Genesis 12
12
Ja jastal ek' yuj ja Abrahami
(12:1—25:18)
Ja Dyosi, stsa'a ja Abrami
1Ja Dyosi, yal yab' ja Abrami:
—A'kan wa moj sok wa moj alijel jumasa, ti la waj ja b'a lu'um oj je'a wi'i. 2Sok wa wintil jumasa oj tojb'esex jun niwan chonab'. Jel lek oj kil'a. Sok jel niwan oj ka iljan, yuj ja we'n jel lek oj ajyuk ja tuk jumasa. 3Ja ma' lek oj yil'a jel lek oj kil ja ke'n, ja ma' mi oj yil'a leki, jach'ni ja ke'n mi oj kil'e lek. —Ts'akatal, yuj ja we'n, ja'yuj jel lek oj kil spetsanil ja kristyano jumasa swinkil ja niwak chonab' jumasa b'a lu'umi—
4-5Ja Abrami, sk'u'an ja jas alji yab' yuj ja Dyosi, el b'a Harani mi b'a k'ot tek'ana, man k'ot b'a slujmal ja Canaani. Yi'aj ja sche'um Sarai, ja yijts'in Loti, ja ya'tijum jumasa smana b'a Harani, sok spetsanil ja jastik sb'aji. Ja k'ak'u jaw ja Abrami, ay yi'oj ox tajb'e sok jo' lajune jab'il (75).
6Ja k'ak'u jumasa jaw ja cananeo ti'to naka aye b'a slujmal Canaan. Ja Abrami ch'ak sb'ejtes spetsanil ja lu'um jumasa jawi, k'ot man b'a Siquem ja it b'a'y ja te' b'a More sb'i'ili.#12:6 Ja Moreji, jun ib'e yaxte' 7Ti je'ji sb'aj yi tiw yuj ja Dyosi, ti alji yab'a: —Spetsanil ja lu'um jumasa iti, oj ka'yi wa wintil jumasa—
Yuj ja sje'a sb'aj ja Dyos ja tiwi, ja'yuj tojb'es jun altar ja Abrami. 8Mi ti kan tiwi, cho och b'ejyuk ti waj b'a yaxk'ulaltik b'a stojol wax jak ja k'ak'u yuj ja Beteli. Yajni k'ot ja tiwi, ti stojb'es ja yal snaj sok k'u'utsi. Ja chonab' Ai, tey b'a stojol wax jak ja k'ak'u, jaxa chonab' Beteli, ti b'a stojol wax och ja k'ak'u. Cho jach'ni ja tiwi stojb'es jun altar b'a oj stoy ja sb'i'il ja Dyosi. 9Tsa'an cho el ja Abram ja tiwi, takal takal waji, ti waj b'a stojol ja takin lu'um k'inal jumasa b'a ko'el k'inali.
Ja Abrami, k'ot b'a Egipto
10Ja k'ak'u jawi, jel tsats ko' ja wa'in b'a spetsanil ja slujmal Canaani. Jel tsats ja wa'ini, ja'yuj ja Abrami, ti waj b'a Egipto yuj ja ay wa'el ja tiwi. 11Yajni, mojanxa aye b'a Egipto ja Abrami, ti yal yab' ja Sarai sche'um:
—Mi ma' lom oj ek' sk'ujol yujni jel tsamala'a— 12Yajnix waj yil a ja egipsiano jumasa, ta sna'awe k'a yuj jche'uma, ja ke'n oj smil'one, jaxa we'n oj a'jan kan sak'an. 13Ja'yuj, ja yajni oj sjob'e' awi'i, ala yabye yuj jmoj alijela. Ja jachuki ojni yil'one leka, sok mi jas sxiwela sb'aj oj ek' kujil—
14Yajni k'otye ja Abram sok ja Sarai b'a Egipto, jaxa egipsiano jumasa jelni tsamal yilawe ja ixuk jawa. 15Ja'yuj ja ya'tijum jumasa ja ma' ay ya'teli, waj yal'e yab' ja mandaranum ja stsamalil ja ixuki. Ti yala ja mandaranum a i'juk och yi b'a niwan na'its. 16Ja mandaranumi, jel lek yila ja Abrami, sk'eb'ayi jitsan chej, nan wakax jumasa, snan sok swaw burro jumasa, ya'tijum sok ya'tijum ixuk jumasa, cameyo jumasa. 17Spetsanil ja iti, mi t'un lek yila ja Dyosi, yuj ja jawi, ja'yuj sjeka yi niwak chamel ja mandaranum sok ja yuntikil jumasa. 18Jaxa mandaranumi, juts'in sjeka spayjel ja Abrami, ti yal yab'a:
—K'elawil ja jas a k'u'lan ki'i— ¿Jasyuj ja mi a wal kab' yuj a che'um ja ixuk iti b'a? 19—¿Jasyuj ja a moj alijel a wala? —Na'awik t'unuk jaxa lek jtaukxta jb'aj sok jastal jche'um b'a. Ja ya'n, i'aj wa che'umi, elan ja ili—
20Tsa'an ja mandaranumi, yal yab' ja soldado jumasa, a ya'we eluk ja Abram ja b'a Egipto. Jaxa ye'nle'i, snutsuwe'el ja Abram sok ja sche'umi, ya'we yi spetsanil ja jas sb'aji.
လက်ရှိရွေးချယ်ထားမှု
Genesis 12: YABD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Sociedad Bíblica de México 2021