APOSTOLO MAGA 2
2
1Go ragi waina naaleatia ni Pentekoste e do pei tea vakavuroana, eu mamau puti doko tokora sikai maau. 2Go m̃araverave nasaruruana sikai e pae nakoroatelagi umai, e dakiusi nasurataana ni nalagi atu sikai, go e pakavuro usuraki nasum̃a waina eu doko asa. 3Go namena maga waina eu darana, dakiusi mena ni nakapu, eu pakilina ki da; go e sake puti ara. 4Go eu pura puti ki Naatana Tapu, po pae asa pasa ki namena p̃ota maga, dakiusi waina Naatana e dua ra naga euga vasa lagi.
5Go tea ni Yudea seara eu doko Yerusalem, waina eu pei naatam̃oli tape p̃ia, waina eu pae sara nalauna etano ni nakoroatelagi umai. 6Go ragi waina nasaruruana wanogoe e pei tea rogoana, taua ni naatam̃oli maga eu saisai, go nap̃op̃oda e pinovinoi, nalakena sara naatam̃oli eu dogo ra eu pasa pae navasaana visarasara adeada. 7Go eu mamau puti saram̃akoto po maga, po naga, Kuga leo, tea maga mamau puti waia waina eu pasa eu da pei naatam̃oli maga ni Calilea kite? 8Go ekasana nigida, sara naata kakagida, tu dogo pae navasaana waina tu pakilina asa? 9Tea ni Parthia go ni Media go ni Elam, go tea maga waina eu doko Mesopotamia, Yudea go Kapadokia, 10Ponto go Asia, Ferucia go Pamfilia, Ityipt go tokora maga ni Linue m̃aladigi ki Kurene, go nam̃enakiatatoko maga waina eu pae Roma umai, tea ni Yudea maga go proseluto maga, 11tea ni Krete go ni Arabia, tu dogo ra eu pasa pae namenagida maga nawosiana warua maga ki Sup̃e. 12Go eu saram̃akoto puti, po midoaki putuaki, po dum̃ada noa ki da, eu naga, Tea waia e pei nasava? 13Ma tea p̃ota seara eu mari saudoa ki nia, po naga, Eu munu p̃arua ki waine vau.
14Ma Petero e duleana, nara ma tea rualima sikai tamate sikai eu mamau, go e sike nadaleona po pasalagi paki da, e naga, Naatam̃oli ni Yudea maga, go tea maga mamau puti waina ku doko Yerusalem, kuga atae tea waia, go kuga takidorogo navasaana aginau maga. 15Nalakena nara waia eu da matamaloku mau, dakiusi waina nimu ku midoaki nia; nalakena e ko pei aura ketolu ni naaleatia; 16ma tea waia e pei tea waina e pei tea noaana pae profeta Yoel;
17Go ega wo doko naaleatia edaku maga, Sup̃e e noa e,
Aga wo daki kovai Naatagu paki sara nap̃okasi:
Go natumu naanoai maga go natumu nagoroi maga euga wo pea noa sai,
Go natureai animu maga euga wo punusi navunusiana maga,
Go tea matua animu maga euga wo p̃erea ki nap̃erea maga:
18Ioro go tea suasua naanoai aginau maga go tea suasua nagoroi aginau maga naaleatia maga wanogoe
Aga wo daki kovai Naatagu paki da; go euga wo pea noa sai.
19Go aga wo pitua ki tea ni namagaana maga nakoroatelagi ni elagi,
Go navaivaiana maga maramana ni etano;
Nada, go nakapu, go namavu ni naasua:
20Elo ega wo panop̃ota po pei namaligo,
Go atelagi ega wo pei nada,
Ega wo pea ki naumaiana ni naaleatia ki Yehovah,
Naaleatia warua go ni namatakuana:
21Go ega wo doko naga sara naata waina euga wo pioso paki nagisa ni Yehovah euga wo pei tea mautipauriana.
22Naatam̃oli ni Israel maga, kuga rogo navasaana maga waia: Yesu ni Nasareth, naatam̃oli sikai waina e pei tea viseikisokisokiana paki mu pae Sup̃e ki nawosiana kasua maga go ki tea ni namagaana maga go ki navaivaiana maga, waina Sup̃e e mari ra pae asa m̃aleoputo kakamu, dapala waina ku dum̃amu atae a; 23nae, waina e pei tea vituakiana ki namidoakip̃otaeana tawonakiana go naveaataeana ki Sup̃e, nimu ku duri a nakau valadagoto po mari punue a pae nam̃elearu ni naatam̃oli sigisigileo maga: 24waina Sup̃e e sike a e duleana, e peresi navitinuana ni namateana maga: nalakena e da pei tea mariataeana mau naga nae ega vei tea tapesokiana asa. 25Nalakena David e noa nalo kakana,
A leopunusi Yehovah kivea ki naraegu sara ragi:
Nalakena e doko pisari nam̃elearugu ni matua, naga aga ta parivari mau:
26Nalakena tea wanogoe nap̃op̃ogu e laelaea go namenagu e sokamidi;
Go nap̃okasigu ega wo doko naleogoroana:
27Nalakena p̃a wo da doropusi naatagu paki Hades mau,
Go p̃a wo da p̃itua ki tea dodomidodomiana anigo naga ega vunusi namesoana mau.
28Ku mari au a atae napua maga ni namauriana;
P̃a wo pakavuro au ki nalaelaeaana doko naraem̃a.
29Taigu maga, e p̃ia naga aga viviari noa ki mu nalo ni patriarke David, naga e mate po pei tea ovakiana, go matigo aneana e sikoti gida doko pa pa paki masoso. 30Ma nae e pei profeta sikai po atae naga Sup̃e e pivisa paki nia ki navivisaana sikai, naga ega wo lawo ki nawa ni nawarer. 31Sikai malo tasake aneana; e pea punusi tea wanogoe, po noa namoroduleanaana ki Kristo, naga e da pei tea toropusiana paki Hades mau, go naga nap̃okasina e da punusi namesoana mau. 32Yesu wanogoe Sup̃e e sike a e duleana, go kinami au mamau puti pei tea noasokisoki kakana. 33Nalakena tea wanogoe nae waina e pei tea tapeana pakilagi ki nam̃elearu ni matua ni Sup̃e, go waina e dape ki Tamana nasaiana ni Naatana Tapu, e po daki tea waia, waina nimu ku punusi a po dogo e. 34Nalakena David e da sake paki nakoroatelagi mau: ma nae e naga,
Yehovah e noa ki Nawota aginau, P̃a toko pisari nam̃elearugu ni matua,
35Pa pa aga wo mari tea kokona ki‐go maga euga vei malo vasiana ni nam̃elem̃a maga.
36Nalakena tea wanogoe nasum̃a mamau ni Israel euga atae m̃ata ki nia, naga Sup̃e e mari a e pei Nawota go Kristo, Yesu waina nimu ku duri a nakau valadagoto.
37Go ragi waina eu dogo tea wanogoe, eu pei tea vuriana nap̃op̃oda, po noa ki Petero go apostolo p̃ota maga, Taigami maga, auga mari nasava? 38Go Petero e noa ki da, e naga, Kuga midoakidoa, po pei tea bapetisoana sara naata kakamu pae nagisa ni Yesu Kristo paki namidoakikorokoroana ni namarinaleosaana animu maga; go kuga wo dape navituam̃olikiana ni Naatana Tapu. 39Nalakena nasaiana e pei tea animu, go agi natumu maga, go agi tea maga mamau puti waina eu madu uvea, agi tea maga waina Yehovah Sup̃e anigida ega wo soso ra. 40Go e noa sokisoki kasua ki navasaana p̃ota laapa, po pasa parati ki da, po naga, Kuga vei tea mautipauriana m̃elu dua ki tagona dagele waia. 41Go tea maga waina eu dape navasaana aneana eu pei tea bapetisoana: go naaleatia wanogoe naatam̃oli eu alagoro pei manu dolu eu sokari ra. 42Go eu doko mau doko navasapiseikiana ki apostolo maga go nasaisaipeaniana, natova‐p̃oraebred‐ana go natapasavasaana maga.
43Go namatakuana e pakilina ki sara naatam̃oli: go tea ni namagaana laapa go navaivaiana laapa eu pei tea mariana pae apostolo maga. 44Go tea maga mamau puti waina eu saralomau eu doko mamau tokora sikai maau, po mari naleo maga mamau puti eu p̃olosi ra; 45go eu sori natano veaniana adeada maga go naloriki adeada maga, po p̃otae dua tea maga mamau puti asa, e pataka ni waina te naata e pe vei tea tika. 46Go sara naaleatia eu doko mau doko nasum̃a tapu nap̃op̃oda sikai maau asa, go eu dova p̃orae bred nasum̃a adeada, po gani navinaga adeada nap̃op̃oda laelaea po pei lomau, 47eu do samasamani Sup̃e, go narei mamau eu saup̃ia ki da. Go Nawota e sokari ra sara naaleatia tea maga waina eu do pei tea mautipauriana.
လက်ရှိရွေးချယ်ထားမှု
APOSTOLO MAGA 2: NTB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bible Society of the South Pacific