JOHAN 2
2
Kana Khua Mo Hoi Puai
1Nihnih hnuaah Galilee peng Kana khua ah mo hoi puai um i. Jesuh ai nu khai ciata ah um ai, 2Jesuh le a hnuahlunte heh sawm tlang ve i. 3Amahte cabitti a bo fangin a nu in Jesuh hnenah, “Cabitti nai nawn lo nakhaw,” tiin rel i.
4Ciafangin Jesuh in, “Mi nu, i rel duh mah; i can khim lai lo i,” tiin ti i.
5A nu in hnenumte hnenah, “A ruaihnak hmuahhmuah bawn tu ih,” tiin ti i.
6Ciata ah Judah dan ai a umhnak bangin amahte kut somhnak ca tuhin ti ralca bel lian puipui bel ruk dah tlang i. Bel khat in galan#2:6 2:6 Galan pakhat in tidap palang ruk tluk thual i kul in sawm thum tian va thai i. 7Jesuh in hnenumte hnenah, “Hemi belte heh ti a dim in thun tu ih,” ti i. A liam tianin thun ai, 8anite hnenah, “Bel songai ti khiah suak tu ilai puaibawnhnak a tawlreltu pa hnenah pe tu ih,” tiin ti i. Tidap heh pe tlang i. 9Ciami tidap khiah cabitti ah cang ai ciami heh tep i. A konteng in ciami cabitti hleng i, ti ling tlang lo i; tidap a suaktu hnenumte incen ling tlang hlen i. Ciamanin mohoitu pa ko ai, 10a hnenah, “Aisusu inkhai cabitti ur ber heh a hmasaber ah pe de ai mi tampui a kham deuh fangin cabit menma pe de i; ikhalselai nang tu cabit ur ber heh a tawp tian pe ben isi,” tiin ti tlang i.
11Jesuh in he ngaihsunurkul hmasaber heh Galilee peng Kana khua ah bawn i, Ciatihin a songlawihnak larruai ai a hnuahlunte in sang tlang i.
12Cia hnuaah Jesuh le a nu, a naute le a hnuahlunte thawn Capernaum khua ah feh tlang ai ciata ah ni tlawmniu song cam tlang i.#Mat 4:13
Biakinn Ah Jesuh Feh I
(Mat 21:12-13; Mar 11:15-17; Luk 19:45-46)
13Kansuak Puai can a khim dawn fangin Jesuh tu Jerusalem ah feh i. 14Biakinn a hleng fangin ciata ah kawlpaw le tuu le lailengte zuartu le tangka a thlengtute amahte cabuai ah a to tlang hmu i. 15Ciamanin rihual heh vithnak fung ah merh ai, tuu ituseh kawlpaw ituseh a zuarhnakte vit ai Biakinn songin hnawt sek i; tangka thlengtute ai cabuai khai bungbaleh sek ai tangka nawi pawl khai vorh sah sek i. 16Laileng zuartute tu, “Heta in ning lailengte heh tlanpui tusek ih! I Pa ai inn heh ning dawr zuarhnak ah hmang nawn mah ih!” tiin thupe i. 17Ciafangin a hnuahlunte in, “Aw Pathian, kaimah in na inn thinkarhhnak heh i thinlung songah mai bangin ko i,” tiin Lai Thianghlim in a tihnak hih tlang leh i.#Saam 69:9
18Judah mi hotute kawi tlang ai, “Hebangtluk thil bawnthilhnak thu nai ing, ti na larruaihnak ah ziang ngaihsunurkul kin hmuh tuh isi?” tiin zawt tlang i.
19Jesuh in, “Hemi Biakinn heh bal tu ilai ni thum songah sa ben leh tuh ing,” tiin ti i.#Mat 26:61; 27:40; Mar 14:58; 15:29
20Anite in, “Ni thum songah sa ben nitur im? Hemi Biakinn sahnak ah kum sawmli le kumruk rai i,” tiin ti tlang i.
21Ikhalselai Jesuh in a rel nuamhnak Biakinn tu amah ai taksa ruangpui i. 22Ciamanin Jesuh thihhnak in a tho leh fangin a hnuahlunte in amah ai taksa ruangpui rel i, ti khiah ling tlang leh ai Lai Thianghlim ai relhnak le Jesuh ai relhnak heh sang tlang i.
Jesuh In Minung Zia Ling Thil I
23Jesuh tu Kansuak Puai song Jerusalem khua songah a um laiah mi tampui in ngaihsunurkul a bawnhnak hmu tlang manin ani tu sang tlang i. 24Ikhalselai Jesuh in a thinlung veksen in sang lo i, zaimantifangin minung heh zaibang i, ti khiah ling sio i. 25Amahte thula tu midang in rel salawn kul lo i, zaimantifangin amahte thinlung zaibang i, ti khiah amah in ling sio i.
လက်ရှိရွေးချယ်ထားမှု
JOHAN 2: RZB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Zanniat Bible © Bible Society of Myanmar, 2018.
