MARKUS 10
10
Jagamome Ejaikai Mana
1Kouda kodaa make uwijake Judea dokoo ma, Jarden onee auwaato ma dakii tai. Me wedaba kotuu timakeigai danite kotuu timakai. Tijake okai etopeigi danite etopai.
2Parisi bagee okaapa mejake egaado teete mana, „Me idaana jagamome ejaikai pijo, mee?” egaado tai.
3Tijake Jesus wo eteete mana, „Musaja kawe dani kitimakita?” etii.
4Tijake okeija ka eteete mana, „Musaja mana, mege badii kapogeije jaugajawijake ejaikai enita,” etii.
5Tijake Jesus eteete mana, „Ikiija ka kegepa bida kouja kou mana muto kijaebijamakita.
6Kodeja edoga kidi uwoje makije ugajawita gaa, Ugatameja jame ma jagamo ma eugajawita.
7Okai kouja jame idaana nakame ukame ejaikijake jagamome ma enaida aakai,
8tijake okejai wija ena emo ena tine kidaa tai. Kojoka okejai wija ko beu, kodeja ena tine kidi to.
9Okai kouja Ugatameja tawajawita kidi ki me ka ko okaakai te tijawii,” etii.
10Okai owaapa dakii tijake okai kou mana kodo etope-taido kigeena ma egaado tai.
11Tijake Jesus eteete mana, „Meija jagamome ejaikijake ino ka jagamo wo ebukipi, ejaikita me maida mogai.
12Daana kou danite jagamo idaana okaija jameme ejaikijake ino jameepa uwi-toojogo, okai maija mogai,” etii.
Jesus Jokaido Ebukai
13Me ka jokaido Jesuspa oomei, jokaido kodo ejakido-tita, tijake etope-taido enogimai.
14Okai kou kodo Jesus edojake okai emoge gai, eteete mana, „Jokaido kei aneepa me-tita no naaejaikei. Wate-wate te etai; Ugatameja jakimakita makiida kei dani bagee ipuwe kouja.
15Beu maa kou ani kitii, meija Ugatameja jakimakita makiida joka dani tijake te jakimakipi, okai kouda kodaa umina wadoujo te kaitagi,” etii.
16Tijake jokaido kede ejupugijake okei maida gane jamakijake mobu menii.
Jokaagaa Tonawi
17Okai ita maida uweetigo me idaana tibigi mejake okaapa mijouga kijake eteete mana, „Ei, enauto Kuduu, ani magijo kei tai, ajii taine no?” etii.
18Tijake Jesus wo eteete mana, „Magijo ka enauto naabateege? Meena ma enaa beu, kodeja Ena to, kii ke Ugatame kidi.
19Nitimakita manaido aki epi. Me te wagii, mogai te tai, oma te motii, puja mana te kubai, me puja te eukai, akaitai akuukai ibo ejaikai,” etii.
20Tijake joko eteete mana, „Ei, Kuduu, kei utoma jokaida kodaa make dijo douga,” etii.
21Tijake Jesus jokaagaa kidi edojake ipa egajake eteete mana, „Tumaana to akeepa beu. Akija agijoudo kaa te-uwijake daba bageepa menii. Tijake aki epaawado ka agijo makiitage. Daana mejake naapei,” etii.
22Okai kou mana kodo juwijake okaija ebepeka nogiwadoke tijake gaagaa ma uwii, okai agijo wedaba kouja.
Tonawi Maida Make Etopita Mana
23Jesus wado doumigijake etope-taidoopa eteete mana, „Tonawi bagee Ugatameja jakimakita makiida wadoujo kai ko gaagaa umina no,” etii.
24Etope-taido ego takuu-takuu umina kou mana kodo maida make. Tijake Jesus kigeena ma eteete mana, „Kowaa kei, ani jokaaneido, tonawi agijoudo to dimi kotopijawii bagee Ugatameja jakimakita makiida wadoujo kai ko gaagaa no.
25Tonawi me idaana Ugatameja jakimakita makiida wadoujo kai ma ko, unta idaana keipo mugu duba woujo kai ko euga ekowamakija,” etii.
26Kodeja okei ego takuu-takuu umina tijake eteete mana, „Keetigo ko meime ajii tija?” etii.
27Tijake Jesus edomakijake eteete mana, „Me ka te ekowamakija kodeja, Ugatame kou dani ko beu. Ugatame kidi utoma agijo utoma ekowamakija,” etii.
28Tijake Peterus eteete mana, „Dodou, inii ke utoma agijo jaikidokijake kaapeetege,” etii.
29Tijake Jesus eteete mana, „Beu maa kou ani kitii, ani maida make, daana ajii mana maida make me idaana ma owaa ma, kenekaane ma, panekaane ma, ukame nakame ma, jokaane ma, maki ma te ejaikidokii,
30kodeja okai ito kii makiida kiija kigi mutoona#10:30 seratus joko motiitagi, kou ko, owaido ma, kenekaane ma, panekaane ma, ukaane ma, jokaane ma, maki ma, daana ewidogai ma, tijake putuuda kodaa ajii tai imo to togoo.
31Kodeja okei tiga bagee wedaba nemouga kaitai, daana nemouga ka bagee okei tiga kaitai,” etii.
Kigi Widaago Jesus Bokaitagi Mana Eti-menita
32Okei ita maida Jerusalim wado uweetigo Jesus tiga ouwii. Okei ego takuu-takuu tijake eepeete bageido maija weda gai. Wija ma gaati kede ouwijake okai maida makeeniitai manaido okai etii,
33eteete mana, „Juwidowei, inii Jerusalim wado uwii. Me Joka kidi imam iboudo ma, kapogeije epi bagee maapa eekegajawijake wagiine mana wegaitai; tijake ojaa bageepa eekegajawiitai;
34okei ewidogaitai, daana epoge etuwaitai, daana godijai etijake wagimakaitai, tijake uno wido umijake anigoutagi,” etii.
Jahja ma, Jakub ma Aediimita Mana
35Zabdi jokaaneija Jakub ma, Jahja ma aamejake aeteete mana, „Ei, Kuduu, inaija ide agijo aki nijakei tijawii kadiimai,” aetai.
36Tijake Jesus eteete mana, „Ani kijakei tai magijo ide?” etii.
37Tijake okejai aeteete mana, „Inai ke me idaana ki akija etikaato gebo, daana me idaana ki akija akaato gebo akija ajiipi duba aanimake-tijake niimai,” aetai.
38Kodeja Jesus eteete mana, „Ikaija ka aanadiimeega agijo ikai aagai beu. Anija naita uwaawe ikai aanomake, mee? Daana anija baptis natai danite ikai maija baptis kitimake, mee?” etii.
39Tijake okejaija ka aeteete mana, „Enaa, aakei taitage,” aetai. Tijake Jesus wo eteete mana, „Anija naita uwaawe ikai aanaita, daana anija baptis natai danite ikai maija baptis kitai,
40kodeja anija etikaato gebo, akaato gebo aanimakai mana kou ko anija menija ko beu; kodeja epeepi jatijawita bageepa kaita,” etii.
41Joko ka gaati kede kou mana kodo juwijake okei Jakub ma, Jahja ma emoge egai.
42Tijake Jesus okei utoma manaa-tijake eteete mana, „Ikii epi ojaa bagee ejakimakija bagee kedaa bida peu etimakai, daana okeija ka iboudo kedaa boko jaduwajawii.
43Kodeja ikii jupi kou dani ko beu. Kodeja meija ikii jupi ibo kaine gapi, kijakei te-tai me kai enaa.
44Daana meija ikii jupi okai tiga kaine gapi, okai utoma bagee jakei te-tai me kai.
45Me Joka maija me ka jakei te-tijake mei ko beu kouja, kodeja meepa jakei tijake me wedaba komoka jaawiine tijake dimi mana ekegajawii,” etii.
Bartimeus Peka Beu Jaawita
46Tijake okei Jericho makijo dakii. Jesus ma etope-taido ma enaimo me wedaba ma Jericho makijo podomeetigo gaa Timeus jokame Bartimeus kidi peka wanee diime-tai me kidi ita watija animaki-toojogo.
47Jesus Nazaret ka me kidi jaweete mana juwijake okai emeeme teete mana, „Ei, Jesus, Daud Joka, ipa nagai,” etii.
48Daana me wedaba ka ewidogijake gabo tou etii, kodeja umina kidi emeeme to tigoo, „Ei, Daud Joka, ipa nagai!” etii.
49Jesus joonidoke tijake eteete mana, „Manaa-tiwei,” etii. Okei peka wanee me kidi manaa-tijake eteete mana, „Kegepa tipinimaki, jooni, mana kateete,” etii.
50Daana eba jaikidokijake kii gaa kidi joonidoke, tijake Jesuspa uwii.
51Tijake Jesus eteete mana, „Aki magijo ide ani kakei tai ko?” etii. Tijake peka wanee me kidaa eteete mana, „Ei, Kuduu, peka nakadijawii kadiimai,” etii.
52Tijake Jesus eteete mana, „Aki uwi, akija maakodo gai kodaa beu keege,” etii. Okai kou gaa kodo maija peka kadidoke tijake Jesus ita maida eepei.
လက်ရှိရွေးချယ်ထားမှု
MARKUS 10: EKG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
