PAMUNGKAAN 30
30
1Hape anggo si Rahel laing so maruntungan do. Jadi gabe mangiburu ma ia mida angkangnia i, jana didok ia ma tu si Jakob, “Lehen ma da di au anak! Anggo inda, mate noma da au.”
2Gabe muruk ma si Jakob tu si Rahel, ning ia ma, “Nanggo au da Debata. Ia do na mambaen na so maruntungan ho.”
3Jadi ninna si Rahel ma, “Indon naposongku dadaboru si Bilha; sapodoman ma ho dohot ia anso adong anaknia. Songon i noma dalanna anso gabe ina au markite-hite ia.” 4Dung i dilehen ia ma si Bilha tu halaklahinia i jana campur ma si Jakob di podoman dohot naposo i. 5Denggan ma pamatang ni si Bilha jana sorang ma anaknia halaklahi. 6Didok si Rahel ma, “Pihak tu au do hape Debata. Ditangihon Ia do pangidoanku jana dilehen Ia do di au sada anak halaklahi.” Jana dibaen ia ma goar ni dakdanak i, si Dan.#30:6 DAN: Sarupa do goar on pandohanna dohot hata “mamihak” di hata Ibrani. 7Denggan ma pamatang ni si Bilha mangulahi jana sorang ma anaknia halaklahi. 8Ninna si Rahel ma, “Ma huabisi gogongku maralohon angkangku, hape monang do au,” hara ni i dibaen ia ma goar ni dakdanak i, si Naftali.#30:8 NAFTALI: Goar on sarupa pandokkonna dohot hata “maralo” di hata Ibrani. 9Dung torang diboto si Lea na manyampul ia, dilehen ia ma naposonia dadaboru i ma si Zilpa tu si Jakob gabe ripena. 10Gabe sorang ma sada anak ni si Zilpa. 11Didok si Lea ma, “Maruntung do au,” gabe dibaen ia ma goar ni dakdanak i, si Gad.#30:11 GAD: Goar on sarupa pandokkonna dohot “untung” di hata Ibrani. 12Sorang muse dope anak ni si Zilpa sada, 13jana didok si Lea ma, “Na martua ma da au antong.” Jadi gabe dibaen ia ma goar ni dakdanak i, si Aser.#30:13 ASER: Goar on sarupa pandokkonna dohot hata “martua” di hata Ibrani.
14Hatiha masa sabion, kehe ma da si Ruben tu padang-padang, jana dapot ia ma disi sabangso duhut na margoar dudaim, jadi dioban ia ma i tu si Lea, inangnia i. Didok si Rahel ma tu si Lea, “Bia lehen ma di au deba ubat na dapot ni anakmi.”
15Ning si Lea ma mangalusi, “Na so tuk dope lakna halaklahingki buatonmu? Hape mur giot buatonmu dope saonnari ubat na dapot ni anakki.”
Ning si Rahel ma, “Anggo dilehen ho do ubat i na dapot ni anakmi di au, hupatola pe ho rap modom dohot si Jakob borngin on.”
16Di na muli si Jakob sian padang andospotang i, dialo-alo si Lea ma ia jana didok ma, “Anggo saborngin on, rap dohot au ma ho modom harana madung hugarari dohot ubat na sian anakki.” Jadi campur ma halahi di podoman borngin i.
17Ditangihon Debata ma pangidoan ni si Lea, denggan ma pamatangnia jana sorang ma anaknia na palimahon. 18Ning si Lea ma, “Madung dilehen Debata di au pasupasu, hara ni na hulehen i si Zilpa tu halaklahingki.” Jadi hara ni i, dibaen ia ma goar ni anaknia i, si Isakar.#30:18 ISAKAR: Goar on sarupa pandokkonna dohot hata “Hatoban na niongkos adong upana” di hata Ibrani. 19Denggan ma pamatang ni si Lea mangulahi jana sorang ma anaknia na paonomkon. 20Didokkon ia ma, “Madung dilehen Debata di au silehen-lehen na lobi jeges. Saonnari jagiton ni halaklahingku ma au, harana ma pola onom anak halaklahi hutubuhon,” hara ni i dibaen ia ma goar ni dakdanak i si Zebulon.#30:20 ZEBULON: Goar on sarupa pandokkonna dohot “jagit” dohot “hadiah” di hata Ibrani. 21Dung i ditubuhon si Lea ma muse sada boru na margoar si Dina.
22Jadi diingot Debata ma si Rahel; ditangihon Debata ma pangidoannia jana dipatola Debata ma ia mardakdanak. 23Jadi denggan ma pamatang ni si Rahel jana sorang ma sada anaknia halaklahi. Ning si Rahel ma, “Madung diagohon Debata hailaonku di na nilehenNia sada anak halaklahi tu au. 24Sai mur ditambai Tuhan ma nian di au nanggo apala sada nari anak halaklahi.” Jadi hara ni i dibaen ia ma goar ni anaknia i, si Josep.#30:24 JOSEP: Goar on sarupa pandokkonna dohot hata “sai dilehen ma deba nari”, dohot “madung diagohon ia” di hata Ibrani.
Marsitawaran si Jakob dohot si Laban
25Dung ditubuhon si Rahel si Josep, didok si Jakob ma tu si Laban, “Paloas ma au kehe mulak tu luatku. 26Lehen ma di au ripengki na dua i songon i angka dakdanakku, jana padiar ma au kehe. Na karejo do au tu ho umbaen na dapot au halahi. Tangkas do diboto ho lojangku na karejo i.”
27Didok si Laban ma tusia, “Tangihon ma jolo hatangkon: Madung dipaboa sada halak partondung tu au, na dipasupasu ni Tuhan au hara ni ho. 28Dok ma sanga na sadia upamu, anso huboto mangalehen di ho.”
29Dialusi si Jakob ma, “Diboto hamu do sanga na bia lojangku na karejo i di hamu, songon i ma bahatna tamba pahan-pahananmunu hara ni dengganna huparmahani. 30Dompak so ro au tuson, nada sadia dope sinadonganmu, hape saonnari madung sonang sajo, jana madung dipasupasu Tuhan ho hara ni au, hape andigan dope hatihana laho manyarihon na di au?”
31Ning si Laban ma, “Aha do giotmu gararna baenonku tu ho?”
Dialusi si Jakob ma, “Nada giot au upa. Hutoruskon ma marmahan pahan-pahananmunu i asal ma satuju hamu di usul na hudok on. Songon on ma: 32Paloas hamu ma au sadari on mardalan di tonga-tonga ni sude hambeng dohot biri-birimunu i anso hupaasing sude anak ni hambeng na lomlom dohot sandok anak ni hambeng na poso jana na marbolang sanga na marturik. I ma sude upa na nipangido ni rohangku. 33Mura do botoonmunu tu joloan on sanga na tigor au maradopkon hamu. Muda ro hamu sanga sadihari mamareso upangki, manigor mura do botoonmunu sanga na tigor na hubaen i tu hamu. Muda ro ho mamareso upangku, sugari sura ma adong hambengku na so marbolang sanga na so marturik, sanga sada biri-biri na so lomlom, disi botoonmu ma manigor na hutangko do pahan-pahanan i.”
34Dialusi si Laban ma, “Satuju ma au disi! Songon na nidokmi ma tabaen!” 35Tapi sadari i, dipaasing si Laban ma sude hambeng na marbolang sanga na marturik, sanga na adong saotik bolangna na bontar; dipaasing ia muse ma sude biri-biri na lomlom. Dung i disuru ia ma angka dakdanaknia paresohon angka pahan-pahanan i, 36torus kehe ma halahi rap dohot pahan-pahanan i dumao sian si Jakob, hira-hira dalanan tolu ari daona.
Dipahan si Jakob ma angka hambeng biri-biri nampuna ni si Laban na tinggal i.
37Jadi dibuat si Jakob ma angka dangka ni hayu andulpak, mayang dohot simarlasiak na rata jana diluak ia ma deba lampakna i gabe marbolang na bontar dohot na rata ma idaon hayu i. 38Dipayakkon ia ma i di jolo ni hambeng na pungu i, di bagasan panginumanna i. Umbaen na disi dipayakkon ia, harana somalna, sai tagi do marcampur pahan-pahanan i laho-laho minum. 39Jadi muda di jolo ni dangka ni hayu i hambeng i campur, gabe sibolang, sanga na marturik sanga na marbolang-bolang ma anakna i.
40Dung i dibuat si Jakob ma angka biri-biri, dipaadop ia ma i tu angka hambeng na marbolang, na marturik dohot na lomlom. Jadi songon i ma dibaen ia laho mambuat hulanan ni pahan-pahanannia sandiri jana disirang ia ma sian hulanan ni pahan-pahanan ni si Laban.
41Asing ni i, muda campur ma angka pahan-pahanan na gogo, dipayakkon si Jakob ma angka dangka ni hayu sinangkinan di jolo ni angka binatang i, di bagasan panginumanna i. 42Tapi anggo di jolo ni pahan-pahanan na gale, nada dipayakkon ia hayu i. Jadi sude pahan-pahanan na bontar, gale do i; jana i ma puna ni si Laban. Hape anggo na lomlom, na marturik dohot na marbolang i, na gogo do sude, jana i ma nampuna ni si Jakob. 43Jadi sian dalan na songon i gabe kayo sajo ma si Jakob. Gabe bahat ma marhulanan hambeng biri-biri ni si Jakob, untonia, halodenia dohot angka hatobannia.
လက်ရှိရွေးချယ်ထားမှု
PAMUNGKAAN 30: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society