yuwana 1

asa 1

ŋuɽun ŋun ŋidərəḏi galo

1uro kili ŋuɽun ŋijo, ŋijil elo gwe, ŋiro elo. 2namɩni ŋuɽun nalɩje elo gwe uro kili. 3ŋɩdi wei ŋigelɩnu ŋu gwe na gwaŋ gwetɩdo gwate gwun gwugelɩnu kaja guŋun no. 4na ḏɩmiḏa ḏijo lugwun na ḏɩmiḏa nuro bure gweḏi liji. 5na bure oɽa galo kirɩm, nate naṯi girɩm ḏami no.

6gwəmɩnyo gwijo gwun gwuwəjo elo gwun gwan yuwana. 7gwuwiḏi gi ḏɩteijo ḏe ga, gwəteije ga bure gwe kani a liji wei əmɩnyi ŋuɽun ŋe ŋuŋun. 8ŋu gwate gwiro bure gwəwei no, namɩni gwuwiḏi gi ḏɩteijo ga bure gwe kweno.

9bure kweno gwiro gwerkwe, gwun gwoɽejo liji galo wei lun lɩwiḏi kɩḏilio. 10ŋu gwijo kɩḏilio, na gɩḏilio gelini ŋu gwe, naṯi liji leḏi gɩḏilio ḏɩme. 11gwuləḏi ŋɩdi ŋuŋun namɩni liji luŋun gwate gwaləmɩnyi no. 12namɩni wei lun ləmɩnyu, nulḏəḏə ŋelɩnya nalro nyaɽe nyeḏi elo, wei lun ləmɩnyu jiri juŋun. 13luŋa late lilɩŋinu ŋuwən ŋe i ŋuɽun ŋe ŋeḏi jiŋɩno i ŋuɽun ŋun ŋɩbunyɩlo gwiji no, namɩni lilɩŋinu ḏi elo.

14na ŋuɽun ro aŋɩnu, naṯilɩje lagəri, nanaŋu ḏoɽeḏa ḏuŋun ḏiro gi ḏoɽeḏa ḏeḏi ŋaɽe ŋetɩdo ŋeḏi baba, ŋenyeḏo ḏiŋiriḏa ganu na ŋuɽun ŋun ŋiro gwerkwe. 15yuwana gwiteijo ga ŋu gwe, nuəri gwula nuarno, kweno gwiro gwun gwuməḏi gwe, ŋu gwun gwar gwila gɩdo lugwi gwinyidara gi gwune, gwijo uro gwerre lugwi. 16na gi ḏenyeḏa ḏuŋun liŋə wei lɩmape ḏiŋiriḏa, na ḏiŋiriḏa ḏilbaḏaice kworo elo. 17gi gwune ŋuɽun ŋun ŋigelɩlo elo ŋɩwiḏi ḏi musa gwe; namɩni ḏiŋiriḏa na ŋuɽun ŋun ŋiro gwerkwe ŋɩwiḏi ḏi yecu kɩrisṯo gwe. 18gwiji gwate gwete gwun manaŋu eloŋu no, ŋaɽe ŋuŋun ŋun ŋiro ŋetido ŋun ŋijo gi jabba ganu jeḏi baba ŋiro ŋun ŋɩmijaŋinijo.

ḏiteijo ga ḏeḏi yuwana mamadan ḏan yecu

mṯ. 3:1-12, mks. 1:7-8, lk. 3:15-17

19na ŋuɽun ŋeno ŋiro ḏɩteijo ga ḏeḏi yuwana. na ḏa liju leḏi urucəlim lɩmawəjo jɩsis na lilawi gwalɽoṯəḏɩjo, naleicɩno, ŋa gwan əḏi? 20nuteije ga nate nuŋiŋiɽini no numɩni arno, nyi gwədu gwan kɩrisṯo no. 21nalmɩni ɽoṯeḏe naleicɩno, namɩni ŋa gwiro aŋe? ŋa gwan iliya a? nuleicɩno, nyi gwədu no. naleicɩno, ŋa gwiro nebi a? nuleicɩno, awe. 22naluməḏɩjo naleicɩno, ŋa gwan əḏi kani analwɩrlijo ŋuɽuna luŋa lun lɩwəjije? ŋɩrṯa ŋiro ŋanalumə ŋan gwulo gwuŋa? 23nuleicɩno, nyi gwiro ŋwal ŋweḏi gwete gwun gwaṯorniḏe galo uro kiḏɩwer, nuarno, ṯuḏɩnil ṯaṯ galo ḏeḏi gwele gwun gwiro elo, gi gwune arne isaia gwun gwiro nebi. 24na lun liwəjo liji lono liro lɩbarɩsi. 25nalɽoṯəḏɩjo naleicɩno, gwudaro gəko naṯababṯaijiḏi ḏa ŋa gwate maro kɩrisṯo, i iliya i nebi no? 26nal yuwana wɩrlijo ŋuɽuna nuleicɩno, nyi gwaṯibabṯaijiḏi ŋau ŋe. gwete gwo gwuḏuḏɩnu kɩlɩgi ganu lagalo gwun gwate gwilɩŋiḏanyalo no, 27gwun gwar gwila gɩdo lugwi, na nyi gwate gwɩdeleḏo gwikədə gɩrna geḏi gɩwɩḏe guŋun no. 28ŋuɽun ŋeno ŋɩwiḏi beṯabra gwun gwijo gi ḏuɽo ganu ḏeḏi urdun, kalo gun gaṯɩn yuwana babṯaijiḏi.

29na giləganu nuaŋu yecuŋ meləḏa lugwun, nuarno, eʼe lrəmə leḏi elo lun loga lun laṯəbiri ŋuɽuna ŋɩki ŋeḏi gɩḏilio. 30gwəwei gwiro gwun gwuməḏi gwe, ŋu gwun gwar gwila gɩdo lugwi gwinyidara gi gwune gwijo uro gwerre lugwi. 31na nyi gwate gwilɩŋiḏi no, namɩni nyi gwuwiḏi nyi babṯaijiḏi ŋau ŋe kani ŋaŋini gi liji leḏi isreiyil. 32na yuwana gwiteijo ga nuarno, nyi gwaŋəḏi gwuɽɩwə gwun gwɩpiḏo pɽul gwugwulu gwiro gi gɩɽiḏir kanyin nujaḏaṯa lugwun. 33na nyi gwate gwilɩŋiḏi no namɩni gwun gwuwəjɩŋi nibabṯaijiḏi ŋau ŋe, nuŋwieicɩno, ŋu gwun gwaŋəḏi gwuɽɩwə gwun gwɩpiḏo pɽul gwugwulu nujaḏaṯa lugwun, gwiro gwun gwibabṯaijiḏi gwuɽɩwə gwe gwun gwɩpiḏo pɽul. 34na nyi gwaŋəḏi, na gwiteijo ga niarno, kweno gwiro ŋaɽe ŋeḏi elo.

calɩmis jeḏi yuwana mamadan na yecu

35na ŋɩno giləganu mɩna yuwana gwuḏuḏɩnəḏelo na calɩmis juŋun jɩttən. 36nuŋalaḏe ḏi yecu gwune wiḏu, nuarno, eʼe lrəmə leḏi elo lun loga. 37na calɩmis juŋun diŋɩni jun jiro jɩttən gwune uməḏu, nalgwujane yecuŋ. 38na yecu wɩrla ganu na gwune nulaŋu gwugwujanɩlo, nuleicɩno, nyalbunyaŋe? naleicɩno, rabbi, ŋuɽun ŋeno ŋarno, mualɩm gwəri, ŋa gwaṯɩje ne? 39nuleicɩno, wilal nyaŋaḏa. nalwila nalaŋaḏa gala gun gijune, nalijaḏaṯa gi lamon lono. galo gijo gɩṯo garo garage. 40na anḏarawus, gwun gwiro megin gweḏi simian buṯrus, gwiro gwete gweḏi calɩmis jun jiro jɩttən jun jiḏiŋɩnu yuwanaŋ nalgwujane yecuŋ. 41na anḏarawus buje gwerre megin gwun gwan simian, nueicɩno, anmabuja gwun gwuwɩrṯi elo, ŋuɽun ŋeno ŋarno, kɩrisṯo. 42nugwuloḏa ḏi yecu. nan yecu ŋalaḏe, nueicɩno, ŋa gwiro simian ŋaɽe ŋeḏi yuwana; ŋa gwaje gwani sapa, jiri ceno na buṯrus jiro jetɩḏo. 43na giləganu na yecu ar gwele jalil, nubuje bilibusŋ, nueicɩno, gwujani. 44na bilibus gweḏi amɩrɩgen yun yan beṯsaiḏa yun yiro amɩrɩgen yeḏi anḏarawus na buṯrus. 45bilibus gwubujo naṯanailŋ nueicɩno, anmabuja ŋu gwun gwuli gwe musa kɩḏam geḏi ŋuɽun ŋun ŋigelijɩlo elo, na nebɩŋa, yecu gweḏi nasɩra gwun gwiro ŋaɽe ŋeḏi yusib. 46na naṯanail eicɩno, ŋɩdi ŋəḏi ŋun ŋiŋir ŋəḏu nasɩra a? na bilibus eicɩno, wila ŋaŋaḏa. 47na yecu aŋu naṯanailŋ nuwila lugwun, nuuməḏəṯə lugwun, eʼe, gwiji gweḏi isreiyil gwerkwe, gwun gwate gwəṯi ḏirḏeijo ganu no. 48na naṯanail eicɩno, ŋa gwilɩŋəḏəṯiŋi ne? na yecu wɩrlijo ŋuɽuna nueicɩno, gwerre bilibus gwate gwimaŋorniḏa no, gwune jaga kwuwɩḏa ganu, nyi gwaŋəḏaŋa. 49na naṯanail wɩrlijo ŋuɽuna nueicɩno, mualɩm gwəri, ŋa gwiro ŋaɽe ŋeḏi elo; ŋa gwiro gwele gweḏi isreiyil. 50na yecu wɩrlijo ŋuɽuna nueicɩno, ŋa gwəmɩnyu gi gwune eicaŋano nyi gwaŋəḏaŋa kwuwɩḏa ganu a? ŋa gwaje gwaŋu ŋɩḏio ŋɩbuṯano kworo kweno. 51nueicɩno, gwerkwe, gwerkwe ganu, nyi gweiceijɩno, nyaŋa laje laŋu kanyinŋ miḏini, na liji leḏi kanyin leḏi elo laṯababubo na lagwugwulo kɩɽelo ŋaɽe ŋeḏi liji.

လက်ရှိရွေးချယ်ထားမှု

yuwana 1: OTR1966

အရောင်မှတ်ချက်

မျှဝေရန်

ကူးယူ