PAMUNGKAAN 44
44
Mago panginuman
1Jadi laing diparentahon si Josep muse ma tu kapala ni pangisi ni bagas i, “Isi hamu ma angka harung ni halahi dohot eme i sanga na sadia na tarboan halahi, jana pamasuk mangulahi hepeng ni halahi tu bagasan harungna be, di ginjang ni eme i. 2Pamasuk muse panginumanku perak i tu bagasan harung ni anggi ni halahi siampulan i dohot hepeng panggarar ni emena i.” Dibaen parkobas i ma songon na niparentahon tusia. 3Ancogotna i sogot dope, dipabuat si Josep ma angka kahangginia i rap dohot angka halodena i. 4Dompak so sadia dao dope halahi sian kota i, didok si Josep ma tu kapala ni pangisi ni bagasnia i, “Ompoti jolo kojar halahi. Muda dung dapot, dok ma tu halahi, ‘Biasi dibaen hamu na jat balos ni na denggan? 5Biasi ditangko hamu piala perak ni tuanku? Panginumannia do piala i dibaen ia dohot panjamaan laho martondung do i. Na mambaen hajahatan godang do hamu!’ ”
6Dung lalu parkobas i mandapoti angka kahanggi ni si Josep i, didok ia ma songon na nidok ni si Josep i tu halahi. 7Dialusi halahi ma tusia, “Na mandok bia dehe tuan i ulaning? Hami sumpahon ma, na so adong hami baen songon i! 8Diboto tuan i do, salangkan hepeng na dapotnami di harungnami di ginjang ni eme i, madung hami paulak tu tuan i sian Luat Kanaan. Jadi dia ma patut hami tangko muse perak sanga sere ni tuanmunu i! 9Betak sai tardapot tuan i barang i di sada halak sian hami, padiar ma mate niuhum, jana hami on pe padiar ma gabe hatobanmu.”
10Didok parkobas i ma, “Satuju! Tapi hum na mambuat piala i sajo pe da gabe hatobanku, anggo na asing i tola ma kehe.” 11Jadi diompoti halahi ma marsipaijur harungna be tu tano jana marsibuka ma. 12Tangkas ma dipareso parkobas ni si Josep i, dipungka ia ma sian harung ni siangkaan lalu tu harung ni sianggian i, jana dapot ma piala i di bagasan harung ni si Benyamin. 13Jadi marsisibak bajuna be ma angka angkangna i hara ni marsakna. Marsimuat halodena be ma halahi laho mulak tu kota i mangulahi.
14Disi lalu si Juda dohot kahangginia i tu bagas ni si Josep i, laing di bagas i dope ia, gabe marsomba-somba ma halahi di jolonia. 15Jadi didok si Josep ma, “Na mambaen bia dehe hamu? Adong he na so diboto hamu do, anggo songon au on halakna, tarbaen au do da padapotkon hamu sian na martondung.”
16“Aha be na tardok hami tu hamu, tuannami?” ning si Juda mangalusi. “Bia ma baenonnami mandok i na so tutu? Bia ma baenonnami mandok na tigor hami? Madung diungkap Debata hasalaannami i! Saonnari anggo hami, naposomu noma, jadi nanggo hum ia na tardapot maroban piala ni tuan i.”
17Ning si Josep ma, “Ah, nada le! Nada ra au mambaen songon i! Hum na maroban piala i sajo do na gabe hatobanku. Anggo hamu na asing i, bolas do mulak tu amanta hamu. Horas ma!”
Diondihon si Juda si Benyamin
18Jadi ro ma si Juda tu jolo ni si Josep jana didok ia ma, “Ampun tuannami, paloas au jolo mandok hata tu tuan i. Ulang muruk tuan i tu au; sarupa do huetong tuan i dohot raja i sandiri. 19Madung disapai tuan i tu hami sanga na adong dope amangnami sanga kahangginami na asing. 20Jadi hami alusi, ‘Adong dope amangnami madung matobang situtu; jana angginami pe adong dope sada nari na sorang dung matobang amanami i. Anggo na manadohon angginami i, madung jumolo, jadi anggo saonnari hum ia sajo noma na mangolu sian halahi na saina; jana na holongan do roha ni amangnami i mida ia.’ 21Na nisuru ni tuan i do anso hami oban ia tuson, anso marsuo ia dohot tuan i. 22Jadi hami alusi do, ‘Nada tartadingkon dakdanak i amanta; muda ditadingkon ia amanta, mate noma amanta i.’ 23Dung i laing didok tuan i na so tola be hami ro mangadop tu tuan i anggo so hami oban angginami i.
24Jadi di na mulak hami tu amangnami, hami paboa do sude na nidok ni tuan i. 25Dung i disuru amangnami i do hami mangulahi manobusi panganon tuson. 26Hami alusi tusia, nada tarbaen hami kehe tusi; na so tola mangadop tu gubernur i anggo nada rap dohot hami sianggiannami i. 27Hape didok amanta hami i do, ‘Diboto hamu do, hum on do anak na nitubuhon ni ripengku si Rahel. 28Madung ditadingkon na parjolo i au. Na niparsurage ni binatang panyoro do i, angke nada huida be ia mamungka sian parkehenia i. 29Jadi muda laing buatonmunu dope anakku na paduahon on sian au, jana masa ma parmaraan tusia, tontu hamarsahan na nibaenmunu on tu au, i noma na maroban au tu hamatean; au ma matobang.’ ”
30-31“Jadi hara ni sudena i, tuannami,” ning si Juda tu si Josep, “Muda mulak hami tu amanta hami so dohot dakdanak i, anggo amangnami i, mate noma i. Tarihot tu dakdanak i noma hosa ni na tobang-tobang i; boti hara ni tobangnia, patibu mate noma ia baenon ni hamarsahan na hami baen on tusia. 32Sada muse, na dung hupasahat do ngolungku tu amanta hami songon jaminan ni dakdanak on. Ma hudok tusia; muda nada huoban mulak dakdanak on tusia, au ma mananggung sala lopus mate au. 33Jadi na mangelek-elek ma au tu tuan i, au ma tading dison gabe naposo ni tuan i gonti ni anggingki, anggo ia padiar ma mulak rap dohot angka angkangna i. 34Bia ma he pambaenku mulak tu amanta hami anggo so dohot do anak i rap mulak dohot au? Nanggo tahan au paligi-ligi sitaonon i songgop tu damang i.”
လက်ရှိရွေးချယ်ထားမှု
PAMUNGKAAN 44: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society