Matius 2
2
Sé tou majus a micona owo
1Kekawus i Yesus aitou am Betlehem an tana' Yudea an tutuw i colano Herodes makatimboi ing kakawasaan, wo mayo sé tou majus a micona owo mai an Yerusalem. 2Séra memué-muéi, “Am bisa Sia, si colano é tou Yahudi si makatoué' itu? Sinéréo ami si sumesendot-Na a micona wo kami mai eng kumundu en sumiri' Sia.”
3An tutuw i colano Herodes luminga in abar itu sia mangaya'ka', taniitu ka'i pakasa sé tou an Yerusalem. 4Wo li'usenna waya sé kikiiten é imam wo sé makailek wutul in Torat. Wo wuéienna ai séra. “Am bisa réén en touan oka i Kristus?”
5Wo icua éra ai sia, “Am Betlehem an tana' Yudea, ampa'paan tana'i en aipatic ang kitap i nabi.
6 #
Mi. 5:1
‘Ico Betlehem an tana' Yehuda,
ico ra'io ka'i kota si tumeki-tekic
an uner é kota an Yehuda,
ampa'paan ai coo maai oka
si esa Tou e merénta sé tou-Ku Israel.’ ”
7Wo towan i Herodes ang kerapi maene-enep sé tou majus itu wo wuéienna i mareti-reti ai séra sa kawisa si sumesendot itu kaséréan. 8Kekawus in itu, iru'du'na séra mangé am Betlehem. Icuana, “Mangém wo pangéréno sumama-sama' si Toyaang itu wo sa Sia aipeta'upo miow, yabaro mai a yaku wosama' aku ro'na mangé kumundu en sumiri' Sia.”
9Kelinga in aicua i colano itu, maya'o séra. Sérén éra si sumesendot si sinéré éra a micona itu rumior ai séra akar icateka' wo mento' an dangka' im pakaento'an i Toyaang itu. 10An tutuw éra isuméré si sumesendot itu, séra wutu-wutul arui. 11Wo séra muntep am balé itu, sérén éra si Toyaang itu ang karapi i Maria inang-Na. Wo séra kumundu wo kumuru en sumiri' si Toyaang itu. Wukaan éra en tampa pengaémaan ing kasiyaan wo iwéé éra eng kasiyaan éra tanu raragés ai Sia tanumai mas, kamenyan wo mur.
12Kekawus in itu, ampa'paan séra linupuan am pinangipi wosama' ra'ica toro maréng angé a si Herodes, anaé séra maréng an doong éra kumiit an lalan walina.
Em pamalé i Yusuf sumingkir angé a Mesir
13Kewaréng angé é tou majus itu, mapaturu' mai si malaékat i Amang Kasuruan am pangipi i Yusuf wo kumua, “Tumooro, indono si Toyaang itu ang karapi i inang-Na, sumingkiro mangé a Mesir wo mentoo a mangé mbitu akar Aku numuwu' ka'i ai co. Ampa'paan pangérén oka i Herodes si Toyaang itu e maté Sia.”
14Wo si Yusuf tumoor, indonna si Toyaang itu ang karapi i inang-Na wo asi wengi ituke' séra sumingkir angé a Mesir. 15#Hos. 11:1Wo séra mento' a mangé mbitu akar i colano Herodes maté. Pakasa en itu mamuali wosama' malekep sapa si aicua i Amang Kasuruan a si nabi, “Towan-Ku si Toyaang-Ku a Mesir owo.”
Sé toyaang teké' am Betlehem pinaté
16An tutuw kailekano i colano Herodes sapaoka sia niuwako é tou majus, sia mae'bow keli. Wo iru'du'na pira-piraan surarona e mangé maté waya sé toyaang teké' am Betlehem wo in sangkumna, sérao sé toyaang tuama en umur éra ruao ngata'un wo sé ra'ipé' imalekep rua ngata'un, kiit in oras an tutuw sia mamuéi ang karapi i mareti-reti a sé tou majus itu.
17Wo in taniitu imalekepo en Taar i Amang Kasuruan si aicua i nabi Yeremia.
18 #
Yer. 31:15
“Ang kota Rama kalingaan en amé'
wo en sesendu'an, kawendun oka mai.
Amé'an i Rahel#2:18 Rahel itu ngaran i penanaan i Yakub. An tuus anio', sé toyaang i Rahel aipeputé wo sé pakasa im bangsa Israel. sé toyaangna.
Wo ra'ica kiimna iboren,
ampa'paan séra imatéo.”
Si Yusuf wo sé pamaléna maréng sumawel an Israel
19An tutuw i Herodes maté, si malaékat i Amang Kasuruan mapaturu' mai am pinangipi i Yusuf a mangé Mesir. 20Icua i malaékat itu ai sia, “Yusuf, tumooro! Indono si Toyaang itu wo si inang-Na wo maréngo sumawel an tana' Israel. Ampa'paan séra sé mawasa maté si Toyaang itu imatéo.”
21Wo si Yusuf tumoor paalinna si Toyaang wo si inang-Na itu mangé an tana' Israel. 22Taan kelinga i Yusuf sapaoka si Arkelaus toyaang i Herodes en sumawel si amangna e mamuali kolano an Yudea, si Yusuf maindé'ke' maréng angé. Ampa'paan aisina'u am pinangipi, wo sia mangéke' an sangkum ing Galilea. 23#Mrk. 1:24; Luk. 2:39; Yoh. 1:45Icateka' mangé séra ang Galilea, séra mento' ang kota makangaran Nazaret. Wo in taniitu, en taar sé aicua é nabi andumoro' i Toyaang itu imamualio: Sia tuulen oka “Tou Nazaret.”
လက်ရှိရွေးချယ်ထားမှု
Matius 2: TNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
En Taar Weru a nunuwu' é Tontemboan @ LAI 2018
