KADADDIYAN 32
32
Yakub tako' se tatemmowa bi' Esau
1E bakto Yakub nerrossagi parjalananna laju esanderri kat-malaekat. 2E bakto ngoladi kat-malaekat jareya, Yakub adhabu, “Areya tantarana Allah.” Daddi kennengngan jareya enyamae Mahana'im.#32:2 Mahana'im: Nyama reya e dhalem basa Ibrani artena “parkemahan dhadhuwa'”.
3Yakub laju ngotos oreng, epamangkat kaadha' ka Seir e baba Edom, esoro nyare kaka'na. 4Reng-oreng jareya bi' Yakub esoro ngoca' kantha reya ka Esau, “Badha pessennepon Yakub sapaneka, ‘Kaula akompol sareng Laban kantos abit. 5Samangken kaula ampon gadhuwan sape, hemar, dumba, embi', dunor lalake'an sareng babine'an. Kaula ngatore kabar ka sampeyan, guste, kalaban pangarep moga-moga sampeyan kasokana narema kaula.’ ”
6E bakto la abali ka kennengnganna Yakub, reng-oreng otosan jareya mator, “Abdina ampon apanggi sareng Esau, kaka'na panjennengngan. Samangken Esau parappa'na ajalan ka ka'dhinto, ngamba'a panjennengngan, abakta oreng pa' ratos.” 7Ngedhing oca' jareya Yakub ce' tako'na. Reng-oreng se ekabareng laju ebagi epadaddi dhu bagiyan; bariya keya dumba ban sapena ban ontana. 8Ca'na pekkerra, “Mon Esau nyerrang se sabagiyan, bagiyan settonganna gi' ngenneng buru.”
9Yakub laju adu'a, oca'na, “Adhu, Guste Allah se esemba Ibrahim emba abdidalem sareng Ishak eppa' abdidalem, peyarsa'agi parnyo'onan abdidalem, GUSTE. Sareng Junandalem abdidalem epakon abali ka nagara abdidalem, akompol sareng la-bala abdidalem. Junandalem adhabu badhi ngator sadajana sopaja tadha'a alangan pa-ponapa ka abdidalem. 10Abdidalem ta' pantes narema kabellasan sareng kaestowannepon Junandalem akadi se ampon kalakon. E bakto abdidalem alengka Songay Yordan abdidalem ta' ngeba pa-ponapa kajabana tongket. Samangken abdidalem abali ka ka'dhinto abakta reng-oreng sareng bin-ebin se epecca daddi dhu bagiyan ka'dhinto. 11Nyo'ona salamet abdidalem, Guste, sopaja ta' kantosa ekaneyaja Esau, taretan abdidalem. Abdidalem tako' manabi Esau nyerrang sareng mate'e abdidalem sadaja, tamaso' jugan babine'an sareng na'-kana'. 12#Kad. 22:17 Kaemodi ja' Junandalem ampon adhabu badhi ngator sadajana sopaja abdidalem ta' manggiya alangan pa-ponapa, sareng aparenga toronan sabannya'na ka abdidalem, toronan se bannya'epon kantos ta' ekenneng bitong, akadi bannya'na beddhi e paseser.”
13-15E malem jareya Yakub ngenep e jadhiya. Kalagguwanna ebinna laju epele, ebagiya ka Esau menangka le-olle. Le-ollena jareya acem-macem, iya areya: embi' babine' dhu ratos meggi' ban lalake' dhu polo meggi', dumba babine' dhu ratos meggi' ban lalake' dhu polo meggi', onta se gi' nyosowe ban budhu'na tello polo meggi', sape babine' pa' polo meggi' ban lalake' sapolo meggi', hemar babine' dhu polo meggi' ban lalake' sapolo meggi'. 16Ban-keban jareya esa-pesa epadaddi pan-barampan bagiyan, yan-sabagiyanna epassra'agi ka settong kabulana, esoro jaga. Ca'na Yakub ka la-kabulana jareya, “Kassa' mangkat kaadha'. E antarana bagiyan se settong ban settonganna kodu eella'e.” 17Ka kabulana se nomer settong Yakub ngoca', “Mon tang taretan Esau tatemmo ban ba'na sarta atanya, ‘Sapa lorana ba'na? Ba'na entara dha'emma? Andhi'na sapa ban-keban se eerengngagi ba'na jareya?’ 18-20Saodi kantha reya, ‘Gadhuwanna Yakub, abdiepon Esau, badhi eatorragiya ka Esau, lorana. Yakub dibi' gi' badha e bingkeng.’ ” Kabulana se kapeng dhuwa', kapeng tello', ban sakabbinna se esoro ajaga ban-keban gella', padha eparenta'agi kantha jareya keya. Ca'na pekkerra pola le-olle jareya bisa macellep atena Esau, daddi mon tatemmo sopaja Esau bisa'a nyapora kasala'anna. 21Le-olle jareya esoro giba kaadha', dineng aba'na dibi' gi' ngenep e parkemahanna.
Yakub akeket e Peniel
22E malem jareya Yakub jaga se tedhung, laju alengka Songay Yabok, ngeba binena se kadhuwa, sellerra se kadhuwa ban ana'na se sabellas oreng. 23Saellana reng-oreng jareya la epalengka songay kabbi, Yakub laju ngeba dhi'-andhi'na alengka songay jareya keya. 24#Hos. 12:3-4 Samarena, Yakub dibi' gi' nyeccer e budhi, kadibi'an, ta' noro' alengka songay jareya.
O-tao pas badha oreng lalake', oreng jareya laju akeket ban Yakub sampe' para' seyang. 25E bakto oreng jareya arassa ja' ta' kera bisa'a makala Yakub, Yakub laju epokol epateppa' e bangkongnga, sampe' tolangnga bangkongnga jareya locot dhari cacopona. 26Oreng jareya adhabu, “Mara, sengko' ocol, sateya la para' moncara are.”
“Bunten, junandalem ta' eocola, kajabana manabi abdidalem eberkadi dhimen,” atorra Yakub.
27“Sapa nyamana ba'na?” dhabuna oreng jareya.
“Yakub,” saodda.
28 #
Kad. 35:10
Dhabuna oreng jareya, “Molae sateya nyamana ba'na banne Yakub pole. Ba'na la akeket ban Allah sarta ban manossa, ban ba'na mennang; daddi nyamana ba'na sateya oba daddi Isra'il.”#32:28 Isra'il: Nyama reya monyena padha ban oca' Ibrani se artena “oreng jareya akeket bi' Allah”, otaba “Allah akeket”.
29 #
Kim. 13:17-18
Atorra Yakub, “Samangken ngereng abdidalem parenge oneng pasera asmana junandalem.”
Tape oreng jareya adhabu, “Ba'na ta' osa tao ka tang nyama.” Saellana jareya Yakub laju eberkadi.
30Ca'na Yakub, “Sengko' nangale'e Allah, dhep-adhebban, tape sengko' gi' odhi'.” Daddi kennengngan jareya bi' Yakub enyamae Peniel.#32:30 Peniel: Nyama reya monyena padha ban oca' Ibrani se artena “raena Allah”. 31E bakto are la moncar, Yakub laju mangkat dhari Peniel. Pajalanna abak dippang polana tolangnga bangkongnga se locot dhari cacopona gella'. 32Sampe' sateya oreng Isra'il ta' endha' ngakan daging e bagiyanna cacopona tolangnga bangkong, polana Yakub ekenneng pokol e bagiyan jareya.
လက်ရှိရွေးချယ်ထားမှု
KADADDIYAN 32: MAD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ