Genesisi 8
8
Kugwita ka ndambi
1Se Txizimu txi to alakanya Nowa ni sotshe sihari sa txitinga ni sotshe sifuyo si a nga ti naso ngalavani; Txizimu txi to maha diphuho di txi futeta txitimwi ka ditiko, se mati ma to khata kuphwa. 2Minambo ya kuhuma hahatshi ka mafu yi to ema kukhulunga; mafasitela a nzumani me vhaleka; se mati a nzuma ma to leka kuwa. 3Se kudotho-kudotho mati ma to khata kuphwa ha mafuni,#8:3 Vaheb. me tshumela me tsula. ma to phwa msana ka 150 wa masiku. 4Se ka mtxima wa wutxhanu ni yimbidi, ngu ditshiku da wugumi ni mtxhanu ni mambidi ka mtxima, ngalava yi to ya txhekama txitimwi ka mmango wa Ararati. 5Se mati ma to ya masoni ngu kuphwa, an'ze ka mtxima wa wugumi; ka ditshiku do khata ka mtxima wa wugumi, ku to woneka txitimwi ka mimango.
6Ku to maheka taku msana ka mune wa magumi a masiku, Nowa a to tula difasitela di a nga ti di mahile ha ngalavani, 7Se a to tulela digwana, adi di nga huma di puruma-puruma hahanze, di tshumela di wuya, kala kuza mati mephwa txitimwi ka mafu. 8Msana keto, a to humisa txituvani, a nga ti natxo kasi kuwona, taku mwendo mati ma hungulekile txitimwi ka mafu. 9Txituvani kha txa ya mana ko khandama kona, txi to wuya ka Nowa, txi ta wulela ngalavani, nguko ku ti ni mati txitimwi ka otshe mafu; ene a to nawuluta diwoko, e ñola txituvani e txi wuleta ngalavani amu a nga ti kona.
10Aniko Nowa a to engeta e rinzela mtxhanu wa masiku ni mambidi, a to humisa kambe txituvani hahanze ka ngalava. 11Se txituvani txi to tshumela txi wuya kwakwe ni minova, txi di ñote ngu mrotho ditshanzu litshambwati lo nakana la muolivha. Ngu kona Nowa a nga tiziva taku mati ma phwite txitimwi ka mafu. 12Sekoko ene a to engeta e rinzela mtxhanu wa masiku ni mambidi, e humisa kambe txituvani, aniko kha txa tshumela txi wuya kwakwe.
13Sekoko ngako Nowa a di ni 601 wa malembe a kuhanya kwakwe, ka mtxima wo khata, ngu ditshiku do khata da mtxima, ku to phwa mati ha mafuni. Nowa a to thavisa lyangwa la ngalava; a di solete, a to wona taku mafu a ditiko ma omile. 14Ka ditshiku da wugumi ni mambidi, ka mtxima wa wumbidi, mati ma to maneka ma di phwite. 15Sekoko Txizimu txi to womba ka Nowa, txi txi kha txona:
16“Huma ngalavani, awe ni msikati wako, ni vanana vako ni vasikati va vanana vako. 17Sotshe sihari si si ku kumweko ni nawe, sotshe si i ku nyama, sinyana, sifuyo, ni sotshe si si tsimbilako ngu dibindi ha mafuni, huma naso, si na velekele ha mafuni, si na veke mihando, si na ande ha mafuni.”
18Sekoko Nowa a to huma, ni vanana vakwe, ni msikati wakwe, ni vasikati va vanana vakwe. 19Sotshe sihari, sotshe so tsimbila ngu dibindi, sotshe sinyana, ni sotshe si si kasako ha mafuni, si to huma ngalavani, ngu tixaka ta sona.
Nowa e aka txiluvelo
20Nowa a to akela Txizimu txiluvelo, e teka sihari sokari ka sotshe so sawuleka, ni ka sotshe sinyana so sawuleka, a txi maha mningelo wo hiswa ha txiluveloni. 21Se Mkoma a to hefemula, a txi pfa kubhumula, a txi khene kha Mkoma mbiluni kwakwe: “Ani kha ni na mbi ngadi ni ruketela ditiko ngu mhaka ya m'thu, nguko mipimiso ya mbilu ya m'thu njo biha, kukhukhela wananani kwakwe; kha ni na mbi ngadi ni daya kambe sotshe sivangwa si si hanyako, kufana ni ti ni nga ti maha. 22Mafu ma di nga diho, kuphaya ni kuelula, malanga ni wuxika, wusiku ni mitshikari, kha si na mbi gwita.”
လက်ရှိရွေးချယ်ထားမှု
Genesisi 8: BEC2016
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
A Bíblia em Txitxopi © Bible Society in Mozambique, 2016.