S. Juan 4
4
2. Ne ya'p k'axʌ' u tuko' ti' Jesús
(4.1—6.71)
A Jesús y yete a ch'upra a lʌji' u winki Samaria
1Tuk'in ak Ts'uri ka tu yua u yei'ko' a mok a u winiko' a judíos a ku ya'batio' fariseos: A Jesús más ya'p tʌn u but'ik ja' a winik y más pim tʌn u yirik u kʌ'sa winik y mo' bex a Juan 2(chen mo' lʌji' a Jesús a ku but'ik ja' a winik, lʌji' u kʌ'sa winik ku metko'), 3ka tu yua bex a Jesús, jok'i ix Judea, ij ka' bini Galilea. 4Chen yʌnti' u yʌj mʌn xok'o Samaria. 5Y yʌj k'uchi ix jump'eri' u meje kʌjta u lu'mi Samaria a lʌji' u k'aba' Sicar, a xok'o yok'o u lu'm a Jacob a tu p'ʌta kaj kimi ti' u ti'a a k'aba' José. 6Tita tiʌ jump'eri' u jor to' u pʌnmʌ ti' u yo'ch ja' a Jacob. Tu ne k'ak'chuk'in, a Jesús nej kʌ'ni tuj ximʌnʌ, lʌji' xu'ri kuta u je'subʌ yok'o a lay u jor to' u pʌnmʌ ti' u yo'ch ja' a Jacob. 7Y junturi' ch'upra u winki Samaria tari tita u jare ja', Y Jesús tu ya'ti' a ch'upra:
—Ts'aten chichin in wuk'e a wo'ch ja'. 8U kʌ'sa winik a Jesús bino' u mʌne o'chi ix u kʌjta a lay a lu'm.
9Y a ch'upra a lʌji' u winki Samaria tu nuka:
—¿Biken tech ka' k'atik ten in ts'ek a wuk'u, maj wirik a ten ti in tar Samaria y tech Judá? Tu ya'a bex, to'o toj u yej a mok lʌji' u winki Samaria yete u winki Judá mo' ket u yoro'.
10Jesús tu nuka ti':
—Wa a we bai poch u ts'ek tech K'uj y bexi' o a k'omʌ moki a tʌn u k'atik tech: ts'ae in wuk'u, a bʌji' tech ka bi a ka' k'ate ti', y a ti' bi u ts'atech jump'e ja' a lʌji' ku ts'ek a kuxta. 11A ch'upra tu nuka ti':
—Ts'uri, a jor tu yʌn a ja' ne tʌm y mʌnʌ' ba' yete ti a jarik a ja': ¿Tu ka bin a ch'ae a ja' a ka wei'k a ku ts'ek in kuxta? 12¿Yʌn wa tech más t'ojech ti' in teto' a Jacob, a lʌji' tu ts'ato' a je' u jor u ja' a u pʌnmʌ, a to'o lʌji' tu yuk'a y laj mʌni u yuk'ik u ti'a y u wakʌx?
13Jesús tu nuka ti:
—Tu woro a mok ku yuk'ik a je' a ja' je'e u ka' uk'ajchʌ, 14chen a mok ku yuk'ik a ja' a kin bin in ts'ae, mʌnʌ' u yʌj uk'ajchʌ, a lay a ja' a kin bin in ts'ae binukaj waya jump'eri' ja' a muj xu'pu u jok'o ti' u kuxta tu woro k'in y mʌnʌ' u yʌ kimi.
15A ch'upra tu ya'a:
—Ts'uri, ts'aten a lay a ja' ka wei'k, ti mi' yʌj uk'ajchʌ y ti' mi' yaj tar way in ch'ae ja'.
16Jesús tu ya'ti':
—Xen, y t'ʌne a lak' y ka ka' sut way.
17A ch'upra tu nuka:
—A ten mʌnʌ' in lak',
Jesús tu ya'a:
—Jach to jai' ka wei'k mʌnʌ', 18a tech jumujk'ʌ' ch'a'bech y a beje' ti'ʌ mo la' a lak', ben a ta wa, jach to jʌy.
19Ka tu yao' bex a ch'upra, tu ya'a:
—Ts'uri, kin wirik a tech lʌjiech profeta. 20In teto' tu k'ujinto' K'uj way yok'o a je' a wits, chen a teche'x a judíos ka wei'ke'x ix Jerusalén yʌnti' in k'ujintiko' K'uj tita.
21Jesús tu nuka ti':
—Ch'upra ch'ae in t'ʌn a ki wei'k tech, binukaj tar u k'ini ya mʌnʌ' a k'ujintik K'uj ix Jerusalén y mix way yok'o a je' a wits. 22A teche'x ka k'ujintike'x a mok ma' we'x, a teno' in weo' mok kin k'ujintik, ki wei'k teche'x a mok ku bin u bise a winiko' ix kʌ', ti' ku bin tar ix a Judíos. 23Binukaj tar u k'ini a lʌji' a beje' yaj k'uchi u k'ini tuk'in ku lik'o a mok ku jach ki k'ujintik K'uj a bex u k'at u Pixʌn K'uj, toj bex u k'at ak Tet u ki k'ujinta'. 24K'uj mʌnʌ' u bʌk'e bix a winik, a ti' lʌiti' u Pixʌn K'uj y a mok ku k'ujintik yʌnti' u ki k'ujintik a bex u k'at u Pixʌn K'uj. 25A ch'upra tu nuka:
—A ten in we, je'e u tar a Mesías a lʌji' u k'aba' Cristo, ti' ka tak jeu' laj ki' tsikbʌtik to' tu woro a ba'.
26Jesús tu ya'ti':
—A Ten Lʌjien a Cristo, a tʌn u t'ʌn yete tech.
27Lʌji' kaj suto' u kʌ'sa winik a Jesús, y tu pesa' u yoro' ka tu yiro' a Jesús u tsikba yete junturi' ch'upra, chen mix mok tu tunta' u k'ate ti': ¿Baij ku k'atik ti'? O ¿baij ku tsikbʌtik yete a ch'upra? 28Pachi a ch'upra tu p'ʌta u kum tuku ch'eik a ja' ij bini ix u kʌjta y tu ya'tio' a winiko' a bex:
29—Ko'tene'x a wire'x junturi' xi'ra, a to'o tu laj a'ten baij in meba, ti a wirke'x. ¿Wo mo' lʌji' a Cristo? 30Y a winiko' jok'o yok'o u kʌjto' ij bino' tu tiʌ a Jesús. 31Y u kʌ'sa winik a Jesús tʌn u p'iskubʌjo' u yao' ti' a Jesús bex:
—Rabí, k'ʌs jʌnen chichin.
32Ti' tu nuka tio':
—A ten toj yʌn in wo'ch baij kin bin in jʌte, a to'o teche'x ma' a we'ex.
33U kʌ'sa winik chu'mpʌjo' u tsikbo' yete u bojo' y bex tu yao':
—¿Mo' yʌn mok tu tasa ti' u yo'ch ti' u jʌnʌ?
34Chen Jesús tu nuka tio':
—A ten in wo'ch, lʌji' in metik a baij u k'at a mok tu tuchi'ten y in ts'osik u meaj. 35¿Maj wei'ke'x a teche'x p'ata cuatro ak nʌ' ti u k'uchu u k'ini ti'a jo'kik a trigo? Chen ten kin wei'k teche'x: “Nʌ'se a wiche'x y ire'x u lu'mi a pʌk'ex, ya tsoy a jo'kike'x.” 36A mok ku meaj u jo'kik ba', ku bo'ta' y a lay ku jo'kik lʌji' ku ts'abati' u kuxta a ya mʌnʌ' u yʌ kimi, y bexi' ku ts'abati' a mok tu yʌj pʌk'a y tu ka'to' ku tsoy tu yoro'. 37Jach taj a toj a'a a t'ʌn a ku yei'k: “Junturi' a mok ku pʌk'ik y junturi' a mok ku jo'kik.” 38Ten tin tuchi'te'x a jo'ke'x a to'o teche'x mo' taj mete'x u meaji, u jero' tu meto' u meaji, y teche'x ka jo'ke'x a to'o lʌji' tu meto' u meaji.
39Y ne pim u winki kʌjta Samaria tu yakso' tu yoro' ti' Jesús a tu tu tsikbʌta a ch'upra a ku yei'k: «Tu la' a'ten tu woro a ba' in meba.» 40Ij taro' u winko' Samaria tu tiʌ Jesús y tu p'isubʌjo' u k'ato' ti Jesús u p'ata yete tio' y Jesús p'atij ka'p'e k'in yete tio'. 41Y más ne pim winik tu yakso' tu yoro' tu tu yuo' u bʌjio' u tsikba a Jesús, 42Y a winiko' tu yao' ti' a ch'upra: «Mo' jari kin ch'eik a t'ʌn a tu taj tsikbʌta, ya beje' tin wuo' in bʌjio' a teno', y tin wiro' a je' jach lʌji' u Yʌj Taki a winiko', a lʌji' a Cristo.»
Jesús ku ch'ensik junturi' u xi'ra u ti'a a mok lʌji' u k'ʌni' aj wes
43Kaj mʌni ka'p'e k'in, Jesús jok'i ix Samaria ij bini ix Galilea. 44A to'o toj u bʌji' a Jesús ka tu ya'a: «Mix otsi u yira' a profeta yok'o a lu'mi'.» 45Kaj k'uchi ix Galilea u winki a lay a lu'm tu ki' akso' a Jesús tu tio', tu toj u k'omo' a Jesús, tij ira' kaj meta u yo'cho' a judíos a u k'ini pascua ix Jerusalén y tita tu laj iro' baij ne ya'p ba' tu meta Jesús.
46Pachi Jesús ka' suti ix u meje kʌjta a Galilea a u k'aba' Caná a tu tu waisa a ja' a u yʌki a menʌ' u ya'ri a nukuch ts'us. Y tita tiʌ junturi' xi'ra a mok lʌji' u k'ʌni' aj wes a ti' u tar ix Capernaum y lʌji' ne mo' uts u xi'ra ti'a. 47A lay a xi'ra ka tu yua tiʌ Jesús aj lik'i ix Judea ij k'uchi ix Galilea, tari tu yʌn a Jesús y tu p'isubʌj u k'ate ti' Jesús ka tarak u ch'ense u xi'ra u ti'a a tʌn u jach bij kimi. 48Jesús tu nuka ti':
—A teche'x jai' ka ch'eike'x u t'ʌn K'uj wa ka wirke'x u ye'sa ba' teche'x y u meta tsoy ba' yete u muk' K'uj, wa mʌnʌ', teche'x maj ch'eike'x u t'ʌn.
49Chen a xi'ra a mok lʌji' u k'ʌni' aj wes tu ya'a:
—Ts'uri, ma' ne xʌnta a weme, mo' tey jach kimi in ti'a.
50Jesús tu ya'ti':
—Suten ta watoch, u xi'ra a ti'a kuxʌ'.
A xi'ra tu ch'a u t'ʌn a ba' tu ya'a Jesús ij bini. 51Tuk'in ya tʌn u sut tu yatoch, u k'ʌnio' jok'o u nup'o' u ts'uri ti u yei'ko' ti':
—¡A ti'ʌ kuxʌ'!
52Y tu k'ata tok'in kaj chu'mpʌ u yui'k u bʌj tʌn u ch'ene ti' a chʌkbi. Ij nuka ti':
—Joa ka tʌn mʌn k'ak'chuk'in ch'eni u chʌkbi.
53Y a xi'ra k'ajti ka tu yira lʌiti' u horai ka tu ya'a Jesús bex: «A ti'a kuxʌ'.» Y tu yakso' tu yoro' ti Jesús yete tu woro u bojo' a u yet kʌjta ix u yatoch.
54A je' lʌji' u ka wʌts' a tu ye'sa' u metik tsoy ba' yete u muk' Jesús ix Galilea kaj sutpʌ ix Judea.
လက်ရှိရွေးချယ်ထားမှု
S. Juan 4: PLacNaha
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Sociedad Biblica de México AC
