Panagnaan 13
13
Sakkat si Ibram ka si Lut
1Pag-anu, lay na si Ibram ka si Saray lakka man Ejip sampay lay na sila nakka Negeb pabalik ddas ka mimon altaꞌ da. Kamanakan da pun, yana si Lut, lay na du boo da. 2Na si Ibram ilay siꞌ tud dayahan na. Meka na baanan bili-bili na, kambing na, ka ga sapiꞌ na. Maka meka na du mmas na ka dublun pilak porol.
3Pag-anu, lay na baw sila lakka man Negeb maglentehan padisu-padisu lahat. Song hallom lay na sila nakka bay limpaꞌ da ni sallangan Betel ka Eyay. 4Boꞌ ndooy na silay man si Ibram bay nambak batu binuwat pangulbanan maruhuꞌ. Dari ndooy siꞌ lay du si Ibram numba Tuhan pabalik.
5Kuwan si Lut siꞌ tu ma bay mmeꞌ ni si Ibram padisu-padisu lahat, meka du baanan ga bili-bili na, ga kambing na, sampay ga sapiꞌ na. Maka meka na du lumaꞌ luna na para anak-nda na sampay mimon tindog na. 6Na hangat lipat man lipat na pin kahayop-hayopan si Ibram ka si Lut, song hallom yaꞌ na haluhaya man da makan ga hayop da. Dari yaꞌ na sila kapagdambuwaꞌ ni lahat looy. 7Boꞌ na, sasaꞌ-manasaꞌ na ga tukang ngipat ga hayop si Ibram ka ni si Lut. Sarī gi, ndang luu gi ndooy kahayop-hayopan bangsa Kanan ka bangsa Peris ma ndang maglahat ndooy.
8Dari yuk si Ibram ni si Lut, “Toꞌ, kita itu anak-sipahanak. Daa subay na pin kita sasaꞌ. Yaꞌ sina sikatuwaꞌ wā sasaꞌ-manasaꞌ siga tindog ta meꞌ tuu. 9Ndang-ndang luha du paglahat tuu. Gam na kita sakkat. Meneꞌ na ko. Bong ko pa saddopan, aku pa mataallaw. Bong ko pa mataallaw, aku pa saddopan.”
10Pag-anu, ilooy ma ngaliling na si Lut pa dambilaꞌ pa dambilaꞌ. Pag awop na pa kaluhān Labbak Juldan huwin pa daira inawnan Soal, ndaꞌ na mahap sambuhan katumbu-tumbuhan ndooy. Maka takita na na sukup boheꞌ lahat looy. Ni lilingan na subay ga tinanom-tinanom Tuhan atawa tanaꞌ ayad ni bihing Sōng Nayil ndooy ni Ejip. (Jaman looy ilay siꞌ, yaꞌ gi bay hinansu meꞌ Tuhan Sodom ka Gomora, yana siga daira ni labbak lahat looy.) 11Dari siꞌ ilooy na bay peneꞌ si Lut, yana Labbak Juldan labbasakayi huwin pa mataallaw. Sangkon ilooy na poonan man na bay pasakkat man Paꞌ na Ibram. 12Ga si Ibram siꞌ tu masi tamban ndooy ni Kanan. Kuwan ga si Lut, lay na maglayin pa Labbak Juldan sampay ndooy na sila bay matangge siga lumaꞌ luna da ni bihing daira Sodom. 13Salla na, kuwan jama Sodom baw siꞌ tu, biddaꞌ na jahallis da. Dusa da pa Tuhan tud yaꞌ na taambat.
14Na lay jaꞌ siꞌ palakka si Lut, lay na baw Tuhan magpalman ni si Ibram, yuk na, “Lilingun na sikaliput lahat tuu sa tapus-tapus mata. 15Dean ku na sina mintu ningkau sampay na ga panubuꞌ nu mimon lahat tuu. Sagannap tanaꞌ ma takita nu satapus-tapus mata, kapakaam na sina mintu saumu. 16Maka panubuꞌ ma dean ku ina mintu ningkau, mas mura gi initung momok tanaꞌ man sila tandaꞌ ni kaeka da. 17Dawnun sa kaluhān lahat tuu sampay tahaꞌ na batan dean ku na sina mintu ningkau labbasakayi.”
18Na yaꞌ gi siꞌ hallom, lay na baw maglayin ga si Ibram pa Hebron ni bihing siga poon kayu mehe njawom tanaꞌ si Mamre. Takka ndooy, lay du si Ibram nambak batu binuwat pangulbanan man na ngulban pa Tuhan.
လက်ရှိရွေးချယ်ထားမှု
Panagnaan 13: sjm
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2021, Wycliffe Bible Translators, Inc. All rights reserved.