Homa 1
1
Owati dai kadikiyahi
1Yeso Kirisito‑ka yo‑yose i‑di Baoro ama·oni. Deoso owa‑ya kadike, owa‑ya yosemarine, Deoso Ati Amosabote okaminabonehe.
2Hibati‑ya Yeso kaki awisareya, Deoso ati‑ya mai mi‑mita‑mete Deoso Ati Amosabote‑ya mai mita, Deoso‑ka yama hani‑ya ati mai hikanahanomatane.
3Deoso Ati Amosabote i‑di Yeso Kirisito ai‑ka Hidi tamine amane. Fare tamine okaminebonane. Neme‑ya Badi eyehe winemata, makobote bofe‑ya wade, ai‑ka Hidi i‑di Dafi‑ka nodi tohane.
4Hibati‑ya bofe‑ya kobone, mai hinahabe, Deoso hinakitame,
“Yeso Kirisito i‑di Deoso Bidi kitabote tohane.” Deoso‑ka Doni amosabote ati nematane.
5Kirisito ene Deoso owa‑ya kadikemarine, Yeso‑ka yo‑yose ohawahabonehe. Deoso owa‑ya kasomemarine, Bara mai‑ya Deoso Ati Amosabote okaminabonehe. Yeso ati‑ya mai nofiya, ati mai hikadabeya, Yeso Kirisito‑ya mai kahiyaraboneni.
6Homa‑ya dai wi‑wina dai‑ya Deoso kadikaharimata, Yeso Kirisito ati‑ya dai no‑nofa Yeso‑ka dai amani.
7Homa‑ya dai wi‑wina Deoso dai‑ya nofe, dai‑ya kadikematane, Deoso‑ka dai tohabonehe. Dai‑ka yama hani‑bone okanahanoneni. Ai‑ka Abi i‑di Deoso, ai‑ka Ayo i‑di Yeso Kirisito mai fama, dai‑ya mai kasoma, dai atibodi ati dai‑ya soma teni.
Homa‑ya dai wi‑wina dai‑ya owatibodi foya
8Yeso ati dai nofa, dai tamine omita, ya‑yai·oneni. Mai tabori dami‑ya dai tamine‑ya mai hiyaramoneni.
“Homa‑ya mai wi‑wina Deoso ati‑ya mai nofi nafemoneni.” Mai ati na,
mai ati omita, mai ati ihi ya‑yai·ona, Yeso Kirisito ene Deoso okahiyarateni.
9Deoso ati onofi nafe, Yeso Ati Amosabote okamina, dai tamine ohiyara oteni, Deoso‑ya. Dai tamine ohiyaranade‑ya Deoso watone.
10Dai tabaro‑ya okabone ona,
“Abi Deoso, Homa‑ya mai wi‑wina mai tabori‑ya okabone ona, tiwati amosiya, mai tabori‑ya okaboneni.” Oteni.
11Dai‑ya owati awi nofineni, dai okasomabonehe. Owa ene Yeso ati dai nofi ba‑basi niya, dai atibodi kitawahabone owatibodi ati nineni.
12Dai tabaro‑ya kobo·oniya, dai okasoma, fara owa dai kasomahari nabone onani. Ai ibi kasoma, ai atibodi kiti ba‑basi teni.
13Dai tabaro‑ya okabone onamaro, mai tabori‑ya yama aninasa ona, dai tabaro‑ya okara. Bara mai dama mai‑ya ohiyarineni, Yeso ati‑ya mai nofabonehe. Makobote dai‑ya ohiyaramakebone onani, Yeso ati‑ya dai one nofamakebonehe.
14Mai dami‑ya Yeso ati okaminabone Deoso ati nemarine. Kereko mai toha, Bara mai one toha, yama yaki‑ya mai wi‑wina mai toha, yama‑ya mai wa‑wato mai toha, yama‑ya mai watora mai toha, mai na, mai nafi‑ya Yeso Ati Amosabote okaminabone owatibodi ati teni.
15Mai dami‑ya Yeso ati okaminabone Deoso ati ne. Homa‑ya okiya, dai‑ya Yeso Ati Amosabote okaminabone owatibodi ati nani.
Yeso ati ai no‑nofa ai sibarabone
16Yeso Kirisito Ati Amosabote okamina, owa habo siitora, owa habo kitabisa, ya‑yai·oneni. Deoso kitabote tohe, ati ene Yeso Kirisito Ati Amosabote‑ya ai nofa, ai‑ya ati somawamatene. Yodeo Yeso tamine‑ya mai miti baha, Bara Yeso tamine‑ya mai mitamakinineni.
17Deoso hawine‑ya Yeso Ati Amosabote ai‑ya yofikitine. Yeso ati‑ya ai nofa, ati ai nofi na‑nafi nawahebonane. Ai ene amosaramaro Deoso fawanihi. Ai ene amosara wadara‑nima ai ene nawahani. Yeso ati ai nofa, Deoso ai‑ya ati somawame, Deoso tabaro‑ya ai winaboneni. Hibati‑ya Deoso ati‑ya ai owa kanahanomata,
“Kirisito ati‑ya mai nofa, mai ihi amosara mai ihi nafi‑ya Deoso fawanihi. Tabaro‑ya mai winawahateboneni.” Deoso‑ka yama hani ati nineni.
Deoso ati‑ya mai tokadabara, Deoso mai‑ya yawebona
18Ai one mai tamine okanahanaboneni. Mai ihi amosarihi, Deoso ati miti‑ya mai nofarihi, mai ati ihi mai one Deoso ati‑ya mitarihi, Deoso ene‑ya mai awa, Deoso‑ya mai watorihi, mai na, mai ihi amosara. Neme‑ya mai ihi‑ya Deoso awe, Deoso yawe‑ya mai awawahaboneni.
19Hibati‑ya yama nafi‑ya Deoso wamane, ene‑ya mai nafi awameteni, Deoso‑ya mai watabonehe.
20Bofe‑ya Deoso ene‑ya mai nafi awa, neme‑ya ene mai hiawahari hine. Deoso kitabote tohe‑ya mai awateni. Deoso‑ya mai watora, hini mai ihi tohateni.
21Hibati‑ya Deoso ene‑ya mai awamaro,
“Yama nafi Deoso ene tohi awirini. Hiniya yama yanineni. Deoso wadaterene.” Mai atibodi ati na.
Deoso‑ya mai kahiyari awira, hini mai ihi yama‑ya mai watora, mai ka‑kana na, mai‑nima mai nawaha, hini mai ihi yama soki‑nima mai atibodi nawaha, yama‑ya mai watomarani.
22Yama nafi‑ya mai watamone mai ati na, mai atibodi honita toha, hiniya mai ka‑kana nawawahani.
23Deoso yokana ati‑ya mai nofara, hiniya mai yahi‑ya yama‑ya mai wamana, bani mai afe wada mai‑nima na toha, bani yama‑ka mai‑nima na toha, maka‑nima na toha, ai‑nima na toha na, fara yama mai wamahina, ati wadarihi, hasikani wadarihi na‑ya mai kahiyaranasa nineni. Yama mai wamahina‑ya mai kahiyarabisa, Deoso yokana‑ya mai kahiyari awirani.
24Deoso‑ya mai nofi watora mai‑ya Deoso saatokase,
“Feye amani. Mai narabi hawi watora mai‑ya ohiyarami awiraboneni. Hini mai atibodi ati‑ya mai nofabisa, hini mai atibodi ati‑nima mai niya, mai atibodi mai‑ya weenamaraboneni.” Deoso ati nematane.
Hini mai atibodi ihi mai ihi amosara, mai ibi tokatowe, mai dami‑ya mai atibodi ati aha, hini mai atibodi ati‑nima mai ihi teni.
25Deoso ati‑ya mai nofara, keyehe‑ya mai nofa, Deoso‑ya mai kahiyarara, Deoso‑ka yama wamani‑ta‑ya mai kahiyarabisineni. Deoso amosabote amane, ai ati nahi. Deoso ai kahiyari fawariyahi. Fara amani.
26Deoso ati mai hinofare, mai‑ya hiyarami awire, hini mai atibodi ati kasira‑nima mai naboneni. Mai fanawi mai makidi‑ya mai nokotonira, mai fanawi hini one‑ya nokotonibisa, mai ibi famineni. Mai ihi towe‑ya Deoso nofaterene.
27Mai makidi fara tohaharina, mai fanawi‑ya mai nofara, makidi hini mai one‑ya mai nokotonibisa, hini hinama mai fama, mai ibi aha, mai ihi amosara mai manakone Deoso daahina, fara‑ya mai kayafaboneni.
28Deoso ati‑ya mai nofara, Deoso mai‑ya saatokase, hini mai ihi Deoso mai‑ya hiyarami awirane. Mai atibodi yama towe kobohina, hini mai atibodi ati‑nima mai ihi nawahani. Haa‑nima mai ihi rabone Deoso ati ne, haa‑nima mai ihi teni.
29Yama towe‑ya mai atibodi nokotonihe, hini mai atibodi ati koboni‑ka yama‑ya mai nokotoni teni. Mahi‑nima mai ihi amosara, mai one‑ka yama‑ya mai nokotonihe, mai one‑ka yama‑ya mai kayafara, mai yawateni. Mai one‑ya mai kako, mai one‑ya mai nanahaba, mai ibi wee, keyehe‑ya mai hiri na, hini mai‑ya mai kahiyara, mai one noki‑ya mai one‑ya mai kahiyara, mai one noki beheri‑kaya mai one‑ya mai towe tonihi teni. Mai one tamine‑mone‑ya mai ibi narabi basateni.
30Mai one tamine‑mone‑ya keyehe‑ya mai hirinade, Deoso‑ya mai kako na, hini mai‑ya mai atibodi kahiyara,
“Amosabotebisa oda amani.” Mai ati na.
Hini mai atibodi yama towe hikadika‑nima mai ihi na, mai‑ka abi mai‑ka ami mai na, mai ati‑ya mai tokadabaterani.
31Yama‑ya mai wato nofarihi, yama amosa‑ya mai nofarihi mai na, hini mai ati‑nima mai nabone mai ati na, hini mai ati‑nima mai ni awira. Mai one‑ya mai nofara, mai one‑ya mai kasomaterani.
32Mai ihi amosara‑ya mai nokotonihe, hini mai ihi‑ya mai saatonakosara. Deoso mai hinahababone, hini mai‑ya mai watobisa, mai korikasara, mai ihi‑nima mai one ihi namakitasa, mai ya‑yainibisineni.
လက်ရှိရွေးချယ်ထားမှု
Homa 1: jaaNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ