Matie 5

'KÜKËA 'WLU 'TƆGƖSƖƐ

Zozii cɩa Laagɔɔ' 'nyupälɩɩ' yëkuu' wälɩ

(Makö 3.3; Lukö 6.20‑23)

1Zozii ni bhɛ lä ‑jlü 'kädaa 'yi nä, kɔ gblää‑ 'sää 'kükë 'wlu, 'nɩ ɔ yi sä kʋ. 'Nɩ ɔɔ' 'kʋgënyʋa yio yëku 'jloo 2'nɩ ɔ yiwa cɩalɩ 'kʋ cie, ɔ lä

3‑Wa plöö‑ lä 'wugɔɔ 'mnö ŋäzönyʋä nä, wa yä 'pʋ!

Laagɔɔ' 'Leyiduu ‑glö yɩ waa' lʋʋ.

4‑Wa tu lä nä, wa yä 'pʋ!

Laagɔ yiwa 'yii sɩɔ.

5‑Wa nää‑ lä plɛkʋ nä, wa yä 'pʋ!

Laagɔɔ' ‑dʋdʋʋ ‑ʋ yi lä nä,

Wamää‑ 'gʋʋ lä jaa 'kʋ lä lüü!

6‑Lʋa 'yigëgbɩɩ' nʋtʋ bhlä lä nynä ‑gbugbe ‑yä 'mnätʋ 'sɔ nä, wa yä 'pʋ!

Sä wa ylä lä nä, Laagɔ yiwa sɔɔ 'nyɛ.

7‑Wa ‑kä lä ŋäzöplɛ nä, wa yä 'pʋ!

Laagɔ yiwa ŋäzö yibhë.

8‑Wanö pleyii‑ ‑kplɔ lä wɩa nä, wa yä 'pʋ!

Wa yi Laagɔ 'yi 'ni.

9‑Wa gbä lä 'nɩ 'kʋ wɔtɔlɩ kʋ lä nyɩkpa pää' nä, wa yä 'pʋ!

Laagɔ yiwa ʋʋ' 'yuë laa.

10‑Lʋa wa klä lä nyenyisä 'yigëgbɩɩ' ‑za nä, wa yä 'pʋ!

Laagɔɔ' 'Leyiduu plöö‑ yɩ waa' lʋʋ.

11Anyɩ nä, nyɩkpa ka'anyɩ 'bhɩsɛ, 'nɩ wa ka'anyɩ 'sɩɩ nyenyisä klä, 'nɩ wa ka'anyɩ ‑kpläkplösä yëku 'mʋ sää 'naa 'ŋnöö ‑za nä, a yä 'pʋ!

12Nä, a nʋ ‑pʋpɛ ‑yä a kään ‑jäkä pleyii ‑mä, anyɩa' bɔɔpälɩ 'kädɩ ‑kʋ ‑mɔɔ Laagɔ yëku. 'Plɔfɛtɩnyʋa 'fɩɩn ‑wa ‑kʋ bhlä tɛɛ nä, sɔɔ ‑säkä ‑säkä wa ‑klʋwa lä nyenyisä.

Zozii' 'kʋgënyɔ plöö‑ ‑dʋdʋʋ' glü ɩyä 'ylʋzɔɔ' zëlü

13Anyɩ nä, anyɩ‑ plöö‑ lä ‑mää 'ylʋzɔɔ' glü. Glü kä nyɔnyɔɔ' ‑bhɩä nä, säsä wa yii bhä nʋ 'nɩ wa yii bhä bʋkʋ mɛnɔɔ' 'ŋʋʋ? Ɩɩ' yɩɔ lʋʋ 'kʋ ‑ŋwa nä, kwa jɛnɩ jlukʋ 'nɩ 'plöplönyʋä nämnönɩ 'kʋ. 14Anyɩ‑ plöö‑ lä 'ylʋzɔɔ' zëlü. 'Duu lʋʋ wa 'slää‑ lä 'kükë 'wlu nä, ʋʋ' ‑lä 'kɔɔn 'kʋ zizio. 15'Nɩ 'näpɛ wa kɛ 'yi döö‑ nä, waa' 'gbie ‑wʋ ‑takwë 'wlu, ‑mä zëkpë 'kʋ wa ŋʋɛ 'nɩ ɛ ŋänɩä gbëë' nyɩkpaa' 'fɩɩn 'kʋ. 16Nä, anyɩa' zëlüü, ɩ ŋänɩä 'sɔɔ nyɩkpa 'kʋ! Ɩmɩ 'mnö wa 'kä lä anyɩa' 'nägägbɩɩ 'yi 'nii ‑yä wa 'kä lä a 'Bä Laagɔ 'ŋnu fään.

Zozii cii‑ Laagɔɔ' ‑Jlämaa yëkuu' wälɩ

17A 'nä bhobho ‑lä nynä ‑mä Moyizöö' ‑Jlämaa ‑yä 'Plɔfɛtɩnyʋa' ciciwälɩɩ, kä n ‑yi ‑yä n 'kɩ ‑lɔɔ ‑sä. Nn' ‑wʋ cii‑ nynä n 'kɩ ‑lɔɔ ‑sä ‑mä, ɩ 'kä glää nä, 'ɩzä n ‑yi lä. 18‑Nʋawlɛɛ 'mnö, n sonö'anyɩ nynä ‑mä, 'tänyɩɩ 'fɩɩn 'mnö ‑laagɔ ‑yä ‑dʋdʋ 'sɔ yi lä kʋ nä, Laagɔɔ' ‑Jlämaa' ‑lä 'kɔɔn 'pɛ 'kʋ ‑bha. Aa' ‑lä 'sää 'näböyilɛɛ 'kʋ ‑bha. Sɔɔ ɩ 'kä lä kʋ ‑aaa, ‑yä wälɩɩ 'fɩɩn‑ ‑jɩjlɔɔ lä nä, ɩ 'kä glää. 19Nyɩkpɔɔ' lɔɔ ‑ɔ gä ‑Jlämaa nëëdëë' ‑jlämö 'tɩkɩɩlɛɛ 'titi 'klʋkpä ‑sä nä, 'nɩ ‑ɔ gä ɔ ‑liesɩ ‑soo nynä ‑mä wa nʋ ɔmɔ 'bhisäkʋ nä, ‑mɔɔ Laagɔɔ' 'Leyiduu 'mnö nä, ‑lɔɔ' nyɩkpɔɔ nyɩkpa 'tɩkɩɩlɛɛ wa 'kɔ laa. 'Ɩzä ‑ɔ yi lä ‑Jlämaa 'fɩɩn 'klʋkpää' 'ŋʋ, 'nɩ ‑ɔ yia lä 'sɩɩ cɩa nä, ‑mɔɔ Laagɔɔ' 'Leyiduu 'mnö nä, ɔmɔ wa 'kä lä nyɩkpa 'kädɔ laa. 20Kä n mʋ'anyɩ yɩ soo ‑kää nynä ‑mä, ‑Jlämöcɩanyʋa ‑yä Falizɩɛnyʋaa' 'yigëgbɩɩ, anyɩa' 'yigëgbɩɩ 'nɩɩ 'kʋ ‑zi nä, aa' ‑lä 'kɔɔn Laagɔɔ' 'Leyiduu 'mnö plä.

Gbʋgblɛ ‑yä cielɩɩ' yëkuu' wälɩ

21A nuu‑ nynä ‑mä, wlä kä Moyizöö' ‑Jlämaa soo bhä ‑a 'bäsɩ nynä ‑naa 'bhlä ‑lä ‑n ‑lie.#5.21 Ɩ bha 'Nämʋ 20.13; Detlo 5.17. Nyɩkpɔ kä ɔ ‑lie bhlää‑ nä, ɩ ‑ŋwa 'kʋ nynä ‑mä wa kunöɔ tʋ 'zuzu dëlü. 22‑Mä ‑amʋ kä n mʋ'anyɩ yɩ soo ‑kää nynä nyɩkpɔ ‑kä ɔ ‑liee' ‑za gbʋgblɛ pleyii ‑kä nä, ‑lɔɔ' nyɩkpɔɔ wa kunöɔ 'zuzu dëlü tʋ. 'Nɩ nyɩkpɔ kä 'sɩɩ ɔ bheli 'bhɩsɛ‑ nynä ‑naa 'fiee nä, ‑lɔɔ' nyɩkpɔɔ, ɩ ‑ŋwa 'kʋ nynä wa kunöɔ 'Zufʋnyʋaa' 'Tütüplä‑jɛnyɩɛ yëku tʋ ‑yä wa 'kɔ gbäylö ‑sä. 'Nɩ nyɩkpɔ kä 'sɩɩ ɔ bheli ‑soo nynä ‑mä, dëbënyɔ‑ nä, ‑lɔɔ' nyɩkpɔɔ, ɩ ‑ŋwa bhä 'kʋ nynä wa 'pɔɔ 'Dëvloo' ‑Kosu ‑düdëa 'mnö. 23'Nɩ Zozii yiwa bʋkʋ soo, ɔ lä ‑n gä cii‑ nynä ‑mä ‑n 'gä Laagɔɔ' bʋbɔda mʋ ‑yä, ‑n 'gä bʋbɔ bʋbɔlʋʋ Laagɔ 'nyɛ nä, ‑n gä ‑lʋʋ fädä ‑kʋ 'nɩ ‑n gä ‑luë nynä ‑mä ‑n bheli ‑kä ‑naa wälɩ 'mnö nä, 24‑lʋʋ ‑n fä bhlä nä, ‑n tu ‑lɔɔ bʋbɔda, ɩyä ‑n 'ylɩbhɔ ‑n bheli yëku ‑yä ‑n ‑yɔsɔ 'nunu 'fɩa. ‑N ‑yɔsɔ kä yɩ 'nunu‑ nä, ‑naa ‑lʋʋ ‑n fä bhlä bʋbɔlɩɩ' ‑za nä, ‑lɔɔ ‑tɛɛ ‑n nä ‑n fʋʋ. 25Nyɩkpɔ kä‑ä 'zuzu dëlü tʋ ‑kuu nä, 'tänyɩɩ ɔ ‑yä ‑mɔɔ 'sɔ ‑kʋ lä ‑mɔɔ mʋdä nä, ‑n nʋ saa 'fɩɩn ‑yä ‑n ‑yɔsɔ 'kä 'mʋ 'nunu ‑yä ɔɔ' kä‑ä ‑kä 'zuzu dëlü fä, ɩyä 'zuzuo ‑mä 'sɩɩ, ɔɔ' kä‑ä ‑kä ‑jɩɩ gbëë' 'sʋjaa kuu nynä wa 'ŋʋ‑ʋ ‑jɩɩ'. 26‑Nʋawlɛɛ 'mnö, n sonö‑ö nynä ‑mä, ‑n 'nö sɔɔ ‑nʋ 'nɩ kwa kä‑ä ‑jɩɩ' paa‑ nä, ‑n yi ‑mɔɔ ‑jɩɩ kʋ 'nɩ ‑n yi ‑lɔɔ' dluu plʋʋdä kʋ ‑aaa, 'nɩ ‑pikinii' ‑lä ‑mɔɔ too.

Wluylälɩ ‑yä ŋnʋ‑ylälɩɩ' yëkuu wälɩ

27A nuu‑ 'sɩɩ nynä ‑mä kä Moyizöö' ‑Jlämaa cii‑ nynä ‑Naa 'ylä ‑lä ‑n ‑liee' 'ŋnɔ, ɩyä ‑naa 'ylä ‑lä ‑n ‑liee' 'wli.#5.27 Ɩ bha 'Nämʋ 20.14; Detlo 5.18. 28‑Mä ‑amʋ nä, kä n mʋ'anyɩ soo ‑kää nynä ‑mä, nyɩkpɔɔ' lɔɔ‑ wloo lä 'ŋnɔ, 'nɩ ‑ɔ ci lä ɔɔ' pleyii nynä ‑mä, 'ŋnɔnɔ n yio 'ylä nä, ‑lɔɔ nyɩkpɔɔ, ɔ ‑yä wɛzä 'ŋnɔɔ 'ylä ‑mɔɔ ɔɔ' pleyii. 29‑Naa lüüklä‑yie kä gbä 'nɩ ‑n gä nyenyii' bhlüü nä, ‑n ‑sɛɛ ‑mɔɔ! ‑N ‑sɛɛ ‑mɔɔ ‑yä ‑n 'pɛɛ 'klä fɛɛn! Sä ‑n 'gä 'bhë 'kʋ kʋ ‑yä ‑n 'gä ŋnäŋä ‑kosu ‑düdëa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑naa 'yɛkɛɛ, ɛmɛɛ‑ ‑lä ‑bha 'pɛlʋ 'kʋ ‑yä ʋ too, ɩyä ‑n 'gä ‑lɔɔ nëë' ‑bha. 30‑Naa lüüklä ‑klɔgba kä gbä 'nɩ ‑n gä nyenyii' bhlüü nä, ‑n ‑döa 'kʋ ‑yä 'paa 'klä fɛɛn! Sä ‑n gä 'bhë 'kʋ kʋ ‑yä ‑n 'gä ŋnäŋä ‑kosuu' ‑düdëa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑naa 'yɛkɛɛ, ɛmɛɛ‑ ‑lä ‑bha 'pɛlʋ 'kʋ ‑yä ʋ too, ɩyä ‑n 'gä ‑lɔɔ nëë' ‑bha.

'Ŋnɔ ‑yä ɔɔ' 'wli 'sɔɔ 'mʋ ‑bhabhalɩɩ' yëkuu' wälɩ

(Matie 19.9; Makö 10.4‑5,10‑12; Lukö 16.18)

31A nuu‑ 'sɩɩ nynä ‑mä, Moyizöö' ‑Jlämaa lä Nyɩkpɔ kä cii‑ nynä ɔ 'kä ɔ 'ŋnɔ cɛɛ nä, ɔ gbɩɔ 'bɔɔgʋ 'kʋ nynä ɔɔ' 'ylɔɔ yɩɔ.#5.31 Ɩ bha Detlo 24.1. 32‑Mä ‑amʋ nä, kä n mʋ'anyɩ yɩ soo ‑kää nynä ‑mä nyɩkpɔ, ɔ 'ŋnɔ 'nö 'wlie 'ylää 'nɩ ɔ kɔ cɛɛ‑ nä, ‑lɔɔ' nyɩkpɔɔ kɔ 'kä lä gbä ‑yä ɔ 'ŋnɔ 'kä wluyläŋnɔ 'plö. 'Nɩ nyɩkpɔ kä 'sɩɩ 'ŋnɔ lɔɔ ɔ ‑nyoto tlüü‑ lä nä nöö‑ nä, ‑lɔɔ' nyɩkpɔɔ yä 'sɩɩ 'ŋnɔ 'ylä.

Zlügolɩɩ' yëkuu' ‑dɔɔ

33A nuu‑ 'sɩɩ nynä kä ‑Jlämaa ‑soo ‑a tɩtɩä nynä ‑mä, nyɩkpɔɔ' ci ‑lä nynä ‑mä n 'sɔlɩ ‑mä n yi ‑nʋnʋ nʋ! 'Nɩ ‑lɔɔ' nyɩkpɔɔ 'kä bʋkʋ ci nynä ‑mä, ‑ɔ! n cii‑ bhä ‑mä nn' nʋʋ yɩɔ! Nyɩkpɔ kä Laagɔ dëlü cii‑ nynä ‑mä, n yi ‑nʋnʋ nʋ nä, ‑lɔɔ' ‑lʋʋ ɔ nʋʋ!#5.33 Ɩ bha Levi 19.12; 'Nɔblʋ 30.3; Detlo 23.22‑24.

34‑Mä ‑amʋ n mʋ'anyɩ yɩ soo ‑kää nynä aa' zlügo ‑lä 'kwläkwlä! Aa' zlügo ‑lä 'nyukpɔ‑laagɔnʋ 'mʋ! ‑Ɔnöza bhää? 'Nyukpɔ‑laagɔɔ 'mʋʋ‑ plöö‑ lä ‑a 'Bä Laagɔɔ' 'Leyi‑këkpëa. 35Aa' zlügo ‑lä 'sɩɩ gbämnä‑dʋdʋʋ'! ‑Ɔnöza bhää? ‑Dʋdʋnʋ nä, ʋmʋ ‑a 'Bä Laagɔ gbɛɛ lä ʋʋ' ‑kokokpüü 'kʋ. Aa' zlügo ‑lä 'sɩɩ Zolizalɛmʋ‑duu' 'ŋnöö 'mnö. ‑Ɔnöza bhää? Zolizalɛmʋ‑duu 'mʋʋ‑ plöö‑ lä 'Loyo 'kädɔɔ' 'duu. 36'Nɩ ‑naa zlügo ‑lä 'sɩɩ ‑naa 'wluu 'mö! ‑Ɔnöza bhää? ‑Naa 'wluu nyɩɩye ‑bhlo 'coo, ‑nn ‑lä mii 'nɩ ‑n 'gɛ pɔɔmä, 'nɩ ‑nn ‑lä 'sɩɩ mii 'nɩ ‑n 'gɛ kpëmä. 37A kä wälɩ nëë' ‑sä, 'nɩ a kä cii‑ nynä ‑ɛɛɛ! nä, anyɩa' ‑ɛɛɛ 'plö ‑ɛɛɛ. 'Ɩzä ka kä cii‑ nynä yio! nä, anyɩa' yio 'plö yio. A kɩ yɩ 'klë 'kʋ pään nä, ‑lɔɔ' 'klëa 'Dëvlo nëë' a bha ylä.

Kpäsälɩɩ' yëkuu' wälɩ

(Lukö 6.29‑30)

38A nuu‑ 'sɩɩ nynä kɩ cio‑ nynä ‑mä, ‑n ‑lie kä‑ä 'yii ‑wlä nä, ‑n wlä 'sɩɩ ɔɔ' ‑lɛɛ! Ɔ kä‑ä gleeye nëë' ‑sä nä, ‑n ‑sɔɔ 'sɩɩ gleeye nëë'!#5.38 Ɩ bha 'Nämʋ 21.24; Levi 24.20; Detlo 19.21.

39‑Mä ‑amʋ nä, kä mʋ'anyɩ yɩ soo ‑kää nynä nyɩkpɔ 'kanyɩ nyenyi ‑nʋ nä, a 'nä ‑sä ‑lä kpä. Nyɩkpɔ kä‑ä lüüklä‑nyukluu' 'kpeye paa‑ nä, ‑n tlɔɔ 'sɩɩ ‑mɔɔ' 'nyukluu ‑yä ɔ 'pʋʋ 'kpeye!

40Nyɩkpɔ kä cii‑ nynä ‑mä ɔ 'kä‑ä tʋ kuu ‑yä, ɔ 'kä‑ä ‑naa 'kotu ‑sä nä, ‑n ‑tanöɔ 'yi ‑yä ɔ 'bhlü 'sɩɩ ‑naa gbëbie‑lokwie 'kʋ! 41Nyɩkpɔ kä‑ä 'fɩɩ ‑klää nynä ‑mä ‑n ‑yɔsɔ bhlü ‑blɔɔ' kilooyee' ‑blɔklë nä, ‑n ‑yɔsɔ bhlü kilooyuë 'sɔɔ ‑blɔ! 42‑Ɔ zlää‑ä lä nä, ‑n 'nyɩɔ! Nyɩkpɔ kä‑ä ‑soo nynä ‑mä ‑n gblɔɔ nä, ‑n gblɔɔ ‑mä ‑naa sɩɔ ‑lä!

‑N wamä ‑naa ‑zɔbhlɛgbänyɔ

(Lukö 6.27‑28,32‑36)

43A nuu‑ nynä ‑mä, kɩ cio‑ nynä ‑n wamä ‑n ‑lie#5.43 Ɩ bha Levi 19.18. ‑mä ‑naa ‑zɔbhlɛgbänyɔ nä, ‑n zɔbhlɛmänöɔ. 44‑Mä ‑amʋ kä n sonö'anyɩ lä nynä ‑mä, a wamä anyɩa' ‑zɔbhlɛgbänyʋä! ‑Wa ŋʋ'anyɩ lä 'kwlɩkabhɩää' nä, a 'pʋwa 'nyu ‑mä 45a kä 'sɔɔ nʋ nä, 'Bäɔ ‑ɔ ‑kʋ lä ‑mɔɔ Laagɔɔ' nä, ‑lɔɔ a 'kä lä ɔɔ' 'yuë 'plö. ‑Ɔnöza bhää? 'Bäɔ nä, gbenyenyinyʋa ‑yä 'nää nʋnyʋa 'sɔ nä, kɔ gbä 'nɩ 'ylʋʋ pʋ waa' ‑lefɩɩn ‑za. 'Nɩ 'yigëënyʋa ‑yä nyɩkpaa' ‑lʋa ‑wʋ lä 'yi gëë‑ nä, ɔ gbä 'nɩ 'nyu bhlä waa' ‑lefɩɩn ‑za. 46‑Wa ‑wa'anyɩ lä nä, wamä ‑bhlo a kä ‑waa nä, Laagɔɔ' bɔɔpälɩɩ' 'cësä a tään bhää? Lapoo‑ylänyʋa 'titii‑ plöö‑ lä gbenyenyinyʋa nä, wa nʋmʋ 'sɩɩ sɔɔ. 47'Nɩ a bhelie ‑bhlo a kä bhään nä, wälɩklë ‑sä a ‑nʋ bhä 'nɩ ‑a 'ninie bhä nyɩkpa plɛkʋ? Nyɩkpaa 'titi ‑waa 'mänyɩ ‑wʋ lä Laagɔ nä, wamä ‑mä 'sɩɩ, wa nʋmʋ sɔɔ. 48Nä, 'Bäɔ ‑ɔ ‑kʋ lä ‑mɔɔ ‑laagɔɔ' nä, sɔ ‑kplɔɔ lä nä, anyɩ ‑mä 'sɩɩ a kplɔɔ 'sɔɔ!

လက်ရှိရွေးချယ်ထားမှု

Matie 5: god

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

GOD - u2 အကြောင်းကို ပို၍ သင်ယူပါ။

Matie 5
မှ လူကြိုက်နှစ်သက်သော ကျမ်းပိုဒ်များ။

နားထောင်ပါ။ Matie 5

Matie 5 အကြောင်း ဗီဒီယိုများ

ရှင်မဿဲခရစ်ဝင် 5

Lumo Project

Matie 5

Matie 5
မှ လူကြိုက်နှစ်သက်သော ကျမ်းပိုဒ်များ။

နားထောင်ပါ။ Matie 5

Matie 5 အကြောင်း ဗီဒီယိုများ

ရှင်မဿဲခရစ်ဝင် 5

သမ္မာကျမ်းစာ:

Godié

ဗားရှင်း: GOD - u2 - god

Matie 5

Matie 5

Matie 5မှ လူကြိုက်နှစ်သက်သော ကျမ်းပိုဒ်များ။

နားထောင်ပါ။ Matie 5

Matie 5 အကြောင်း ဗီဒီယိုများ

ရှင်မဿဲခရစ်ဝင် 5

သမ္မာကျမ်းစာ:

Godié

ဗားရှင်း: GOD - u2 - god

Matie 5

Matie 5
မှ လူကြိုက်နှစ်သက်သော ကျမ်းပိုဒ်များ။