Lukas 8
8
Daberru-daberru mengèkutken janah mengkebasi Jesus
1Oda pella sadikè dekkah nai, iagahi Jesus mo kuta dekket sosor-sosor merkuliling lako memagahken Sukuten Simerandal terrèngèt Dèbata pecèndekken Kerajaenna. Dekket sisinNa sisipuluh dua kalak rebbak dekketSa. 2#Mat. 27:55-56; Mrk. 15:40-41; Luk. 23:49 Bagi ma bak daberru-daberru sienggo ipemalum ibas sakitna nai dekket nisellapen sètan pè, imo si Maria simergerar Magdalena pè (pitu sètan ipellaus bana nai). 3Si Johana sinibages si Kusa, pugabè istana si Herodes; si Susana, mbuè dèng tupèh daberru sidèban. Ikebbasi kalak i ngo karina mi sindalanen idi dekket riarna sendiri.
Umpama terrèngèt sada kalak penabur
(Mat. 13:1-9; Mrk. 4:1-9)
4Dak merrohen ngo jelma idi i merbagè kuta nai mendahi Jesus. Enggo kessa mbuè kalohoon pulung, isukutken Jesus mo umpama taba kalak idi, nina mo, 5“Lot mo sada kalak laus menabur bennih. Tikan menabur idi ia, lot mo dèba bennih idi ndabuh mi dalan, nai ideddohi dèba mo i janah ipangani manuk-manuk. 6Dèba ndabuh mo i mi tanoh batu. Tikan turah dèng ngo bennih idi mènter males mo, kerna ngkerrah ngo tanohna. 7Dèba ndabuh mi tanoh kopi-kopi, rebbak tubuh mo kopi-kopi idi dekket bennih i, gabè ipetcek kopi-kopi idi mo bennih siturah idi. 8Tapi lot ma mo dèba ndabuh bennih i mi tanoh nggabur, turah janah ndeppur mbellen mo ia janah merbuahken serratus lempit.”
Iujungi Jesus mo sukutenna idi bagèen, “Kènè simendengkohkensa, radumi kènè mo i mendè-mendè!”
Kasa ndia merumpama Jesus
(Mat. 13:10-17; Mrk. 4:10-12)
9Nai ikusoi sisiin idi mo Jesus, kadè lapaten codiin idi. 10#Jes. 6:9-10 Ialoi Jesus mo, “Ipergeddo Dèbata ngo asa pellin kenè kessa memettoh rusia kerajaenNa idi. Kernana i ngo asa taba sidèban isukutken idi merkitè codiin, asa mula pè merpenengen kalak i tapi oda merpendidah, tukasi pè merpemeggè kalak idi tapi oda merpendengkoh janah oda iarti.”
Ipeterrang Jesus lapaten umpama penabur
(Mat. 13:18-23; Mrk. 4:13-20)
11“Bagèen ngo lapaten codiin ndai; Ia ukum bennih idi, imo kata Dèbata. 12Bennih sindabuh mi dalan idi imo kalak simendengkoh kata i, tapi roh mo Sibolis irampasi mo berrita idi i pusuh perratèen kalak idi nai, gabè oda nèngè kalak idi percaya janah oda maluah. 13Bennih sindabuh mi tanoh batu, imo kalak simendengkoh sukuten idi menter lolo ngo ia menjalo. Tapi oda ikeddarohken. Pellin sigejjap ngo kessa percaya ia. Ai roh kessa pengunjunen gabè oda nè hot kalak idi. 14Bennih sindabuh mi tengah kopi-kopi, imo kalak simendengkoh sukuten idi, tapi olang-aling ngo kalak idi, ai sèkel kalohoon kalak i kaya janah mersennang-sennang i dunia èn. Idi nola mo menessak kalak idi gabè oda nè merbuahken selloh kalak idi. 15Ukum bennih sindabuh mi tanoh nggabur idi, imo kalak simendengkoh sukuten idi janah mènter ipennep mendè ibagasen pennarihenna. Iulaken ngo mendè ibagasen mbingit, gabè merbuahken mbuè janah mendè.”
Umpama terrèngèt pelita
(Mrk. 4:21-25)
16 #
Mat. 5:15; Luk. 11:33 “Oda lot kalak mengelakati pellita itungkupi nola dekket kendang, barang ibaing nola mi terruh peddemmen. Tapi mi babo perpelitaan i ngo ibakin asa karina kalak simbengket mi bages mengidah cuhayana.
17 #
Mat. 10:26; Luk. 12:2 Oda lot simboni mak gabè terridah janah oda lot sinirahasiaken mak ntarar nola janah terbettoh.
18 #
Mat. 25:29; Luk. 19:26 Kernana i peratè-atèken mo mendè sinidengkoh ndènè. Ai barang isè enggo lot bana, iberrèken nola ma ngo bana, tapi barang isè madèng lot bana, buaten ngo bana nai barang kadè sienggo lot bana idi kin.”
Inang bak kaka-anggi Jesus
(Mat. 12:46-50; Mrk. 3:31-35)
19Roh mo inang bak anggi Jesus mendahiSa, tapi oda terbakin kalak idi soh mendahi Jesus, kerna buèna jelma nterrem idi. 20Nai lot mo sada kalak mendokken taba Jesus, “Guru, i ruar ngo bagèndari inang bak anggimu pè, naing pejumpa dekket kono.”
21Tapi nina Jesus mo taba kalak idi, “Kalak simendengkoh janah simengulaken kata Dèbata ingo inangku bak kaka-anggingKu.”
Ipemènak Jesus angin sapa-sipu
(Mat. 8:23-27; Mrk. 4:35-41)
22Tikan i sada ari, mbangkit mo Jesus rebbak dekket sisinNa mi sada bungki, janah idokken taba sisinna, “Laus mo kita mi suberrang tao,” nai mènter berkat mo kalak idi. 23Sinderrang mengkayuh idi kalak i, terpeddem ngo Jesus. Sintempu roh mo angin sapa-sipu i tao i. Sumampak-sampak mo laè i masuk mi bungki janah lako bahaya mo kalak i karina. 24Idapetken sisiin i mo Jesus janah idungoi, nina mo, “O Guru, Guru, mago mo kita!”
Kèkè mo Jesus, isergangi mo angin bak tao situmuyu-tuyu idi. Nai mènter mènak mo angin bak tao i. 25Idokken Jesus mo taba sisinNa, “Kasa buradan kènè? Idikè ngo kepercayaen ndènè?”
Gabè mbiar janah kagum kalohoon mo kalak idi, nina mo samahsa, “Isè ngo ndia tuhu kalak ènda dekket ngo angin topan bak galombang ndorok iperèntah, janah tunduk ngo tabasa!”
Ipemalum Jesus nisellapen tendi jahat
(Mat. 8:28-34; Mrk. 5:1-20)
26Soh mo Jesus dekket sisinNa mi nagerri Gerasa i suberrang tao Galilea kan kebincaren. 27Sampur kessa mo Jesus mi darat, idahi sada kalak daholi siniselluki tendi jahat ngo Ia. I kuta nai ngo kalak i. Enggo toko dekkahna oda nèngè uè ia meroles janah oda uè tading i bages. Dak merian ibas liang kuburen ngo ia. 28Iidah kessa mo Jesus, mènter mersurak mo ia ninganna mersembah merkuraja i hadeppen Jesus janah nina mo, “O Jesus, Anak Dèbata Sintèmbul i! Merkadè kono roh mendahi aku? Kuèlèk-èlèk mo kono asa ulang isiksa kono aku!” 29Idokken pè bagidi, kumarna enggo iusir Jesus ia bana nai. Mbuè ngo tendi jahat i menellukisa. Asa enggo pè irantè ia irettes ngo rantèna i janah iembah tendi jahat i mi kellongoon.
30Ikuso Jesus mo ia, “Isè gerarmu?”
“Ukum gerarku: Lègiun,” nina mengaloi – kerna mbuè ngo enggo tendi jahat i menellukisa. 31Ièlèk-èlèk tendi jahat i mo Jesus, asa ulang iusir kalak idi mi Lembeng Kematèen.
32Ndessing mi bekkas idi lot mo mbuè kalohoon babi, dak menggigi i pispis delleng ni sidi. Gabè i`lèkken tendi jahat i mo asa ipaduè nemmu kalak i memengketti babi idi. Nai ipaduè Jesus mo kalak idi misidi. 33Karuar mo tendi jahat idi bai jelma idi nai janah ibengketti mo babi i, nai mènter mermangkaten mo babi idi i tebbing i nai mi tao gabè terneknek mo.
34Iidah simermakan babi idi kessa mo simasa i, bulanting mo ia laus mi kuta, ibagahken mo simasa idi bai perkuta dekket mi sosor sikulilingna. 35Merrohen mo kalak lako menengen simasa i. Idahi kalak i mo Jesus, gabè iidah kalak i mo enggo malum siniselluken tendi jahat idi kin kundul i gembar nèhè Jesus. Enggo mo merroles ia janah enggo merpikiren nterrang. Gabè buradan mo kalak idi karinana. 36Isukutken sienggo mengidah simasa idi mo taba jelma siroh idi terrèngèt permalumna. 37Karina pengisi Gerasa mengendik-endik Jesus asa itadingken bekkas idi, kerna mbiar kalohoon ngo kalak idi karina. Nai ibengketti Jesus mo bungki lako balik. 38Ièlèk-èlèk niselluken tendi jahat idi mo Jesus, asa ipadiat ia mengèkut rebbak Jesus.
Tapi ipasulak Jesus mo ia molih, 39idokken Jesus mo mbangsa, “Molih mo kono mi sapomu janah sukutken mo barang kadè sienggo ibakin Tuhan i bamu.”
Nai laus mo ia, iagahi mo kuta i memagahken sienggo nibaing Jesus tabasa.
Berru si Jairus – Daberru simendegges Jesus
(Mat. 9:18-26; Mrk. 5:21-43)
40Balik kessa Jesus i suberrang tao i nai, lolo kalohoon mo jelma nterrem idi, ai ipèma-pèma ngo Ia. 41Nai roh mo sada kalak pengendeng bages perguruun mergerar si Jairus. Isembah mo Jesus, janah ièlèk-èlèk asa roh mi bagesna. 42Kerna mpiah kaloon ngo iakap berruna sisada i sienggo merrumur sipuluhdua tahun idi, ai enggo patè-patèen.
Sinderrang merdalan Jesus mi bages si Jairus, dak sessak ngo jelma nterrem idi. 43Lot mo isidi sada kalak daberru enggo sipuluhdua tahun dekkahna dak bubus. Enggo mbuè keroginna mertambar tapi laju oda malum. 44Ibas tengah-tengah jelma nterrem idi nai mènter ijolmiti daberru idi mo Jesus i podi nai, ijamah mo punca jubah Jesus. Nai mènter mentadi mo iakap ia darohna bubus idi. 45Ikuso Jesus mo jelma i, “Isè menjamah Aku?”
Tapi isè poda lot mengaku, gabè nina si Petrus mo, “Guru, mbuè ngo jelma i kulilingmu, ai dak isessak kalak i ngo Kono!”
46Idokken Jesus mo, “Tapi lot ngo menjamah Aku. Kubettoh ngo i, ai karuar ngo gegoh bangKu nai.” 47Satdar mo daberru idi, enggo terbettoh sinibaingna idi. Roh mo ia menggirgir, isembah mo Jesus. Ibagahken mo karinana, tah kadè sebabna asa ijamah ia Jesus, idengkoh jelma nterrem idi, janah barang bakunè permalumna sakitna i gejapkenna i. 48Nai nina Jesus mo tabaSa, “Alè nangè, kepercayanmi ngo pemalumken kono. Njuah-njuah mo ko balik!”
49Tikan mengerana dèng Jesus, soh mo sada kalak pasulaken i bages si Jairus nai. Idokken mo taba si Jairus, “Ulang pella lejai nèngè Guru i, ai enggo matè berrumu idi.”
50Idengkoh Jesus ngo nidokken pasulaken i, gabè nina mo mbang si Jairus, “Ulang kono ganggu, percaya mo ko, njuah mono iakap berrumu i.”
51Soh kessa mi bages si Jairus, isè poda ipadiat Jesus mbengket rebbakkensa laènken pellin si Petrus, si Johanes, si Jakobus dekket partua anak idi mo kessa. 52Karina nisidi tangis ngo janah marsak kumarna permatè anak idi. Idokken Jesus mo, “Ulang kènè tangis, oda ngo matè anak ènda, pellin meddem ngo!”
53Nai itertabai kalak idi mo Jesus, ai ibettoh kalak i ngo enggo matè berru idi. 54Nai ijamah Jesus mo tangan anak idi, ninganna idokken, “Alè tatat, kèkè mo kono!” 55Mènter roh mo kessah anak idi janah kèkè mo ia. Enggo kessa i, idokken Jesus mo asa iberrèken anak idi mangan. 56Lengang kalohoon mo partua ni anak idi. Tapi igerai Jesus ngo kalak idi asa ulang ibagahken barang mendahi isè pè simasa idi.
လက်ရှိရွေးချယ်ထားမှု
Lukas 8: LAIBTD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
