LUKA 24
24
1NO mũthenya wa kwambĩrĩria kiumia, o gũgĩkĩa-rĩ, magĩthiĩ mbĩrĩra-inĩ, makuuĩte mĩnyamũ mĩnungi wega ĩo marathondekete. 2Na magĩkora ihiga rĩrĩa rĩarĩ ho rĩgaragarĩtio, rĩgathengio mbĩrĩra-inĩ. 3Magĩgĩtonya thĩinĩ, na matianakora mwĩrĩ wa Mwathani Jesu. 4Na gũgĩkinya atĩrĩ, hĩndĩ ĩrĩa maarigĩtwo nĩ ũndũ ũcio, makiumĩrĩrũo nĩ arũme erĩ mehumbĩte nguo ciahenahenagia, marũgamĩte hakuhĩ nao; 5na rĩrĩa atumia acio metigĩrĩte mũno, makĩinamĩrĩra maroretie mothiũ thĩ, arũme acio makĩmoria atĩrĩ, Nĩ kĩ gĩgũtũma mũcarie ũrĩa wĩ muoyo kũrĩ arĩa akuũ? 6#Mat 16.21; 17.22,23; 20.18,19; Mar 8.31; 9.31; 10.33,34; Luk 9.22; 18.31-33.Ndarĩ haha, no nĩariũkĩte: ta ririkanai ũhoro ũrĩa oigire rĩrĩa aratũire Galili, 7atĩrĩ, Mũrũ wa Mũndũ ndarĩ hingo atakaneanwo moko-inĩ ma andũ ehia, na aambwo mũtĩ igũrũ, na mũthenya wa gatatũ nĩakariũka. 8Nao makĩririkana ciugo ciake, 9makĩinũka makoima mbĩrĩra-inĩ, na makĩĩra arĩa ikũmi na ũmwe, o na arĩa angĩ othe, maũndũ macio mothe. 10Na rĩrĩ, Mariamu Mũmagidali, na Joana, na Mariamu nyina wa Jakubu, o na atumia arĩa angĩ maarĩ hamwe nao, nĩo merire atũmwo mohoro macio. 11Nao atũmwo makĩona ciugo icio ta irĩ cia ũrimũ, makĩrega kũmetĩkia. 12No Petero agĩũkĩra agĩteng’era mbĩrĩra-inĩ; nake aainama aarora thĩinĩ, akĩona matama marĩa ma gatani me maige moiki; akĩinũka gwake agegearĩte nĩ ũndũ wa ũndũ ũcio wĩkĩkĩte.
13Na gũgĩkinya atĩrĩ, andũ erĩ a thiritũ yao nĩmaathiaga o mũthĩ ũcio gatũũra getagwo Emau, karĩ rũgendo rũa thaa igĩrĩ na nuthu, mũndũ akiuma Jerusalemu. 14Na nĩmaateretanagia ũhoro wa maũndũ macio mothe mekĩtwo. 15Na gũgĩkinya atĩrĩ, rĩrĩa maateretanagia makoranagia ũhoro-rĩ, Jesu we mwene akĩmathengerera, agĩtwarana nao. 16No maitho mao makĩgirio mamũmenye. 17Nake akĩmoria atĩrĩ, Nĩ mohoro marĩkũ maya mũraaria mũgĩthiĩ? Nao makĩrũgama, matukĩte mothiũ. 18Na ũmwe wao wetagwo Kileopa agĩcokia akĩmwĩra atĩrĩ, Kaĩ ũtũire wiki Jerusalemu wee, kuona atĩ ndũũĩ maũndũ marĩa mekĩtwo kuo matukũ maya? 19Nake akĩmoria atĩrĩ, Maũndũ marĩkũ? Nao makĩmũcokeria atĩrĩ, Ĩ maũndũ ma Jesu wa Nazarethi, ũrĩa ũrarĩ mũnabii wĩ na ũhoti ũhoro-inĩ wa ciĩko iria arekaga, o na ciugo iria aroigaga, akĩonagwo nĩ Ngai o na kĩrĩndĩ gĩothe: 20o na ũrĩa athĩnjĩri-Ngai arĩa anene o na aathani aitũ maamũneanire atuĩrũo cira wa kũũragwo, na makĩmwambithia mũtĩ igũrũ. 21No ithuĩ-rĩ, nĩtũrerĩgĩrĩire atĩ nĩwe ũrĩa ũgakũũra Aisiraeli Na ningĩ, hamwe na ũguo wothe-rĩ, ũmũthĩ nĩguo mũthenya wa gatatũ nginya maũndũ macio mekwo. 22Ningĩ atumia amwe a thiritũ iitũ nĩmatũgegirie mũno; nĩmegũthiĩte rũcinĩ tene mbĩrĩra-inĩ, 23na maaga mwĩrĩ wake, nĩmokire maatwĩra atĩ nĩmoimĩrĩirũo nĩ araika, nao maamera atĩ arĩ muoyo. 24Na andũ amwe aitũ maathiĩ mbĩrĩra-inĩ, maakora o ta ũguo atumia acio matwĩrire; no rĩrĩ, We mwene, matinamuona. 25Nake akĩmera atĩrĩ, Inyuĩ mwagĩte ũũgĩ, na mũtahiũhaga gwĩtĩkia na ngoro maũndũ marĩa mothe maaneranwo nĩ anabii! 26Githĩ to mũhaka Kristo anyarirũo na maũndũ macio, na acoke atonye harĩa he na riri wake? 27Agĩkĩambĩrĩria na ũrĩa Musa aandĩkire, o na anabii othe, akĩmataũrĩra mohoro mothe marĩ Maandĩko-inĩ marĩa mamũkoniĩ we.
28Magĩgĩkuhĩhĩria gatũũra karĩa maathiaga; nake agĩtuĩka ta arĩ kũhĩtũka arahĩtuka. 29Magĩkĩmũringĩrĩria, makĩmwĩra atĩrĩ, Raarĩrĩra gũkũ na ithuĩ; nĩ gũkorũo nĩgũkiriĩ gũtuka, na riũa nĩ ta rĩthũu. Nake agĩtonya araarĩrĩre nao. 30Na gũgĩtuĩka atĩrĩ, rĩrĩa aaikaire thĩ hamwe nao marĩe irio, akĩoya mũgate, akĩũrathima, akĩwenyũra, akĩmanengera. 31Namo maitho mao makĩhingũka; makĩmũmenya; nake akĩbuĩria, makĩaga gũcoka kũmuona. 32Magĩkĩũrania atĩrĩ, Githĩ ngoro ciitũ itikũhĩahĩaga thĩinĩ witũ rĩrĩa egũtwaragĩria twĩ njĩra, hĩndĩ ĩrĩa egũtũtaũragĩra Maandĩko? 33Na magĩũkĩra o thaa ĩo, magĩcoka Jerusalemu, magĩkora andũ arĩa ikũmi na ũmwe, o na arĩa maarĩ hamwe nao, monganĩte. 34Andũ acio makĩmera atĩrĩ, Nĩ ma, Mwathani nĩariũkĩte, na nĩoimĩrĩire Simoni. 35Nao makĩheana ũhoro wa maũndũ marĩa moneire njĩra-inĩ, na ũrĩa emenyithirie kũrĩ o na ũndũ wa kwenyũra mũgate.
36Ningĩ o makĩaragia maũndũ macio-rĩ, We mwene akĩrũgama gatagatĩ-inĩ kao, akĩmera atĩrĩ, Mũrogĩa na thayũ. 37Nao magĩtuĩka nda magĩĩtigĩra mũno, makĩĩgereria atĩ nĩ ngoma mekuona. 38Nake akĩmera atĩrĩ, Mũgũtangĩka nĩkĩ? Na nĩ kĩ gĩgũtũma mũgĩe na mathangania ngoro-inĩ cianyu? 39Rorai moko makwa, o na magũrũ makwa, atĩ nĩ niĩ mwene; ’hambatai, mwĩonere; nĩ gũkorũo ngoma ndĩrĩ mwĩrĩ na mahĩndĩ ta ũũ mũkuona ndĩ nacio. 40Na aarĩkia kuuga ũguo, akĩmonia moko make, o na magũrũ. 41Nao maakorũo matarĩ maretĩkia nĩ ũndũ wa ũrĩa makenete na makagega-rĩ, akĩmoria atĩrĩ, Mũrĩ na irio haha? 42Nao makĩmũhe gĩcunjĩ gĩa kĩũngũyũ kĩhĩhie. 43Nake agĩkĩoya, akĩrĩa o makĩĩonagĩra.
44Agĩcoka akĩmera atĩrĩ, Ici nĩcio ciugo ciakwa iria ndamwĩrire rĩrĩa ndatũire na inyuĩ, ngĩmwĩra atĩ, Gũtirĩ hingo maũndũ mothe matakahingio, o marĩa maandĩkĩtwo ũhoro wakwa watho-inĩ wa Musa, o na mabuku-inĩ ma anabii, o na thaburi-inĩ. 45Hĩndĩ ĩo agĩcoka akĩmahe ũũgĩ, mamenye wega Maandĩko: 46agĩkĩmera atĩrĩ, Ũũ nĩguo ũhoro wandĩkĩtwo Maandĩko-inĩ atĩrĩ, atĩ no mũhaka Kristo anyarirĩke, na acoke kũriũka oime kũrĩ arĩa akuũ mũthenya wa gatatũ; 47na ningĩ atĩ ũhoro wa kwĩrira na wa kuohanĩrũo mehia ũkahunjĩrio ndũrĩrĩ ciothe na rĩĩtwa rĩake, na kwambĩrĩrio o kũu Jerusalemu. 48Na inyuĩ nĩ inyuĩ aira a maũndũ macio. 49#Atũm 1.4.Na rĩrĩ, nĩndĩĩtũma kĩrĩa kĩĩranĩirũo nĩ Awa gĩkinye kũrĩ inyuĩ: ĩndĩ ikaragai itũũra-inĩ rĩrĩ o nginya rĩrĩa mũgekĩrũo hinya uumĩte Igũrũ.
50 #
Atũm 1.9-11. Agĩcoka akĩmaruta hau maarĩ, akĩmatongoria o kinya handũ haringaine na Bethania: akĩambararia moko make na igũrũ akĩmarathima. 51Na gũgĩkinya atĩrĩ, o akĩmarathimaga, agĩtigana nao agĩtwarũo Igũrũ. 52Nao makĩmũinamĩrĩra mamũhoe, magĩcoka Jerusalemu makenete mũno: 53na gũikara nĩmaaikaraga hekarũ-inĩ makĩgathaga Ngai.
လက်ရှိရွေးချယ်ထားမှု
LUKA 24: OGKBIBLE
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©Bible Society of Kenya, 2019
