LUKAX 19
19
Yesux Mai Zakkhie
1Yesux kawx laig hu mai breeng daux veng Yerikho. 2Yam an koe cao kaing pui koh mau pa kaux Zakkhie nawh mawh cao mi heue. 3Nawh sawg ti sang yaox Yesux mawh pui pa yuh ka mawx, kheu hun pui nawh ang pon ti yaox, kheu nawh mawh pui kalux, iak heue. 4Nawh to sivoe mai haok piang khaox lieah tix khaox, son sang pon yaox Yesux, kheu sang lawng Nawh krax an heue. 5Yam hoek Yesux ka dee an, Nawh yaog ti simi mai ah nin ka nawh, “Zakkhie eue, nied ti lih laung laung, Aux tak paung daux nyiex maix singaix heue.” 6Nawh nied ti lih mai koe krax gaux rhawm, rieb ti teei Nawh Cao heue. 7Yam yaox pui, kix khawmuik salao ah nin, “Nawh hoik laig ti paung mai pui pa ting map heue.” 8Zakkhie cung ah nin ka Simiang, “Simiang eue, sinngao pa koe aux tix plak aux tawx ka pui hot sia khankix, phan aux hoik teei pa ang khaw ti teei ka pui mawx ang ah, aux tak deeh pheuex phwan son heue.” 9Yesux ah nin ka nawh, “Krax taoh hoik hoek ka daux nyiex in singaix, kheu hoik mawh kaw in kawn simex Abraham heue. 10Mawh kheu Kawn kawn pui hoek sonsang sawg ti taoh ka pui pa hoik grai khankix heue.”
Grawng Kawncau Mai Mau
11Yam kawn nghiet kix ceu in khankix, Nawh Cao baox krai lox tiag in, mawh kheu Nawh Cao dex hoek ka veng Yerusaliem, kheu ce kix meung Siyiex tak sang bleeh dom mawx dom an heue. 12Kheu nan Nawh Cao ah nin, “Simiang tix kaux hu ka daux meung dee singai tix meung, sonsang pon haktiex son tokaux tix mai deeh hoek heue. 13Nawh kok kawncau tix kao kaux mai tawx mau ka kix kao coi mai ah nin ka kix, yuh lai geu ka mau in tom deeh hoek aux heue. 14Viang mawh nan, pui meung, pui haktiex nawh, koeng ka nawh mai ploi pui hawt khaix nawh ah nin, “Ex tak ang kieh pui in ting piang ex heue. 15Yam deeh hoek nawh khaix hoik pon nawh haktiex, nawh tawx lox kieh kok ka kawncau khankix, pa hoik tawx nawh mau, hoek ka nawh, sonsang pon nawh ti tawng, kix hoik pon rao yuh lai miex ding. 16Kaw phao ka hoek sivoe nawh, ah nin, Simiang eue, mau cie maix tix coi an, hoik baox pon rao kao coi heue. 17Nawh baox ah nin ka kawncau an, mhawm heue, kawncau pa mhawm eue, mawh kheu hoik kaux sijax maix ka daux pa iak pa liied maix giex kaing veng kao veng heue. 18Ra kaux tix kaux hoek ah nin, Simiang eue, mau cie maix tix coi, hoik baox pon rao phwan coi heue. 19Ka kawncau an kawx nawh ah nin, maix kawx giex kaing piang veng phwan veng heue. 20Tang kaux tix kaux hoek ah nin, Simiang eue, jhak heue, mau cie maix tix coi an, aux hoik pua ti deuh ka daux man khoek in. 21Mawh kheu lhat aux ka maix, kheu mawh maix pui riex nu ti ah heue. Maix teei ceu pa ang maix deuh mai vawg ceu pa ang maix rhuat heue. 22Nawh ah nin ka kawncau an, kawncau pa caox eue, aux tak prawng maix ka lox pa lih khaing jheeh maix heue. Kheu hoik tawng maix grawng mawh aux pui riex nu ti ah, teei ceu pa ang aux deuh mai pa vawg ceu pa ang aux rhuat heue. 23Phan mawh nan yuh ka mawx maix ang tawx mau cie aux ka nyiex dee deuh mau? Yam deeh hoek aux, aux tak pon mau aux khawm rao heue. 24Nawh ah nin ka kix pa cung dex tan khankix, deeh teei mau tix coi an khaing nawh mai tawx ka kaw pa hoik koe kao coi heue. 25Kix ah nin ka nawh, Simiang eue, nawh hoik koe kao coi heue. 26Aux krai ka pex, pa hoik koe ku kaux daux pui, tak sang baox tawx ka nawh heue. Kaw pa ang koe viang pa hoik koe nawh kawx, tak sang deeh teei khaing nawh heue. 27Lheu khaing an, pui pa koeng ka aux khankix, pa ang rhawm kieh aux yuh simiang giex kaing kix, pex viex tin mai pah kix yum sivoe aux heue.”
Brug La Laig Daux Veng
(Mat 21:1-9; Mak 11:1-11; Yo 12:12-15)
28Yam hoik krai Nawh ceu an, Nawh thong kix hu sivoe haok ka veng Yerusaliem. 29Yam hoek Nawh dex yaong Bephake mai yaong Betanix, ka gawng pa kok mawh gawng Sanlun, Nawh ploi kawncau Nawh hu ra kaux, 30ah nin, “Hu ka daux yaong pa koe sivoe pax mai yam laig pax ka daux yaong an, pax tak yaox kawn la pa hoik phyawk tan, pa ang pui sax brug piang heue. Kah pax viex nawh hoek heue. 31Phan pui tix kaux kaux chawk pax, pax lai kah kawn la in yuh ka mawx? Pax tak deeh ah nin, Simiang lo nawh heue.” 32Kiex pa hoik ploi, hu yaox awm pa hoik krai Nawh Cao ka kiex heue. 33Yam kawn tak kah kiex kawn la an, cao la an khankix, chawk kiex ah nin, “Pax lai kah la in yuh ka mawx?” 34Kiex deeh ah nin, “Simiang lo nawh heue.” 35Kiex viex la an hoek ka Yesux mai kix teei kraung ceep tix, sau ka piang la an mai Nawh Cao brug ka piang heue. 36Yam hu Nawh Cao, kix teei kraung ceep tix nah ti tawm ka daux krax heue. 37Yam hoek Nawh Cao dex ka veng Yerusaliem mai lih jee gawng Sanlun, cub kawncau pa hun khawmuik, koe krax gaux rhawm mai yaog yaw Siyiex ka lox sinum, grawng kaing sibrawm pa hoik yaox kix khankix, 38ah nin, “Simiang pa hoek ka daux ceu kaux Siyiex leeing ju, ting bwanson heue. Kieh nhim ka daux meung raoma, kieh koe min plakngai dee lhaong khaing paox tix heue.” 39Pharishie tix blah pa ot ka daux cub pui hun an, ah nin ka Nawh Cao, “Sara Cao Gau eue, ne ka kawncau Maix khankix.” 40Nawh Cao deeh pawk lox ah nin ka kix, “Aux krai ka pex, phan pui khankix yawg tix ang nye, simaox rang khankix tak sang riag yo lox tix heue.”
Yiiem Son Veng Yerusaliem
41Yam hoek bleeh Nawh dex veng Yerusaliem mai yaox veng an, Nawh yiiem, 42ah nin, “Phan maix hoik tawng ceu pa dex dawt mai pa nhim daux singaix in, viang mawh nan yam in maix ang pon yaox heue. 43Grawh grawng nawh, bawg yam singaix tak sang hoek ka piang maix, yam pui pa koeng ka maix khankix tak sang yuh tab, yuh lawng, rob maix mai tak ot vung viang maix ku plak mai laung maix ka heue. 44Tak sang kieh maix sidawm sidu mai tiex, khawm kawn praix pa koe ka daux maix heue. Kix tak ang grham kieh simaox koe tix lon piang tix lon ka daux maix, kheu ang maix tawng bawg yam pa hoek pa tawx bwanson ka maix heue.”
Kieh Nyiex Bwan Singax
(Mat 21:12-17; Mak 11:15-19; Yo 2:13-22)
45Nawh Cao laig daux nyiex bwan mai grheu pui pa coh khankix lih, 46ah nin ka kix, “Hoik tiiem ti deuh ah nin, nyiex Aux tak mawh nyiex rawg bwan, viang mawh nan pex hoik kieh mawh dee ot pui tud rhim heue.” 47Nawh Cao sidiex gau ka daux nyiex bwan ku singaix. Viang mawh nan cao giex kaing li pa ting khankix mai pui tiiem lai khankix mai kix pa mawh pui pa ting khankix, sawg ti yuh Nawh laux. 48Kix sawg ang pon mai ang yaox, ceu pa sang yuh kix, kheu pui ku kaux daux pui khawmuik, breuk Nawh mai nghiet lox Nawh Cao heue.
လက်ရှိရွေးချယ်ထားမှု
LUKAX 19: WCL
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Wa Common Language Bible © Bible Society of Myanmar, 2012
