Mark 7
7
Aadaŋgee ku kookuweyyo
(Elloŋ Matiye 15.1-9)
1Guu lekkiɗo Pariziyennigee o aalimnigee daare ku Kitamniti Muusa ma ase min geegar ka Zerizalem, gu asiɗe timma gu kadarɗiya Iisa. 2Guu elliɗiy jobookeetee Iisa daare maa gu tewɗo bala apilo ta picco aleŋ ta aadaŋgeeco Yawudigeyyo. 3Guta pa Pariziyennigee ma gicco Yawudigee paracco karmayyay aadaŋgeeco maa gu kookuweeco garawwiyoo. Guta teewa ɗa bala apilo ta picco samaane. 4Gaa gimu ase min sunniti, ga acakka ƴa omma gaa teeɗo ka. Guta pa lekka aadaŋgeeco daare payya maani maa gu karmayya, aleŋ apilo ta kuraakeyyo o ta ondigeyyo o ta supiraŋgeyyo. 5Guu Pariziyennigee guta kotti o ma aalimnigee ku Kitamniti Muusa inniyya Iisa goo: «Ayme gu jobookeecam alɗica jobokka ɗa aadane tee ta kookuweetine gu tewɗo ma picco maa gu apalle ɗa aleŋ maa gu gaarine?» 6Gaa Iisa tiiliyyoo gaa: «Kuŋ ay giimi ma beneyya ma beneetoŋ ka, ka galbigeetoŋ pa kayti. Beneyti Mellayi maa ga beneyye ma nabiinice Esaya min tippa ma gaartoŋ ay tirta. Mella pa gaa:
“Giimi kooko cepelliy uwwa semeetaw ma beneeco ka,
ma galbigeeco pa gu aaye arro min oko naa.
7Aabidico kulla gayee ɗa maatiki,
asan gi giraane maa gu garaayo oko giimo ay hukumnigee
maa gu giimi cemekka min kayyeeco ka#7.7 Elloŋ Esaya 29.13..”»
8Gaa Iisa beneyyiɗe payya gaa: «Hukumnigeetee Mellayi ƴa ku dowwiyoo, kuu karmayɗe aadaŋgeeco giimo.
9«Ku ibina pe poocico hukumnigeetee Mellayi, kuu joboɗɗo ka aadantoŋ, 10asan ga Muusa beneyye gaa: “Cipiliy semeetee taccum o ku yaacum.” Gaa beneyyiɗe kulla gaa: “Ma beneyya miɗɗa oko tatti e baŋ ga oko yaati ay kee ka diyaawi#7.10 Elloŋ Oomiti min Masir 20.12, 21.17 o Soƴoowee ku Saɗikaŋgeyyo 20.9..” 11-13A kuŋ soopa garkayyay giimi kuu ga ay tirta appe ga gimu beneyyiyyee oko tatti e baŋ ga oko yaati gaa: “Lawwi maa na aŋka ampane kee na moogiɗum ay korban.” Kuu beneyya goŋŋakite pa, ku beree botol oko gimu kaaka ga alɗo lee ɗa payya ya maatiki oko tatti e baŋ ga oko yaati. Ma keeke pa, ku duwiyee oko beneyti Mellayi ma aadaŋgeetoŋ maa ku garkayya. Kuu lewɗo pe garrarri maani ma saabayye aleŋ kooko goŋŋa.» (Beneyti Iisa maa ga taale gaa korban keeke pa goo ‘saɗikane oko Mellayi’.)
Lawwi ma negekka gimu unti Mellayi
(Elloŋ Matiye 15.10-20)
14Gaa Iisa beneyyiyyoo payya oko giimi ku maani koo ma temekkiyee gaa gu saapu katta. Gaa beneyyiyyoo gaa: «Giyyoŋga parattoŋ beneytu keeke o ku ibinoŋga samaane. 15Lekka ɗa maatiki ka renta ma on̰ee oko gimi, gaa niŋgiyya unti Mellayi. Ma negekka gimu ay ma okomma soo min galbanti. 16Maa gaa lekka deyya ku giyyiti ga giyyu samaane!»
17Gaa uttiyyoo oko giimo gaa deeɗe un̰n̰a ger kaƴi aɗe. Guu jobookeetee enewɗiya oko masal teete. 18Gaa tiiliyyoo gaa: «Kuŋ kulla gi giraanitu on̰owwitoŋ ɗa missa e? Lekka ɗa maatiki ma asaa min renta gaa un̰n̰iɗo aatti gimi ga asiyya niŋga unti Mellayi! Ku ibinya ɗa keeke e? 19A gata pa maatiki kaaka on̰aa ɗa galbanti, innasoopa ga on̰aa aatti ka, gaa palliyya.» Beneyti keeke maa ga beneyye ga aŋka ga gaariyyo kadar gu lawwi paracco ay ku tiyaawi#7.19 Elloŋ Lubaakico N̰amaakeetee Iisa Masi 10.9-16.. 20Gaa beneyyiyyoo payya gaa: «Ma negekkaa gimu unti Mellayi soopa ay gaari ma okomma min ɗakko galbanti, 21asan ga ay min galbanti gimi appe gu okomɗo gu moyoowi ku miɗɗa ma esekkayo diyyo ta daato e baŋ pa ta miɗaayo bala paate, o maaso, o diyaw ma aaniyo, 22o un̰n̰o oko daatti gimi e baŋ ga oko mittí daatti, o kaarito ta lawwo, o liyaw ta gaari ku miɗɗa, o daɓallo, o diyyo ta zeneyyo alala, o girlo, o n̰ilaaki, o cipilo ta zii, o liyaw ka awaaki unti Mellayi. 23Gaari ku miɗɗa kooko paracco okomma min ɗakko galbanti gimi, o gu guta appe ma negekkaa giimi unti Mellayi.»
Daate ma ay Yawudiŋga ɗa dowwaca galbantí oko Iisa
(Elloŋ Matiye 15.21-28)
24Gaa min iŋaa ga Iisa waciɗe ga ƴiiliɗe, ga kaatiɗe kiɗa ta Tir. Gaa deeɗe un̰n̰a ger kaƴi aɗe ma gubbo ka, asan ga aŋka ɗa gu giimi leeɗe kabarre. Gaa ma kaaka aɗe gu giimi leeɗiyee kabarre. 25Gii lekkiɗo daate kaƴi aɗe maa gi runtí ga aarinne deegeyyica. Gaa maa gi giyyikki gi asiɗe koɗokka gi asiɗe gala asintee. 26Gita pa ay gima ma ay Yawudiŋga ɗa, weewica soo kiɗa ta Pinisi ma aaye aattí kiɗa ta Sirii. Gii malmiliyya Iisa gee ga ban̰n̰u ga pittitiiga aarinnití runtí. 27Gaa Iisa beneyyitti gaa: «Duwaayo ƴa omma oko miico gu tewɗo gu ayawɗo, asan gi ay tirta ɗa ki iccicca tiyawco miico, kii uwwiyyooca oko ronco kan̰n̰o.» 28Gii tiiliyyee gee: «Beneycum keeke ay tirta appe, miltu, innasoopa gu ronco kan̰n̰o kulla ma ay balti taabulli son̰son̰n̰aca aɗe tiyawco miico ma sobaa kiɗaati.» 29Gata pa tiiliti gaa: «Mileŋ ka beneyye goŋŋa, ka addo appe o gi runte ga aarinnití oome.» 30Gii waciɗe gii yookiɗe girtí gii deeɗica gassa runtí gii aaye daŋgilo o aarinnití okomme.
Gimu ma ay ambuuku o ga liitti rebelle
31Gaa Iisa kaatiɗe min kiɗa ta Tir, gaa ƴiiliɗe ma geegar ka Sidon, gaa ƴiiliɗe kiɗa ta Gawaagargee Ku Orro#7.31 Gawaagargee Ku Orro pa goo Dekapolis ma beneyyi ka Gireknigeyyo. gaa yookiɗe baharre ta yaata tee ta Galilee. 32Maa ga sarɗe, guu giimi itiriyyee gimu ma ay ambuuku o ga beneyyi raɗɗee. Guu wakkiyya Iisa goo ga gageegu pittee ziiti. 33Gaa Iisa tirriyiyya arro min oko giimo, gaa issiyyeegu pittee deytee. Gaa pisiɗe olo pitti, gaa eesiyyeega liitti. 34Gaa cukilɗe uwwa samaani. Gaa naasiɗe raɗɗa ma inno gaa: «Epata#7.34 Epata ay beneyyi ka Arameyyenigeyyo.!» Epata pa goo ‘Iyyu!’ 35Gaa ma haŋka keeke aɗe gu deytee iyyiɗe o ga liitti ipire. Gaa beneyɗo saa pe samaane. 36Gaa Iisa sartiyiyyoo gaa gu addo beneyya ɗa ya oko gimu kaƴi ka kulla. Gata ƴa sartayyayo o guta pa beneyya saa pe oko giimo ta ƴiila. 37Guu giimi ajjibiɗe saa pe ta kaw, guu beneyɗo goo: «Gaartee paracco maa ga leewa samaane ta kaw. Ambuukee ɗe kulla ga eyay, gu gewɗo o maa gu letticco rebelle kulla ga eperrayoogu, gu beneyɗo samaane!»
လက်ရှိရွေးချယ်ထားမှု
Mark 7: mmy
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2019, Wycliffe Bible Translators, Inc. All rights reserved.
