Mathiu 7
7
1Te nu thonkas wuni, kȧmȧ a te thonkas nu. 2kotȧy-e kathoŋkas ȧke mǝ nǝ thoŋkas-e kǝ mǝ a thonkas nu; ɔwa aŋthuntha aŋa mǝ nǝ thunth-e, ŋǝ mǝ a kȧl thuntha nu. 3Ko tȧy tȧŋ mǝ nənk ȧŋpol aŋa yi ka rafɔr ra ɔwɔnt mu kɛrɛ mǝ te nənk kagboŋ ȧke yi ka rafɔr ra mu gbeŋ-e? 4Thalɔm to mǝ gbǝli pa ka ɔwɔnt mu, Yɔ kȧmȧ i wurɔ ȧŋpol ka rafɔr ra mu, ma mǝ ba kagboŋ ka rafɔr ra mu-e? 5Mun wuni yɔr, mɔtha wurɔ kagboŋ ka rafɔr ra mu, ɔwa kǝdarǝŋ kati mǝ tǝ gbǝli nənk gbǝraŋ tǝ kǝwura ȧŋpol ka rafɔr ra ɔwɔnt mu.
6Te nu sɔŋ rǝka rǝsǝm ka ɛtǝn, ɔwa te fitha mȧthǝni ma nu ka tǝsɔp, ta thani aŋ nas ma ka ȧtȧtək taŋ, ɔwa aŋ fǝlɛ aŋ gbarigbari nu.
7Yif nu, a tǝ sɔŋ nu. Thɛns nu, ɔwa nǝ tǝ fir. Gbȧtgbȧt nu ka kȧdare, a tǝ kanthɛ nu; 8kotȧy-e wuni o wuni ɔwe mǝ yif-e, ɔ tǝ sɔthɔ, ɔwe mǝ thɛns-e, ɔ tǝ fir, ɔwa ɔwe mǝ gbatgbat-e, a tǝ kanthɛ kɔ. 9Wuni reke kǝtɔŋ ka nu-e, bepi ɔwan kɔŋ ɔ tholir kɔ kǝbo-e, mǝ ɔ sɔŋ kɔ asar-e? 10Thalɔm bepi ɔ tholir kɔ kǝlop-e, mǝ ɔ sɔŋ kɔ abok-e? 11Bepi naŋ ma nǝ yi alǝs-e, nǝ tȧrȧ kǝsɔŋ ɛboya ɛfinɔ ka aŋwuth a nu-e, pǝ tha gbethi ɔKas ka nu ɔwe yi ro riyana mǝ ɔ sɔŋ hɛ ɛyɛt ɛfinɔ ka ŋaŋ aŋa mǝ tholir kɔ-i? 12Tiyȧŋ tȧy o tȧy ȧte nǝ yema kȧmȧ afǝm aŋ yɔ nu-e, ya nǝ yi tǝ kǝyɔ sɔ ro ŋaŋ; kotȧy-e ȧte tǝ yi aŋthɔ yi ɛmaŋ ya aŋnabi.
13Wɔŋ nu ka kadare kǝthiŋkanɛ, kotȧy-e kadare kǝ yi kǝbana ɔwa aroŋ rǝ yi rǝbana ara lomanɛ ka kadinɛ, ɔwa ŋa agbȧthi aŋa wɔŋ ri. 14Pǝkasifɛ kadare kǝ thiŋkanɛ ɔwa aroŋ rǝ lɔl ara lomanɛ ka aŋesǝm, ɔwa ŋa athȧn aŋa fir ri.
15Botnɛ nu rǝ ȧmerȧ ta aŋnabi ayem aŋa mǝ der ro nu rǝ ɛlopra ya tǝlɔmɛ, kɛrɛ rokor aŋ yi tǝthɔlu alukǝs. 16Nǝ tǝ tȧrȧ ŋa ka mȧkomi maŋ. Afǝm aŋ gbǝli pim mǝtiti rǝ tǝbȧnk-i, thalɔm mǝgbɔnɔ rǝ tǝsenduku-i? 17Ya pǝ yi sɔ-e, ŋǝnt o ŋǝnt afinɔ aŋ kom mǝkomi mǝfinɔ, kɛrɛ ŋǝnt alǝs aŋ kom mǝkomi mǝlǝs. 18Ŋǝnt afinɔ aŋ gbǝli hɛ kom mǝkomi mǝlǝs, ya pǝ yi sɔ, ŋǝnt alǝs aŋ gbǝli hɛ kom mǝkomi mǝfinɔ. 19Ŋǝnt o ŋǝnt aŋa te kom mǝkomi mǝfinɔ-e, a tǝ tap ŋi, ɔwa a tǝ fitha ŋi ro nȧnt. 20Tiyȧŋ nǝ tǝ tȧrȧ ŋa ka mȧkomi maŋ.
21Pǝ yi hɛ wuni o wuni ɔwe mǝ pa ro mi, Pa, Pa, kɔnɔ mǝ wɔŋ ka rȧbȧy ra ro riyana, kɛrɛ ŋaŋ gbo son aŋa mǝ yɔ mȧselɔ ma ɔKas kȧmi ɔwe yi ro riyana. 22Agbȧthi aŋ tǝ pa ro rɔmi ka ȧŋrey ŋati, Pa, Pa, saŋ-e, sǝ la hɛ nȧbi ka ȧŋes a mu-i? Sǝ la hɛ wurɔ akǝrǝfi-i, sǝ la hɛ yɔ mǝyɔs mǝkabanɛ mǝgbathi ka ȧŋes a mu-i? 23Ka ȧŋlɔkɔ ŋati i ti kanɛ ŋa gbafǝth kǝpa, Thȧnkȧŋ i tɛ hɛ nu. Wur nu ro rɔmi, naŋ aŋa yɔ mǝyɔs mǝlǝs. 24Tiyȧŋ wuni o wuni ɔwe tǝl ȧsim ta mi-e, ɔwa ɔ wop ti-e, ɔ bȧlȧnɛ mɔ wuni tempi ɔwe tǝmǝr ȧŋseth ŋɔŋ ka aŋgbalaŋ rokɔm. 25Ka akɔm kǝ thuf, ɔwa ȧmȧnt mǝfɔl mǝ der, ka aŋfef aŋ sɔŋ aŋ sapǝth ȧŋseth ŋati; kɛrɛ aŋ fumpɔ hɛ, ȧtesoma-e a tǝmǝr ŋi ka aŋgbalaŋ rokɔm. 26Kɛrɛ wuni o wuni ɔwe mǝ tǝl ȧsim ta mi ȧte, ɔwa ɔ wop hɛ ti-e, ɔ bȧlȧnɛ mɔ wuni pǝŋk ɔwe tǝmǝr ȧŋseth ŋɔŋ ka kȧsǝnt. 27Ka akɔm kǝ thuf, ɔwa ȧmȧnt mǝfɔl mǝ der, ka aŋfef aŋ sɔŋ, aŋ sȧpǝth ȧŋseth ŋati. Kaŋ fumpɔ, ɔwa kȧfumpɔ kati kǝ yi kǝbana.
28Ka pǝ re yi ma Yisɔs ɔ gbanthi ȧsim ȧte, aŋfǝm aŋ kabanɛ ta kathǝksa kɔŋ, 29kotȧy-e ɔ thǝksa ŋa mɔ wuni ɔwe ba afɔsɔ, pǝ yi hɛ mɔ aŋkarmɔkɔ aŋ yɔ.
လက်ရှိရွေးချယ်ထားမှု
Mathiu 7: TMNNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Themne New Testament © The Bible Society of Sierra Leone, 2009.
