इच्चो एर हीम,” इंचि अद मुरतटुन तल्कतोर.
9अस्के अद मुरतळ, “निमे यहुदिन आसिगुडा, उंदि सामरिया मुरतटुन, उनालय एर हीम, इंचेके बल्हा तल्कसंतिन?” इंचि इत्ता. (यहुदिल्क सामरिया लोकुल्कुनतोनि बदे संबंदम इर्रकोंदुर. अदुनहाटीं अद अल्हा इत्ता.) 10अस्के येसु, “ओक्कला निमे, पेनदा वरमतुन आनि उनालय एर हीम इंचि नीकुन तल्कानोर बोर आंदुरो, एरपाट कीसि मत्ते, निमेने कुद्दु नाकुन एर तल्किस मन्नेन, अस्के नना नीकु पिस्वर हियना एर हीसि मन्नेन,” इंचि इत्तोर. 11अस्के आ मुरतळ, “कुहि अय्ते वेल्लेन लोतु मंता महाराज. निहगा एर तोरालय बाल्टिगुडा हिल्ले. इसोंटस्के ई पिस्वर हियना एर नीकु बल्हा दोर्कार? 12माकु ई कुहि मावा मातिर दादल याकोब हीतोर. ई कुहिता एर ओर कुद्दु उनुंदुर, इंका ओना मर्क, एटिं, गोळ्कु-गोदां उनुंदुं. अय्ते निमे ओनकन्ना पेद्दोना?” इंचि पूसकीता. 13अय्ते येसु, “ई एतुन उनना हरेक मनकंक मर्रा तप्पाकोंटा दूपांता. 14गानि नना हियना एतुन बोर अय्ते उंटोरो, ओन्क मर्रा बस्केने दूपायो. नना हीता एर ओनालोप्पो बस्केळ्क ऊरसेके मनना ऊटालेसीं मारियसि, ओन्क बस्केळ्क पिस्सना पिस्वरतुन हिय्यार,” इंचि जवाब हीतोर. 15अय्ते अद मुरतळ, “अल्हा अय्ते अद एर नाकु हीम महाराज! अद एतुन नना उट्टुनित्ते नाकु बस्केने दूपा आयो, नाकु मर्रा बस्केने एर ओयालय इच्चोर लक्कु वायना अव्सरमगुडा मन्नो,” इंचि इत्ता. 16अस्के येसु दान, “होन, होंचि नीवा मुय्दोन केय्सि तरा होन,” इंचि इत्तोर. 17अस्के अद, “नाकु मुय्दो हिल्लोर,” इंचि इत्तस्के येसु, “निमे निजमे वेहतिन! नीकु मुय्दो हिल्लोर,” इंचि इत्तोर. 18पजा येसु, “अद बल्हा इत्ते, नीकु हेय्युर मुय्दुर मत्तुर, निमे इंदके बोनतोनि अय्ते मंचंतिनो ओरगुडा नीवा मुय्दो आयोर. अदुनहाटीं निमे निजम वेहतिन,” इंचि इत्तोर. 19अस्के अद मुरतळ, “महाराज, नीवा पोल्लें केंजसि नाक अय्ते, निमे पेनदा कबुरतोन आंदिन इंचि नाकु तेळियता. 20मावा एनकटा पेद्दाल्क इदे गुट्टापोर्रो मोळ्कुंदुर. गानि मिमेट बारे, मोळ्कना असल जेगा येरुसलेमे आंदु इंतिर,” इंचि अद मुरतळ येसुन इत्ता.
21अस्के येसु दान्क इल्हा वेहतोर: “बाई नाकुन नम्मा! पेनबाबांक मोळ्कनाहाटीं इद गुट्टातगा हिलाकोंटे येरुसलेम सहर होनना अव्सरम हिल्ले, मिमेट बगानना मोळ्का परंतिट, इसोंटा वेला मुन्ने वासेक मंता. 22मिमेट सामरिया राज्येमतोर मीकु तेळियवादान मोळ्कंतिर. गानि मुक्ति यहुदिल्कुनाहेंदाले वासेक मंता. अदुनहाटीं मोमोट यहुदिल्क अय्ते माकु तेळियतदुने मोळ्कंतोम. 23गानि पेनदुन निजम मोळ्कानोर पेनदा सत्तेमतुन एरपाट कीसि ओर पेनदा आत्माते मोळ्कना वेला मुन्ने वासेक मंता. आनि अद वेला एव्से मंतां. बारित्ते इल्हा मोळ्कानोर्कुने पेन मेच्कुंता. 24पेन आत्मा रूपमते मंता. अदुनहाटीं दान मोळ्कानोर अंटोरगुडा आत्माते, सत्तेमते मोळ्कना,” इंचि वेहतोर.
25पजा अद मुरतळ, “किरिस्तु इनना मेसय्याल वासेक मंतोर इंचि नाकु एरपाटे. ओर वातस्के माकु अंटोर्क अन्नि पोल्लें वेहानुर,” इंचि येसुन इत्ता. 26अस्के, “नीतोनि वळ्कानोन, ननाने ओन आंदुन,” इंचि येसु इत्तोर.
27अच्चोटेन अगा ओना सिस्युल्क वातुर. येसु उंदि मुरतळतोनि वळकानद हूळसि ओर्क वेल्ले इचंत्रम आता. अय्नागानि बोरे ओन, “नीकु बतल गावाले? दानतोनि निमे बारि वळ्कसंतिन?” इंचिगुडा इना हिल्लुर.
28अस्के अद मुरतळ अळकातुन अग्गेन होळसि नाटे होंचि लोकुल्कुंक वेहता. 29“इदवेरादाका नना कीतव अन्निना बारेमते वरोर मनकल वेहतोर. ओरे किरिस्तु बारे, मिमेट वासि हुळट!” इंचि नाटेनोर्कुन इत्ता. 30अस्के नाटेनोर नाटुन होळसि येसु मत्ता जेगातगा वातुर.
31अद मुरतळ नाटे होत्तस्के, सिस्युल्क, “गिचचो तिन रब्बी!” इंचि येसुन विनंति कीतुर. 32गानि येसु, “नहगा तिनालय इसंटा तिंडि मंता गदा, अद तिंडिता बारेमते मीकु बतले तेळियो,” इंचि सिस्युल्कुन इत्तोर. 33अस्के सिस्युल्क, “गुरुनाहाटीं बोरन्ना तिनालय बतलन्ना तत्तुरा?” इंचि ओरद-ओरे वळ्ककुनालय दल्गतुर.
34अस्के येसु ओर्क इल्हा वेहतोर: “नाकुन लोहतोना इच्चा मत्ताप ताकमळ, ओर वेहता कबाह्कुन पूरा कियमळ, इदे नावा तिंडि आंद. 35वंजि वीतता पजा, इंका नालुं नेल्क अय्ते वंजि कोताक वांता, इंचि मिमेट इंतिर. गानि नना वेहनद केंजट, कळ्क विच्चि पोलमतेके बेस हुळट, पंटा कोताक वासि मंता. 36पंटा कोय्यानोर बूति दोर्किच्कुंचेक मंतोर आनि बस्केळ्क पिस्सना पिस्वरताहाटीं पलम जमा कीसेक मंतोर. दीनहेंदाल वीततोर, कोय्यानोर इव्वुरगुडा कुसिते कलियसि मना परांतुर. 37वरोर वीतंतोर, इंकावरोर कोय्यंतोर इनना वेसुड इगे निजम आंता. 38बोरो वेरेतोर कस्टपळसि पंडिस्ता पंटातुन कोय्यालय नना मीकुन लोहतन. मिमेट कस्टपळा हिल्लिर, गानि ओर कीता कस्टमता पायदा मीकु दोर्कसंता,” इंचि येसु वेहतोर.
39“नना कीतव अन्निना बारेमते वरोर मनकल नाकु वेहतोर,” इंचि वेहता, आ मुरतटा गवाइतुन केंजसि, अद नाटेना वेल्लेन मंदि सामरिया लोकुल्क, येसुनपोर्रो विस्वासम इरतुर. 40सामरिया लोकुल्क येसुनगा वासि, “निमे महगा मन्नु,” इंचि विनंति कीताहेंके, येसु रोंड रोजकु अगा आगतोर. 41येसु कराहता पोल्लें केंजसि इंका वेल्लेन लोकुल्क ओन विस्वासम कीतुर. 42“सिराप निमे वेहताहेंकेन मोमोट येसुन नम्मा हिल्लोम. इंदके कुद्दु मोमोटे ओना पोल्ले केंजसि, दुनियातोर्कुन पिसागोटना निजम किरिस्तु ईरे आंदुर इंचि मोमोट विस्वासम कीतोम,” इंचि आ लोकुल्क मुरतटुन इत्तुर.
सायाबुना मर्रिन येसु बेस कींतोर
(मत्तयाल 8:5-13; लूकाल 7:1-10)
43रोंड रोजकु आतंका, येसु अगटाल गालिल राज्येमते होत्तोर. 44पेनदा कबुरतोंक ओना सतता देसेमते कदर दोर्को, इंचेके येसु मुन्नेने वेहचि मत्तोर. 45दाटसि होनना पंडुगुनाहाटीं गालिल राज्येमता लोकुल्कगुडा येरुसलेम होंचि मत्तुर. अगा येसु कीतव अन्नि कबाह्कुन ओर हूळतुर. अदुनहाटीं येसु गालिल राज्येमते वातस्के ओर अंटोर येसुन बेस दग्गेरा कीकुत्तुर.
46बद नाटे अय्ते येसु एतुन अंगुर पानकम कीतोर, अदे काना नाटे ओर मर्रा होत्तोर. गालिल राज्येमता कपर्नाहुम इनना नाटे, राजाना हिळु कबळ कियाना वरोर सायाबुना मर्रि बिमार अरसि मत्तोर. 47अय्ते यहुदिया राज्येमताल गालिल राज्येमते येसु वातोर इंचि ओन्क कबुर तेळियताहेंका ओर येसुंक कलियालय होत्तोर. होंचि येसुना काल्कुनपोर्रो अरसि, “नावा मर्रि इरगा बिमार आसि हायनाल आसि मंतोर, निमे ओन बेस कियालय नातोनि ताका,” इंचि विनंति कीतोर. 48अस्के येसु, “चिन्हां, इचंत्रमता कबाह्क हूळवद मिमेट नम्मनोर आयिर!” इंचि ओन इत्तोर.
49आ सायाब, “ना मर्रि हायका मुन्नेन निमे ताका सामि,” इंचि विनंति इत्तोर. 50अस्के, “नीवा मर्रि पिस्संतोर, निमे होन,” इंचि येसु ओन इत्तस्के, ओना पोल्लेतुन नम्मिसि ओर तिरियसि होत्तोर. 51ओर हर्रि पीसि होंचेकेन मत्तोर, नड्डुम हरदेने ओना जीतागाह्क कलियसि, “सायाब, नीवा मर्रि बेस आतोर,” इंचि वेहातुर. 52अस्के “नावा मर्रि बद वेलाक बेस आतोर?” इंचि ओर्कुन पूसकीतोर. “निन्ने पिय्यल उंद एगनेंके ओना एळ्कि रेय्ता सायाब!” इंचि ओर वेहतुर.
53अस्के आ सायाब ओर वेहतद केंजसि, बद वेलाते येसु, “नी मर्रि पिस्संतोर,” इंचि इत्तोरो, अदे वेलाते ओना मर्रि बेस आतोर, इंचि ओन्क तेळियसोत्ता. अदुनहाटीं ओर, ओना लोतोर अंटोर येसुन नम्मुकुत्तुर. 54यहुदियाताल गालिलते वासि येसु कीतद इद रोंडो इचंत्रमायना चिन्हे आंद.
လက်ရှိရွေးချယ်ထားမှု
योहान 4: esg-Deva
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022, Wycliffe Bible Translators, Inc. All rights reserved.
