Matius 18

Sapa yang paling hebat

(Mrk. 9:33-37; Luk. 9:46-48)

1 # Luk. 22:24 Waktu itu, Yesus pe murit-murit datang pa Dia, kong batanya, “Guru, kalu Tuhan Allah Berkuasa sebagai Raja, sapa dari antara Tuhan Allah pe umat yang akan jadi orang yang paling hebat?”

2Pe dengar itu, Yesus pangge ana kacil satu kong kase badiri ana itu pa dorang pe tenga-tenga. 3#Mrk. 10:15; Luk. 18:17 Turus, Dia bilang pa dorang, “Inga bae-bae yang Kita mo bilang pa ngoni ini: kalu ngoni tara ruba ngoni pe hidup jadi sama deng ana kacil yang tara sombong ini, ngoni tara akan jadi Tuhan Allah pe umat yang Dia Berkuasa sebagai Raja. 4Jadi, sapa yang anggap diri biasa-biasa saja sama deng ana kacil ini, dia itu suda yang Tuhan Allah anggap paling hebat di antara Tuhan Allah pe umat yang Dia Berkuasa sebagai Raja. 5Kong sapa yang tarima pa orang biasa-biasa saja sama deng ana kacil ini karna orang itu percaya pa Kita, itu berarti dia so tarima pa Kita.”

Jang biking sampe orang jadi berdosa

(Mrk. 9:42-48; Luk. 17:1-2)

6Yesus bilang lagi, “Kalu ada orang yang biking orang biasa-biasa sama deng ana-ana kacil ini jadi berdosa sampe tara percaya lagi pa Kita, lebe bae ika orang itu pe leher, deng gantong batu basar#18:6: Batu basar macam ini yang orang jaga pake untuk giling gandum. satu pa dia kong kase tenggelam di dalam laut. 7Cilaka suda orang-orang di dunia ini, karna ada banya hal yang biking orang-orang tagoda biking dosa sampe jadi tara percaya lagi. Memang hal-hal itu pasti mo ada, tapi cilaka suda orang yang biking sampe orang laeng jadi bagitu.

8 # Mat. 5:30 Jadi kalu ngoni pe tangan atau kaki biking ngoni berdosa sampe jadi tara percaya lagi, potong kong buang suda itu. Lebe bae ngoni maso sorga cuma deng tangan satu atau kaki satu saja, daripada kaki tangan lengkap tapi ngoni dapa buang di neraka yang dia pe api tara mati-mati. 9#Mat. 5:29 Deng kalu ngoni pe mata sabla biking ngoni jadi berdosa sampe jadi tara percaya lagi, cungkel suda kong buang itu, karna lebe bae ngoni maso sorga deng mata sabla daripada mata lengkap tapi dapa buang di neraka.”

Umpama tentang domba yang ilang

(Luk. 15:3-7)

10Yesus bilang lagi, “Inga bae-bae, jang ngoni pandang enteng pa orang biasa-biasa yang sama deng ana-ana kacil ini, karna orang-orang itu ada dong pe malaekat yang salalu ada deng Tuhan Allah di sorga.

[11#Luk. 19:10 Karna Anak Manusia yang dari sorga datang di dunia untuk kase slamat pa orang-orang berdosa.]”

12Yesus bilang lagi, “Ngoni pikir umpama ini dulu. Ada satu orang yang pe domba saratus ekor, kong ada satu yang ilang. Kira-kira orang itu mo biking apa e? Tantu dia mo kase tinggal domba yang sembilan pulu sembilan itu di panta gunung, kong pigi cari domba satu yang ilang itu, to? 13Bagitu dia dapa domba satu yang ilang itu, dia sanang skali. Kita bilang pa ngoni e, dia pe sanang itu lebe basar dari dia pe sanang untuk domba yang sembilan pulu sembilan ekor yang tara ilang itu. 14Bagitu lagi deng ngoni pe Bapa di sorga, Dia tara mau Dia pe ana-ana ada yang ilang dari Dia, biar cuma satu saja.”

Orang-orang yang ada masala musti baku bae lagi

15 # Luk. 17:3 Kong Yesus bilang lagi, “Kalu ada ngoni pe sudara yang percaya biking sala pa ngoni, ngoni sandiri yang pigi pa dia, kong cuma ngoni dua saja, baru ngoni kase tau dia pe sala. Kong kalu dia mangaku dia sala, berarti ngoni dua so berhasil baku bae ulang. 16#Ul. 19:15 Tapi kalu sudara itu tara mau tarima dia sala, bawa lagi satu atau dua orang sama-sama deng ngoni, kong ngoni pigi pa dia. Ngoni biking bagitu karna ada tatulis di Kitab Suci bagini, ‘Kalu ada orang yang dapa tudu biking sala, musti ada dua atau tiga orang yang jadi saksi untuk bilang orang itu sala.’

17Tapi kalu dia masi tara tarima apa yang dorang bilang, kase tau suda masala itu pa jemaat. Kong kalu jemaat so togor, turus dia tara mau dengar lagi, anggap saja dia itu orang yang tara kanal Tuhan Allah. Atau, anggap saja dia itu berdosa sama deng tukang tagi pajak yang jaga tipu orang.

18 # Mat. 16:19; Yoh. 20:23 Inga e, apa yang ngoni larang di dunia ini, itu lagi yang Tuhan Allah larang. Deng apa yang ngoni kase ijin di dunia ini, itu lagi yang Tuhan Allah kase ijin.

19Kita bilang lagi pa ngoni, kalu di dunia ini ada dua orang dari ngoni yang satu hati berdoa minta apa saja, pasti Kita pe Bapa di sorga mo kase apa yang dorang minta itu. 20Barang, kalu ada dua atau tiga orang bakumpul karna percaya pa Kita, di situ suda Kita ada sama-sama deng dorang.”

Umpama tentang orang karja yang tara kase ampun pa dia pe tamang

21 # Luk. 17:3-4 Abis itu, Petrus datang pa Yesus kong tanya, “Guru, kalu kita pe sudara yang percaya biking sala pa kita turus, sampe barapa kali kita musti kase ampun pa dia? Sampe tuju kali ka?”

22Kong Yesus jawab pa dia, “Bukang! Kita bilang pa ngana e, ngana musti kase ampun pa dia bukang cuma sampe tuju kali, tapi tuju pulu kali tuju kali. 23Ngana musti biking bagitu karna Tuhan Allah Berkuasa sebagai Raja pa Dia pe umat, sama deng umpama ini: ada raja satu yang mo urus dia pe orang-orang karja yang bautang pa dia. 24Waktu raja itu mulai urus dong pe utang itu, ada orang karja satu yang dapa kase mangada pa raja. Orang karja itu pe utang doi mas spulu ribu tas.#18:24: Doi mas spulu ribu tas, di teks asli bahasa Yunani pake, spulu ributalenta. Satu talenta itu anam ribu dinar. Satu dinar sama deng orang karja pe gaji satu hari. Jadi doi spulu ribu talenta itu dia pe jumla kira-kira sama deng orang karja pe gaji selama dua pulu ribu taong. 25Tapi orang karja itu tara mampo bayar dia pe utang itu. Karna itu, raja suru jual orang karja itu termasuk dia pe ana bini deng samua yang dia punya, la dia pe utang bisa dapa bayar. 26Pe dengar itu, orang karja itu langsung berlutut kong bamohon bagini, ‘Tuang raja, sabar sadiki ka, kase waktu pa kita ka, supaya kita bole kase lunas samua kita pe utang.’ 27Pe dengar orang karja itu bilang bagitu, raja rasa kasiang pa dia, kong kase lapas pa dia, deng hapus dia pe utang.

28Tapi waktu orang karja itu kaluar dari situ, dia baku dapa deng dia pe tamang karja. Tamang itu ada bautang pa dia doi perak saratus,#18:28: Di teks asli bahasa Yunani pake, saratus dinar, kong satu dinar di jaman Roma itu sama deng orang karja pe gaji satu hari. Jadi doi saratus dinar, dia pe jumla kira-kira sama deng orang karja pe gaji ampa bulan. itu cuma sadiki skali kalu mo kase banding deng dia pe utang pa raja. Tapi dia tangka pa dia pe tamang kong ramas dia pe tamang itu pe leher. Dia bilang pa dia pe tamang itu, ‘Woe, bayar suda ngana pe utang pa kita!’ 29Pe dengar itu, dia pe tamang langsung berlutut kong bamohon pa dia bagini, ‘Tamang, sabar sadiki ka, kase kita waktu untuk kase lunas kita pe utang-utang itu.’ 30Tapi dia tara mau, mala dia kase maso dia pe tamang itu di penjara. Dia pe tamang musti bayar dia pe utang samua, baru dia bisa bebas. 31Waktu dia pe tamang-tamang karja laeng lia apa yang jadi itu, dorang pe hati susa kong pigi lapor samua itu pa raja. 32Pe dengar itu, raja suru pangge pa orang karja itu kong bilang, ‘Woe orang karja yang jahat! Samua ngana pe utang pa kita, kita so hapus karna ngana bamohon pa kita. 33Jadi ngana lagi musti kasiang pa ngana pe tamang itu, sama deng kita me perna kasiang pa ngana.’ 34Raja itu jadi mara skali pa orang karja itu. Kong raja serakan orang karja itu pa dia pe tukang-tukang pukul di penjara supaya dorang siksa pa dia sampe dia bisa kase lunas dia pe utang.

35Bagitu lagi deng Kita pe Bapa di sorga, Dia mo pake cara yang sama deng itu pa ngoni kalu ngoni tara kase ampun butul-butul pa ngoni pe sudara yang percaya.”

လက်ရှိရွေးချယ်ထားမှု

Matius 18: PB MMU

အရောင်မှတ်ချက်

မျှဝေရန်

ကူးယူ