Matayo 4
4
YEZU NASIBA, NAROZIBWA SITANI.
1Kumara Omwoyo nigusagara Yezu mw’iswa, aze kurozibwa sitani#4, 1 Yezu akafuha sitani kumurozya, obwo yayenzire kutwoleka omuhanda gwo kwangiraho omuhate w’emyoyo zetu. 2Mbe ka yasibire misana makumi ana n’ebiro makumi ana, narumw’ enzala. 3Aho omuroza namwizaho namugambira ati: Raba oli Mwana wa Mungu, nogire amabale ganu gabe mikate. 4Wenene nasubamo nagira ati: Chandikirwe kiti: Omuntu tatungwa omukate gwonka, nawe buli kigambo ekikuruga mu kanwa ka Mungu. 5Aho isitani nilimusagara mu kikale kitakatifu, nilimuta ha kanoni k’eklezia#4, 5 Ekikale kitakatifu echo ni Yeruzalemu, omwo eklezia y’Abayahudi yaliga eli yo kwesumbyamo kuhereza ebitambo no kulembereza., 6nilimugambira liti: Raba oli Mwana wa Mungu, mbe noyenage ha nsi; kuba chandikirwe kiti: Akakulagirira bamalaika be, bakubature mu ngaro zabo, otasitaza ekigere chawe h’ebale. 7Yezu nalisubiramo ati: Hona chandikirwe kiti: Otarozaga Omukama Mungu wawe. 8Kumara isitani nilimusagara h’ebanga lilehire muno, nilimwoleka engoma zona zo mu nsi n’ikuzo lyazo lyona, 9niligira liti: Nkukuha ebyo byona, okenama nompabudu. 10Aho Yezu naligambira ati: Rugayo, sitani, kuba chandikirwe kiti: Ohabudu Omukama Mungu wawe, nokolera Wenene wenka. 11Hatyo isitali nilimuleka, mbe bamalaika nibeza nibamukolera.
YEZU ALI KAFARNAHUMI.
12Yezu ka yahulire okwo Yohana yabohirwe, nagenda Galilaya, 13naruga mu charo cha Nazareti, naza kutura Kafarnahumi ha chambu, mu mbibi za Zabuloni na Neftali, 14niho ekigambo ch’omulagi Izaiya kihike, echo yagizire ati: 15Ensi ya Zabuloni n’ensi ya Neftali, omuhanda gwa ha chambu, omwambu gwa Yordani, Galilaya y’abasenzi, 16Abantu abatwire mu mwirima, babona olumuli luhango, n’abatwire mu nsi y’ekiminimini ch’olufu bayakirwa olumuri.
YEZU NATANDIKA KWOLEKERERA. — ABAHEMBA BO KUTANDIKA.
17Kurug’olwo Yezu natandika kwolekerera, nagira ati: Mutamw’ebiheno byanu, kuba obukama bwo mw’igulu bwezire hehi.
18Mbe Yezu ka yabaramire ha chambu cha Galilaya, nabona ab’end’emo babili, Simoni, owe bayeta Petro, na Andrea, omutabani wabo, nibanaga enero mu nanza, kuba baliga bali bategi. 19Nabagambira ati: Nimundube, ndabagira mube bategi b’abantu. 20Mbe bonene aho n’aho nibasiga enero zabo, nibamuruba. 21Akiriraho obusyo, nabona ab’end’emo bandi babili, Yakobo, mwende Zebedeyo, na Yohana, omutabani wabo, bali mu bwato na Zebedeyo ise, nibasobora enero zabo, nabayeta. 22Kachwi n’ako nibasiga enero n’ese, nibamuruba.
YEZU NAKOL’AMAHANO.
23Yezu nazongorora muli Galilaya yona, nayolekerera mu masomero gabo#4, 23 Amasomero nigo amazu omwo Abayahudi basumbiraga kulembereza no kusomamo Ebitabo Bitakatifu. Baliga bamanyire kulalika abageni bakumukire kwolekerera abezabo olunaku lwa sabato. nagamba Evanjeli y’obukama, nakiz’endwara n’obusasi bwona mu bantu. 24Enkuma ze nizisugana muli Siriya yona, nibamuletera ab’endwara zona n’ab’obusasi bwona, n’abali n’amasitani, n’abagwi b’ilalu, n’abalema, wenene nabakiza. 25Kai embaga ningi y’abantu nibaruga Galilaya, na Dekapoli, na Yeruzalemu, na Buyahudi, na mu nsi y’engego endi ya Yordani, nibamuruba.
လက်ရှိရွေးချယ်ထားမှု
Matayo 4: KED1946
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
First published in 1946 by the White Fathers. Published online with the permission of the White Fathers.
