Genese 32
32
Iakobo Esau eavakive aupe
1Iakobo elare oki aupe, kai Aualari ve aneru arero koarape; 2Iakobo erero eavape la hoa are maeape: “Ma va Aualari ve hevehe haela!” Laelave are la ita rare Mahanaima rare itavape.
3Iakobo meu haela uku Esau, Seira ve leia, Edoma la ita ve, oharo maeakive paparaehape, 4are erero maria kileape: “E va haelapo Esau maria maeakive, ‘Ave horova haela Iakobo mariave, ara Labana ve leia ve aeaveape aiai ma hoa; 5ara va boromakau, asini, mamoe ve hiru oaria ila, horova haela, i horova marita ila kara; ara kai ma oharo haelapo paraeaive, ehovea areve oropa ve lei veveke leikive’.”
6Meu haela Iakobo ve leia helari ekepe, kai mari maeape: “Ela va ave apoheari Esau ve leia leikila; are i haela 400 ila aro koarakive ekevahaeairo.” 7Iakobo la hoa oaoka lei iki heraho leipe; are i hareho la haela, kai mamoe, nanikosi i kamela ila hiru orahokaila hamureape, 8are iki maria kekelape, “Esau iki hiru aea hai ka la leikilava, hiru aea hukaukilai hovea.”
9Iakobo maeape: “Arave oa Aberahamo i oa Isako ila ve Aualari e, arave Iehova e, a araro maria kimaeape, ‘Ave ita i apavara ila ve leia helari aukive, ara aro lei veveke leikilai’. 10A ave horova haela leipe la ikiheroe eapapo i mai ehoe ila ara va hovea ka, ehovea ara mai kaika ila hiki ma Ioridana mai ve overa kilaupe, kai, ara ka mahau hiru orahokaila la leila. 11Arave apoheari Esau ve mai ve araro hela hareavaki, ara arero oaoka leivila, are elaro oaria hareho haeaki ave, lou i akoremari ila hareho. 12Aka a araro maeape ‘Ara aro lei veveke leikilai; ara ave meavohula ahea ma ve la kekele ve numera hovea leivahaeakilai, la numera eapapo haela kaoaki hovea lei va ka’.”
13Laelave, are la oroa leia avuku uavape, areve eharu uku are Esau ve meru leikive hareape. 14Nanikosi abu 200 ila, nanikosi mea 20 ila, mamoe abu 200 ila, mamoe mea 20 ila, 15amae ila kamela ereve mere ila 30 ila, boromakau abu 40 ila, boromakau mea 10 ila, asini abu 20 ila, kai asini mea 10 ila. 16Are ma eharu areve horova haela ve mai ve aiarape, animala ve hiru lahua lahua ila; are kai areve horova haela maeaeape: “E va arave oropa ve auvahaeaki, kai hiru hiru arai ve lahua lahua kari aukive.” 17Oropa auvahaeaki la haela are maria maeaeape: “Arave akoreapo Esau ero koaraki velavela maria la leikilava, ‘E va leita ve haela? E lahoa aukive ha? Ma animala leita ve ha?’ 18E kavale maeaki, ‘Ma va ave horova haela Iakobo ve eharu, are erero haelapo Esau ve meru hovea paraeaive, are kai elave aire kai ekeve’.” 19Are kai aireaki auvahaeaki haela kara laria maeaeape: “E va Esau koaraki la hoa la oharo hovea hovea maeakive. 20E va aeka maria avahaeakilai, ‘Ave horova haela Iakobo elave aire le ekeve’.” Ehovea are maria kekelape “Ara va oropa paraeaki ma meru ve ara arero kurupaeakilai, kai ara areve oropape aireaki eavaki la hoa, are araro auhohi leikilai.” 21Laelave, meru eharu oropa paparaehape, are havahu la oroa kovo ita hiki aeape.
Iakobo Peniela leia ve la hahari
22La oroa havahu are urai areve uavila orahokaila, horova marita orahokaila, areve akoremari 11 ila, karai Iaboka la oki ve mai ukai paparaehape. 23Are erero mai ukai ve paparaehape, areve eharu oaria kara. 24Iakobo lahua aeape; kahara, haela ae are i hareho hahari ape aiai mea opaki hoa. 25La haela ovohae eavape are Iakobo au heaorapaila, la hoa are Iakobo ve mauki aru ureve koharape; kahara, Iakobo arero hahari leipe la hoa areve mauki la aru haiae le leipe. 26Are la hoa maeape: “Araro paraea, mea opaki maea maea.” Aka Iakobo maeape: “Ara aro paraea ka aiai a araro lei morapaeakive.” 27Are arero maeape: “Ave rare leita ha?” Are maeape: “Iakobo.” 28La hoa are arero maeape: “Ave rare aireaki Iakobo rare itava va ka, a va Iseraela rare itavakilai, ehovea a va Aualari i haela ila hahari lei heaorapape.” 29La hoa Iakobo maeape: “Ave rare hela araro kimaeaki.” Aka are arero maeape: “A va arave rare ve velavela ehovealeve ha?” Kahara, are la hoa arero lei morapaeape. 30Iakobo la ita rare Peniela rare itavape, kai mariape: “Ara Aualari ve oropape ovohae laeavila, aka arave ovokake au havoavakue.” 31Hare pekaki la hoa are Peniela hakurepape; are maea hilau hilau aupe ehovea areve mauki la kakare. 32Laelave la hoa ikiki mahau mauki aru ureve la elele Iseraela haela lalavahaea va ka, ehovea are Iakobo ve mauki aru ve la elele mai paeape.
လက်ရှိရွေးချယ်ထားမှု
Genese 32: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972