Maariko 3
3
Yëësu arahwënia ömöntö urusikö urwa Obhotooro
(Mataayo 12:9-14; Ruuka 6:6-11)
1Hano urusikö urwöndë urwa Obhotooro rwaahikirë, Yëësu akasoha mu-nyumba iya esango iya Abhayahudi, Kaperenaumu hayö. Mu-nyumba muyö, yaarenga-mo ömöbhëëru uwa okobhoko. 2Abhafarisaayo mbaaitaahanga Yëësu nyoore nahwënia ömöntö uyö urusikö urwa Obhotooro. Okore hano araamuhwëni, bhanyoore ikibhuno ikya ukumushongera. 3Mbe, Yëësu akatëëbhya ömöbhëëru uwa okobhoko uyö igha, “Nshö wemerre ghatëghatë hano.” 4Mbe, Yëësu akabhöörya abhantö bhayö igha, “Ne-ngʼana kë ikwikërribhwa ekorwe urusikö urwa Obhotooro, no-kokora amangʼana amaiya, kasi amaghogho? Ukuhwënia, kasi ukwita?” Bhakakira kiri.
5Yëësu akabhamoghorra amaiso bhonswe igho eno arërëëyë, akabhaabhayera mo-nkoro iyaaye, ko okoghera iya emetwe ighyabho ëmëköngʼu. Ho Yëësu yaamarrë akatëëbhya ömöbhëëru uyö igha, “Rambora okobhoko ukwaho.” Ömöntö uyö akarambora okobhoko ukwaye, kamwë igho kokahwena! 6Hayö na hayö igho Abhafarisaayo bhayö bhaare-ho bhakarishoka kebhara, bhakakora ikiina, bhakashumaasha na abhasoorani abha rikomo irya omokama Herode Antipa.#3:6 Abhasoorani abha rikomo irya omokama Herode Antipa. Riyö ni-rikomo irya Abhayahudi ryaarë, reno ryaarenga na singuru. Tiryahanshaini na irya Abhafarisaayo hë. Kasi bhonswe igho bhoobhohanga ko bhoora Yëësu yaamanyekaini ku-kyaro kyonswe igho. Ku bhuyö bhakatuna enshera iya ukumwita. Bhakasimya ukutuna enshera iya ukwita Yëësu.
Abhantö abhaaru bharaghya ku-Yëësu
7-8Mbe, Yëësu akatanora, akaghya ku-nyansha iya Ghariraaya hamwë na abheegha abhaaye. Rikomo rinene irya abhantö rekamosoorana, ko bhoora bhaarenga bhaighuurë amakono ghano yaakörrë. Abhantö bhayö, mbaaruurë Yërusarëëmu, na mo-mekowa ighya Ghariraaya, Yudea na Idumaaya, humbu iya omooro ughwa Yorodani, na haangʼë na imighi ighya Tiiro na Siidööni. 9Ko bhoora rikomo irya abhantö ni-nene ryaarë, ku bhuyö Yëësu akatëëbhya abheegha abhaaye bhasëëmi ubhwato, okore hano abhantö bharaahumbushane na okomohegha, asohe mu-bhwato. 10Abharööyë mbaaruhirë bhakaheghana, bhaatunanga bhamukuni-ko ko bhoora yaarenga ahwënëri abhantö abhaaru. 11Abhantö bhano bhaarë na amasambwa, bhuyö bhaamomaahanga igho, bhairekera hansë ko-maghörö aghaaye eno bharakuura bhököngʼu igha, “Uwe no-Moona uwa Waryobha örë!” 12Kasi umwene akakaania bhököngʼu amasambwa ghayö igha, ghatakaatobhorra abhantö engʼana iyö.
Yëësu arashaaghora abhatomwa abhaaye ikömi na bhabhërë
(Mataayo 10:1-4; Ruuka 6:12-16)
13Yëësu akariina ku-nguku, akabherekera abhantö bhano yaatunanga. 14Akashaaghora-mo abhantö ikömi na bhabhërë, bhano yaabhërëkëëyë igha, abhatomwa.#3:14 Abhatomwa. Maaha mo-faharaasa. Yaakörrë igho, okore bhabhenga hamwë nawe, abhatomenga okoraareka, 15kora bhabhe na ubhwera ubhwa ukwata amasambwa ukurwa ko-bhantö. 16Ghano ngo amariina agha abhantö ikömi na bhabhërë bhano yaashaaghööyë,
Simööni, ono Yëësu yaarökirë igha, Peetero,#3:16 Peetero. Ensonga iya iriina riyö ni-igha, ritare. 17Yaakobho na Yohana, bhamura abha Zebhedaayo, bhayö mbo Yëësu yaarökirë iriina igha, Bhoanerighe, ensonga iyaaryo ni-igha, abhaana abha ekebhaghatyö, 18Anderea, Firipö, Bhatoromaayo, Mataayo, Toomasi, Yaakobho mura uwa Arufaayo, Tadaayo, Simööni Omozerote,#3:18 Simööni Omozerote. Simööni yaabherekerwanga igha, Simööni Omozerote, handë igha, Simööni Omokananaayo. Amariina ghayö ngo bhaabherekeranga abhantö bhano bhaitaneranga öbhötöönööni ubhwa ikyaryo ikyabho ukurwa ko-Bharuumi. Maaha mo-ketabho ikya Mataayo 10:4; Ruuka 6:15. 19na Yuuda Isikariyote, ono yaanyëërëëyë Yëësu inikö.
Yëësu araghambwa igha obhotoro ubhwayenku-Bhërizëbhuri bhukurwa
(Mataayo 12:22-32; Ruuka 11:14-23, 12:10)
Ho Yëësu yaamarrë, akakyora ka. 20Rikomo irya abhantö ghwiki rekaikomania, rekaghera Yëësu na abheegha abhaaye bhakataamibhwa okorya. 21Bhawamwabho Yëësu hano bhaaighuurë amangʼana ghayö, bhakamogheera, ko bhoora bhaaghambanga igha, omotwe ghwamosareka.
22Kora abhëëghya abha amaraghërryö agha Mosa bhano bhaaruurë Yërusarëëmu, bhakaghamba igha, “Ono yairomberwa na Bhërizëbhuri, oghonene ughwa amasambwa! Ghuyö ngwo ghokomohaana obhotoro ubhwa ukwata amasambwa ukurwa ko-bhantö.”
23Mbe, Yëësu akabhabherekera, akabharëngërya ëbhërëngyö igha, “Oghosambwa#3:23 Oghosambwa. Maaha mo-faharaasa. ngotora ukwiyata ughwene? 24Hano abhantö abha obhokama öbhömwë bharaaitane abheene ko abheene, obhokama bhuyö nkusika bhörë. 25Na hano abhantö abha eka ëmwë bharaaitane abheene ko abheene, eka iyö nkusika ërë. 26Hano Oghosambwa ghoraaitane na amasambwa aghaaye, obhokama ubhwagho nkunyaraghana bhörë, bhoono iyakë bhoreemerre? Tebhobhe-ho hë, nkusika bhörë këmwë. 27Kasi, obhoheene ni-igha, ömöntö taatore okosoha mu-nyumba iya ömöntö uwa singuru, amuruusi ëbhëntö ibhyaye igho atamöbhöhirë. M-maheene igha hano araamobhohe, hayö bhoono ho araatore ukumuruusya ëbhëntö ibhyaye.
28“No-bhoheene nkobhatëëbhya igha, abhantö mbaraabherwe ëbhëbhë ibhyabho bhyonswe igho. Ghwiki mbaraabherwe amatöki aghaabho ghonswe igho. 29Kasi, hano ömöntö araatoke Umwika Ömöhörëëru, taabherwe hë. Uyö naraabhe na risoro irya ëkëbhë amakora ghonswe igho.” 30Yaabhatëëbhëri igho, ko bhoora bhaaghambanga igha, “Aana risambwa.”
Bhawamwabho Yëësu
(Mataayo 12:46-50; Ruuka 8:19-21)
31Mbe, nyakuwaabho Yëësu na bhawamwabho Yëësu, bhakahika hayö, bhakaimerra kebhara iya inyumba iyö yaare-mo. Bhakatoma ömöntö abherekere Yëësu, aashe bhashumaashe nawe. 32Rikomo rinene irya abhantö, ryaarenga rikaayë rimwinaarrë. Bhakatëëbhya Yëësu igha, “Tamaaha, nyakuwëënyu na abhamura abhëënyu n-kebhara hayö bharë, bharatuna igha, mushumaashe.”
33Yëësu akabhahonshora igha, “Maayö bhaana bhamura abhëëtö m-baahë?” 34Akamaaherra abhantö bhayö bhaarenga bhaikaayë bhamwinaarrë, akaghamba igha, “Momaahe, bhano mbo bha maayö, na bhamura abhëëtö. 35Ömöntö wowonswe igho ono akokora ghano Waryobha akutuna, uyö we mura uwëëtö, maayö, na umwisëkë uwëëtö.”
လက်ရှိရွေးချယ်ထားမှု
Maariko 3: ssc
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2021, Wycliffe Bible Translators, Inc. All rights reserved.
