Halloo 11
11
Baablooni Bakkooch Shuuneeti Dilaaloo
1Wonna showee toommooch beeti asheenaꞌo bulli yibbaateebeeto, ikke noonoona baachiye. 2Asheenaꞌo aabi-keyo waanee hammiibee, Shinaaree showooch ikke bakkoon daneꞌi, arooch koteheete.
3-4Asheenaꞌoo boonoshinaa boonoshina “No shigo ceekkemmonaa showee toommo bulliich shaceyaanoon ikkooch no beeyemmonoyich, ittoshi waataa nooch katemoonaa bi cilloo shimaayooch tuggeti dilaaloonon shuunebone” iyeete. Aroochee ishichiyeete: “Ittoshi waataa nuuqqoochee xuuboon hachibone. Bi kupphemmoyichoo qaaqqoona koribone” iyeete. Xaqqee qoodoyich xuuboon shuuneheete; ikke xuubee toommooch bare xuuboon keciꞌi reenjoona yeshiiheete.
5Ebina katemoon shuuneheete. Arooba Doono Yeeri ebi asheenaꞌo shuuneti katemoonaa dilaaloonon beegga kindiye. 6Doono Yeeri ishichiye: “Ebi asheenaꞌo ikkeenaꞌone; boonoshi bulli ikke noonoona yibbaatee beetinaꞌone. And illa ebin shuuneya tiyitinaꞌoyich, gubbich boonoshi gabito bullin tuniyoyich boonoshin mawemmo amolla aalloone. 7Wobote; kindibone. Boonoshinaa boonoshina ikkoo gettiibeeto baroyich bi giyaachemmoyich, boonoshi noonoon aroochaa baccibone” iye.
8Ebina Doono Yeeri asheenaꞌon showee toommo bulliich shacciye. Ebich ebi katemoon shuunoon qajjiyeete. 9Doono Yeeriyoo showee toommo bulliich beeti asheenaꞌochi noonoon aroochaa bi baccitoyich, ebi katemee shigo, Baablooni#11:9 Baablooni geto, “Bacceyoo” getone. getteehe. Aroocheenoo Doono Yeeri asheenaꞌon showee toommo bulliich shaccitone.
Sheemichi Shiijjereenaꞌo
(1 Kiinoo 1:24-27)
10Sheemichi shiijjereenaꞌo eboshine: Aalliyee aaco besheti gutte natoyee gubb, Sheemi ball nattiichii, Arifakisaadin shiyihe. 11Aroochee bare anaami bushiishoonaa maache bushiishoonon shiyihe. Arifakisaadin bi shiyitoyee gubb, uuche ball nattiichii qitiye.
12Arifakisaadiyoo shaashaa uucha nattiichii, Seelin shiyihe. 13Aroochee bare anaami bushiishoonaa maache bushiishoonon shiyihe. Seelin bi shiyitoyee gubb, awudde ballaa keejj nattiichii qitiye.
14Seeli shaasha nattiichii, Ebeerin shiyihe. 15Aroochee bare anaami bushiishoonaa maache bushiishoonon shiyihe. Ebeerin bi shiyitoyee gubb, awudde ballaa keejj nattiichii qitiye.
16Ebeeri shaashaa awudd nattiichii, Feleegin shiyihe. 17Aroochee bare anaami bushiishoonaa maache bushiishoonon shiyihe. Feleegin bi shiyitoyee gubb, awudde ballaa shaasha nattiichii qitiye.
18Feleegi shaasha nattiichii, Reꞌin shiyihe. 19Aroochee bare anaami bushiishoonaa maache bushiishoonon shiyihe. Reꞌin bi shiyitoyee gubb, gutte ballaa yiixiya nattiichii qitiye.
20Reꞌi shaashaa gutta nattiichii, Seruugin shiyihe. 21Aroochee bare anaami bushiishoonaa maache bushiishoonon shiyihe. Seruugin bi shiyitoyee gubb, gutte ballaa shabaatta nattiichii qitiye.
22Seruugi shaasha nattiichii, Nakoorin shiyihe. 23Aroochee bare anaami bushiishoonaa maache bushiishoonon shiyihe. Nakoorin bi shiyitoyee gubb, gutte ball nattiichii qitiye.
24Nakoori hiyaa yiixiya nattiichii, Taarin shiyihe. 25Aroochee bare anaami bushiishoonaa maache bushiishoonon shiyihe. Taarin bi shiyitoyee gubb, balli aaraa yiixiya nattiichii qitiye.
26Taari shaba nattiichii, Abraamin, Nakoorinaa Haraaninon shiyihe.
Taarichi Shiijjereenaꞌo
27Taarichi shiijjereenaꞌo eboshine:
Taari Abraamin, Nakoorinaa Haraaninon shiyihe. Haraaniyoo Looxin shiyihe. 28Haraani, bi nihoo Taari batt kashoona beetaa, bi shiijje showoo tuneti, Kalideenaꞌo showooch beeti, Uuri katemoochaa qitiye. 29Abraaminaa Nakoorina mecheenaꞌon shaaggiyeete. Abraami mechee Saarayi getteehan. Nakoori mechee wotta Miliki getteehan. Miliki Haraani busheene. Haraaniyoo Milikinaa Isikinochi nihoone. 30Saarayiyoo xaafee bi tunetoyich, bushoo biich aalloone.
31Taari, bi bushoo Abraamin, bi bushoochi bushoo, Haraanichi bushoo Looxin, Abraami mechee, bi naamechee Saarayinoo yechiꞌi, Kanaanee showooch hamma, Kalideenaꞌo showooch beeti, Uuri katemoochee kechiye. Tunebaani Karaan shaggiꞌi, arooch koteheete.
32Taariyoo Karaan beechii, bi shiijjeti gutte ballaa uuche natona qitiye.
လက်ရှိရွေးချယ်ထားမှု
Halloo 11: KBRC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
SIM International, 2020.