Lukas 10
10
Iutus Jesus sisiin, pitu puluh kalak
1Enggo kessa i, ipilih Jesus mo pitu puluh kalak sisiin. Ipasulak mo kalak idi dua kalak sindalanen, joloon laus merdalan lako mengagahi kuta bak bekkas sinaing dahinNa. 2#Mat. 9:37-38 “Enggo mbuè kalohoon peraniin,” nina Jesus taba kalak idi, “tapi cituk ngo ukum simerrani. Jadi pido kènè mo bai sidasa perraniin i nai asa ipasulak lako merrani. 3#Mat. 10:16 Asa, berkat mo kènè bagèndari, Kupasulak ngo kènè bagè biri-biri mi tengah-tengah biahat. 4#Mat. 10:7-14; Mrk. 6:8-11; Luk. 9:3-5 Ulang pella embah kènè tagan-tagan barang bagut-bagut barang pè cipatu. Ulang mo pella tendo kè i tengah ndalan lako merrèken salam barang taba isè pè. 5Mula ibengketti kènè sada bages, mènter dokken kènè mo: ‘Damè mo mi pengisi bages ènda.’ 6Mula lemmo atè perbages idi damè, selloh ngo salam ndènè idi bana. Tapi ukum oda lemmo atèna damè idi, jalo kènè mo balik salam ndènè idi. 7#1 Kor. 9:14; 1 Tim. 5:18 Iani kènè mo sada bages, janah jalo kènè mo barang kadè ikebbasi bai ndènè i sidi, ai patut ngo menjalo upah kalak simahan bahaan. Ulang pella pindah-pindah kènè i sada bages nai mi bages sisada. 8Mula soh kènè mi sada kuta janah ijalo ngo kènè mendè i sidi, pangan kènè mo nihidangkenna i sidi. 9Pemalum kènè mo simersakit nisidi janah dokken kènè mo taba jelma nisidi: Oda ndekkah nèngè, ipecèndek Dèbata mo Kerajanna i tengah-tengah ndènè. 10#Ul. 13:51 Tapi mula ibengketti kènè sada kuta, janah oda ijalo kènè i sidi. Laus mo kènè mi dalan mbellen ni kuta idi janah dokken kènè mo: 11‘Abu silekket ni tapap-tapap nèhè nami pè kupispisken kami ngo mahan pernèngèten bai ndènè. Tapi èngèt kènè mo, oda ndekkah nèngè roh mo Kerajaen Dèbata i tengah-tengah ndènè!’ 12#1 Ms. 19:24-28; Mat. 10:15, 11:24 Èngèt mo, mula roh ari kiamat, masèhen ngo atè Dèbata midah kuta Sodom, ulang pada midah kuta idi!”
Kuta siso percaya
(Mat. 11:20-24)
13 #
Jes. 23:1-18; Hes. 26:1–28:26; Jl. 3:4-8; Am. 1:9-10; Zak. 9:2-4 “Merjaya mo kono Korazim dekket kono alè Betsaida! Ukum i kuta Tirus dekket Sidon kin ibakin tanda kellengangen sinibakin i tengah-tengahna idi, enggo mo nemmu peselsel kalak nisidi janah mertobat! 14Lotiin mo pengisi Sidon dekket Tirus terrolih masèh atè i ari kiamat, ulang pada kènè. 15#Jes. 14:13-15 Bang kènè pè alè Kapernaum; idokdok kènè ngo ipedates kènè soh mi langit? Oda, tapi ibuang mo kènè mi narakka!”
16 #
Mat. 10:40; Mrk. 9:37; Luk. 9:48; Joh. 13:20 Nai nina Jesus mo taba sisinNa, “Barang isè menguèi rana ndènè simenguèi Aku mo i. Barang isè menonja kènè, simenonja Aku mo i. Janah barang isè menonja Aku, simengutus Aku ngo nitonjana isidi.”
Balik sisiin sipitu puluh kalak
17Balik mo sisiin sipitu puluh kalak idi ibagasen sampang atè. “Tuhan” nina kalak idi. “Tunduk ngo karinana dekket sètan pè kubakin kami mengasangken gerarMu!”
18Ialoi Jesus mo, “Kuidah ngo ndabuh i langit nai Sètan i bagè pellian. 19#Ps. 91:13 Èngèt kènè mo, enggo Kuberrèken kuasa bai ndènè mendeddoh nipè dekket bik, bak kuasa lako mennaluken karinana musuh. Janah kadè poda ndorok mencilakai kènè. 20Tapi ulang pella lolo ukur ndènè kumarna karina tendi jahat i tunduk bai ndènè. Tapi lolo mo kènè, kerna enggo isuratken gerar ndènè i sorga.”
Mersampang atè Jesus mendokken melias atè
(Mat. 11:25-27, 13:16-17)
21Nderrangna i ma, mersampang atè mo Jesus ibagasen Tendi Perbadia. Idokken Jesus mo, “Ialè Pa, Tuhan ni karina langit dekket tanoh èn! Kudokken melias atè baMu, kerna nirusiakenmu taba kalak simpantas niasè dekket simbages nahu, ipeterar Kono ngo taba kalak sikurang nahu. Ibaing kono ngo karinana i alè Pa, ibas lemmomu nai.”
22 #
Joh. 3:35, 10:15 “Karina enggo ipesakat BapangKu bangKu. Keppè isè ma poda menandai Aku, laènken Bapa i. Janah oda lot menandai Bapa laènken Anak i, kalak nipetandaken Anak i taba Bapa mo kessa.”
23Nai itulihken Jesus mo sisinNa, idokken mo pellin bai kalak idi, “Sayurntua mo kènè kumarna niidah ndènè i bagèndari. 24Èngèt kènè mo: Mbuè kalohon ngo nabi dekket raja pè sèkel naing mengidah bagè niidah ndènè i, tapi oda terbaing kalak i mengidah idi. Sèkel kalohon ngo kalak idi mendengkoh bagè sinidengkoh ndènè i, tapi oda terbaing kalak i mendengkohsa.”
Codiin terrèngèt kalak Samaria mermasèh atè
25 #
Mat. 22:35-40; Mrk. 12:28-34 Tikan sidari, roh mo cènder sada kalak guru agama lako mengunjuni Jesus, ikusoken mo, “O Guru, kadè ngo sibakinenku asa dapet aku kenggelluhen siamman sumendah idi?”
26Ialoi Jesus mo ia, “Kadè sitersurat ibas Bibèl? Nai bakunè ngo pana pengantusimu terrèngèt idi?”
27 #
3 Ms. 19:18; 5 Ms. 6:5 Ialoi simettoh patiin idi mo, “Kennah kekellengenmu ngo Tuhan Dèbatamu ibas nasa pusuh peratèenmu, dekket i nasa kessahmu, dekket nasa gegohmu, dekket nasa atè-atèmu, janah kekellengenmu ngo denganmu jelma tosè bagè dirimu.”
28 #
3 Ms. 18:5
“Tuhu ngo pengaloimu i,” nina Jesus tabasa, “Baing mo bagidi asa nggelluh kono.”
29Tapi naing mo ipènterri guru-guru agama i dirina, ikuso mo, “Isè ngo dengan jelma idi?”
30Ialoi Jesus mo, “Lot mo sada kalak daholi mengencuah i Jerusalem nai mi Jeriko. I tengah ndalan isamun pennamun mo ia. Ipupus mo nasa hartana, janah ipekpekki pella naing-naing matè ia, nai itadingken mo ia bagidi ugahen. 31Nai lot mo tupung memellus sada kalak imam arap i. Iidah imam i ngo nemmu ia, tapi iimbilken mo merdalan janah iterrusken perdalanenna. 32Enggo kessa i, mentas ma mo arap idi sada kalak marga Lewi, iidah ma mo nisamun ndèba i gampar. Ilausken ma mo arap dalan sidèban. 33#2 Kron. 28:15 Tapi lot mo sada kalak Samaria mentas arap i, iidah kessa sitersamun i masèh mo atèna. 34Idapetken mo sitersamun idi, idaisken mo minak dekket anggur mi ugahna, ibaluti mo ugahna i. Idokong mo mi babo kudana janah iembah mo mi permalamen, ikebbaru mo ia isidi. 35Sibarembenkenna ibuat mo dua kèpèng pirak, iberrèken mo taba sidasa bages permalamen idi ninganna idokken, ‘Kebbaru mo ia,’ nina. ‘Mulak kessa aku sikalèn mi sènda, kugarar pè karina kerogiin misidi.’ ”
36Nai nina Jesus mo mengujungi sukutenna i, “Siapaina ngo dok atèmu kalak i sitellu ndai gabè dengan jelma bai sitersamun idi?”
37Ialoi guru agama idi mo, “Kalak simermasèh atè tabasa idi ngo!” “Mula bagi, laus mo kono mengulaken bagidi!” nina Jesus mbangsa.
Itongkir Jesus si Maria dekket si Marta
38 #
Joh. 11:1
Sinderrang i perdalanen Jesus dekket sisinNa, soh mo kalak i mi sada kuta. Lot mo i kuta i sada kalak daberru mergerar si Marta menjalo kalak i mi bagesna. 39Anggi si Marta imo si Maria. Ukum si Maria dak kundul ngo mendengkohken peddah Jesus. 40Tapi ukum si Marta, dak merkebbas ngo iperluken. Nai idapetken si Marta mo Jesus janah idokken mbangsa, “Tuhan, tengen mo anggingku ènda, ibelli ngo pellin aku merkebbas. Dokken mo asa iurupi aku!”
41Idokken Jesus mo, “O alè Marta, kasa pella bagidi pengkebasimu, 42sada ngo siperluna! Ipilih si Maria ngo simendèna, oda buaten idi bana nai.”
လက်ရှိရွေးချယ်ထားမှု
Lukas 10: LAIBTD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
