Mataayo 6
6
Ameeghi ighoro e kobhatoori abhahabhe
1“Mbe, mumööhërëri! Motaköra ghano Eryobha rekwënda ambërë e bhaato kubha bhabharighi. Aribha moraköra hangʼu, motaakubhöna atuho koru o‑Taata waanyu uno anyi Mwishaaro. 2Mbe, hano okobhatoori abhahabhe, otirondi kubha wiyërëkani kinya chaghughuuti chehaaköra mo‑masinaghooghi, na mo‑chanchëra kubha abhaato bhabhatöghösi. Mahëënë ˆnekabhabhoorera, bhayo mbamariri kubhöna atuho yaabho. 3Amare iye eriibhagha okobhatoori abhahabhe, okubhökö koocho gho kumosi ghotamënya ghano okubhökö gho kwiro ghoghuköra, 4kubha obhotoorereri bhoocho bhubhe ne ekebhisere. Taata waanyu uno akorighi ghano ghaghuköru mo‑kebhisere, naghoghoghongi.
Ameeghi ighoro e ghusabha Eryobha
(Ruuka 11:2–4)
5“Hano moghusabha Eryobha, motabha kinya chaghughuuti, gho kubha ibho mbasiighiri ghusabha Eryobha ino bhiimeeriire, mo‑masinaghooghi, na mo‑chanchëra chino cheheteriine kubha abhaato bhabharighi. Mahëënë ˆnekabhabhoorera, bhayo mbamariri kubhöna atuho yaabho. 6Amare iye hano oghusabha Eryobha, usöhë mo‑kenyumba na wighare orwighe. Oramara usabhe gho Taata waacho uno ataakorighibhu. Niho Taata waanyu uno ahaarighi ghano ghaghuköru mo‑kebhisere, naghoghoghongi.
7“Wiiki, eriibhagha moghusabha kwo Ryobha, motabha moraroghoyaroghoya kinya bhahaaköra bhano bhataakorekumi Eryobha. Ibho mbakwihëëbha kubha mbaghutëghëërëru kwo mangʼana ghaabho amaaru. 8Motabha kinya ibho bhaghuköra, gho kubha Taata waanyu neeche ghano mokwënda koru hano mookubha mokeere komusabha. 9Mbe, inyu musabhe Eryobha morabhugha,
‘Taata wiito uno onyi Mwishaaro,
eriina reecho reghongibhu.
10Obhutëmi bhoocho bhuuche,
amiigha ghaacho ghahikeerane,
hano mo‑se kinya iyo Mwishaaro.
11Otuhë reero amënda ghiito.
12Otwabhërë chasiire chiito,
kinya na niitu bhoose tohaabhaabhëra abhasiire bhiito.
13Wiiki otatusöhi mo‑masaki,
amare ototoori no Omobhisa wuure,
[gho kubha obhutëmi m‑bho bhoocho,
na changuru, no obhokumi obhokoro, koru emiishe ghyose.
Hawubhaabha.]’”
14Yesu akëëndërëra kobhugha, “Aribha mokobhaabhëra abhaghëndi amasari ghaabho, Taata waanyu uno anyi Mwishaaro nakobhaabhëra na niinyu amasari ghaanyu. 15Amare aribha motaakobhaabhëra abhaghëndi amasari ghaabho, Taata waanyu uno anyi Mwishaaro taakobhaabhëra na niinyu amasari ghaanyu.
Ameeghi ighoro e kwiyima ebhiinyakurë
16“Hano mookubha mwiyiimiri ebhiinyakurë, ebhesho bheenyu bhëtëërëki amacheeche kinya chaghughuuti chehaaköra. Ibho mbahaakunya obhosho bhoobho kubha abhaato bharighi kubha mbiyiimiri ebhiinyakurë. Mahëënë eni ˆnekabhabhoorera, bhayo mbamariri kubhöna atuho yaabho. 17Amare iye aribha wiyiimiri ebhiinyakurë, wishaabhe obhosho na uhake amaghuta a‑mutu, 18kubha abhaato bhatamënya kubha wiyiimiri ebhiinyakurë. Taata waanyu uno ataakorighibhu, niwe omwene akumënya. Mbe, Taata waanyu uno akorighi ghano ghaghuköru mo‑kebhisere, naghoghoghongi.
Ameeghi ighoro e bhwame
(Ruuka 12:33–34, 11:34–36, 16:13)
19“Motitoorera agharinga mo‑se ino, gho kubha nekwiröötëra ne ebhebhongi mbeghusari, na abhiibhi mbaghusöha na kwibha. 20Amare mwitoorere agharinga Mwishaaro hano etaakwiröötëra ne ebhebhongi bhetaaghusari, na hano abhiibhi bhataaghusöha na kwibha. 21Ahaghiro hano moghotoora agharinga yaanyu, niho ne emetema gheenyu gheekubha.
22“Amiisho nigho oromore ro mobhere. Mbe, aribha amiisho ghaacho ghaanyi mahöru, omobhere waacho woose nookubha ne emirëngaari. 23Amare aribha amiisho ghaacho ngasarëkiri, omobhere waacho woose nookubha ne ekengʼuuri. Aribha emirëngaari ghino gheenyi moose yaacho ngigharwire na kubha ekengʼuuri, m‑bhe kengʼuuri kiyo n‑ekengʼuuri ghe changuru!
24“Taanyi‑ho omutamishi uno aghotora kuhökëri abhatëmi bhabhere kwo riibhagha rimu, gho kubha nakomosiigha umu na komurëgha owonde, hamu aghöötane na umu na komutaraaha owonde. Motaaghotora korihökëri Eryobha na chambiiri kwo riibhagha rimu!
Ameeghi ighoro e kubha na ahaho
(Ruuka 12:22–31)
25“Mbe, ˆnekabhabhoorera, motanyaakera eriimanya reenyu kubha neke mookurë, hamu neke mookunyo, hamu kubha neke mokobheeka. Kana, obhuhöru bhotaaghokera ebhiinyakurë, no omobhere tooghokera changibho? 26Mumööhërëri ebhinyönyi bhe mwishaaro. Bhetaakwemi, bhetaaghughësa koru ghotindëka ebhiinyakurë mo‑ghitara. Koru hangʼu, Taata waanyu uno anyi Mwishaaro, nakobhiraagheri. Mbe, kana inyu motaanyi no obhwëra ghokera ebhinyönyi bhiyo? 27N‑niwe ghate yaanyu uno aghotora gho kwinyaaki kooche, kwiyëngëra obhuhöru bhooche koru gho sa imu?
28“Ngwake mokwinyaaki ighoro e maghööti? Mumööhërëri ebhibhari bhe mwiteregho kinya bhehaabhari. Bhetaaghuköra omoremo, koru bhetaaghwitumera amaghööti. 29Amare ˆnekabhabhoorera kubha, koru omutëmi Seremaani mo‑bhokumi bhooche bhoose tabheekuru bhoheene kinya ebhibhari bhiyo! 30Mbe, aribha Eryobha ndehaabheeki amanyaaki ghi ibhara koru nangabha ghaanyi‑ho reero na tabhoori ngakurëkëru mo‑mororo, ibheere, nibhu reghuköra retighe kobhabheeki inyu ghokera ebhibhari bhe manyaaki ghayo? Neke abhaato bhano moonyi no obhokumi bhosuuhu?
31“Mbe, motiinyaaki kubha, ‘Neke tookurë?’ hamu ‘Neke tookunyo?’ hamu ‘Neke tokobheeka?’ 32Nekobhugha hangʼu gho kubha, bhoose bhano bhataryeche Eryobha mbahaaköra ghayo ghayo, na Taata waanyu uno anyi Mwishaaro neeche bhoheene kubha mokobhyënda. 33Amare, inyu mutabhare singa obhutëmi bho Ryobha na ghuköra ghano rekwënda ambërë yaache, na aghande ghoose ghayo ndëköbhëëngërëërëri.
34“Mbe, motiinyaaki ighoro e tabhoori gho kubha tabhoori nekwinyaakera eyeene. Orosiko roose ndoonyi na anyaako yaache.
လက်ရှိရွေးချယ်ထားမှု
Mataayo 6: ntk
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022 Wycliffe Bible Translators, Inc. All rights reserved
