1 Musa 10
10
Pemparen dukak-dukak si Noak
(1 Kron. 1:5-23)
1En mo pemparen si Noak, si Sem, si Japet dekket si Ham. Enggo kessa laè mengeraja i, lot mo anak kalak i sitellu.
2Dukak si Japet imo si Gomer, si Magog, si Madai, si Jawan, si Tubal, si Mesekh dekket si Tiras. 3Pemparen si Gomer imo kalak Askenas, Rifat dekket kalak Togarma. 4Pemparen si Jawan imo kalak Elisa, Spanyol, Siprus dekket kalak Rodes. 5Kalak i mo empung simerian i biding laut dekket i pulo-pulo.
Imo karina pemparen si Japet. Gennep bangsa bak suak merian i nagerrina gennep, janah memakè katana sendiri.
6Pemparen si Ham imo kalak Kus, Mesir, Libia dekket Kanaan. 7Pemparen si Kus imo si Seba, Hawila, Sabta, Raema, dekket Sabtekha. Pemparen si Raema imo kalak Syeba dekket kalak Dedan. 8Anak si Kus imo si Nimrod sigabè sada kalak lubalang perlebbè i tanoh èn. 9Merkitè pengurupi Jahowa, gabè sada kalak perburu mahantu ngo ia. Kernana i, dak idokken dèba ngo, “Katerra pè, ibaing Jahowa mo ko gabè sada kalak perburu bagè si Nimrod.” 10Kerajaenna mula-mula imo nagerri Babel, Erekh dekket Akad, telluna idi imo i Babilonia. 11I sidi nai laus mo ia mi Assur, nai ipajek mo kuta Niniwe, kuta Rehobot-Ir, kuta Kalah, 12dekket Resen imo i kellang-kellang Niniwe bak Kalah. Kuta mbellen ngo karina i.
13Pemparen si Mesir, imo kalak Lidia, Anamim, Lehabim, Naftuhim, 14Patrusim, Kaslohim, dekket Kaftorim. Bangsa Kasluhim en mo empung kalak Palistin.
15Dukak si Kanaan imo si Sidon, situaen, dekket si Het. 16Si Kanaan ma ngo empung kalak Jebusi, Amori, Girgasi, 17kalak Hewi, Arki, Sini, 18Arwadi, Semari dekket Hamati. Marga-marga Kanaan i mersèrak ngo soh mi sindaoh, 19gabè mbellang kalohon baleng kalak i mulai i Sidon nai soh mi Gerar, soh mi gembar Gaza, janah mi kebincaren memuspus soh mi Sodom, Gomora, Adma dekket Zeboim, soh mi gembar Lasa.
20Imo karinana pemparen si Ham. Gennep bangsa dekket marga merian i gennep nagerrina janah lot ngo katana sendiri.
21Si Sem kaka si Jafet, imo empung bangsa Heber. 22Dukak si Sem imo si Elam, si Assur, si Arpakhsad, si Lud dekket si Aram. 23Pemparen si Aram imo kalak Us, Hul, Geter dekket Mas. 24Si Arpakhsad imo bapa si Selah, janah si Selah imo bapa si Eber. 25Si Eber dua ngo anakna; situaen mergerar si Peleg, kerna i tikkina mo bangsa i tanoh èn terbagi-bagi; sipeduaken mergerar si Joktan. 26Pemparen si Joktan imo kalak Almodad, Selef, Hazar-Mawet dekket Jerah, 27Hadoram, Uzal, Dikla, 28Obal, Abimael, Syeba, 29Ofir, Hawila dekket kalak Jobab. Imo karina pemparen si Joktan. 30Nagerri bekkas kalak i imo i Mesir nai soh mi Sefar, imo delleng kan kebincaren.
31Idi mo karina pemparen si Sem. Gennep bangsa dekket marga merian i nagerrina janah lot ngo katana sendiri.
32Idi mo karinana pemparen si Noak, merbangsa-bangsa, mengèkutken keturunenna gennep. Usur kalak idi ngo bangsa-bangsa i dunia enggo kessa laè mengeraja idi.
လက်ရှိရွေးချယ်ထားမှု
1 Musa 10: LAIBTD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)