MATHIE 6
6
Áyí olie áyí opɔ́ gbremán phɔ
1– Ɔ́n ne ya ápasá hɛ́nmɛn tɛ́ yí lie néphan salé hɔ́n etɛ́ Yankan yí, ochɛ́sé néphan khúnbrɛn owú hɔ́n. Kasé hɔ́n etɛ́ áyí yábhɛ lókɔn, ɔ́n ma lé gɛ ápɛnsɔ́n hɔ́n The abha tho yé.
2Lóka ɛbhó jɛtɛn pɔ́ gbremán, ɛle lú lóphɔ khwɛ́ sé néphan owan hɛ, sa ńmɛ́n mɔ́nmɔnmán yí átɛ́ hɛ́nbhúrɛ si le ábhácathé ɔ́nmɔn. Wo tɛ́ yí yábhɛ lókɔn sé néphan olri wo hwa. Mímí mɛɛ́n kranmán hɔ́n: wo pɛnsɔ́n nɔn wo gɛ kábrɛ. 3Lókhɛ́n hɛ-ɛ, lóka ɛbhó jɛtɛn pɔ́ gbremán, tɛmɛ ɛtɛ́ hrɔman, ló hɛ jɔ bhwá nbrɛn lɔ ole yé lóbhwe, 4ochɛ́sé ápɔ́ yí lókɔn olí yíbɛn ahrɔman, lónɔn hɛ The Yankan khɛ́n awu hɛ yí ɛtɛ hrɔman, bha sɔ́n hɛ lópɛn.
Áyí olie yankanla phɔ
(Ɔ́n wú Lwik 11.2-4)
5– Lóka hɔ́n éla Yankan, ɔ́n ne tɛ́sa ńmɛ́n mɔ́nmɔnmán yí átɛ́: wo, wo pɔ átho óya la Yankan hɛ́nbhúrɛ si le ábhácathé nkpɔ́mɛ́n nkpɔ́mɛ́n, ochɛ́sé néphan khúnbrɛn owú wo. Mímí mɛɛ́n kranmán hɔ́n: wo pɛnsɔ́n nɔn wo gɛ kábrɛ. 6Lókhɛ́n hɛ-ɛ, lóka ɛ́la Yankan ɔn, ɛká hɛ khúthé, ɛhɔ́n si phú, ló ɛla hɛ The abha lóne kpɔ́thé si lókɔn, ló hɛ The khɛ́n awu hɛ yí ɛtɛ hrɔman, bha sɔ́n hɛ lópɛn.
7Lóka hɔ́n éla Yankan, ɔ́n ne tɔ bhwe búdúbúdú, sa néphan ale yɛn Yankan yí átɛ́: wo bhú salé kasé wo étɔ bhwe búdúbúdú nɔn Yankan bha yé wo la. 8Ɔ́n ne tɛ́ yí sa wo, átɛsalé lóka ɔ́n ka bhi hɔ́n The Yankan yí, khɛ́n mɛ́n-ɛ ńyɛn lóyí emián hɔ́n. 9Nɛn lósi énɛn salé ɔ́n khɔ́ la Yankan o, ɔ́n tɔlé:
“Lo The abha átho,
tɛmɛ hɛ hɛ́n phɔ ofí;
10Hɛ Bhringbilí obhá,
tɛmɛ otɛ́ hɛ thɛ́n yí apɔ,
áyítathé sa ló wo etɛ́ átho a.
11Se lo ncɛ́n brɛ nɛnlí ékɛ.
12Yɔ lo yíléletɛ́ phɔ́ lo,
sa lósi, lo lɔ lo bhá khɔ́ yɔ́phɔ́ néphan
atɛ́ lo yíléle a.
13Ló ɛlé yalí lo, lo ká ásúwú mɛ́n,
lókhɛ́n ɛhɔ́n lo yɛn logbo mɔ́n mɛn.
[Átɛsalé bhringbilí,
ńsɛ́npɛ́ le ńguhá ɔ́nmɔn li hɛ ékɛ,
godo. Amɛn.]”
14Kasé hɔ́n eyɔ́phɔ́ néphan khɛ́n etɛ́ hɔ́n yíléle ɔn, hɔ́n The abha átho lɔ bha yɔ́ hɔ́n yíléletɛ́ phɔ́ hɔ́n. 15Lókhɛ́n kasé ɔ́n ne yɔ́phɔ́ néphan khɛ́n etɛ́ hɔ́n yíléle, hɔ́n The abha tho lɔ bha lé yɔ́ hɔ́n ne phɔ́ hɔ́n.
Áyí olie ńmɛ́nji phɔ
16– Kasé hɔ́n éjimɛ́n, ɔ́n ne gbrumán hɛ́nmɛn sa ńmɛ́n mɔ́nmɔnmán yí átɛ́: wo hɛ́nmɛn jrɛn, ochɛ́sé néphan khúnbrɛn owú salé wo éjimɛ́n. Mímí mɛɛ́n kranmán hɔ́n: wo pɛnsɔ́n nɔn wo gɛ kábrɛ. 17Lókhɛ́n hɛ-ɛ, lóka ɛ́jimɛ́n, ɛchó hɛ́nmɛn, ɛfɛ́n hɛ́n, 18ochɛ́sé néphan ole yɛ́n salé ɛ́jimɛ́n. Khɛ́n hɛ The brɛ abha kpɔ́thé pán oyɛ́n, ló hɛ The khɛ́n awu hɛ yí ɛtɛ hrɔman, bha sɔ́n hɛ lópɛn.
Ajayí ofɛ́n tré átho
(Ɔ́n wú Lwik 12.33-34)
19– Ɔ́n ne fɛ́n ajayí tré krɛn théji, ali ási ńdrwan le ńdagra ɔ́nmɔn lɔ yí, sídomán lɔ gbisi phwan, ló wo khwɛ́n yí sído. 20Lókhɛ́n tɛmɛ ɔ́n fɛ́n jayí tré átho, ali ási ńdrwan le ńdagra ɔ́nmɔn le gɛ lɔ yí, saji sídomán lɔ le gɛ gbisi phwan khɛ́n ákhwɛ́n yí sído. 21Átɛsalé ási hɛ jayí bha ɔn, lóne nɔn hɛ thɛ́n lɔ tré.
Áyéfí abha lephan phɔ
(Ɔ́n wú Lwik 11.34-36)
22– Ńmɛbhí nɔn ali áphɔ nánmí khanniɛn. Kasé hɛ mɛbhí yɔn mwámwá, hɛ phɔ nánmí khúnbrɛn bhá áyéfí hrómɛn. 23Lókhɛ́n kasé hɛ mɛbhí le yɔn mwámwá, hɛ phɔ nánmí khúnbrɛn bhá dubhlékhu hromɛn. Kasé áyéfí lókɔn abha hɛ phɔ, ájrɛn dubhlékhu, lódubhlékhu lókɔn bha tɛ́ nkhóo!
Yankan le jɛtɛn ɔ́nmɔn
(Ɔ́n wú Lwik 16.13)
24– Lephan brɛ lé gɛ khwɛn hwánthe mɔn hɛ́nmɛn nɛn: ánman sa bɛn mɛ, ló ánman pɔ́ lójɔ. Ánman ní mɛ́nbrɛ bɛn phɔ, ló ánman sa lójɔ mɛ. Ɔ́n man lé gɛ khwɛn Yankan hɛ́nmɛn nɛn, khɛ́n ɔ́n khwɛn jɛtɛn lɔ hɛ́nmɛn nɛn.
Áyɔn se salé opɛ mwasrui bhá Yankan tho
(Ɔ́n wú Lwik 12.22-31)
25– Lóhɛ́nthé nɔn achɛ mɛɛ́n kranmán hɔ́n salé: Hɔ́n nɛn ɔ́n ma lí le hɔ́n ndu ɔ́n ma nán khɛ́n ábha chɛ́ hɔ́n bhá mɛpɔ́, ɔ́n ne tɛ́ lóphɔ dandan. Ádɛgɔn ɔ́n ma bhó mrwɛn phɔ, lóhɛ́nthé lɔ ɔ́n ne tɛ́ dandan. Ńmɛpɔ́bhá yɔn brɛn nɛnlí, saji áphɔ nánmí lɔ yɔn brɛn ádɛgɔn, wú léliló? 26Ɔ́n gbɛnɛn wu átho nkɔcran éfe jekhali a, wo-ɛ ńyámí lɔ wo lé ha, saji ńyámí lɔ wo lé bhú, ńyámí lɔ wo lé gba bhurɛhɛ́n ákɔ hromɛn tré, lótɛ khɛ́n hɔ́n The abha tho sé wo nɛn wo lí! Wú hɔ́n jɛ le khɔnman brɛn ńkɔ́cran? 27Hɔ́n hrómɛn, abɛn nɔn ábha khɔ́ mɛ́n mwanhɛ́nbhu dɔndɔn hromɛn chɛ́ mɛ́n mɛpɔ́bhá cí bhɔ́tho háne npɔ ɛ?
28Ló bítɛ khɛ́n ádɛgɔn hɛ́nthé, hɔ́n etɛ́ dandan ɛ? Ɔ́n wɛ́sɛ ábithe nbi nánnanhɔn si ákhɔ́ lé a, wo-ɛ júmán lɔ wo lé lí, ńdɛgɔn lɔ wo le thán, 29lótɛ khɛ́n mɛɛ́n kranmán hɔ́n salé, Salomɔn bhwá nbrɛn lɔ, mɛ́n bhringbilí khúnbrɛn hrómɛn, ńnɛn pɛ ádɛgɔn ayɔn brɛn ńbi nánnan brɛ lókɔn bhrɔ́ɔ́. 30Néphan alepɛ mímíbhú! Ńbi lókɔn atre bithe ncɛ́n, khɛ́n npi obha hɔ́n fɔ́nka átɛn hromɛn, kasé Yankan khwa wo dɛgɔn yɔ́n yábhɛ nɛn, kalósi akhɔ tɛ khɛ́n hɔ́n, anman nɛ́n khwa hɔ́n dɛgɔn yɔ́n brɛn nɛn e? 31Ɔ́n ne ya tɛ́ dandan, khɛ́n ɔ́n tɔlé: “Ébí nɛn óbha lí? Ébí ndu óbha nán? Ébí dɛgɔn óbha khwa ɛ?” 32Néphan ale yɛn Yankan nɔn ánɛn lóyí lókɔnhɔn ákakhúnbrɛn. Khɛ́n hɔ́n The abha tho-ɛ yɛn salé hɔ́n énɛn lóyí lókɔnhɔn. 33Lóhɛ́nthé ɔ́n phrɛ thwási nɛn Yankan Bhringbi khúbhɛ́, le áyíyálitɛ́ ali áyí ánnɛn khɛ́n. Ló áyí khúnbrɛn akha, Yankan bha bhó bhɔ́tho sé hɔ́n. 34Ɔ́n ne bhu npi cí ebhá cí phɔ mwanhɛ́n, lée npi cí bha bhú mɛ́n nbrɛn phɔ mwanhɛ́n. Ágbrelí abha ácí brɛ brɛ khúnbrɛn hrómɛn ɔn, anwú mɛ́n nbrɛn bhwe.
လက်ရှိရွေးချယ်ထားမှု
MATHIE 6: ENT96
အရောင်မှတ်ချက်
မျှဝေရန်
ကူးယူ
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmy.png&w=128&q=75)
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Ebrié New Testament © Bible Society of Côte D'Ivoire, 1996.