Panagnaan 14
14
Si Lut tinabang meꞌ si Ibram
1-4Jaman looy ilay, luu bonoꞌ mehe ndooy ni Labbak Siddim ma limun na ni batnaa meꞌ boheꞌ danaw inawnan Danaw Tinimus. Meꞌ tuu silay salsila bonoꞌ looy siꞌ: Luu lima sultan bay takawum meꞌ Sultan Kerolamel, panghuluꞌ ni Elam. Ga sultan looy siꞌ sikalima yana ga Sultan Bera ni Sodom, Sultan Bilsiya ni Gomora, Sultan Sinab ni Adma, Sultan Semebel ni Seboyim ka disu sultan ni Bela, yana daira ma pinag-awnan du Soal. Sila siꞌ tu ndang lay na takawum meꞌ Sultan Kerolamel, luu na sapu-duwan taun. Sugaꞌ pag taabut ni kasapu-tallun taun, yaꞌ na sila kuhi pinagbayaan, sampay doman na sila nulang. Dari siꞌ, kuwan Sultan Kerolamel lay maru madallaꞌ sila. Dari lay ya ngisun siga gapiꞌ na yana ga Sultan Amrapel man Babilon, Sultan Ariyok man Ellasal, ka Sultan Tiral man Goyim.
5Dari pag taun balik, kuwan Sultan Kerolamel ka ga gapiꞌ na ga sultan looy siꞌ, ddas ka mimon sundalu da, lay na sakap ngalān ga sultan looy siꞌ sikalima ma doman na nulang. Sugaꞌ lān da pilay, lay doꞌ sila duhuꞌ pahās ngalān siga bangsa sarī, yana bangsa Repa ndooy ni Asterot-Kalnaim ka bangsa Sūs ndooy ni Ham ka bangsa Em ni Shabe-Kiriyatayim. Boꞌ lai jaꞌ du sila ā meꞌ ga Sultan Kerolamel. 6Bangsa Hōl pun ndooy ni Punu Seyil ngabut sampay pa El-Paran ni bihing-bihing lahat luha ma yaꞌ magjama, lai du ā meꞌ siga sundalu ga Sultan Kerolamel.
7Pus meꞌ looy, lay na baw sila pilay pa En-Mispat, yana daira ma inawnan du Kades. Ndooy siꞌ, lay na baw sila maā bangsa Amalek. Lakka mandooy, lay na baw sila ngalān pilay pa Hasason-Tamal sampay maā ga bangsa Amol ndooy.
8Pus meꞌ looy, lay na ga Sultan Kerolamel ka ga gapiꞌ na pawus ngalān ga sultan looy siꞌ sikalima ma doman na nulang. Ga sultan looy siꞌ sikalima, yana ga sultan man Sodom ka sultan man Gomora ka gapiꞌ da tallu sultan ndang luu na kumpo-kumpo ni Labbak Siddim ddas ka ga sundalu da. 9Dari lay na sila sibonoꞌ ka ga Sultan Kerolamel sugaꞌ lay jaꞌ sila ā.
10Na ni Labbak Siddim ilay siꞌ, meka lowang pannoꞌ leꞌ kitlan. Dari pag magsonsehan ga siga sundalu ga sultan man Sodom ka Gomora song pa kapunu-punuhan, kasohean lay labuꞌ pa jawom siga lowang kitlan ndooy. Sugaꞌ kuwan kasohean, lay baw bay kapassut pa kapunu-punuhan. 11Kuwan kalaban da, yana ga sultan Kerolamel ka ga gapiꞌ na, lay gi pawus pa Sodom ka Gomora. Takka ndooy, lay kaddoꞌ da mimon altaꞌ sampay balanjaꞌ ni siga daira looy. Sampay siga raayat ndooy pun, lay na du boo da moleꞌ. 12Si Lut pun, kamanakan si Ibram, lay du talapay binoo sabap luu du ya maglahat ndooy ni Sodom. Altaꞌ na pun, lay du kaddoꞌ da.
13Lipara luu disu jama man Sodom bay kapatangkaw. Dari lay ya pilay pa mman si Ibram mahati lay tasungkub si Lut.
Na si Ibram ilay, meꞌ jama ngawnan iya, “bangsa Hibrani looy.” Jaman looy siꞌ, maglahat ya ndooy ni tagan siga poon kayu mehe ni tanaꞌ si Mamre. Na si Mamre ilay bangsa Amol, magdanganakan ka si Eskol ka si Anel. Boꞌ sila ilay siꞌ ndang gapiꞌ ka si Ibram.
14Pag taaka si Ibram lay tabeꞌ tasungkub kamanakan na, ilooy ma lay ya magti patuhut kawu-kawu tatabang na ga si Lut. Iya siꞌ tu bay pilay, lay ya moo kalallahan ma bay sulig njawman na ma ndang alistu sibonoꞌ. Eka da siꞌ, tallu hatus sapu-wawuꞌ. Dari lay onse da ga Sultan Kerolamel ka ga gapiꞌ na sampay lay na taabut da ndooy ni Dan. 15Bbuwatan si Ibram siꞌ tu, lay mahagiꞌ-mahagiꞌ siga jama na, boꞌ da nganggappung monoꞌ sila sangom. Dari lay na ā ga Sultan Kerolamel ka ga gapiꞌ na. Kuwan ilooy ma takapin, lay gi inonse ngabut sampay pa Hoba huwin pa uttaraꞌ man Damaskus. 16Dari siꞌ lay na salamat si Lut meꞌ ga si Ibram sampay mimon danda-lalla ma bay tasungkub meꞌ ga Sultan Kerolamel. Maka mimon altaꞌ bay kinaddoꞌ meꞌ siga sultan looy, lay na du binawiꞌ meꞌ si Ibram.
Si Melkisedek nupaatan si Ibram
17Na pag beleng ga si Ibram pus da bay maā ga Sultan Kerolamel ka ga pagkahi na sultan, luu na baw pōꞌ Sultan Bera man Sodom nampang iya ni Labbak Siyabe ma pinag-awnan du Labbak Sultan. 18Maka luu du bay pōꞌ pilay disu lalla inawnan si Melkisedek, sultan man Salam. Iya ilay siꞌ imam lagi man wakil Tuhan Mahatinggi. Iya siꞌ tu nampang, lay gi ya moo tinapay ka tubaꞌ anggul pilay man ngahulmat sila. 19Lay gi supaatan na si Ibram, yuk na, “Ibram, kamura-murahan binuwanan na pin ko barakat meꞌ Tuhan Mahatinggi ma bay mapayak gumi ka langit. 20Pudji mehe pa Tuhan Mahatinggi ma bay nabangan kau maā siga banta nu.”
Pag-anu, ilooy ma lay buwanan si Ibram Imam Melkisedek sabahagiꞌ sapū ni mimon altaꞌ ma bay takoleꞌ na man siga sultan looy.
21Yuk sultan looy baw siꞌ man Sodom ni si Ibram, “Tuwan, mimon pangaltaꞌ ku ma bay takoleꞌ nu, ningkau na. Sugaꞌ bong siꞌ la kadarihan jaꞌ ningkau, papoleun jaꞌ siga raayat ku.”
22Iya tampung si Ibram, “Sapahan ku baw pa Papuꞌ ku, yana Tuhan Mahatinggi ma bay mapayak gumi ka langit, 23basta yaꞌ baw situ ku ngaddoꞌ pangaltaꞌ nu san dainsiꞌ salban atawa pun disu ingkot tumpaꞌ. Meꞌ naa ina, yaꞌ na sina mintu luu dapat nu māꞌ danan ku magkadayahan sabapan nu. 24Yaꞌ baw sina ku ngaddoꞌ oy maka oy na sarī man balanjaꞌ ma lay na kalanduꞌ takakan meꞌ siga jama ku. Sugaꞌ luu gi baw tu gapiꞌ ku yana ga si Anel, si Eskol ka si Mamre. Sila na jaꞌ sohoun ngaddoꞌ bahagiꞌ da.”
လက်ရှိရွေးချယ်ထားမှု
Panagnaan 14: sjm
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2021, Wycliffe Bible Translators, Inc. All rights reserved.