Genese 7
7
Meahaiapo ma haa leipe
1Iehova Noa maeape: “A i ave lalava haela oaria ila iki vevaea ureve pekahavakive, ehovea ara aro ovohae eavape, ma vilakao ve a hiki va mai ehoe haela. 2Maea veveroro la animala lahua lahua a va 7 ila karakive, mea i abu ila; kai maea veveroro aue la animala ve hiru lahua lahua a va orahoka orahoka aeakive, mea i abu ila. 3Akea ve la ori lahua lahua kara, a va 7 ila 7 ila ai pekakive, mea i abu ila; ehovea ereve mere ma meahaiapo hoa ovokake apeakilai. 4Hare 7 karia leiki hoa, ara va lai ihaukive maeakilai, hare 40 i oroa 40 ila, kai ara karikivahaeape la ovokake eharu oaria ara meahaiapo ve oropape ve hai ka leivahaeakilai.” 5Kahara, Iehova arero maeaeape la eharu oaria Noa hovea hovea le leivahaeape.
6Meahaiapo akea ve ma haa eapapo arureape la hoa Noa ve hitolo va 600 ila. 7Noa vevaea ureve pekape; areve akoremari, kai areve uva, kai areve akoremari ve uavila are i hareho pekahavape, ehovea ma haa eapapo. 8Maea veveroro animala kai maea veveroro aue la animala, kai ori oaria, kai meahaiapo hai loalula la eharu oaria kara, 9orahoka orahoka, mea i abu ila, Noa i hoa haroapo pekahavape; Noa Aualari ahilape la oharo hovea hovea. 10Laria leipe, kai hare 7 karia leipe la hoa, meahaiapo ma haa eapapo le arureape.
11Noa ve hitolo 600 la hoa, papare orahokaila ureve, 17 la hare, ahea ma eapapo la ma le vovohoape, kai kaia ve okiape la hapape. 12Lai meahaiapo akea ve ihaupe, hare 40 i oroa 40 ila. 13La hare havahu, Noa, Sema, Hamu i Iapeta ila, Noa ve akoremari la, kai Noa ve uva, kai akoremari ve la uavila ilehoila kara, oaria hareho vevaea ureve pekahavape; 14aeka ere i hareho pekahavape animala lahua lahua oaria, kai boromakau lahua lahua oaria, kai meahaiapo hai loalula la eharu oaria kara, kai akea ve la ori lahua lahua oaria kara, maho ila la eharu oaria. 15Ere Noa i hareho vevaea ureve pekahavape, aivau ve eharu i ovokake leilula eharu oaria ila, orahoka orahoka aivavahaitape. 16Aivavahaitape aivau eharu oaria va mea i abu ila Aualari arero pupu hovea maeape la hovea; Iehova areve vevaea ve okiape le kokaukape.
17Ma haa meahaiapo aeaveape hare 40. Ma eapapo leipe, kai vevaea le murai veape, kai arero meahaiapo akea ve murai veape. 18Ma eapapo meahaiapo roroapai eapapo havahu leipe; vevaea kai ma akea ve murai veape. 19Ma oaria va aheke havahu leivahaeape, kai meahaiapo hai roroapape; kela ehoaha oaria, kaia ve ihau ve, ma le havuopape. 20Ma ve koru leipe kela akea ve 25 feet hovea; kela oaria le roroapai karia leipe. 21Meahaiapo loaloape la aivau eharu oaria le apihaeape, ori, kai boromakau, kai animala, kai hai loalula eharu oaria kara, kai haela oaria kara. 22Overa ura ovokake ve mea hailavavila la haela oaria, meahaiapo apearoape la eharu oaria, apihaeape. 23Kai mea akea ve apearoape la ovokake eharu oaria hai ka le leivahaeape, haela, kai boromakau, kai hai loalula eharu oaria, kai akea ve la ori, ere va meahaiapo akea ve hai ka leivahaeape. Noa hiki ovokake aeaveape, Noa i are i hareho vevaea ureve apearoape la haela. 24Ma va meahaiapo akea ve avaivaia hare 150 hovea.
လက်ရှိရွေးချယ်ထားမှု
Genese 7: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972