LUKAX 23
23
Viex Yesux Hu Sivoe Pilat
(Mat 27:1-2,11-14; Mak 15:1-5; Yo 18:28-38)
1Cub kix khawmuik kaoh mai viex Nawh Cao hu ka sivoe Pilat. 2Kix jah ti deuh phimap ka piang Nawh Cao, ah nin, “Ex yaox Pui in yuh kieh pui meung ex lud mai ang kieh tawx mau koh ka simiang Kesa, Nawh ah tokaux tix mawh, Khrit Simiang heue.” 3Pilat chawk Nawh Cao ah nin, “Mawh Maix Simiang Pui Yudax lie?” Nawh Cao pawk lox ah nin, “Mawh awm pa ah maix heue.” 4Pilat ah nin ka cao giex kaing li pa ting khankix mai ka cub pui hun khankix, “Ang aux yaox dee lud ka daux pui in tix ceu kawx heue.” 5Viang mawh nan, kix nie baox lheu, nied ti ah nin, “Nawh hoik cheeik ka kawn pui, ka lox sidiex lox gau Nawh, jah ka meung Galilie, ka daux meung Yudax kudah kudee, tom hoek ka dee in heue.” 6Yam mhong Pilat lox an, nawh chawk kix grawng an “Mawh Nawh pui meung Galilie lie?” 7Yam tawng nawh grawng mawh Nawh Cao Pui pa ot greem simiang Herut, nawh ploi Nawh Cao hu ka simiang Herut, tokaux nawh kawx ot ka daux veng Yerusaliem, ka daux bawg yam singaix an khankix heue.
Viex Yesux Hu Sivoe Herut
8Yam yaox Herut Yesux, nawh kied gaux rhawm, mawh kheu nawh hoik uik dawg rheung simie ti yaox Nawh Cao, kheu nawh hoik mhong grawng Nawh mai simie ti yaox mhai pa daox am pa yuh Nawh Cao tix ceu ceu heue. 9Nawh chawk Nawh Cao ka lox tom nie, viang mawh nan Nawh ang pawk lox tidtix ka nawh heue. 10Cao giex kaing li pa ting khankix, pui tiiem lai khankix, cung tan, nied ti baox deuh phimap ka Nawh Cao heue. 11Herut, khawm pui naing nawh khankix, nieb yuh pa ang nab ang yam, yuh pa ang cee ang cak ka Nawh, kieh Nawh ceep kraung pa jiet mhawm grang mai deeh ploi Nawh Cao hu ka Pilat heue. 12Simiang Herut mai Pilat mawh paox grawm dom an ka daux singaix an heue. Grawh grawng nawh, glang ka in kiex koeng ka paox tix heue.
Tat Lox Sang Pah Yesux Yum
(Mat 27:15-26; Mak 15:6-15; Yo 18:39—19:16)
13Pilat kok cao giex kaing li pa ting khankix mai simiang khankix, pui khankix, khrawm paox tix, 14ah nin ka kix, “Pex hoik viex pui in ka aux, awm mawh pui pa kieh pui lud heue. Aux hoik chawk cheng Nawh ka sivoe pex, ang yaox dee lud pui in, grawng ceu pa deuh pex phimap ka Nawh heue. 15Lheu khaing an simiang Herut kawx ang yaox dee lud, kheu nawh hoik deeh ploi Nawh hoek ka ex Nawh ang nyang yuh ceu pa keung ti yum tidtix heue. 16Mawh kheu nan aux tak sang sivied Nawh mai ploi Nawh heue.” 17Mawh kheu nan tak lai ploi tix kaux ka kix, ka daux pawie an heue. 18Viang mawh nan kix khawmuik kok yo tau ah nin, “Teei ti tik pui in mai ploi Barabax ka ex heue.” 19Barabax mawh pui pa hoik sau ka daux thawng, kheu mawh nawh pa hoik tieh feen tix kaux, yam tieh feen ka daux veng an nawh mawh pa hoik pah pui yum heue. 20Pilat baox deeh ah ka kix tix bawg, kheu simie nawh ti ploi Yesux. 21Viang mawh nan kix khawmuik kok yo ah nin, “Tawk Nawh piang khaox lhak, tawk piang khaox lhak heue.” 22Nawh chawk ka kix loe bawg tix bawg ah nin, “Mawh kheu patix, pui in hoik yuh pa caox pa yuh ka mawx? Aux ang yaox grawng ceu pa khaw Nawh ti yum tix ceu kawx heue. Mawh kheu nan aux tak sang sivied Nawh mai ploi Nawh heue.” 23Viang mawh nan kix nied ti baox kok lox sinum, mhaing ti kieh tawk Nawh Cao piang khaox lhak, lox kix mai lox cao giex kaing li pa ting khankix pex heue. 24Pilat prawng ca, yuh ka mawx sonsang yuh, awm ceu pa rawg mhaing kix heue. 25Nawh ploi ka kaw pa hoik sau ka daux thawng, kheu pa hoik tieh feen mai kheu hoik pah pui yum, awm pa rawg mhaing kix. Viang mawh nan nawh tawx Yesux ka kix, sonsang yuh awm pa simie kix ti yuh heue.
Tawk Yesux Piang Khaox Lhak
(Mat 27:32-44; Mak 15:21-32; Yo 19:17-27)
26Yam tuk kix Yesux hu, kix giex Simon pa mawh pui meung Kurene, pa kaoh khaing daux tiag mai kix deuh khaox lhak ka piang nawh, sonsang klawm khaox lhak an hawt Yesux heue. 27Cub pui pa kied hun hawt Nawh Cao, khawm bun pa yiiem grai son Nawh. 28Viang mawh nan Nawh Cao deeh gi ah nin, “Kawn bun veng Yerusaliem khankix eue, paw yiiem son Aux, viang mawh nan yiiem son tokaux pex, son kawn praix pex khankix heue. 29Grawh grawng nawh, singaix bawg yam tak sang hoek, yam kix tak sang ah, bun pa neh mai vaig pa ang sax nghe kawn mai teeih pa ang sax kieh peuex khankix koe bwanson heue. 30Yam an kix tak sang ah nin ka gawng khankix, rau ka piang ex liak mai ton khankix tawb kheem ex liak. 31Kheu phan kix yuh ceu in khankix ka khaox im khaox klai, tak sang yuh ka mawx ka khaox kroh?” 32Viang mawh pui caox ra kaux kawx, kix tuk hu tau mai Nawh Cao, sonsang teei kiex yum heue. 33Yam hoek kix tix dah pa kok mawh, si-ang kaing, kix tawk Nawh Cao piang khaox lhak tan mai pui caox an kiex, kix tawk plak taix khawn dawm Nawh tix kaux, khawn gwiex tix kaux heue. 34Yesux ah nin, “Keeing eue, pluat ploi phimap kix liak, kheu ang kix tawng pa yuh tix heue.” Kix teei kraung ceep Nawh Cao mai nieb ti yaox mai gwieh sinax kix heue. 35Pui khankix cung ti jhak tan, simiang khankix kawx, nied ah pa ang cee ang cag ka Nawh ah nin, “Nawh hoik taoh ka pui tang kaux khankix, kieh Nawh taoh tokaux tix, phan Nawh mawh Khrit cie Siyiex, pa hoik laug Nawh ti teei.” 36Pui naing khankix kawx, yuh pa ang cee ang cak mai tawx ti yaox sidah niex ka Nawh, 37ah nin, “Phan Maix mawh simiang pui Yudax, taoh tokaux tix tiru heue.” 38Kix tiiem ti deuh lai pa ah nin, ka piang Nawh Cao, “IN MAWH SIMIANG PWI YUDAX”. 39Ka daux pui caox an kiex pa hoik preue, tix kaux ah pa ang khaw ang jiet ka Nawh Cao ah nin, “Phan Maix mawh Khrit taoh tokaux tix mai yiex heue.” 40Viang mawh nan tang kaux an deeh ah ka kaw an ah nin, “Viang ka Siyiex kawx ang maix lhat lie, siyox kham geu maix krax prawng awm paox tix lie? 41Ax kham geu yuh nin hoik khaw, kheu ax pon pa khaw tix geu, son ceu pa hoik yuh tix, viang mawh nan pui in ang sax yuh pa lud tidtix heue.” 42Nawh ah nin ka Yesux, “Simiang eue, yam hoek Maix ka daux meung tix, doh keud ka aux liak.” 43Yesux dee ah nin ka nawh, “Aux krai lox tete ka maix, ka daux singaix maix tak ot tau mai Aux ka daux Paradisux heue.”
Grawng Yum Yesux
(Mat 27:45-56; Mak 15:33-41; Yo 19:28-30)
44Yam an dex liah nari mai praix faik piang haktiex khawmuik tom hoek dim nari heue. 45Singaix uik faik, man tie ka daux nyiex bwan griah ka sigreung heue. 46Yesux kok lox sinum ah nin, “Keeing eue, Aux tawx khuan tix ka daux tawm taix Maix.” Khaix hoik ah Nawh nan, Nawh Cao deeh tawx khuan tix mai dud rhawm heue. 47Yam yaox cao giex kaing naing an, grawng ceu pa hoik mawh, nawh yaogyaw Siyiex ah nin, “Kaw in mawh pui rahsee tete heue.” 48Cub pui hun pa hoek ti yaox ceu in tau, yam hoik yaox kix ceu pa hoik mawh khankix, kix dieh naok tix mai deeh ing heue. 49Pui pa meed tawng Nawh Cao, bun pa hoik hawt hoek tau mai Nawh Cao khaing meung Galilie, cung dee singai mai jhak ka ceu in khankix heue.
Sipaung Yesux
(Mat 27:57-61; Mak 15:42-47; Yo 19:38-42)
50Yam an pui tix kaux pa kaux Yosiep, pa mawh cao prawng see, pui mhawm, pa rahsee. 51Nawh ang rieb ang khaw rhawm ka grawng pa hoik kum kawng kix mai yuh pa mawh pui Arimasie, veng pui Yudax tix veng, pa krox ti jhak son yam sang hoek meung Siyiex. 52Pui in hu ka Pilat mai rawg mhaing tokaux yum Yesux heue. 53Nawh teei tokaux yum Nawh Cao lih mai nawh pua ka man paing mai deuh Nawh ka daux simeeig, pa hoik saik ka daux rang mai dee ang bax sax deuh pui heue. 54Singaix an mawh singaix khre mai singaix twah dex sang hoek heue. 55Bun khankix pa hoik hoek tau mai Nawh Cao khaing meung Galilie, hawt khaix mai yaox simeeig mai grawng deuh tokaux yum Nawh Cao yuh ka mawx. 56Kix deeh ing mai cox khre sidah bhawng mai sidah kraix khankix heue. Kix laux lee tix, singaix twah, awm pa khaw mai lox tawm pingnyap heue.
လက်ရှိရွေးချယ်ထားမှု
LUKAX 23: WCL
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Wa Common Language Bible © Bible Society of Myanmar, 2012
