LUKAT 6
6
Apùnì Yahuri mene Ala hesik welegat werek kolek, Yesùt agoromì gandum eken palogo nìlìk lagaukwa wene
(Mat.12:1-8; Mrk.2:23-28)
1Apùnì Yahuri mene ineki sabìt oba Ala hesik welegat welagaikarek a'nogo ba aike sapùl he, at Yesùt agoromì ane wanhì lagaukwa mene amanogo inom, gandum yagokwe laga logolìk he, agoromì nen gandum eken palogo ineki nen wùlì tagalogo nìlìk nìlìk lagaukwa. 2Atì'nogo nìlìk laganem he, it ap Parisi mene aike nen he,
“Hit yì nineki sabìt oba Ala hesik welegat logolìk he,
Atì'nogo hagasusak lek, ìlùk wene palek werek meneat he, nahalok palìk wagep,” ìlùk yogoisasukwa. 3Atì'nogo yogoisasukwama, at Yesùt en he,
“Ap Taùt agoromì opolik lagaukwa mene inom sùpùrùk inaik hesikomo re, at en hagasike mene Ala ane ba helal waganek a'nogo hit en etage salhì'lek welagep nogo? Etage salhesebat o. 4Ala awì wùrì'mo kìlìk sùpùrùk horoti mene Ala hesik hisagarek mene yùgùnat nasak motok lek. We, it Ala esewerek mene halok enek nasak ìlùk, wene palek meneat he, at Taùt en wanhikesik, at aike nìkì logolìk he, aike agoromì opolik lagaukwa mene amanogo wogisasike, ìlùk helal waganek a'nogo hit etage salhì'lek welagep nogo?” ìlùk yogoisasikesik he, wene aike mel yogoisasike:
5“Nineki sabìt oba Ala hesik welegat welagorek atì, esewerek he, an abat ta'lasi wagagi nebe yìat o,” ìlùk yogoisasike.
Ala hesik welegat werek kolek, Yesùt en ap aike eki hapelek mene hagasike wene
(Mat.12:9-14; Mrk.3:1-6)
6Nen, ineki sabìt oba aike sapùl, it Ala hesik welegat werek kolek, at Yesùt o apùnì Yahuri mene sapan egarek oba aike kisikesik he, wene yakùlisasike. Yakùlisikenem, ap aike eki ebekwe hapelek mene atoma welagaike. 7Were'ma re, it ap Ala ane helal waganek esewerek mene mel, Parisi mene mel, ina'la nen he,
“Yogotak nineki sabìt oba Ala hesik welegat werek kolek, at en ap arì hagasigin a? Lek a. Hagate halok he,
Hat weak hagaten, ìlùk ùkùm oba houok o,” ìlùk, ineil wanhì lagaukwa. 8Atì'nogo ineil wanho kolek, at Yesùt en ina'la akasukwa mene enagat hùrisìlìk he, ap eki hapelek mene a'nogo mei yogosike:
“Hebe mela'lùk he, tùlem ya eme o,” ìlùk yogosikomo, ap a'nogo mela'lùk he, tùlem aremnogo melasi lagaikomo re, 9at Yesùt en apùnì amanogo mel yogoisasike:
“An nen wene aike hinok wokhisak. Nineki sabìt oba Ala hesik welegat logolìk, hano hagarinabusak a? Weak hagarinabusak a. Telinabusak a? Inoasusak a. Hit en ini ta,” ìlùk, 10atì'nogo yogoisasikesik he, it obogat eileken isìlìk lagaikesik he, ap a'nogo mel yogosike:
“Heki kothan,” ìlùk yogosikomo eki kothasikomo, arat hano agaike. 11Atì'nogo hagasikomo, it ap Ala ane helal waganek esewerek mene amanogo mel, it Parisi mene amanogo mel, ina'mage apik lagalìk he,
“At Yesùt nìkì'nogo hagasuok he,” ìlùk, it-it abok palhì lagaukwa.
Yesùt en ap inebe 12 nen weteberogo hisasike wene
(Mat.10:1-4; Mrk.3:13-19)
12Ati sat he, at Yesùt sapan igìlùk tom oba lagasike. Lagalìk yìbako-hùako Ala ayoko hiko motok were'ma, o arat we isike. 13O we isikomo re, at agoromì ane wanhì lagaukwa mene amanogo waisasikomo wagaukwama re, it mene inebe 12 nen weteberogo hisìlìk he,
“Hinebe lakhikegein,” ìlùk menhisasike. 14Ap weteberogo hisasike atem inetage re, Simon etage aike Peterùt salhike mene a'nogo mel, agot etage Atereat mel, Yakobùt mel, Yohanet mel, Pilipùt mel, Paretolomeùt mel, 15Matìùt mel, Tomat mel, Alpìùt aput Yakobùt mel, Simon,
“O yoma ninawìwerek mene nek logogun,” ìlùk ìkì lagaike a'nogo mel, 16Yakobùt aput Yùrat mel, Yùrat Isikariot Yesùt wasuagalùk hobuk yoko lagaike mene a'nogo mel, inebe atem weteberogo hisasike.
At Yesùt en apùnì motok apik mene wene yakùlisìgìk, ou hagarinapìk, isike wene
(Mat.4:23-25)
17At Yesùt atì'nogo agoromì weteberogo hisìlìk, inom tom oba nen pi wagaukwasik he, kweang enagoma atoma kamo isukwasik were'ma, at agoromì ane wanhì lagaukwa mene amanogo he'nakìt inebe apigat mel, apùnì motok apik o Yurea ya ta mene mel, o kota Yerusalem mene mel, o Tìrùt Siron i laut aik oba welagaikarek mene mel, 18it en at Yesùt ane holhìk, at en it ou weak mene hagarinapìk, uogolùk he, oba atogosi wagaukwa. Atì'nogo atogosi wagaukwama, mokareke oabùt weak mene ina'la kìlìk were'ma inomat hagarinapìke. 19Apùnì ineleage wulaparek hak, at en omamerogo hagarinapenem, it apùnì inebe logolegat atì'nogo hagarinabuagalùk, inebe obogat ineki hakùogolùk walhasukwa.
It aike hanorinapenem, ina'la hai hakìgìk, it aike weagarinapenem, ina'la weak agìk, igin isike wene
(Mat.5:1-12)
20Atì'nogo hagatenem, at Yesùt en agoromì ane wanhì lagaukwa mene amanogo eileken inoba hìlìk he, mel yogoisasike:
“Hit hinelageik mene hùgì, Ala awe a'ma hikegein atì nen he, hina'la hai hakìkì logoino o. 21Nen, hit yogotak hina'la nele negen welagep mene hùgì, hobuk wokhisikenem hinalabut ning hogo nogoin atì nen he, hina'la hai hakìkì logoino o. Nen, hit le aga lagep mene hùgì, hobuk eto asugun atì nen he, hina'la hai hakìkì logoino o. 22-23Nen, it ap yoma inapulak en, it ap alep Ala ane yogoisìkì lagaukwa mene hagarinapì lagaukwa hagat, hit yogotak an abat ta'lasi wagagi a'nogo nane wanhep atì nen ina'mapsìrì wathikìkì logolìk, hit enek kogologo hikìgìk, inane pùk weak wenakhisìgìk.
Ap yì weak, ìlùk hinetage ìkì logolìk hinabok weak palhìk, atì'nogo hagathinapo halok, oko wokhisegein mene pogot oba apik werek atì nen he, hina'la hai hakìkì logolìk huleken etawì watì logoino.
24“Atì'nogo meneat he, hit ap kain hineilmo werek mene hùgì nek he, hinagarok apik atì ba nen, hina'la hai hakìkì lagep mene, hobuk weagathinabigin o. 25Nen, hit aike yogotak elama hesik enek hinalabut ning hogo nìkì lagep mene hùgì weagathinapenem, hobuk no hogoin o. Nen, hit yogotak elama hesik enek eto aga lagep mene hùgì weagathinapenem, hinetaùken warìkì logolìk le asugunat o. 26It ap yoma inapulak en he, it ap aike Ala ane yogoisagarek mene salek lalinapo kolegat he, hogorinapì lagaukwa hak, apùnì obogat en hogothinapo halok he, weagathinabigin o,” ìlùk yogoisasike.
At Yesùt en, “It ap hinaselei mene atì hinetawìrogo logousak o,” ìlùk yogoisasike wene
(Mat.5:38-48, 7:12)
27Atì'nogo yogoisasikesik hobuk he, mel yogoisasike:
“Atì'nogo meneat he, hit an nane holhì lagep mene yì, an wene aike yogohisak. It apùnì hinom weak mene hinetawìrogo logoino o. It en ina'mapsìrì walogo inabìt hagathinapo kolegat he, hit en oko hano mene nek hagarinapì logoino o. 28It en hit homan hikiko kolegat he, hit en he, agaugerinapì logoino o. Nen, it weagathinabì'lùgì mene atì, Ala nen hanorinabuagalùk, it hesik sapan ìkì logoino o. 29It aike nen hinelokoken o'moko lapuk hogo hinoato halok he, o'moko inom hinoasuagalùk ìnùgisani o. Nen, it aike nen hinasu sogoi su mene atì heliko halok he, hinasu eilemkwe mene atì inomat heloak en he, elele wanhùp o. 30It aike nen,
Hit mene wo'nisani o, ìlùk kìno yogohisiko halok he, inebe lopok wogisìkì logoino. Nen, it en hit hinagarok mene wanho halok he, hobuk,
Wo'nisani, ìlùk kìno yogoisagùp o. 31Hit hina'la nen he,
It aike nen tì'nogo haga'ninabilep e! ìlùk akegesep atì hagat, hit en it atì atì'nogoat hagarinapì logoino o. 32Nen, it ap inetawìthinaparek mene nek hit en hinetawìrinapep halok he,
Hano, ìlùk yogohisogoin nogo? It apùnì weak hagatarek mene nen atìtì'nogo inetawìrinaparek mene, it en hogo re, inetawìrinaparegat. 33It apùnì hano hagathinabì'lùgì mene atì nek, hit en hano hagarinapì lagep halok he,
Hano, ìlùk yogohisogoin nogo? It apùnì weak hagatarek mene inoabùt atìtì'nogoat hagatarek. 34Hit en, it apùnì oko wo'nisoak, ìlùk akìkì logolìk wogisìkì lagep halok he,
Hano, ìlùk yogohisogoin nogo? It ap weak hagatarek mene atì re,
Hobuk oko higit hogo wo'nisoak, ìlùk inagaiya'lak weak hagatarek mene aike wogisikenem, it en hogo re, wogisagaregat. 35It atì'nogo hagatarek meneat he, hit en he, hinom weak mene hinetawìrinapìk, hanorogo leberisìgìk,
Oko it en aike wo'nesuak, ìlùk akìgì'legat hinoake yùgùn wogisìgìk, ìkì logogun halok he, hinebe Ala Etagepogot againapùrìat were'ma re, oko hùko mene wokhisegein o. Apùnì nen, at ebe hai watì'lek weak hagato kolegat etawìrinaperek atì. 36Halok he, ninopase etawìrinaperek hak, hit en apùnì hinetawìrinapì logoino o,” ìlùk yogoisasike.
Apùnì ùkùm inoba hìgìk, kotik, egarek mene hesik yogoisasike wene
(Mat.7:1-5)
37Atì'nogo yogoisasikesik he, wene aike mel yogoisasike:
“Ala nen ùkùm hinoba heinogo ìlùk he, hit en apùnì aike ùkùm inoba hùgùp o. Ala nen ùkùm hinoba hìlìk he, weagathinabinogo ìlùk, hit en apùnì aike ùkùm inoba hìlìk he, weagarinapùp o. Halok he, hit an weak hagatì lagep mene Ala nen sagalogo legetsoagalùk he, apùnì nen weagathinabì'lùgì mene hit en sagalogo legetsìkì logoino o. 38Hit en yì mene tì mene yùgùnat wogisegep halok he, Ala nen atì'nogo yùgùnat wokhisegeinat o. Nen, ìlìreke sogoloak oba walhìlìk, apem hetok hogo kalhenem, yamuk hogo pelakhìlìk hobuk oba louk hogo peserogo aike pilelogo piko kolek wogisegesep hak, Ala nen atì'nogoat hùkorogo wokhisegein o. Hit en ìlìreke walhìlìk en wogisegesep atì hak, Ala nen ìlìreke atì baat walogo wokhisegein o,” ìlùk, yogoisasike. 39Atì'nogo yogoisìlìk he, wene aike oba lìrogo mel yogoisasike:
“At aike eileken mùm mene nen, at aike atì'nogo eileken mùmat mene yogotì logolìk he,
Kwe yìkwe lù, ìlùk eki hagasogo wolok lasak akegep? Atì'nogo logoin halok he, eperagat holugu i kaluk wagane'ma pile wo'laka pusak lek nogo? Pusagat o. 40It guru lak wene yakùlisagarek mene sebeksek negen werek kolegat, it inagainapùrì yakùlisagarek mene atì hesaksek negen po ya welagaikarek lek o. Atì'nogo meneat he, sa nen wene arat yakùlìk tùkùm hogo elu arìk halok he, opase yakùlisikerek mene atì eperak hig'irat o. 41Hit hinokawerek hineilekenma e hùko oake palek mene walurek werek atì hìthakìgì'legat he, it hinerùgì hinagaiya'lak aike ineilekenma ìlìngeken hamùlùgat kìlìk were'ma wokhùogolùk kelagisìkì lagep atì nahalok. 42Hinokawerek hineilekenma e hùko mene palek walurek werek atì hìgì'lek logolìgat he, hinerùgì hinagaiya'lak atì yogoisìkì logolìk,
Heilekenma ìlìngeken kike mene atì wokheak o, ìlùk usak nogo? Hinogat oba nek hano salek hinetaùken pìre yì rì! Hinokawerek hineilekenma e palek hùko mene walurek werek atì tak wokhakìlìk en, hineileken arat lìa aga halok he, hobuk hinerùgì hinagaiya'lak ineilekenma ìlìgeken werek mene atì, elok wokhogoin o,” ìlùk yogoisasike.
“E eken ìterek oba nen ero enagat hùthagarek,” ìlùk yogoisasike wene
(Mat.7:16-20, 12:33-35)
43Atì'nogo yogoisasikesik he, hobuk aike mel yogoisasike:
“E ero hano mene aike eken weak mene ìterek lek. Ati hak he, e ero weak mene eken hano mene aike ìterek legat. 44Yì e tì e atì re, eken ìterek atì ba ero enagat hùthagarek. Pakì alok weak meneat he, eken ara hano mene eken hake aike ìrì'mo palharek motok lek. Ati hak he, mùn meneat he, eken he, anggur eken hano mene ìrì'mo palharek motok legat. 45Apùnì nen yì wene tì wene inapema nen egarek atì re, ina'la peserek logolìk, kagalogo lagai waganem egarek o. Inoabùt hano mene ina'la hano mene peserek logolìk, wene hano meneat wulabi wagaikarek o. Meneat he, apùnì inoabùt weak mene ina'la weagat logolìk wene weak meneat wulabi wagaikarek o,” ìlùk yogoisasike.
“Ap inebe pìre nen o pìreat wusukwa,” ìlùk oba lìrogo yogoisasike wene
(Mat.7:24-27)
46Atì'nogo yogoisasikesik he, aike mel yogoisasike:
“Hit an nen yogohisìkì lagì mene hagatì'lek logolìgat he,
Noe, noe, ìlùk nenahalok yogonetì lagep. 47-48Sa nen an noba wìrìk nane holheresik higit hogo hagarì'logo mene atì, o wùtarek mene oba lìrogo yogohisak. At atì, ap en o wùtarek atì hakeat o. Ap aike o wusigìlùk kweang a'marogo habulhìlìk en, helep hìlìk he, o tik helep oba louk hogo hìlìk en oebe wùsike. Atì'nogo wùsikesi'mo nen, hobuk i hu hùko waga logolìk o a'nogo warerathasike mene re, motok ning hogo wùsikomo nogo nen he, abolok aike ìgì'lek motok kamo isike. 49Atì'nogo meneat he, sa nen an nane holhì logolìgat he, higit hogo hagarì'logo lek halok he, ap aike o wùsigìlùk o tik kweang oba hìgì'lek wùsikomo, i hu hùko waga logolìk o a'nogo sa'nok hogo wolok laga logolìk motok weagathesike atì hakeat o,” ìlùk yogoisasike.
လက်ရှိရွေးချယ်ထားမှု
LUKAT 6: LAIDNI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
