SEMPANHNAK 19
19
Sodom Mite A Sual Zia
1Zan lam nitla fangin vancungmite pahnih Sodom khua hleng kawm ai Lot tu minung tawk dun hmun khuapui kotka ah to i. Lot in vancungmite pahnih a hmu fangin hmuak tuhin feh i. Lai tong in ut ai, 2“I bawipate, ning i hio le i sikhaw i inn ah zancam kawm tu ih. I inn ah cam tu ilai ning ke khai som tu ih. Thangha zingtla niu in feh leh tu ih,” tiin ti i. Anite in, “Ilo i, tun zan tu khuapui ai kotka ah cam tuh i ing,” tiin ti i. 3Ikhalselai Lot in a inn ah zancam tuhin ngaihhar kun manin hnuavai fangin a inn ah zancam tuhin lungkhim kawm leh i. Ciafangin Lot in col tel lo sang bawn ai zanfak ur ngai ai kawm i.
4Cia zan mikhualte mitmu hlanah Sodom khuasong minungte upa naupang ti loin Lot inn kulh tlang i. 5Lot heh ko ai. “Na hnenai zancamtu mikhualte akonah i? Suah tucuk, sualpui tuh i ing,” tiin au tlang i.
6Lot tu dawngkham in sumpua ah suak ai dawngkham a kham hnuaah, 7“Rualpuite, ciabang thilpha lo heh bawn tum hram mah ih, tiin ninghio ning ngen ing. 8Sik tu ih, heta ah fenu him pahnih nai ing. Ning suah sah tuhai ning hiamhnak angin bawn tu ih. Ikhalselai he mikhualte vumah zaikhai bawn hram mah ih; zaimantifangin i mikhual i ai i inn ah hleng kawm zo i,” tiin ti i.#Thuk 19:22-24
9Ikhalselai anite in, “Nang ramdang mi rongra; kin pial tu; cia bawn tu ih, khia bawn tu ih, tiin zaiman kin ti isi? thawn tu; cia hlahle nangmah sawn na tuahmawh ngah tuh i ing,” tiin Lot heh tul ai dawngkham bal tum tlang i. 10Ciafangin a mikhualte pahnih in Lot heh dawngkham in duk ai inn songah lut hnuaah dawngkham kham i. 11Cia hnuaah dawngkham pualam ai umtu mi senpui tu upa naupang ti loin mitcawruai sek manin anite in dawngkham hmu thil lo ihang.#2Kum 6:18
Lot Tu Sodom Khua An Suak I
12Cen a mikhualte pahnih in Lot hnenah, “A dang songkhatte tang nai aw lai sim? na fapate, na fanute, na fanute ai pasalte, ko tu sio lai he khua an a rang ngai in suak tu ih. 13Zaimantifangin kinmah in he khua heh siatsuah tuh sek i ing. Hemi khuasong minungte sualhnak le siavahnak heh Bawipa in za zo ai, Sodom khua siatsuahtu tuhin amah in kin hlat i,” tiin ti i. 14Ciamanin Lot tu rang ngai in feh ai a fanute ai paa tuh tlangvalte hnenah, “Rang ngai in he hmun an suak tu ih; zaimantifangin Bawipa in he khuapui heh siatsuah tum ihang,” tiin rel i. Ikhalselai anite in hnihsa menma ah ruat tlang i.
15Zing lam varciang fangin Vancungmi in Lot hnenah, “Rang tu; na nupui le na fanute pahnih tlanpui tulai suak tu zual ih; he khua siatsuah ai a pairal fangin ning tel ngah mawh ngai,” tiin ti i. 16Ikhalselai Lot in hnuakfual deuh i. Ciafangin Bawipa in ninghio thotho ai Lot le a nupui le a fanute pahnih khiah vancungmi in amahte kut in duk ai hnarpua lamah fehpui teu i.#2Pet 2:7 17Hnarpua a hleng tlang fangin vancungmi pakhat in, “Ning luangsuah tuhin tlan tu ih; ning hnua lam her loin zawllai ahkhai comlawk mah ih. Mual vumah tlan tu ilai ning thi tuh lo i,” tiin ti i. 18Ikhalselai Lot in, “Bawipa ciatihin cang maseh, 19ning i hio ai i nunhnak i zuah zo isi. Tlang vum tu hleng ben tuh hrimhrim lo i ing, a hla ze lai ai ciata kin hleng hlanah siatsuahhnak in i man tuh thotho i. 20Bawipa, khia khua niu hmu ing. Khia khua niu tu a nong niu ngawn ai hleng man tuh ing. I luathnak tuhin khia khua ah feh tuh ing,” tiin ngen i. 21Ciafangin Vancungmi in, “Na ngenhnak angin lung na khimpui ing, khia khua heh siatsuah tuh lo i ing. 22Rang ngai in tlan tu taito. Khia khua na hleng hlanah zaikhai bawn tuh lo i ing,” tiin ti i. Cia khua heh, “Khua cikniu,” tiin Lot in ti manin Zoar#19:22 Zoar tihnak tu Hebrew in a cikniuti thawn a awsuah bang dun i. tiin ko tata i.
Sodom Le Gomorrah Siatsuahhnak
23Ni suak ai Lot tu Zoar khuasong a hleng fangin, 24Bawipa in Sodom le Gomorrah khua vumah katmai van in siruai i.#Mat 10:15; 11:23-24; Luk 10:12; 17:29; 2Pet 2:6; Jud 7 25Ciatihin khuapuite le phairawnte, khua songai minung hmuahhmuah, lairam vumai pohnak hmuahhmuah thawn Bawipa in cimpil sek i. 26Ikhalselai Lot ai nupui tu a hnua lam her manin ci khuam ah cang i.#Luk 17:32
27A thangha fangin Abraham tu Pathian thawn a tawk dun hmunah rang ngai in feh i. 28Sodom le Gomorrah khua le phairawn tluan a sik fangin maipual khu bangin maikhu kai ngualngo hmu i. 29Ikhalselai Pathian in phairawn ai khuapuite a siatsuah fangin Abraham tu hai lo ai Lot heh himniu in luatruai i.
Moab Le Ammon Mi Suahkehhnak
30Lot tu Zoar khua songah um a lau manin a fanute pahnih thawn mual vumah thawn ai lungkhukua songah um tlang i. 31Cia fangin a unu in a naunu hnenah, “Kin pa heh a hlombawr tete zo ihang. Fate kin nai thai tuhin a dan bangin kin hoitu tuh lailung vumah pasal um fawn lo i. 32Ciamanin kawitu, kin pa thawn pawl dun in fate kin nai thai tuhin cabitti ri thai in tul ngasing,” tiin ti i. 33Cia zan ah amahte pa heh cabitti ri thai in tul kawm ai a unu in a pa thawn pawl dun i; ikhalselai cabitti ri ze manin a pa in a pawldunhnak khiah ling lo i. 34A thangha fangin a naunu hnenah, “Mizan ah i pa thawn pawl dun i ing, tun zan khai cabitti pe tuh lala ai nangmah thawn pawl dun tu ih. Ciatihin kin pahnih in kin pa ai fa nai tuh ising,” tiin ti i. 35Ciamanin cia zan ahkhai anite in a pa khiah cabitti pe ai ri lala manin a fanu a nauta thawn pawl dun i. A hmasa bangin a pa tu cabitti ri ze manin a fanu nauta thawn a pawldunhnak heh ling thotho lo i. 36Ciatihin Lot ai fanute pahnih in a pa ai fa pai kawm veve i. 37A unu in fapa nai ai a hming ah Moab#19:37 Moabtihnak tu Hebrew in I pa hnenintihnak thawn a awsuah bang dun i. tiin a fanu in bawn i. Ciami fapa tu tun san Moab mite sentu i. 38A naunu inkhai fapa nai ve ai a hming Ben-ammi tiin a fanu in bawn i. Ben-ammi#19:38 Ben-ammi tihnak tu I songkhat ai fapa tica i ai Hebrew in Ammon mi ti thawn a awsuah bang dun i. tu tun san Ammon mite ai sentu i.
လက်ရှိရွေးချယ်ထားမှု
SEMPANHNAK 19: RZB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Zanniat Bible © Bible Society of Myanmar, 2018.