Matíe 10
10
Zozíi cie cíecíenyʋa kʋ́gbá sɔ́
(Málɩ́kɩ 3.13‑19; Lúkɩ 6.12‑16)
1Zozíi wle ɔ́ kʋjɩ̀nyʋ̀àà kʋ́gbá sɔ́ɔ́ lé ɔ́ nyɛ́ á pɔ́wa a ká nyumozìzi jɩ́ɩ, a ká bhlábhlágu ya bhlɛ́kanyʋa fɩ́ɛ́ sɔ́ yalɩma. 2Zozíi a cíecíenyʋaá kʋ́gbá sɔ́ɔ́ a ŋnɩ́ lɛ̀: Tagàanɔɔ́ ɔ́mɔ́ ŋwɔ́ɔ Simɔ́ɔ, á wlele sáà mɔ́ Pɩ́ɛ́lɩ lé ɔ nɩ́ayʋ́ Adrée, Zebedée a yʋ́ Zákɩ lé ɔ nɩ́ayʋ́ Záan. 3Filípʋ lé Batelemíi, Tomáa lé lapóo a kʋbhlinyɔɔ́ Matíe, Afée a yʋ́ Zákɩ lé Tadée, 4bhlɩ́ɛ́ a kʋbhlanyɔ Simɔ́ɔ lé Zudáa Sɩkalɩ́ɔ́tʋɔ́ ɔ̀ nà kà lɛ́ Zozíi nyʋa né kʋ́ nyɛ́ a.
Zozíi cíe ɔ cíecíenyʋaá kʋ́gbá sɔ́ɔ́ Lagɔ̀nɔ̀nʋ kʋ́
(Málɩ́kɩ 6.7‑13; Lúkɩ 9.1‑6)
5Zozíi cíe ɔ́ cíecíenyʋaá kʋ́gbá sɔ́ɔ́ Lagɔ̀nɔ̀nʋ kʋ́, á na ká mʋ a, ɔ́ srʋ á mà: «A ná plɩ́ɩ bhlɩ́ɛ́ mnɩ́ Zúfʋnyʋa nɩ́ kʋ a, lé a ná mʋ sáà Samalitɛ́ɛnyʋa a dí a mnɩ́. 6A nɩ mʋ a, a mʋ Izrayɛ́lɩnyʋaá yà tuo bhlábhlɩ́ bhísakʋ́ a gɔ̀. 7A kʋ nyúzɔ kʋ́ lé a pá wɔlɩ́, a cí mà: Lagɔ a Léyibhlɩɛ́ ya amɔ gɔ̀ mɛ́. 8A yalɩma gupuonyʋa, a gala kúdùkuo, a nɩ lé kosugɔ̀bhlànyʋa ká kplɔɔ, a jɩ́ɩ nyumozìzi. Cémʋ́ á nyɛ́ lɛ́ amɔ lé á nɩ́ lɛ́ amɔ lɛ́ mʋ́ yráa a, a nyɛ́ sɩ́tɛ̀ lé a ná yráa nyɔ lɛ́ mʋ́. 9A ná bhá sìkàà, a ná bhá moníi, a ná ŋwʋ́ sáà moníi pɔ́kɩ̀tɩɩ́, 10a ná fa sakɔ́sɩ, a ná fa kóti sɔ́ sɔ́, a ná fa síi, a ná fa zìzìe, mà nyɔ nɩ zrɩ nɔnʋ a, ɔ́ ka lé ɔ ká li. 11A nɩ ŋnɩ dú kʋ́ a, ɛ́ yi náa gékpíduú, dutoyilɛ̀, a yrá, nyɔ nɩ yi amɔ kʋplada bhá a, a ká ɔ dɛ́ kʋ́ pla a. A nɩ pla ʋ́ kʋ́ a, a kʋ bhʋ́alɛ́ àààn lé a ká dú a mnɩ́ wlʋ́. 12A nɩ pla gbó a mnɩ́ a, a pá mɔ̀ɔ a nyʋa yúó, a cí mà: A lɩ́ wɔtɔma kʋ́. 13Gbóó a mnɩ́ a nyʋa nɩ bhli amɔ námasa kʋ́ a, nyúó a pá a, ʋ́ yi a kʋ́ ŋnɩ, mà a nɩ nɩ́ amɔ námasa kʋ́ bhli a, a nyúó yi amɔ kʋ́ yrɩ́bhà! 14A nɩ ŋnɩ dú kʋ́, ɩ́zà a nɩ pla wlʋ a mnɩ́ lé mɔ̀ a nyʋa nɩ nɩ́ amɔ námasa kʋ́ bhli lé a nɩ nɩ́ a cícíwɔlɩ nyúkwlí pʋ a, a wlʋ́ mɔ̀ɔ, mà a nɩ cí mànɩ́ a ká mʋ a, a gbɔ́dɔ̀ ʋ́ a kokokpí jɩ̀ a mʋ́mʋɩɛ́!#10.14 Wɔlɩdrèè lɩ̀à a gba ŋwɔ́ɔ mà cíecíenyʋaá ya bhʋ́anɩ gbóó yà bhʋ́anɩ wlʋɔ́ sɔ́ a gbʋ́ wlʋ́. Wɔlɩ nɩ ŋnɩ yɩ́ mɔ̀ a, ɛ̀ nɩ́ yɩ́ a gbʋ́ ŋwɔ́ɔ. 15Náa srʋɛ sáà yɩ́ lɛ́ amɔ cɩ́cása, mà Lagɔ a tɩ́tɩ́ plɔ yruó kʋ́, wɔlɩ́ɛ́ nà kà ŋnɩ a, ɩ́ yi wɔlɩ́ɛ́ ŋnɩ wá Sɔdɔ́mʋ yà Gɔmɔláa sɔ́ a nyʋa a nɩɛ́ gɔ̀ plɩ́.
Zozíi a kʋjɩ̀nyʋ̀àà yi kalɩmɛ yɛ́
(Málɩ́kɩ 13.9‑13; Lúkɩ 21.12‑17)
16Ná anɩ́, náa cíe amɔ, a yɩbhlɩ saá mà a mnɛ cémʋ́ bhlábhlɩ́ mnɛ lɛ́ klávʋ̀ʋ nyièdɩ a, a ŋwʋ́ a nyoku yɩ́gɔ̀ bɛbɛlɩ bhísakʋ́, lé a bhá sáà diwɔtɩ kpóòkpí bhísakʋ́! 17A mányɩ, mà nyʋa yi amɔ tɩ́tɩ́ ŋwʋ́ dú a cífɩ a drɩ̀, á yi sáà amɔ a zúfʋcɛcɩghlɩ a mnɩ́ sɩ́á ka fa. 18Á yi amɔ gɔ̀mna yà léyuo sɔ́ a dú wleè ná zà, amɔ nà kà kɛ́zɔ̀ yáa ámá bhè nyʋaá à nɩ́ Zúfʋnyʋa ŋwɔ́ɔ a, sɔ́ a ŋwɔ́nɩ́srɩ̀lɛ nɩ. 19Mà a nɩ ŋwʋ́ amɔ tɩ́tɩ́ cífɩ a drɩ̀ a, di ná gbláa amɔ nyú wɔlɩ́ɛ́ a na ká cí a, lé cémʋ́ a na kɩ́ɩ́ cí a zà, mà cémʋ́ a na kɩ́ɩ́ cí a, Lagɔ yi lɛ amɔ mɩ́ neé pá a. 20Amɔ nɩ́ a ká lɛ cí, a tʋ́ Lagɔ a zuzu nà kà lɛ amɔ neé cíi. 21Nɩ́ayúó yi bhlábhla à, tʋ́ yi ɔ yʋ́ sa á, á yio bhlá, yúó yi a tinyʋa yà a nɛ́nyʋa sɔ́ sa à, á yi a bhlá. 22Nyʋa fɩ́ɛ́ yi amɔ mʋ́ gblɩ̀ ná zà, mà ɔ̀ nà kà duo kʋ́ tɛ́ma lé zɔ̀bhɩayruó ká ŋnɩ a, ɔ́ yi ʋ́ neé wlʋ́. 23A nɩ bhli amɔ nyumosa kʋ́ dú a mnɩ́ a, a gú lé a mʋ yígàdàdu a mnɩ́. Mà náa srʋɛ amɔ cícása, a nɩ́ ka Izrayɛ́lɩbhlɩɛ́ a bhlibhlie zɔ̀ bhɩa lé Nyɔɔ́ a Yuwliyʋɔ́ yi yi.
24Sùklúyʋ nɩ́ ɔ másɛ kʋ́ zi lé cóyʋ nɩ́ ɔ kanyɔ kʋ́ zi. 25Sùklúyʋ ka lé ɔ ká ɔ másɛ wlú ŋnɩ lé cóyʋɔ́ ká sáà ɔ kanyɔ wlú ŋnɩ. A nɩ wle gbikanyɔ Bezebúlʋ ŋwɔ́ɔ nyumozìzi a cífɩ a, a yɩbhlɩ saá mà á yi kɛ́zɔ̀ ɔ gbó vláa!
Zozíi a kʋjɩ̀nyɔ nɩ́ gú
(Lúkɩ 12.2‑7)
26Nyɔ a ŋanɩmɛ ná bhlá amɔ mà wɔlɩ́ɛ́ fɩ́ɛ́ ɩ̀ zúzùò a, ɩ́ yi zɔ̀ flʋ, lé wɔlɩ́ɛ́ ɩ̀ nilo koti kʋ́ a, ɩ́ yi yɩbhlɩlɔɔ̀. 27Wɔlɩ́ɛ́ ɩ́ srʋɛ amɔ cúcú a mnɩ́ a, a cíí gàgàzrɩ̀; wɔlɩ́ɛ́ á ŋwúwŋuole amɔ nyúkwlí a, a pɩ́ɩ́ gbányìdi kʋ́. 28A ná gúu nyɩ́kpɔbhlanyʋa, mà a nɩ́ ka a zizi a bhlábhlʋ́ míi. Lagɔ a nɩ gúu, ʋ́mʋ́ kà pɔ́wa, lé ʋ̀ yi míi ʋ̀ yi nyɔ yà ɔ zuzu sɔ́ kosugàlàà à nɩ́ bhɩa kʋ́ a mnɩ́ páà. 29A nɩ́ saá yì mà nyɔ ŋwʋ́ɛ́ nimni sʋsʋ́ʋ́ a sɔ́ pɛ́lʋ́ tòku a múó a zà a? Ɩ nɩ́ pɛ́lʋ́ ka a, sɩ́tɛ̀ ɩ́ kʋ bhè múó nɩ bhli zɔ̀ a, à Tʋ́ Lagɔ yì saá. 30Ɛ̀ nɩ ŋwɔ́ɔ amɔ a, ɔ́ yì a wlú a nyɩ́é a zumole. 31Ŋanɩmɛ ná bhlá amɔ, mà a ka gbʋ́ lé a zi nimni kɔ́kɔ́mnɩ́ kʋ́. 32Ɩ́mɩ́ kà ŋnɩ́ a zà nyɔ nɩ cíi nyʋa fɩ́ɛ́ a klʋ́ mà ná kʋjɩ̀nyɔ ɔ́ ŋwɔ́ɔ a, ná sɛ́fʋɔ́ ɩ́ yi sáà ɩ Tʋ́ɔ́ ɔ̀ kʋ̀ lagɔɔ́ a Ɔ klʋ́ cí mà cícása ná nyɔ kʋ̀ʋ. 33Ɩ́zà nyɔ nɩ cí nyʋa a drɩ̀ mà ɔ nɩ́ mɔ́ɔ yì a, ɩ́ yi sáà ɩ Tʋ́ɔ́ ɔ̀ kʋ lagɔɔ́ a Ɔ drɩ̀ cíi mà nɩ́ sáà mɔ́ yì.
Dʋ̀dʋ kʋ́ a kʋ wɔtɔmalɛɛ́ a zà Zozíi nɩ́ yi
(Lúkɩ 12.51‑53; 14.26‑27)
34A ná bhobho mà náa yi lé Dʋ̀dʋ kʋ́ ká kʋ́ wɔtɔma, nɩ́ Dʋ̀dʋ kʋ́ a kʋ wɔtɔmalɛɛ́ a zà yi, tʋ́ ɩ́ la lé ɩ́ yi. 35Náa yi lé yʋ́ yà ɔ tʋ́ sɔ́ ká mʋ́ dúlo lé ŋnɩ́keyʋ yà ɔ nɛ́ sɔ́ ká mʋ́ dúlo, lé ŋwnɔ́ yà ɔ ŋwʋ́trɔ sɔ́ ká sáà mʋ́ dúlo, 36ɩ́zà a lɔ́lɔ́kpɩnyʋa nà kà yɩ́ à gblɩ̀nyʋa plɩ́.#10.35‑36 A zɛlɩɩ sáà Misée 7.6. 37Nɩ̀ wà ɩ̀ tʋ́ ya ɩ̀ nɛ́ sɔ́ lé nɩ̀ zi mɔ́ɔ kʋ́ a, nɩ́ ná kʋ́jɩ̀jɩ́ɛ́ neé bhɩa, nɩ̀ wà nà mnɩ́ a yʋ́ lé nɩ̀ zi mɔ́ɔ kʋ́ a, nɩ́ sáà ná kʋ́jɩ̀jɩ́ɛ́ neé bhɩa. 38Mɔ̀ nyɔɔ́ nɩ̀ nɩ́ nà kúsu gbɩdɩ̀ lé kà mɔ́ɔ kʋ́ jɩ́ a, nɩ́ ná kʋ́jɩ̀jɩ́ɛ́ neé bhɩa. 39Mɔ̀ nyɔɔ́ ɔ̀ bhá mɔ̀ɔ nà zɩkpa a kʋ bhlalɛ a, á yi mɔ̀ wlɩ wlʋ́, mà ɔ nɩ tɩ ɔ́ zɩkpa ná zà a, ɔ́ yi ʋ́ neé wlʋ́.
Nyɔɔ́ bhli amɔ námasa kʋ́ a, mɔ́ɔ ɔ́ bhli námasa kʋ́
(Málɩ́kɩ 9.41)
40Nyɔ nɩ bhli amɔ námasa kʋ́ a, mɔ́ɔ ɔ́ bhli námasa kʋ́. Lé ɔ̀ nɩ̀ bhli mɔ́ɔ námasa kʋ́ a, nyɔɔ́ ɔ̀ cíe mɔ́ a, ɔ́mɔ́ ɔ́ bhli námasa kʋ́. 41Nyɔɔ́ nɩ̀ bhli Lagɔ a nékʋ́cinyɔ námasa kʋ́ a cémʋ́ á bhlile Lagɔ a nékʋ́cinyɔ kʋ́ a, á yio sɩ́tɛ̀ dàzɩ̀. Lé nyɔɔ́ nɩ̀ bhli nyɔɔ́ kɔ̀ɔ nɩnɩgbɩ srísá námasa a kʋ́ cémʋ́ á ka lé a kɔ́ɔ́ kʋ́ bhli a, á yio sáà sɩ́tɛ̀ dàzɩ̀. 42Náa srʋɛ amɔ cícása, nyɔɔ́ nɩ̀ nyɛ́ yúóó lɩ̀à a nyièdɩ a yʋ́ nyúwɔtʋkɔpʋ mnáàda ná kʋ́jɩ̀jɩ́ɛ́ a ŋnɩ́ mʋ́ a, ɔ́ nɩ dàzɩ̀ɛ̀ nɩ́ ka tuo.»
လက်ရှိရွေးချယ်ထားမှု
Matíe 10: NEY
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© (Active), Wycliffe Bible Translators, Inc. All rights reserved.
