Mathiyu 11
11
Baseriŋ bi ŋaye ka Yɔni wo Babiye woŋ
(Luku 7:18-35)
1Naa thanki Yisɔs nunkunɔkɔ bakarandeni nama bikɔhi iŋ biye beŋ, ndɛ pɛyɛŋ kɛndɛ ba kaa kaŋ thaninuwa iŋ ba niya kɛwandi ka mɛtiŋ ba tɔpɛ kɛndɛ baŋ.
2Yɔni wo Babiye woŋ kiŋ nde ka yeeli woŋ. Kɛna yuye ndɛ bɛyiniŋ ba Banikisi woŋ ni baŋ, huna ŋindi ndɛ bakarandeni nama binɔndi kɛnama. 3Ndɛ bindɛ nunkunɔkɔ ba bindɛ ka thɔnthiŋina Yisɔs na ba dɔma, na “E yina domo nde wɔ wo see woŋ, maa miŋ be dethiteke hɛlɛŋ ba wɔ hɛna?”
4Yisɔs mɛyiyɛ bindɛ ba dɔma, na “Kaaŋ tepe Yɔni na ba thanki beŋ yuyɔkɔ baŋ iŋ ba thanki beŋ kutiyɔkɔ baŋ. 5Bi mankɔy thaaya beŋ kute, awa bigbɛsinkɔy beŋ kaande, biya bi iŋ nthoonani kinɛnɔy ki bohe ka kɔtɔ ku ka wɔmɛti koŋ ka thinthi beŋ pethɔy, awa bilɔŋɔy ŋaiha beŋ yuye,#Ais 35:5-6 bitukɛ beŋ ŋayino ka tuka haŋ, awa bamɔnɛŋ beŋ niyo kɛwandi Huseri Huyɔhɔy haŋ.#Ais 61:1 6Mayehitɔkɔ ma kiŋ ka biya bi sa yama sikiŋ sɔkɔrɔ beŋ.”
7Naa bohe bakarandeni bi ka Yɔni beŋ duwa, Yisɔs bohe gbonkitiyande sɛthɛ baŋ ba Yɔni, na “Mbɛ mu nde beŋ key ka detha ka wula baŋ? E buwari bu hande na nde beŋ kutu bu si ŋɛna iŋ huru? 8Mbɛ hu nde beŋ kɛndɛ kaaye gbeeŋ? E ba ka detha wɔ thɔɔyɛ mugbɛkitɔkɔ muyɔhɔy? Biya bi thɔɔyɛ mugbɛkitɔkɔ muyɔhɔy bi kiŋ ka kaamani bibukuyuwɛ bi ka gbakuiŋ beŋ. 9Mbu mbɛ hu nde beŋ kaaye kɛndɛ haŋ gbeeŋ? E ba detha banabi? Yaŋ tepe bena, beŋ thanki nda kuta wɔ yamɛ ba banabi, 10baa ba Yɔni bɛna gbalo wuŋ ka magbali ma ka Masaala maŋ ba dɔma, na ‘Masaala tepe ba dɔma, na, yaŋ kɔŋ ŋindi baseri wokiyaŋ woŋ ka kɔtɔkɔy kɛnda, wo ka kɔsinɔkɔ gboŋa baŋ ba yi.’#Mal 3:1 11Yaŋ kɔŋ bena tepe nɔndi baŋ, Yɔni wo Babiye woŋ yameŋ ba wɔ yo wɔ ka faido. Kɛrɛ ndɛ wo thahuwɔy woŋ ka Hugbakinɛ hu ka ariana haŋ, ndɛ na yamɛ ba Yɔni. 12There ka lɔkɔ ba Yɔni wo Babiye woŋ niye kɛwandi baŋ haaŋ saaŋ bohi hɛ, Hugbakinɛ hu ka ariana haŋ niyɔy thɔrɔ wumandiŋ. Awa biyamɛti bibaŋɔy yole ba huŋ pinda. 13Banabiŋ beŋ fooma iŋ Sirani ba ka Musa baŋ ni hunabi haaŋ e Yɔni saa.#Luku 16:16 14Awa mɛnɛ beŋ mɛyi ba maseriŋ mabɛina, Yɔni na Ilaiya wo domo nde ba ndɛ kɔ saa woŋ.#Mal 4:5; Math 17:10-13; Maki 9:11-13 15Wɔ wo ba yuyɛ, ndɛ ponɛŋ kuiha.
16“Mbɛ mu yaŋ thɔyintande iŋ biya bi ka lɔkɔ ba hɛ baŋ? Bindɛ athɔyande nɔŋ mpati bi dɔŋɔ ka gbɔni baŋ niyo ka e bindɛ kɔ thiya bintɔni namɛŋ beŋ ba thurɔkɔ, 17na ‘Miŋ haŋiye bena yakali, kɛrɛ beŋ tha kaŋ. Miŋ soŋiye bena nthenkeyni, kɛrɛ beŋ tha bereŋ.’ 18Naa see Yɔni, ndɛ bohe suŋ, awa ndɛ tha thiiye mampa. Biya beŋ fooma dome, na ‘Ndɛ boho iŋ wayi.’ 19Hati wo domo wo ka Wɔ woŋ see wo thɔŋ e ndɛ kɔ thiiye, awa biya beŋ fooma dome, na ‘Batiki iŋ bayilɔ iŋ mampa na ndɛ; nyathiki wo ka bathuuni duthu na iŋ bahakɛŋ.’ Nama o nama kele hu ka Masaala haŋ hu kɔŋ tɔŋinɔkɔ ka yɛthɛ bakɛnama ba huŋ niyɔ nɔndi ka wumankɛ.”
Mɛtiŋ ba tha ni Kraist na lanɛya baŋ
(Luku 10:13-15)
20Kɛna bohe Yisɔs gbonkiya wukahɛ-kahɛ ka biya bi ka mɛtiŋ babukuyuwɛ baŋ ka thanki ndɛ niya bɛyiniŋ bathakaba, baa bindɛ tha mɛyi ba sikina sɔkɔrɔ hakɛŋ namɛŋ baŋ ba saa ka Masaala. 21Ndɛ tɛpa, na “Nambara kendeŋ, bendo biKoresiŋ. Nambara kendeŋ bendo biBɛthɛseda, baa mɛnɛ bɛyiniŋ bathakaba ba thankɛ nde niyo kendeŋ do baŋ bɛna niyo nde ka biya bi ka mɛtiŋ ba ka Taya mɛnɛ ka Saidɔŋ baŋ beŋ,#Ais 23:1-18; Isi 26:1—28:26; Yow 3:4-8; Em 1:9-10; Sɛk 9:2-4 bi be ni Masaala na lanɛya beŋ, bi kɔŋ nde nɔŋ thɔɔkɔ yabɛŋ babɛkiŋ e bindɛ puyinɔkɔ hɔɔtɔ ba tɔŋina ba bindɛ kutɔkɔ mathonko e bindɛ sikiyɔkɔ maŋaye ka banɛnɔy namɛŋ baŋ. 22Awa yaŋ tepe bena, ka lɔkɔ ba ka kukɔnsɔŋɔŋ koŋ baŋ, Masaala kɔŋ kutiyɛ biTaya mɛnɛ biSaidɔŋ nkinikiniŋ wuŋ yama ba beŋ. 23Awa bendo biKapaniyɔmi, e beŋ kiŋ ba ŋatina yɛthɛ bakendeŋ ka thinthi ka ariana? Beŋ kɔŋ thathina ka pothi ka yahanama;#Ais 14:13-15 baa mɛnɛ waliŋ bamandiŋ ba thankɛ niyo nde kendeŋ do baŋ bɛna niyo nde nɔŋ ka mɛti ba ka Sɔdɔmi,#Mthr 19:24-28 ba kɔŋ nde niyɔ kɛndɛ haaŋ hɛ. 24Awa yaŋ tepe bena, ka lɔkɔ ba ka kukɔnsɔŋɔŋ koŋ baŋ, Masaala kɔŋ kutiyɛ biSɔdɔmi nkinikiniŋ wuŋ yama ba beŋ.”#Math 10:15; Luku 10:12
Saaŋ kiyaŋ do, beŋ be hɛmi
(Luku 10:21-22)
25Ka lɔkɔ babɛina, huna tepe Yisɔs ba dɔma, na “Fandaŋ woŋ, yindo Mariki wo ka ariana woŋ mɛnɛ ka faido, yaŋ thiyi yina maamo baa yi nunuŋ bɛyiniŋ baŋ baŋ ka bikele beŋ iŋ bithanuwɛ beŋ, e yi bɛŋ toŋine bi be kɔthɔ beŋ. 26Nɛna huŋ yaathi Fandaŋ woŋ, yi ni mayɛthi makɛnda mɛnɛ mathimo makɛnda maŋ.”
27Kɛna tepe Yisɔs bakarandeni nama beŋ ba dɔma, na “Fandaŋ woŋ thanki yama dunkune ntha yo ntha,#Yɔni 3:35 awa wɔ ka wo punku kɔthɔ Hati woŋ yɔkɔŋ Fandaŋ na kɔthɛ yama, awa wɔ ka wo punku kɔthɔ Fandaŋ woŋ, yɔkɔŋ yaŋ, Hati woŋ, na kɔthɛ niŋ.#Yɔni 1:18; 10:15 Awa Hati woŋ na yɛthɛ bi ndɛ toŋine Fandama na.
28“Saaŋ kiyaŋ do fooma, bendo dimbo doniŋ bakendeŋ beŋ, awa yaŋ kɔŋ bena hɛmɛni. 29Kɔsinaŋ mathanani niŋ maŋ, awa e beŋ thanuwa maŋaye kiyaŋ, baa wɔ na yaŋ wo thathinɔkɔy iŋ wo thɛbɛ thukuma. Awa beŋ kɔŋ kutu kuhemuwe ka siini bakendeŋ baŋ,#Yɛr 6:16 30baa mathanani niŋ maŋ baŋɔita kosino, awa doni niŋ baŋ ayethɔ.”
လက်ရှိရွေးချယ်ထားမှု
Mathiyu 11: LMBNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© The Bible Society of Sierra Leone, 2011
