Matius 20
20
Umpama tentang orang-orang yang bakarja di kobong anggur
1Yesus bilang lagi, “Cara Tuhan Allah Berkuasa sebagai Raja, sama deng umpama ini. Ada tuang tana satu yang ada kobong anggur. Masi amper siang, dia so kaluar cari orang-orang la bakarja pa dia pe kobong anggur. 2Waktu dia dapa babarapa orang, dia baku ator deng dorang tentang dorang pe sewa karja untuk satu hari. Itu dia mo bayar pa satu orang, satu hari satu perak.#20:2: Untuk satu perak, di teks asli bahasa Yunani ada tatulis, ‘satu dinar’. Satu dinar, itu sama deng orang karja satu hari pe gaji waktu dulu bangsa Roma jaja pa bangsa Israel. Abis itu, dia suru dorang bakarja pa dia pe kobong anggur. 3Kira-kira jam sembilan pagi, dia kaluar ulang kong pigi di pasar. Di sana, dia lia ada babarapa orang yang tara ada karja. 4Kong dia bilang pa dorang, ‘Ngoni karja di kita pe kobong anggur e. Nanti kita bayar pa ngoni deng gaji yang sesuai.’ Pe dengar itu, dorang pigi bakarja di kobong. 5Turus kira-kira jam dua blas siang deng jam tiga sore, dia kaluar lagi kong pigi cari lagi orang karja di pasar, sama deng yang dia biking tadi. 6Abis itu, kira-kira jam lima sore, dia kaluar lagi kong dia lia masi ada orang-orang laeng lagi di pasar yang tara bakarja. Kong dia tanya pa dorang, ‘Bikiapa kong satu hari ini ngoni cuma badiri di sini kong tara bakarja?’
7Dorang bilang pa dia, ‘Torang babagini saja, barang tarada orang yang kase torang karja’.
Kong dia bilang pa dorang, ‘Kalu bagitu, ngoni pigi di kita pe kobong anggur kong bakarja di sana suda.’
8 #
Im. 19:13; Ul. 24:15 Waktu so mo malam, tuang kobong itu bilang pa dia pe mandor, ‘Pangge kamari samua orang karja itu kong bayar dong pe gaji. Ngana bayar pa dorang mulai dari yang maso paling ka balakang sampe yang maso paling kamuka.’
9Di situ, orang-orang karja yang karja paling ka balakang ambe dorang pe gaji kamuka, masing-masing dorang tarima satu perak. 10Jadi waktu orang-orang yang bakarja dari pagi datang ambe dong pe gaji, dong kira dorang masing-masing mo dapa lebe banya dari orang yang bakarja dari balakang. Tapi dorang me cuma tarima masing-masing satu perak. 11Waktu dorang tarima doi itu, dorang bafeto pa tuang kobong itu. 12Dorang bilang, ‘Tuang, tara bisa bagini! Orang yang datang dari balakang, karja cuma satu jam. Masa dorang pe gaji sama deng torang! Padahal torang ini bakarja satu hari fol, kong suar-suar sampe malele.’
13Tapi tuang kobong itu bilang pa satu orang dari dorang, ‘Sudara, jang ngana mara e! Ini bukang berarti kita tara adil pa ngana. Karna dari pertama torang dua so baku ator to, kita mo bayar pa ngana deng satu perak untuk karja satu hari. 14Jadi lebe bae ngana tarima gaji itu deng sanang hati suda kong pulang. Kita suka kase gaji yang sama pa ngana, sama deng kita kase pa orang yang maso ka balakang. 15Kita pe hak pake kita pe doi iko kita pe mau sandiri, to? Atau ngana tara sanang karna kita bae pa orang-orang itu?’ ”
16 #
Mat. 19:30; Mrk. 10:31; Luk. 13:30 Yesus bilang lagi, “Jadi dari umpama itu torang jadi tau, orang yang jadi orang penting di dunia ini, nanti jadi orang yang tara penting, kong orang yang tara penting di dunia ini, nanti jadi orang penting.”
Yesus kase tau yang ketiga kali Dia akan mati
(Mrk. 10:32-34; Luk. 18:31-34)
17Satu kali bagini, Yesus deng Dia pe murit-murit pigi ka atas di kota Yerusalem. Di tenga jalang, Dia pangge Dia pe murit-murit bapisa ka sana sadiki, baru Dia bilang bagini, 18“Dengar e! Skarang torang mo pigi ka atas di kota Yerusalem. Di sana, orang mo serakan Anak Manusia yang dari sorga pa imam-imam kapala deng guru-guru agama yang ahli lima kitab Musa. Kong dorang mo kase hukuman mati pa Dia. 19Dorang mo serakan Dia pa orang-orang yang bukang Yahudi, kong orang-orang itu ejek-ejek, pukul pake tali yang ada barang tajam di dia pe ujung, deng dorang kase salib pa Dia. Tapi di hari yang ketiga, Dia akan hidup ulang.”
Orang yang paling hebat pa Tuhan pe muka itu orang yang layani orang laeng
(Mrk. 10:35-45)
20Abis itu, Zebedeus pe bini deng dia pe ana Yakobus deng Yohanes datang pa Yesus. Ibu itu berlutut pa Yesus mo minta satu barang.
21Yesus tanya pa dia, “Ibu mo minta apa?”
Dia bilang pa Yesus, “Guru, kalu Guru so jadi Raja kong so Berkuasa, Guru suru kita pe ana dua ini dudu pa Guru pe sabla. Satu di sabla kanan deng satu lagi di sabla kiri.”
22Pe dengar itu, Yesus bilang pa dorang bagini, “Ngoni tara mangarti deng apa yang ngoni minta. Kita ini nanti mo dapa banya sengsara. Apa ngoni bisa pikul penderitaan sama deng Kita?”
Kong dorang jawab, “Torang bisa!”
23Turus Yesus bilang pa dorang, “Memang ngoni nanti menderita sama deng Kita. Tapi tentang sapa yang mo dudu di Kita pe sabla kanan deng sabla kiri, itu bukang Kita pe hak mo tentukan. Tampa itu Kita pe Bapa so sadia untuk orang-orang yang Dia so tentukan.”
24Waktu spulu murit yang laeng dengar apa yang dong dua minta itu, dorang hati saki pa dua sudara itu. 25#Mat. 23:11; Mrk. 9:35; Luk. 22:25-26 Turus Yesus pangge pa dorang samua, kong Dia bilang bagini, “Ngoni tau, pemimpin-pemimpin dari bangsa-bangsa yang tara kanal pa Tuhan, dorang itu jaga pimpin pa dong pe rakyat deng karas. Bagitu lagi deng dorang pe orang-orang basar, dorang jaga siksa pa orang-orang yang dong pimpin. 26Tapi ngoni tara bole bagitu! Sapa dari ngoni samua yang suka mo jadi hebat pa Tuhan pe muka, dia musti jadi sama deng orang biasa-biasa saja yang layani pa ngoni. 27Deng sapa dari ngoni yang suka mo jadi orang paling hebat pa Tuhan pe muka, dia musti biking dia pe diri sama deng orang karja untuk layani pa ngoni. 28Itu sama deng Anak Manusia yang dari sorga datang di dunia ini bukang untuk dapa layani, tapi untuk layani deng kase diri mati la tebus orang banya pe dosa.”
Yesus kase sembu dua orang buta
(Mrk. 10:46-52; Luk. 18:35-43)
29Waktu Yesus deng Dia pe murit-murit bajalang kaluar dari kota Yerikho, ada banya orang yang iko sama-sama deng dorang. 30Kong ada dua orang buta yang dudu di pinggir jalang. Waktu dorang dengar Yesus ada iko di situ, dorang bataria, “Bapa, raja Daud pe turunan, kasiang pa torang ka!”
31Pe dengar dorang bataria bagitu, orang banya togor pa dong dua supaya dong dua badiam. Tapi dorang dua bataria lebe kuat lagi, “Bapa, raja Daud pe turunan, kasiang pa torang ka!”
32Kong Yesus berenti, turus pangge pa dorang dua. Dia tanya pa dorang, “Ngoni mau Kita biking apa pa ngoni?”
33Dorang jawab, “Bapa, torang minta supaya torang bisa dapa lia.”
34Pe dengar itu, Yesus rasa kasiang pa dorang. Dia pegang dorang pe mata kong dorang langsung bisa dapa lia. Abis itu, dorang iko pa Yesus.
လက်ရှိရွေးချယ်ထားမှု
Matius 20: PB MMU
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Perjanjian Baru Bahasa Melayu Maluku Utara @ Lembaga Alkitab Indonesia 2020
