Matiye 6
6
Tɔ́ʼɔhɛ̧ sé tûl hí̧ndɔ̂ʼɔ hí̧ fóyári
1«Í ŋgbá tûl a wǎyri ɓá béláké, a í zi ná niŋ péna a Gáŋvbôn, ɓay a njukuri kú kó wǎyri. Tí yá lé, í tí ziŋ kpáʼandɔ̂ʼɔ péna a gel a Bâa wǎyri ka e a nûnalê yá. 2Dáy, gelka mɔ̌, mí kaw hí̧ hɛ̧ hí̧ njuku fóyári lé, mɔ́ zi ná ul tɛ̧̂w ɗambɛl ɓá báŋa njuku foori, ka niŋ a ɓil vûn gɔ́ŋ Gáŋvbôn rá̧ a tûl ŋgborori, ɓay a njukuri kú ɗél kuririy. Katína, mi sa hí̧ wǎyri gbátɓay, kú ziŋ kpáʼandɔ̂ʼɔ péna a kuriri dá. 3Dáy, mɔ̌, mí kaw hí̧ hɛ̧hí̧na hí̧ njuku fóyári lé, ndɔ̂ʼɔ a kpóro, ké zi ná tu hɛ̧ ka ndɔ̂ʼɔ a lâʼa kaw hí̧naké. 4Rá̧lǒo hɛ̧hí̧na a mɔ̌, ké ná ɓá múnáké rá̧ Gáŋvbôn Bâa a mɔ̌, mɛ̌, ka kó hɛ̧ a múnákéy, ké hí̧ mɔ́ kpáʼandɔ̂ʼɔ pénáké.»
Tɔ́ʼɔhɛ̧ sé tûl gɔ́ŋ Gáŋvbôn
(Luk 11:2-4)
5Gelka wǎyri mí kaw gɔ́ŋ Gáŋvbôn lé, í zi ná niŋ ɓá báŋa njuku foori, kú zi ɓay a ew sâa rá̧ a gɔ́ŋ Gáŋvbôn a ɓil vûn gɔ́ŋ Gáŋvbôn rá̧ a gbaŋ ŋgboro, ɓay a njukuri kú kó kuriri. Katína, mi kaw sa hí̧ wǎyri gbátɓay, kú ziŋ kpáʼandɔ̂ʼɔ péna a kuriri dá. 6Dáy a mɔ̌, gelka mɔ̌, mí kaw gɔ́ŋ Gáŋvbôn lé, mɔ́ ri ɓil vûn nâm a mɔ̌, a tu nzáʼaŋgboro ka̧n tûló, a gɔ́ŋ Gáŋvbôn, Bâa a mɔ̌ ka e a gel a múnáké. Rá̧ Gáŋvbôn, Bâa a mɔ̌, mɛ̌ ka kó hɛ̧ a múnáké, ké e hí̧ mɔ́ kpáʼandɔ̂ʼɔ pénáké.
7Gelka wǎyri mí kaw gɔ́ŋ Gáŋvbôn lé, i kɛ̧́ ɓayri táŋ ŋgboroké ɓá báŋa a njukuri ka zi tu Gáŋvbôn nyáy nyá. Kú kɛrɛ ɓá, a tûl kɛ̧́ ɓay ɓá ŋgɛ̧́náké pé Gáŋvbôn e lá vúna a kuriri. 8I mbɛl kuriri yá, ɓayhí̧lé ɗambɛl rá i gɔ́ŋ Gáŋvbôn Bâa wǎyri, ké tí tu hɛ̧, ka i ziy dá. 9Dáy, i kó báŋké, ka i e gɔ́ŋ Gáŋvbôn:
«Bâa a ɓurú ka e a nûnalê,
njuku too, kú tu ɓá mɔ́ kaw ɓá táŋáké,
10a káwa Mbây a mɔ̌ ké gí,
a njuku too ka tísiri, kú niŋ hɛ̧ ka mɔ ziy, ɓá báŋké ka niŋ a nûnalê
11Mɔ́ hí̧ rú a sénɛ́, lâʼa ka ma sɔ̧́na ɓurú,
12Mɔ́ vbá̧buma ɓékéhɛ̧ a ɓurú,
ɓá báŋké ka ɓurú kɔ́, rú e vbá̧buma a ɓékéhɛ̧ a njukuri ka niŋ ɓéké ziŋ rú.
13Mɔ́ zi ná pɔŋ rú lé ɓil ɓékéhɛ̧,
dáy mɔ́ ten rú a ɓil ndɔ̂ʼɔ a Sata̧n.
[Ɓayhí̧lé, káwa Mbây, kpɔ́ŋa, rá̧ hɔ̧́na
too, ɓá a mɔ̌, mbii ka mbii. Amɛn!]»
14«Katína, wǎyri mí vbá̧buma ɓékéhɛ̧ ka njukuri niŋ ziŋ wǎyri, Gáŋvbôn, Bâa a wǎyri ka e a nûnalê, e vbá̧buma hí̧ wǎyri kɔ́. 15Dáy, wǎyri mí zi vbá̧buma ziŋ njukuri ka niŋ ɓékéhɛ̧ ziŋ wǎyri yáy, Gáŋvbôn, Bâa a wǎyri ka e a nûnalê, tí vbá̧buma hí̧ wǎyri yá kɔ́.»
Tɔ́ʼɔhɛ̧ sé tûl sáŋhɛ̧
16«Wǎyri, mí kaw sáŋhɛ̧ lé, í zi ná ɓá mûn a wǎyri tɔ́ʼɔsêe, ɓá báŋa njuku foori. Kú fere nûn a kuriri, ɓay tɔ́ʼɔ hí̧ njukuri ɓá kú kaw sáŋhɛ̧. Katína, mi sa hí̧ wǎyri gbátɓay, kú ziŋ kpáʼandɔ̂ʼɔ péna a kuriri dá. 17Dáy mɔ̌, gelka mɔ kaw sáŋhɛ̧ lé, mɔ́ turu nûn nɔ́ ɓá béláké a fere yámbó nɔ́ tûló, 18rá̧ njukuri kú zi ná tu ɓá, mɔ́ kaw sáŋhɛ̧. Ɓá Gáŋvbôn, Bâa a mɔ̌ ka e a gel a múnáké mbêw yáŋ, pé e túnáké, nǎŋnɔ́, Bâa a mɔ̌ ka kó hɛ̧ a múnáké ka mɔ́ niŋ, e hí̧ mɔ́, kpáʼandɔ̂ʼɔ pénáké.»
Hɛ̧zíŋa a nûnalê
(Luk 12:33-34)
19«Í zi ná mára̧ hɛ̧zíŋa a wǎyri kɔ̧ tísiri nɛ́ ka ndére e ndé rúy, goy e kurúy, ka ríwari e ɗú nzáʼaŋgboro ɓay a ríwáké. 20Nǎŋnɔ́, belɓá, í mára̧ hɛ̧zíŋa a wǎyri kɔ̧ nûnalê, gelka ndére tí ndé rú yá, goy tí kurú yá, ríwari tí ɗú nzáʼaŋgboro ɓay a ríwáké nyáy. 21Ɓayhí̧lé, gel ka hɛ̧zíŋa a mɔ̌ erúy, a goló nɔ́, pé lawɔ́ erú kɔ́y.»
Lámbe a mûn
(Luk 11:34-36)
22«Nûn ɓá lámbe a mûn, dáy nûn nɔ́, mí ná ɓá a béláké, mûn nɔ́ too e a ɓil geltáŋa, 23a nûn nɔ́, mí zi belyáy, mûn nɔ́ too e a ɓil tirí̧ma. Dáy tirí̧maké e ná a̧ní ka geltáŋa ka e ka mûn nɔ́, mí ɓá tirí̧may lé!»
Gáŋvbôn malé lari lé
(Luk 16:13)
24«Njuku hɛʼɛ, ma niŋ péna hí̧ bákáwari sére yá. Ɓayhí̧lé, ké e fɔny njuku mbêw, a zi njuku mbêw. Ké e mbáŋ njuku mbêw, a yáw njuku mbêw. Í zi ma tɔ́ŋ Gáŋvbôn rá̧ lari kɔ́ yá.»
Mbílaw hí̧ Gáŋvbôn
(Luk 12:22-31)
25Ɓaykénɔ́, pé mi sa hí̧ wǎyri ɓá: Law a wǎyri, ké tí ná ɛ́ ɓay sé tûl káwa a wǎyri ɓá, a̧hí̧, i e lâʼaké, malé sé tûl mûn a wǎyri, ɓá gári hí̧, i e rínaké lé? Dáy ndísɛ̌ʼɛ a wǎyri, zi ndé lâʼa yá malé mûn a wǎyri zi ndé gári yá lé? 26Í kó, ndoyri ka zɔ a nûnalêy: Kú zi rú hɛ̧ malé kú lú hɛ̧pay yá, kú zi mára̧ hɛ̧pay kɔ̧ pûl yá, dáy Gáŋvbôn, Bâa a wǎyri ka e a nûnalê, kaw hí̧ kuriri lâʼa dát. Í zi ndé kuriri ka nɛ́rɛ̧ nyá lé? 27A gé a bazeŋ a wǎyri, a ɓil kɛrɛ a mɛ̌ too, ma ta̧m nâm a mɛ̌ kpay sé mbɛl lé?
28«Dáy, ɓayhí̧, i ɛ́ law a wǎyri sé tûl gári rína lé? I kó fúná hoyri, ka lɔŋ a ɓil kpâay, kú zi niŋ péna nyá, a zi sá̧ gári ka̧n mûn a kuriri yá. 29Dáy, a ɓilké nɔ́ too, mbây Salomoŋ a hɛ̧zíŋa a mɛ̌ri̧ too, zi ri gári ka belkóna ɓá báŋa fúná hoy nɔ́rí̧ mbêw yá. 30Gáŋvbôn, mí ɓá gári ri hoyri ka lɔŋ kɔ̧ ɓil kpâa a sénɛ́, típélé lé, kú e fa̧ kuriri kɔ̧ hɔrɛy, pé ma a wǎyri, pé Gáŋvbôn tí ɓá gári ri wǎyri yáy lé! Ɓayhí̧rá̧, mbílaw a wǎyri zi kpú yáy lé! 31Í zi ná ɛ́ law a wǎyri, a i sa ɓá: “A̧hí̧ ná e lâʼaké lé? A̧hí̧ ná e nzónáké lé? Malé gárí hí̧ ná e rínáké lé yá?” 32Ɓayhí̧lé, ɓá njukuri ka zi tu Gáŋvbôn nyáy, pé erú a mára̧ ɛ́ law nɔ́rí̧. Bâa a wǎyri a nûnalê, tu ɓá i zi hɛ̧ nɔ́rí̧. 33Í tí ɛ́ ŋgboro káwa Mbây a Pû a Gáŋvbôn rá̧ káwa a ndáráké a mɛ̌, dalé hɛ̧ nɔ́rí̧ too, ké e hí̧ wǎyri kɔ̧ tûlké. 34Nǎŋnɔ́, i ɛ́ law a wǎyri ɓay a sêe pélé yá, ɓayhí̧lé nâm a pélé e kɛrɛ mûn nɛ́ ka mûn nɛ́. Nâm a sí̧ lé too, ma tɔ́ʼɔsêe a mɛ̌.»
လက်ရှိရွေးချယ်ထားမှု
Matiye 6: pnz
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2023 CABTAL
