ယူဝ်းႁၢၼ်ႇ 16

1ၼင်ႇႁိုဝ်ၸႂ်သူတၵ်းဢမ်ႇလူႉၸိုင်ၵဝ်ႁေႃးလၢတ်ႈၵႂၢမ်းၼႆႉဢေႃႈ။- 2ၶဝ်တၵ်းႁေႃႈသူဢွၵ်ႇသေၵႃႈၼႂ်းၸရွပ်ႈႁေႃးတြႃးတင်းလၢႆပႅတ်ႈဢေႃႈ။ ၶိင်ႇၵႃႇလႃႉဢၼ် ၵေႃႉဢၼ်ဢဝ်သူတၢႆၼၼ်ႉ တၵ်းထၢင်ႇလႄႈဝႃႈ၊ ၵဝ်ႁဵတ်းဝၢတ်ႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆၼၼ်ႉတၵ်းႁွတ်ႈထိုင်ဢေႃႈ။- 3ၵွပ်ႈပိူဝ်ႈဢၼ်ၶဝ်ဢမ်ႇႁူႉပေႃႈၸဝ်ႈ ဢိၵ်ႇတင်းၵဝ်လႄႈ ၶဝ်တၵ်းႁဵတ်းၸိူဝ်ႉၼင်ႇၼၼ်ဢေႃႈ။ လွင်ႈၼင်ႇႁိုဝ်သူတၵ်းၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၵဝ်လၢတ်ႈဝႆႉယဝ်ႉၸိူဝ်ႉၼင်ႇၼႆ ဢွၼ်တၢင်း၊- 4ၼႂ်းမိူဝ်ႈဢၼ်ၶိင်ႇၵႃႇလႃႉၼၼ်ႉ ႁွတ်ႈထိုင်ၼၼ်ႉၸိုင်၊ ၵဝ်ႁေႃးလၢတ်ႈၸိူဝ်ႉၼင်ႇၼႆဝႆႉတီႈသူဢေႃႈ။ ပိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူလႄႈ ၸႃႉၸဵမ်မိူဝ်ႈၵေႃႇၸႃႉမၼ်းၼၼ်ႉ ၵဝ်ဢမ်ႇပႆႇတွၼ်ႉလၢတ်ႈၸိူဝ်ႉၼင်ႇၼႆသေပွၵ်ႈ။

ၼႃႈၵၢၼ်ဝီႉၺိၺ်ႇမူတ်းၸၢင်ႇၸဝ်ႈ

5တေႃႈလဵဝ်ၼႆႉၸိုင်၊ ၵဝ်တၵ်းလႆႈၵႂႃႇၵႃႈတီႈၵေႃႉဢၼ်ပွႆႇၸႂ်ႉၵဝ်မႃးပုၼ်ႉလႄႈတၵ်းၵႂႃႇၵႃႈတီႈလႂ်ဝႃႈၼႆ သူဢမ်ႇလဝ်ႊဢမ်ႇထၢမ်။- 6ပိူဝ်ႈဢၼ်ၵဝ်ႁေႃးလၢတ်ႈလွင်ႈတၢင်းၸိူဝ်းၼႆႉတီႈသူလႄႈ သူႁွတ်ႈထိုင်တၢင်းဢၼ်ၸႂ်လဵၵ်ႉၼႃႇဢေႃႈ။

7ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ပေႃးၵဝ်ၵႂႃႇၸိုင်သူတၵ်းမီးဢၵျူဝ်းဢေႃႈ။ လွင်ႈမၼ်းၸမ်ႉ ပေႃးၵဝ်ဢမ်ႇၵႂႃႇၸိုင်၊ သြႃႇဢူႉပိတ်ႉသေႇဢမ်ႇမႃးတီႈသူ။ ပေႃးၵဝ်ၵႂႃႇၸိုင်ၵဝ်တၵ်းပွႆႇၸႂ်ႉမၼ်းမႃးတီႈသူဢေႃႈ။- 8မိူဝ်ႈဢၼ်မၼ်းႁွတ်ႈမႃးၸိုင် မၼ်းတၵ်းၽုၺ်ႇဢွၵ်ႇၼႄပျႃးတူႉၸရိူၵ်ႈဢပႅတ်ႈ ဢိၵ်ႇတင်းလွင်ႈတၢင်းဢၼ်ၵၢင်းလွတ်ႈတင်းဢပႅတ်ႈ တင်းလွင်ႈတၢင်းဢၼ်ၸီႇယၢင်ႇဢပႅတ်ႈလႅင်းလႅင်းတီႈလေႃးၵႃႉၼႆႉဢေႃႈ။- 9ပိူဝ်ႈဢၼ်ၶဝ်ဢမ်ႇယုမ်ႇမၢတ်ႈၵဝ်လႄႈ မၼ်းတၵ်းၽုၺ်ႇဢွၵ်ႇၼႄပျႃးတူႉၸရိူၵ်ႈဢပႅတ်ႈဢေႃႈ။- 10ပိူဝ်ႈဢၼ်ၵဝ်တၵ်းၵႂႃႇၵႃႈတီႈပေႃႈၸဝ်ႈပုၼ်ႉသေလႄႈ ၵမ်းလိုၼ်းသူတၵ်းဢမ်ႇလႆႈထူပ်းလႆႈႁၼ်ၵဝ်ၼၼ်ႉလႄႈ မၼ်းတၵ်းၽုၺ်ႇဢွၵ်ႇၼႄပျႃး လွင်ႈတၢင်းဢၼ်ၵၢင်းလွတ်ႈတင်းဢပႅတ်ႈဢေႃႈ။- 11ပိူဝ်ႈဢၼ်ၶုၼ်ဢၼ်လႆႈဢုပ်ႉပိူင်ႇလေႃးၵႃႉၼႆႉ လႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈလႄႈ မၼ်းတၵ်းၽုၺ်ႇဢွၵ်ႇၼႄပျႃး လွင်ႈတၢင်းဢၼ်ၸီႇယၢင်ႇဢပႅတ်ႈဢေႃႈ။

12ပိၵ်ႉသမ်ႉၵဝ်မီးၵႂၢမ်းဢၼ်လီလၢတ်ႈလီဝႃႈၼမ်ၼႃႇတီႈသူသေၵေႃႈ၊ တေႃႈလဵဝ်ၼႆႉ သူဢမ်ႇၶၢမ်ႇဢမ်ႇဢဝ်လႆႈ။- 13ၵူၺ်းၵႃႈမိူဝ်ႈဢၼ်ဝီႉၺိၺ်ႇၸဝ်ႈဢၼ် ပျေႉၸုမ်ႇတင်းသမ်ႇမႃႇတြႃးၼၼ်ႉႁွတ်ႈမႃးၸိုင်၊ မၼ်းတၵ်းဢဝ်သူၵႂႃႇသူင်ႇၵႃႈၼႂ်းသမ်ႇမႃႇတြႃးတင်းသဵင်ႈတင်းလူင်ဢေႃႈ။ မၼ်းတၵ်းႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ မၼ်းတၵ်းႁေႃးလၢတ်ႈ ၵႃႈဢၼ်ငိၼ်းတင်းသဵင်ႈတင်းလူင်ၼၼ်ႉဢေႃႈ။ လွင်ႈတၢင်းဢၼ်တၵ်းမႃးၵမ်းလိုၼ်း ၸိူဝ်းၼၼ်ႉၵေႃႈ မၼ်းတၵ်းလၢတ်ႈပၼ်တီႈသူဢေႃႈ။- 14မၼ်းၼၼ်ႉတၵ်းႁႂ်ႈမုၼ်ၽုင်းၵဝ်ထၢင်ႇသႃးမႃးဢေႃႈ။ လွင်ႈမၼ်းၸမ်ႉ မၼ်းတၵ်းဢဝ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းၵဝ်ၼၼ်ႉလႄႈ လၢတ်ႈပၼ်တီႈသူဢေႃႈ။- 15ၵႃႈဢၼ်ၸၢပ်ႈသႅင်ႇၵၼ်တင်းပေႃႈၸဝ်ႈ တင်းသဵင်ႈတင်းလူင်ၸိူဝ်းၼၼ်ႉ ၸၢပ်ႈသႅင်ႇၵၼ်တင်းၵဝ်ဢေႃႈ။ ပိူဝ်ႈၼႆလႄႈ ၵဝ်လၢတ်ႈလႄႈဝႃႈ၊ မၼ်းတၵ်းဢဝ်လွင်ႈဢၼ်ၸၢပ်ႈသႅင်ႇၵၼ်တင်းၵဝ်ၼၼ်ႉလႄႈ လၢတ်ႈပၼ်တီႈသူဢေႃႈ၊ ဝႃႈၼင်ႇၼႆဢေႃႈ။

တၢင်းဢၼ်မႆႈၸႂ်လႄႈသိူဝ်းပျေႃႇ

16ႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊ သူတၵ်းဢမ်ႇလႆႈႁၼ်ၵဝ်။ သမ်ႉႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊ သူတၵ်းၶိုၼ်းႁၼ်ၵဝ်ဢေႃႈ၊ ဝႃႈၼင်ႇၼႆဢေႃႈ။- 17တပႄးၸဝ်ႈၵမ်ႈၽွင်ႈၵေႃႈ ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊ ၵႂၢမ်းဢၼ်မၼ်းၸဝ်ႈဝႃႈ ႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊ သူတၵ်းဢမ်ႇလႆႈႁၼ်ၵဝ်။ သမ်ႉႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊ သူတၵ်းၶိုၼ်းႁၼ်ၵဝ်ဢေႃႈ၊ ဝႃႈၼင်ႇၼႆၼၼ်ႉ ဢိၵ်ႇတင်းၵႂၢမ်းဢၼ်မၼ်းၸဝ်ႈသမ်ႉဝႃႈ၊ လွင်ႈမၼ်းၸမ်ႉ ၵဝ်တၵ်းၵႂႃႇၵႃႈတီႈပေႃႈၸဝ်ႈပုၼ်ႉဢေႃႈ၊ ဝႃႈၼင်ႇၼႆၼၼ်ႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။- 18ဢၼ်မၼ်းၸဝ်ႈဝႃႈ ႁိုင်ၵမ်းဢွၼ်ႇၼိုင်ႈၵူၺ်း၊ ဝႃႈၼင်ႇၼႆၼၼ်ႉ ၶႂ်ႈဝႃႈၸိူဝ်ႉၼင်ႇႁိုဝ်။ ႁဝ်းၶႃႈဢမ်ႇႁူႉ ၵႂၢမ်းဢၼ်မၼ်းၸဝ်ႈလၢတ်ႈၼႆႉ၊ ဝႃႈၼင်ႇၼႆဢေႃႈ။

19မိူဝ်ႈဢၼ်ယေႇသူႉႁူႉလွင်ႈဢၼ် တပႄးၸဝ်ႈၸိူဝ်းၼၼ်ႉၶႂ်ႈလဝ်ႊထၢမ်ၼၼ်ႉၸိုင်၊ မၼ်းၸဝ်ႈလၢတ်ႈလႄႈဝႃႈ၊ သူၵေႃႉၼိုင်ႈလႄႈၵေႃႉၼိုင်ႈ ၶႆႈၸႂ်ဝူၼ်ႉၸႂ်လူၺ်ႈလွင်ႈ ၵႂၢမ်းဢၼ်ၵဝ်လၢတ်ႈလႄႈဝႃႈ၊ ႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊ သူတၵ်းဢမ်ႇလႆႈႁၼ်ၵဝ်။ သမ်ႉႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊ သူတၵ်းၶိုၼ်းႁၼ်ၵဝ်ဢေႃႈ၊ ဝႃႈၼင်ႇၼႆၼၼ်ႉႁိုဝ်။- 20ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ သူတၵ်းလႆႈမီးတၢင်းဢၼ်ႁႆႈႁွင်ႉပွင်ႉၶၢင်းဢေႃႈ။ လေႃးၵႃႉၼႆႉ တၵ်းမီးတၢင်းဢၼ် သိူဝ်းပျေႃႇဢေႃႈ။ သူၸမ်ႉ၊ ပိၵ်ႉသမ်ႉမီးတၢင်းဢၼ် ၸႂ်လဵၵ်ႉသေၵေႃႈ၊ တၢင်းဢၼ်ၸႂ်လဵၵ်ႉၼၼ်ႉ ၵမ်းလိုၼ်းတၵ်းပဵၼ်တၢင်းဢၼ်သိူဝ်းပျေႃႇဢေႃႈ။- 21ၽူႈယိင်းၸိုင် ၼႂ်းမိူဝ်ႈဢၼ်ယင်းတိုၵ်ႉၵိူတ်ႇလဵင်ႉလုၵ်ႈယူႇၼၼ်ႉ၊ ပိူဝ်ႈဢၼ်ထိုင်ၶိင်ႇဢၼ်လႆႈၵိူတ်ႇလဵင်ႉလႄႈ မီးတၢင်းဢၼ်ၸႂ်လဵၵ်ႉၼႃႇဢေႃႈ။ ၵိူတ်ႇလဵင်ႉမႃးသေယဝ်ႉ၊ ပိူဝ်ႈဢၼ်ၵိူတ်ႇလဵင်ႉမႃး ၵူၼ်းၵေႃႉၼိုင်ႈၵႃႈၼႂ်းလေႃးၵႃႉၼႆႉလႄႈ မၼ်းၸၢင်ႈမီးတၢင်းဢၼ်သိူဝ်းပျေႃႇလႄႈ လိုမ်းပႅတ်ႈဝူၺ်ႇတၼႃႇ ဢၼ်လႆႈၶၢမ်ႇ မိူဝ်ႈဢွၼ်တၢင်းၼၼ်ႉဢေႃႈ။- 22မိူၼ်ၸိူဝ်ႉၼင်ႇၼၼ်၊ မိူဝ်ႈလဵဝ်ၼႆႉ ပိၵ်ႉသမ်ႉသူမီးတၢင်းဢၼ်ၸႂ်လဵၵ်ႉသေၵေႃႈ၊ ၵမ်းလိုၼ်းၵဝ်တၵ်းထူပ်းႁၼ်သူလႄႈ သူတၵ်းမီးတၢင်းဢၼ်ႁူဝ်ၸႂ်သိူဝ်းပျေႃႇဢေႃႈ။ ၼင်ႇႁိုဝ်တၵ်းလႆႈႁိမ်ဢဝ်တၢင်းဢၼ်သိူဝ်းပျေႃႇသူၼၼ်ႉၸိုင် ၽူႈလႂ်သေၵေႃႉသေၵူၼ်းဢမ်ႇတၢတ်ႈၼိူင်ႇလႆႈ။

23ၼႂ်းဝၼ်းၼၼ်ႉ သူတၵ်းဢမ်ႇတွင်ႈဢမ်ႇထၢမ်ၵဝ်သေၸိူဝ်ႉသေပိူင်။ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵႃႈဢၼ်သူဢိင်ပိုင်ႈ ၼႃႇမႃႉၸိုဝ်ႈသဵင်ၵဝ်သေလႄႈယွၼ်းတီႈပေႃႈၸဝ်ႈတင်းသဵင်ႈတင်းလူင်ၼၼ်ႉၸိုင် ပေႃႈၵဝ်တၵ်းပၼ်ဢေႃႈ။- 24တေႃႇထိုင်ႁွတ်ႈမိူဝ်ႈလဵဝ်ၼႆႉ သူဢမ်ႇပႆႇဢိင်ပိုင်ႈၸိုဝ်ႈသဵင်ၵဝ်သေလႄႈယွၼ်းသေၸိူဝ်ႉသေပိူင်။ ၼင်ႇႁိုဝ်လွင်ႈတၢင်းဢၼ်သူသိူဝ်းပျေႃႇၼၼ်ႉ တၵ်းၸေးၸုမ်ႇၸိုင်၊ ယွၼ်းတႃႉ။ ပေႃးယွၼ်းၸိူဝ်ႉၼင်ႇၼၼ်ၸိုင် တၵ်းလႆႈဢေႃႈ။

25ၵဝ်ဢဝ်တင်းပုင်ႇဢူႉပမႃႇႁေႃးလၢတ်ႈလွင်ႈတၢင်းၸိူဝ်းၼႆႉဢေႃႈ။ ၶိင်ႇၵႃႇလႃႉဢၼ် တၵ်းဢမ်ႇဢဝ်တင်းပုင်ႇဢူႉပမႃႇၽုၺ်ႇဢွၵ်ႇၼႄပျႃးလွင်ႈပေႃႈၸဝ်ႈ တီႈသူလႅင်းလႅင်းၼၼ်ႉတၵ်းႁွတ်ႈမႃးဢေႃႈ။- 26မိူဝ်ႈၶိင်ႇၵႃႇလႃႉၼၼ်ႉ သူတၵ်းဢိင်ပိုင်ႈၼႃႇမႃႉၸိုဝ်ႈသဵင်ၵဝ်သေလႄႈသူးတွင်းဢေႃႈ။ ၵဝ်တၵ်းယွၼ်းတီႈပေႃႈၸဝ်ႈပုၼ်ႈသူဝႃႈၼႆၵဝ်ဢမ်ႇဝႃႈ။- 27လွင်ႈမၼ်းၸမ်ႉ ပိူဝ်ႈဢၼ်သူႁၵ်ႉၵဝ်လႄႈ ယုမ်ႇလွင်ႈဢၼ်ၵဝ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉလႄႈ ပေႃႈၸဝ်ႈၼၼ်ႉ တူဝ်ၸဝ်ႈၵဝ်ႇႁၵ်ႉသူဢေႃႈ။- 28ၵဝ်ဢွၵ်ႇသေၵႃႈတီႈပေႃႈၸဝ်ႈပုၼ်ႉလႄႈ မႃးၼႂ်းလေႃးၵႃႉၼႆႉယဝ်ႉ။ ၵဝ်သမ်ႉတၵ်းဢွၵ်ႇသေၵႃႈၼႂ်းလေႃးၵႃႉၼႆႉလႄႈ ၵႂႃႇၵႃႈတီႈပေႃႈၸဝ်ႈပုၼ်ႉလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။

29တပႄးၸဝ်ႈၸိူဝ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ တေႃႈလဵဝ်ၼႆႉ ၸဝ်ႈႁဝ်းယင်းဢမ်ႇလၢတ်ႈတင်းပုင်ႇဢူႉပမႃႇလႄႈ ႁေႃးလၢတ်ႈလႅင်းလႅင်းဢေႃႈ။- 30တေႃႈလဵဝ်ၼႆႉႁဝ်းၶႃႈႁူႉလွင်ႈဢၼ် ၸဝ်ႈႁဝ်းႁူႉၸႅင်ႈတင်းသဵင်ႈတင်းမူတ်း ဢိၵ်ႇတင်းလွင်ႈဢၼ် ၸဝ်ႈႁဝ်းဢမ်ႇလူဝ်ႇၽူႈလႂ်သေၵေႃႉသေၵူၼ်း ႁႂ်ႈလႆႈတွင်ႈထၢမ်တီႈၸဝ်ႈႁဝ်းၶႃႈဢေႃႈ။ ႁဝ်းၶႃႈထွၵ်ႈလူၺ်ႈလွင်ႈတီႈႁဵင်းၼႆႉလႄႈ ယုမ်ႇလွင်ႈဢၼ်ၸဝ်ႈႁဝ်းလုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

31 ယေႇသူႉၵေႃႈၶိုၼ်းလၢတ်ႈလႄႈဝႃႈ၊ တေႃႈလဵဝ်ၼႆႉသူယုမ်ႇယဝ်ႉႁိုဝ်။- 32တူၺ်းလူး၊ ၶိင်ႇၵႃႇလႃႉဢၼ်သူတၵ်းလႆႈၽၢတ်ႇၽႄၵၼ် လႅၼ်ႈပၢႆႈၵႂႃႇၵႃႈတီႈ တီႈယူႇတူဝ်ၸဝ်ႈၵဝ်ႇႁင်းၽႂ်ႁင်းမၼ်းလႄႈ ၸုၼ်ႉပႅတ်ႈႁႂ်ႈၵဝ်ၵိုတ်းၵျၢၼ်ႇယူႇၵေႃႉလဵဝ်ၵူၺ်းၼၼ်ႉတၵ်းႁွတ်ႈမႃးလႄႈ တေႃႈလဵဝ်ၼႆႉၵေႃႈႁွတ်ႈမႃးယူႇဢေႃႈ။ ၼႂ်းဝႃႈၼၼ်သေၵေႃႈ။ ၵဝ်ယူႇၵေႃႉလဵဝ်ၵူၺ်းဢမ်ႇၸႂ်ႈ။ ပေႃႈၸဝ်ႈၼၼ်ႉမီးယူႇလူၺ်ႈၵၼ်တင်းၵဝ်ဢေႃႈ။

33ၼင်ႇႁိုဝ် သူတၵ်းမီးတၢင်းၼိမ် ၼႂ်းၵဝ်ၸိုင်၊ ၵဝ်ႁေႃးလၢတ်ႈၵႂၢမ်းၼႆႉမႃးယဝ်ႉ။ သူတၵ်းလႆႈၶၢမ်ႇတုၵ်ႉၶႃႉၼႂ်းလေႃးၵႃႉၼႆႉဢေႃႈ။ ၼႂ်းဝႃႈၼၼ်သေၵေႃႈ ယႃႇပေမႆႈၸႂ်ၶီၸႂ်။ ၵဝ်ပႄႉၼႅင်ႇလေႃးၵႃႉၼႆႉယဝ်ႉ၊ ဝႃႈၼင်ႇၼႆဢေႃႈ။

လက်ရှိရွေးချယ်ထားမှု

ယူဝ်းႁၢၼ်ႇ 16: CBMS

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး အကြောင်းကို ပို၍ သင်ယူပါ။