PAMUNGKAAN 24
24
Sada anakboru baen dongan saripe ni si Ishak
1Madung matobang situtu si Abraham, jana sai dipasupasu Tuhan do ia di sude na nibaennia. 2Sanoli, mandok hata ma ia tu hatobannia na tumobang, i ma na mangurus sude arta sinadongannia, ning ia ma, “Baen ma tanganmu tu holang-kolang#24:2 Baan ma ... di holang-kolang: Songon i ma dibaen muda marsumpa di hatiha i, jana nada tola be ubaon sumpa i. ni hae-haengkon. 3Sumpahon ma mangasahon goar ni Tuhan, Debata na mangarajai langit dohot tano, bahaso na so jalahanmu boru sian halak tano Kanaan on di si Ishak anakki. 4Angkon mangulahi tu luat hatubuanku do jalahanmu boru dongan matobangnia, i ma sian koum sisolkotku.”
5Dung i disapai hatobannia i ma tusia, “Bia do, betak sai nada ra boru i manadingkon bagasna i laho mangihutkon au tu luat on? Angkon obanonku dehe anak ni tuanku tu luat hatubuan ni tuan i?”
6Tapi dialusi si Abraham ma, “Jago ho! Ulang cubo-cubo maroban anakki mulak tu adu! 7Na dung disumpahon Tuhan do tu au, i ma Debata na mangarajai langit, na maroban au sian bagas ni damang dohot sian luat ni koum sisolkotku na giot lehenonNia do luat on tu pomparanku. Laing suruonNia muse ma surusuruanNia mardalan di jolomu anso laing dapot ho boru sian adu di anakki. 8Tapi betak sai nada ra boru i mangihutkon ho, malua ma ho sian sumpamon. Tapi bagi na bia pe, ulang ma oban anggo anakki tu adu.” 9Dung i dibaen hatoban i ma tanganna tu holang-kolang ni hae-hae ni si Abraham tuannia jana marsumpa ma ia laho patuluskon songon na nipangido ni si Abraham i.
10Dibuat hatoban i ma sampulu unto ni tuanna i dohot angka barang-barang na mararga, jana kehe ma ia rap dohot piga-piga halak nari hatoban na asing manopot kota na niinganan ni si Nahor najolo, i ma na di sabola Utara ni Mesopotamia. 11Dung lalu ia di adu, diparadiankon ia ma angka unto i di lambung ni sada sumur di balian ni kota i. Andospotang ma hatiha i, jana tingkina ma angka dadaboru muhat mangalap aek tu sumur i. 12Jadi martangiang ma hatoban i, “O Tuhan, Debata ni tuanku si Abraham, urupi ma au anso denggan manjadi sadari on na hudalankon, jana ingot ma janjiMu na tu tuanku si Abraham. 13Ligi ma, dison au jongjong di lambung sumur on. Marroan ma santongkin nari angka bujing-bujing sian kota i, muhat mangalap aek. 14Dokkononku ma hatangku tu sahalak sian halahi, ‘Tolong ma jolo timbahon embermi jana lehen au minum.’ Jadi muda alusanna tu au, ‘Minum ma hamu da, jana angka untomunu i hulehen pe minum!’ ninna, i ma da ibana sugari boru na nitodoMu di naposoMu si Ishak. Muda tulus tarjadi songon i, botoonku ma tangkas, na nitiopMu do janjiMu tu tuanku si Abraham.”
15-16Nada salose dope ia na martangiang i, ma lalu si Ribka, sada anak boru na lobi jeges boti bujing-bujing dope, di sumur i. Dioban ia garigitnia di abarania i. (Boru ni si Betuel do i, jana si Betuel on, i ma anak ni si Nahor na nitubuhon ni si Milka dadaborunia i. Si Nahor i ma angkang ni si Abraham.) Didapotkon si Ribka ma sumur i, muhat ma ia, lalu mardalan ia mangulahi. 17Dung i marlojong ma hatoban ni si Abraham i mandohonisa jana didok ia ma, “Tolong hamu ma jolo lehen hamu au minum sian garigitmunu i.”
18Dialusi bujing-bujing i ma, “Minum ma da tuan,” ning ia, jana manigor diompoti ia ma paijurkon garigitnia i sian abarania, jana ditiop ia ma garigitnia i mangalehen hatoban i minum. 19Dung sidung hatoban i minum, didok anak boru i ma, “Hutimba pe aek dohot di angka unto ni tuan i, anso laing minum sudena lopus sombu be nguasna.” 20Dung i diompoti ia ma mangusehon aek na di garigit i tu inganan panginuman ni unto i. Diompoti ia muse ma marlojong tu sumur i manimba aek manambai lopus sude pahan-pahanan i sombu nguasna. 21Laing dipamanat-manat hatoban ni si Abraham i ma torus, nada pola mangkuling ia sangkababa hata pe. Sai giot botoonnia ma, sanga na marhasil do tugasnia baenon ni Tuhan, sanga nada.
22Dung sidung dilehen anak boru i angka unto i minum, dibuat hatoban ni si Abraham i ma anting-anting sere sigodang arga, dipapakehon ia ma tu igung ni anak boru i. Tanganna i pe dipapakehon ia ma sapasang golang sere. 23Baru ma mandok hata ia, ning ia ma, “Bia, paboa ma jolo sanga ise do amanta. Adong dehe ulaning inganan parbornginanku dohot angka donganku di bagas ni amanta?”
24“Si Betuel do goar ni amanta, i ma anak ni si Nahor dohot si Milka,” ning anak boru i mangalusi. 25“Adong do inganan parbornginanmunu di bagasnami jana adong do bahat durame dohot panganon ni pahan-pahanan.”
26Jadi manungkap ma hatoban i marsomba tu Tuhan. 27Ning ia ma, “Nipuji ma Ho o Tuhan, Debata ni tuanku si Abraham. Torus do ditiop Ho Tuhan janjiMi na tu tuanku si Abraham jana diuluhon Ho do au lalu tumbuk tu koum sisolkotnia.”
28-30Dung i marlojong ma anak boru i tu bagas ni inangna jana dicaritohon ia ma sude na masa i. Adong do sada iboto ni si Ribka na margoar si Laban. Ma dibege ia carito ni ibotonia i taringot tu na nidok ni hatoban i. Boti ma diida ia anting-anting na di igungnia i dohot golang na di ibotona i. Jadi diompoti si Laban ma marlojong tu balian mandapotkon hatoban ni si Abraham i na topet jongjong rap dohot angka untona di lambung sumur i. 31Jadi didok si Laban ma, “Na nipasupasu ni Tuhan do da ho, hara ni i ulang ma dison hamu di ruar on. Beta ma hita tu bagasta. Madung rade kamar ingananmunu dohot inganan ni angka untomon,” ning ia.
32Jadi diihutkon hatoban i ma ia, masuk tu bagas. Dipaijur si Laban ma boban ni angka unto i jana dilehen ia ma durame dohot jampalon ni pahan-pahanan i. Dung i dibuat ia ma aek pamasu ni pat ni hatoban ni si Abraham i dohot donganna i. 33Di nadung singkop panganan, didok hatoban i ma, “Nada mangan au, anggo so jolo hupalalu tona na huoban.”
Dialusi si Laban ma, “Antong dok hamu ma da.”
34Jadi dipungka hatoban i ma mandok hata, ning ia ma, “Hatoban ni si Abraham do da au. 35Marlobi-lobi do pasupasu ni Tuhan di si Abraham jana dibaen do ia gabe halak na santak kayo. Madung dilehen Tuhan disia biri-biri na marhulanan-hulanan, hambeng, lombu, unto, halode, perak, sere, hatoban halaklahi dohot dadaboru. 36Madung adong anak ni dadaborunia si Sara, di umur na dung ginjang, jana madung dipasahat tuanki sandok arta sinadongannia tu anaknia i. 37Disuru ia do au marjanji mardongan sumpa anso hupatulus parentania. Didok ia tu au, ‘Ulang todo boru di anakku sian bujing-bujing na di tano Kanaan, 38tapi angkon sian sisolkotku koum ni damang do. Jadi kehe ma ho manigor tu adu.’ 39Jadi husapai do tusia, ‘Bia do muda nada ra boru i mangihutkon au?’ 40Jadi ning ia mangalusi, ‘Suruon ni Tuhan na sai hupaolo-oloi i do surusuruanNia mandongani ho dohot mambaen denggan marhasil na nilangkahonmu. Dapot ho do i na gabe dongan matobang ni anakki sian angka koum sisolkotki, i ma sian horong ni damang. 41Baliksa na so nijagit ni halahi ho, anggo i malua ma ho sian sumpamu.’
42Jadi di na lalu au nangkin tu sumur i, martangiang do au di bagasan rohangku, ‘Tuhan Debata ni tuanku si Abraham, sai baen ma manjadi na hulangkahon on. 43Ligi ma, di lambung sumur on do au jongjong. Muda ro ma sahalak bujing-bujing laho muhat, pangidoonku ma tusia aek anso dilehensa di au sian garigitna i. 44Muda ro do ia mangalehen dohot mandok anso dilehen ia muse minum angka untongki, jadi ia ma da ibana ning rohangku na nitodoMu gabe dongan matobang ni anak ni tuanki.’ 45Bo, na so sidung dope au mandok tangiang i di bagasan rohangku ro ma da si Ribka maroban garigit di abarania laho mambuat aek sian sumur i. Jadi hudok ma tusia, ‘Tolong, lehen hamu ma au jolo minum.’ 46Diompoti ia ma manigor paijur garigitnia i sian abarania jana didok ia ma, ‘Minum ma hamu da, jana dohot untomunu i hulehen pe minum.’ Jadi minum ma au antong, dung i dileheni ia muse ma dohot angka untongki minum. 47Dung i husapai ma tusia, ‘Ise dehe amanta?’ Dialusi ia ma, ‘Si Betuel do amanta, i ma anak ni si Nahor dohot si Milka.’ Jadi hubaen ma tu igungnia anting-anting sere dohot golang sapasang tu tangannia. 48Manungkap ma au marsomba jana mamuji Tuhan, Debata ni tuanku si Abraham. Madung ditogu-togu Ia au antong lalu tu jolomunu, tuanku, lopus marsuo au dohot anak boru na giot di anaknia i. 49Saonnari, muda adong do rohamunu mambaen na denggan tu tuanki bope laho manggohi na patut sibaenonmunu tusia, dok hamu ma tu au; tapi muda nada, laing dok hamu ma da antong tu au anso tarputuskon au sanga aha na giot baenonku.”
50Mangalusi ma si Laban dohot si Betuel, “Dibaen na sian Tuhan do haroro ni pangalaho on, nada patut hami mambaen haputusan. 51Ma indon si Ribka, padiar ma da dohot ia mangihutkon hamu gabe dongan matobang ni tuanmi, songon na nidok ni Tuhan i sandiri.” 52Dung dibege hatoban ni si Abraham i na nidok ni halahi i, manungkap ma ia manyomba Tuhan. 53Dung i dirungkari hatoban i ma pakean, perak dohot barang sere, laho pasahatkonsa tu si Ribka. Dohot tu ibotonia i pe, songon i tu inangna i dilehen ia muse do silehen-lehen angka sigodang arga.
54Dung i pe anso mangan minum hatoban ni si Abraham dohot angka donganna i, jana disi ma halahi marborngin. Dung tarsunggul halahi manyogotna i didok hatoban i ma, “Loas hamu ma da mulak au tu tuanku.”
55Tapi didok iboto dohot inang ni si Ribka i ma, “Laing padiar hamu ma jolo si Ribka rap dohot hami marsaminggu nari sanga marsampulu ari on; dung salpu i padiar ma kehe ia.”
56Tapi didok hatoban i ma, “Ulang be da tahan hamu hami. Madung marjurus dibaen Tuhan na hudalankon; paloas hamu ma da mulak au tu tuanku.”
57Dialusi halahi ma, “Antong tasapai ma jolo da si Ribka sanga na bia do pandapotnia.” 58Jadi dipio halahi ma si Ribka laho manyapai, “Atehe, ra dehe ho kehe rap dohot halak on?” ning halahi.
“Ra,” ning anak boru i mangalusi.
59-60Jadi diisinkon halahi ma si Ribka dohot hatoban dadaboru pangkobasinia kehe rap dohot hatoban ni si Abraham dohot angka donganna i. Jadi dipasupasu halahi ma si Ribka ninna halahi ma,
“Sai gabe ma ho Ribka, ina ni marjuta-juta halak!
Sai monang ma pomparanmu manaluhon angka kota ni musuna!”
61Dung i marhobas ma si Ribka rap dohot angka dadaboru na poso na gabe hatobannia, manengget ma halahi tu unto jana kehe ma halahi mangihutkon hatoban ni si Abraham i.
62Jadi laing di hatiha i, mulak ma si Ishak sian padang parhorsihan, mamolus sian sumur na margoar “Na Mamparrohahon Au”. Dung i di sabola Selatan ni Kanaan ma si Ishak maringanan. 63Sanoli hatiha andospotang ruar ma ia sian bandarnia i laho mardalan-dalan di padang-padang i, jadi diida ia ma ro angka unto. 64Di na tarpaida si Ribka si Ishak, mijur ma ia sian untonia i, 65disapai ia ma tu hatoban ni si Abraham i, “Ise dehe bayo na di padang i na ro mandapotkon hita?” ning ia.
“I ma da ibana tuanki,” ning hatoban i. Jadi dibuat si Ribka ma basaennia manutupi bohinia.
66Dung i dicaritohon hatoban i ma tu si Ishak sude na dung nidalankonnia. 67Dung i dioban si Ishak ma si Ribka masuk tu bandar ni si Sara inangnia i, jana diparsaripe ia ma si Ribka. Holong do roha ni si Ishak disia jana songon i ma gabe sombu rohania sian arsak na agoan ina i ia.
လက်ရှိရွေးချယ်ထားမှု
PAMUNGKAAN 24: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society