Mbete Matiye 12
12
1Ke nam a hani ɓil sewu-aw Zezuri kal ke mahful sekle waka fe pay. Namu ɓa nam ɔkna. Ɗaka i nzuk-dih fal yeri dale, ku haw tul fe pay, mí ku o̧kro su̧. 2Fariziri ɓá ko le, ku ɓah hi̧ Zezu ɓahri : « Mú ko nzuk-dih fal wori. Ku ƴo laɓ fe ké bolkusol Ŋgerzah hah laɓu ke nam ɔkna. »
3Bale Zezu ɓahri : « I ki̧ ɓay fe laɓna Daviɗ a lewsa̧ ki̧, kaŋ ya le ? Ɗaka i ni ke bɔh sina yeri#12.3 Ɓay tu ɓay fe laɓna Daviɗ, í ki̧ Mbete 1 Samuel 21.1-6 ke Mbete Lévitique 24.5-9. . 4Ke si vul kani Ŋgerzah. Peŋ ké nzuk fe puhna puh hi̧ Ŋgerzah mí a ye ke su̧ ke bɔh sina yeri pi-aw wa, bolkusol Ŋgerzah ba, hah nzuk a garuri sú̧-u, nzuk fe puhnari kaŋto mí ƴo ke ful ɓay su̧ peŋu.
5Uwa. Ɓay nam ɔkna ké ɓil mbete bolkusol ra, i ki̧ ɓayu ké ɓahri, nzuk kaniri toŋ laɓ pihna#12.5 Ɓay pihna nzuk fe puhnari ke nam ɔkna na ɓil Mbete Nombres 28.9-10 ke Mbete Lévitique 24.8. ke nam ɔkna ɓil vul kani Ŋgerzah ƴo ɓeɓ bolkusol nam ɔkna, mí ku ziŋ ɓay ya. 6Dale mi ƴo ɓah ɓayay hi̧ wuri ɓahri se, nzuk ké mba tul vul kani Ŋgerzah mí ƴo ri-ay. 7I tu ra ɓay ké Ŋgerzah ɓahri, láɓ law in mí ke yih ɓayu. Láɓ pihna hi̧ ni ndikpo le, ke sa-a#12.7 Gel ki̧na-u na ɓil Mbete Osée 6.6. , i tu te-teh gaŋ le, i ta sek nzukri gɔr ya, 8ɓayu ké mbay ké ko tul nam ɔkna ɓa a ye gun nzuk pirmatul. »
9Zezu poŋ gelaw si rih vul misoŋ woyri. 10Í ko. Nzuk mbew ké ndɔk ye hu yɔh kaɓ ri. Mí fariziri nzah nzak Zezu ɓay sek ni. Ku vbi ni ɓay ɓahri : « Bolkusol Ŋgerzah hi̧ nzuk ful ɓay gah sena ke nam ɔkna le ? »
11A ye ba, ke ɓahri : « Ké haŋsekle woiri-ay, a ge mí sami ye toh lɔkɔ ke nam ɔkna le, ke ta ten ni ya le wo ? 12Nzuk pirmatul ba, mba tul sami le, el mba ra ɓáy. Kandɔkaw mí bolkusol Ŋgerzah hi̧ nzukri ful ɓay laɓ suki ke nam ɔkna. »
13Wara mí ke ɓah hi̧ nzuk ké ndɔk ye hu yɔh ra : « Mú ndar ndɔk wo. » Nzuk ra ndar ndɔk ba, ndɔk ye el kpuh kpaŋ ƴo gelu kandɔk ndɔk ye a fál mbew kaŋ. 14Bale fariziri ti̧h ke ɓil vul misoŋ si mbu̧h nzak woyri mbew ɓay i Zezu.
15Zezu tu lekɓay woyri mí ke tɔr poŋ niri. Mí daɓa nzukri ɓa ŋgi̧-u dih fal ye. Ke gah sena woyri gbam, 16mí ke hah niri, kú hi̧ nzukri ɓá tu ni ya. 17Fe laɓna-u kal hi̧ ɓay ké Ezay gun nzak pihna Ŋgerzah a lewsa̧ ɓah ra laɓ ƴo gelu. Nzak pihna Ŋgerzah ɓah kandɔkay : 18« Í ko gun sana bi. Mi lu ni ɓa gun-laɓ pihna bi. Law bi na sa tul ye. Tem bi ƴo ziŋ ni. Ke ɓay ka-kah hi̧ sa̧wnzuk a ɓoruri lah ɓay salɓay hul ké a ye ke kuŋ. 19Ke ɓá-ɓala ya, ke ɓáh ɓay ɓeleŋ ɓeleŋ ya, nzuk mbew ké ƴo mahful ɓay ta lah tiri kusol ye ya. 20Sihri ké fo-fom, ke háw ya. Sal hɔrɔ lampe ké suh hɔrɔ ti̧h ri duk duk, ke rím ya. Ke sí kaŋ kaŋ kpu̧ru ka̧h nam ké-e hi̧ bolkusol Ŋgerzah ɓá ti̧h ɓa fe ké si gaɗa. 21Kaŋ mí sa̧wnzuk a ɓoruri ɓay ɓaŋ law te tul riŋ ɗina ye#12.21 Gel ki̧na-u na ɓil Mbete Esaïe 42.1-4. . »
22Wara mí ku maŋ nzuk a hani ké záh ƴo tul ye gi keni hi̧ Zezu. Nzuku ɓa mbiki, ke ɓa ra̧w pi. Mí Zezu ni̧h záh ké tul nzuk ra hi̧ nun ye ko gel, ke el ɓah ɓay pi. 23Fe-u na law daɓa nzukri riw ɓa saŋ, ku ɓahri : « Nzukay ɓa Ŋgermbay gun zih ŋgermbay Daviɗ mini ani le ? »
24Fariziri ɓá lah mberem nzukri bale, ku ɓahri : « Gunwo̧ro-ay ta ni̧h záhri ké tul nzukri ya. Sa ɓa ŋgerna mbay záh tukala a ye Belzebul mí ke ni̧h záhri ké tul nzukri-aw. »
25Zezu tu ɓay ké mu̧h ɓil law woyri dale, ke ɓah hi̧ niri ɓahri : « Puh lakna a suŋ suŋ ké nzukuri kehr hani le, gbakra hani ƴo ri. Puhri mini kerpuhri gbam ké nzukuri kehr hani le, ta kaɓ ya. 26Mbay záh tukala#12.26 Sa̧w nzak vbeh ɓahri, Satan. Satan sɔk ɓahri, nzukbaa. Mí nah vbeh mbay záh tukala ɓay hi̧ karaŋri ɓá lah ɓa gah-u. ni̧h ra záh tukala yeri le, puh lakna ye gbakra hani. Lák mbay ye ɓay kaɓ ani ɓáy le ? 27Mi ni̧h ra záhri ke ŋgerna Belzebul wa, gun-toŋ fal woiri ba, ni̧h záhri ke ŋgerna ge le ? Sa̧wu mí ku ɓay nda pol ɓa mbay woiri. 28Mí mi ni̧h záhri ke ŋgerna Tem Ŋgerzah bale, lák mbay Ŋgerzah ti̧h tul woiri da. 29Uwa, dara nzuk ɓá rih puh nzuk huhrumun ɓay fa̧h fe yeri le, ke ŋgá̧h nzuk puh-u pol, kaŋ ya le ? Ke ŋga̧h ni dara mí ke fá̧h fe yeri riw ɓáy. 30Nzuk ƴo fal ŋgaŋ bi ya le, ɓa nzukbaa bi. Nzuk mbu̧h nzukri gel mbew ziŋ mi ya le, gbakra nzukri. 31Sa̧wu mí-i ƴo ɓah ɓayay hi̧ wuri, suya a suŋ suŋ mini ɓay a suya-uri ké nzuk ɓah ke riŋ nzuk le, mahful ɓay lu salɓayu ké tul nzuku ƴo ri. Mí nzak nzuk ɗi pihna Tempuki ɓa pihna záh tukala le, salɓayu ta lu ké tul nzuku ya. 32Nzuk a a̧y ké mbi riŋ gun nzuk pirmatul ɓah keni suya le, mahful ɓay lu salɓayu ké tul nzuku ƴo ri ɓáy. Mí nzuk ké fah Tempuki le, salɓayu ta lu ya gaŋ, ɓa ra seway, ɓa ra sew a gi-u kara salɓayu ta lu ya.
33Uwa. A woiri i ko kpuh na ɓa suki le, lehna-u na ɓa suki pi. I ko kpuh suya le, lehna-u suya pi ɓayu ké lehna kpuh ƴo sɔk mun kpuh-u. 34A woiri, mi̧hri soy, nzuk law a pipiri-uri, kerɓay a pipiri-uri ké i mbek ku̧ ɓil law woiri ra wa, ke mahful fe mí i él ɓah ɓay a suki ɓáy le wo ? Ɓayu ké fe mbekna ké nzuk mbek ku̧ ɓil law ye ƴo ur dukuku mí ti̧h ke nzak ye. 35Kerɓay a suki ké gaŋ ɓil law nzuk lawsuki le, nzak ye ƴo fer kerɓay a suki ku̧ kala. Kerɓay a pipiri-u ké gaŋ ɓil law nzuk law a pipiri-u bale, nzak ye ƴo fer law si̧hna ye ku̧ kala. 36Mi ƴo ɓah hi̧ wuri ɓahri se, kɔk ɓay a suŋ suŋ gbam ké nzukri ɓah-aw, ku ɓay ki̧ falu nam-kuŋ salɓay. 37Ɓay ké ti̧h nzak wo mí sɔk ketina wo, ɓa ra ƴó ke Ŋgerzah ɓa záh wo, ɓa ra kehrna wo ke Ŋgerzah. »
38Wara mí nzuk-sɔk mbete bolkusol Ŋgerzahri ke farizi a haniri el ke ɓay ɓahri : « Metere, nah yih ɓay mú laɓ fe saŋ, náh ko, Ŋgerzah pih mu mini ani le ? »
39Zezu ba, yih nzak woyri ɓahri : « Gun tukala-ayri, nzuk law a pipiri-uri, ku ti̧h kala si mbi záh a ɓoru, ku nzah ɓay ko fe saŋ. Mí fe saŋ le, ku ɓay ko ya. Sa ɓa fe saŋ a a̧y ké laɓ Zonas gun nzak pihna Ŋgerzah a lewsa̧ kú-u ko-aw. 40Kandɔk Zonas ké na ɓil mahnzuy suŋ say, seh say#12.40 Ɓay tu ɓay Zonas le í ki̧ Mbete Jonas., gun nzuk pirmatul ɓay na ké puh záhri suŋ say, seh say#12.40 Ziɓri ki̧ namri titilu ke seh riŋna. Í ki̧ ɓay nam ɔkna ɓil Mbete-ƴah tɔh riŋri ɓay lah ɓay ki̧na namri-u ma pol. kaŋ pi. 41Nzuk Ninive a lewsa̧ri ɓay ti̧h ke gun tukala-ayri. Ku mbú̧h ma gel-kuŋ salɓay. Fe laɓna nzuk Niniveri ɓay ten suya gun tukala-ayri hi̧ salɓay suya mgba tul gun tukala-ayri ɓay fe le, nzuk Niniveri lah kahɓay Zonas ra, mí ku mbi law woyri ké tul suya ma fal el kan law tul nzak pihna Zonas. Mí í ko, nzuk ké ƴo-ay ba, mba tul Zonas ra mba-mba.
42Mbay a wu̧yu ké lak mbay tusiɓa a fál ɓel ɓil seh lewsa̧ ɓay ti̧h ke gun tukala-ayri. Ku mbú̧h ma gel-kuŋ salɓay. Fe laɓna ye ɓay ten suya woyri hi̧ salɓay suya mgba tul woyri ɓay fe le, a ye ke ur ke gbu̧h tusiɓa si lah ɓay ru̧na Salomoŋ mbay a luki. Mí í ko, nzuk ké ƴo-ay ba, mba tul Salomoŋ ra mba-mba.
43Gelke záh tukala ti̧h ke tul nzuk le, ke ha̧rma ɓil lawkɔr yek yek ƴo fakla gel nam, mí ke ziŋ ya. 44Wara mí ke el ɓahri se : “Mi él si doro gel kaɓna bi a pol ra.” Ke el gi ka̧h ba, ke ziŋ gel kaɓna ra na ndikpo, gelu te-teh, gelu lek na guk guk ɓa suki. 45Bale ke ti̧h, mí ke si fa̧h záh a ɓoruri toŋndɔk say ké mgbɔrna woyri kal mgbɔrna ye ka-kal. Ku gi ɗeh puh ké tul nzuk ra. Wara mí kó nzuku baseh mbamba kal nzuku a pol. Kandɔkaw pi mí fe-u ɓay laɓ ke gun tukala-ayri. Ku ɓa nzuk law a pipiri-uri. »
46Zezu ƴo ɓah ɓay hi̧ daɓa nzukri ra bale, í ko, mah ye ke yi̧n yeri gi ƴo kala. Ku vbi ɓay ye, ku yih ɓah ɓay ziŋ ni. 47[Nzuk mbew ɓahri : « Zezu, mah wo ke yi̧n wori ƴo kala, ku yih ɓay ko mu. »]#12.47 Gel ki̧na-ay ta ɓil sa̧w nzak mbete Ŋgerzah a haniri ya. 48Dale Zezu yih nzak nzuk ra ɓahri : « A ge mí ɓa mah bi le ? Nzuk a suŋri mí ɓa yi̧n biri le ? »
49Mí ke ndoh ndɔk ye ma tul nzuk-dih fal yeri ke ɓahri : « Í ko mah bi ke yi̧n biri ké ƴo-ay, 50ɓayu ké nzuk a a̧yri ké laɓ fe ké bah bi ké nunmbam yih le, a woyri mí ku ɓa mah bi, yi̧n bi, manah biri. »
လက်ရှိရွေးချယ်ထားမှု
Mbete Matiye 12: SIAFNK
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc. All rights reserved.
