yuwana 21
21
asa 21
yecu maŋini gi ḏɩrawe ḏeḏi ṯabariya
1na ŋɩno gɩdo yecu aɽu nuaŋinijo calɩmis juŋun mɩna gi ḏɩŋawe ḏeḏi təbaŋiyə; nuaŋini dino. 2simian buṯrus na ṯoma gwun gwan gwəriḏɩnu, na naṯanail gweḏi kana kamɩrɩgen yeḏi jalil, na nyaɽe nyeḏi jebəḏi, na calɩmis juŋun jɩttən jiro kaja jijo ŋɩmaga. 3nal simian buṯrus eicɩno, nyi gwar gwele gi ḏuma ŋwumi. naleicɩno, anaŋa dino ilwele. naltu naləḏi kwu murkab ganu; na gilio kono nate nancɩməṯo gwaŋ gwədi no. 4gwune na galo uɽe na yecu ḏuḏɩni kɩmerɩmer elo, namɩni calɩmis jate jilɩŋiḏi yecu gwiro no. 5nal yecu eicɩno, nyaɽe nyi, nya ləṯi ŋwumi a? nalwɩrlijo ŋuɽuna naleicɩno, awe. 6nuleicɩno, winil car jeḏi ŋwumi gi lɩmere leḏi murkab lun liro ḏiŋir na nyalabuje. na dino nəlɩjiwini nate naləṯi ŋɩma ŋaliŋgwoḏa car no gi gwune ŋwumi ŋwutu. 7na ṯalɩmis ṯeno ḏun ḏaṯi yecu əmɩnyi nuuməḏɩjo buṯrusŋ, nuleicɩno, gwele gwiro gwun gwiro elo. gwune na simian buṯrus ḏiŋɩni gwele gwiro, nukɩɽɩbəne ga giria ge gi gwune gwijiga lɩmuɽino gwerre ki nuəḏi gi ḏɩrawe. 8namɩni calɩmis jun jiro kaja nalwila murkab gwe gwun gwɩti gi gwune late lijo gala gwola ganu kɩməmu elo no, garo yarda ḏuɽi di na luŋa lugwuluḏi car ŋwumi ŋwe. 9na gwune naldəga kwɩnyəm elo, nalaŋu ŋwura ŋweḏi igo ŋwijɩne ŋwumi elo, na gia. 10nal yecu eicɩno, apul ŋwumi kworo ŋwun ŋwumanyalo gwunnɩno. 11na simian buṯrus abo nugwulejo car ga kwɩnyəm jenyeḏo ŋwumi gwe ŋwɩbuḏo, jɩnei na ḏuɽi ṯoḏɩne na ṯəɽɩl, na ŋwumi ŋwijo ŋwutu, namɩni car jate jɩmanḏaḏe no. 12nal yecu eicɩno, wilal nyaʼe, na gwatɩn gwetɩdo gweḏi calɩmis gwun gwunuɽoṯəḏɩjo gwuneicɩno, ŋa gwan əḏi no, gi gwune lilɩŋiḏi gwele gwiro gwun gwiro elo. 13na yecu wila nuape gia nulɩḏəḏə na ŋwumi dino. 14lamon leno liro lun laduji loro ṯəɽɩl lun laŋinijɩle yecu calɩmis juŋun gwune nudiɽo gi ḏaiya.
ŋuɽun ŋun ŋiro gɩdo ŋun ŋuməḏɩjil yecu buṯrusŋ
15gwune nalʼe na yecu eico sɩmian buṯrusŋ no, simian, ŋaɽe ŋeḏi yuna, ŋa gwəmɩnyeni gi liji leno a? nueicɩno, i, gwele gwi, ŋa gwilɩŋiḏi nyi gwəmɩnyaŋa. nueicɩno, iʼi joŋolia jinyi jun joga. 16nuaɽu nuuməḏɩjo mɩna nueicɩno, simian, ŋaɽe ŋeḏi yuna, ŋa gwəmɩnyi a? nueicɩno, i, gwele gwi, ŋa gwilɩŋiḏi nyi ŋwəmɩnyaŋa. nueicɩno, iʼi joŋolia jinyi. 17nuuməḏɩjo gi lamon lun laduji loro ṯəɽɩl nueicɩno, simian, ŋaɽe ŋeḏi yuna, ŋa gwəmɩnyi a? na buṯrus rone gi gwune gwuməḏɩju gi lamon lun laduji loro ṯəɽɩl, ŋa gwəmɩnyi a? nueicɩno, gwele gwi, ŋa gwiiɩŋidi ŋuɽuna wei; ŋa gwilɩŋiḏi muma nyi gwəmɩnyaŋa. na yecu eicɩno, iʼi joŋolia jinyi. 18gwerkwe, gwerkwe ganu, nyi gweicaŋa no, gwune duḏo gwoga ŋa gwaṯɩkaii aŋɩna yuŋa, nawele kaja guŋa kalo gun gibunya gar ganwele, namɩni gwunnɩno naro gwuɽun nawali di ganu duŋa na gwiro kaja gwaŋakaii, na gwaŋagwuloḏa kalo gun gate gibunya gar gwanwele no. 19na ŋu gwar dino kani nuaŋiḏi ḏaiya ḏeḏi buṯrus ḏar ḏaro galakwe ŋwubuḏi eloŋu. gwune nuumə dino nueicɩno, gwujani. 20na buṯrus wɩrla ganu nuaŋu ṯalɩmis ḏun ḏaṯi yecu əmɩnyi nugwujane. na ŋu gwiro gwun gwiḏɩrəḏi yecuŋ gi jabba ganu kaja gun giṯɩlge nueicɩno, gwele gwi, əḏi gwiro gwun gwalḏəḏəŋaŋu? 21gwune na buṯrus aŋu nueico yecuŋ no, gwele gwi, gwiji kweno gwapaŋe? 22na yecu eicɩno, ḏa ŋuɽun ŋi ŋɩmaro ŋu gwajiga kəbe nyi gwaɽuwa, gɩrṯa ŋiro lugwuŋa? gwujani ŋa. 23na ŋiro dino ŋuɽun ŋeno ŋɩmawɩreḏelo gi calɩmis wei ŋun ŋarno ṯalɩmis ṯeno ḏate ḏai no. namɩni yecu gwate gwarno, ŋu gwate gwai no, numɩni arno, ḏa ŋuɽun ŋi ŋɩmaro ŋu gwajiga kəbe nyi gwaɽuwa, ŋɩrṯa ŋiro lugwuŋa?
ŋuɽun ŋun ŋiro gɩdo
24na kweno gwiro ṯalɩmis ḏun ḏɩṯeijo ŋuɽuna ga ŋeno nululi, na ililɩŋiḏi ḏɩteijo ḏuŋun ga ḏiro gwerkwe. 25na ŋuɽun ŋijo ŋutu ŋiro kaja dino ŋun ŋapɩlo yecu; na ḏa ŋulinu wei ŋete ŋete, nyi gwarno galo gate gaŋaje kɩḏilio gutu gan jɩḏam je jun julinu no.
လက်ရှိရွေးချယ်ထားမှု
yuwana 21: OTR1966
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nuba, Otoro New Testament
© British and Foreign Bible Society, 1966.
