LUKA 23

Pilata hmaah Isua

(Mt 27.1-2,11-14; Mk 15.1-5; Joh 18.28-38)

1Tin, pung khâwmho zawng zawng chu an tho va, Isua chu Pilata hnênah an hruai ta a. 2Tin, “He mi hian kan chite a tikhawlo va, Kaisara hnênah chhiah chawi a khap a, Krista, lal, a intih kan hria e,” tiin an hêk ta a. 3Tin, Pilatan a hnênah, “Juda-te lal i ni em?” tiin a zâwt a. Tin, ani chuan a hnênah, “Ni e,” a ti a, a chhâng a. 4Tin, Pilatan puithiam lalte leh mipuite hnênah chuan, “He mi chungah hian eng mah sual ka hmu lo ve,” a ti a. 5Nimahsela, anni chuan, “Galili ramah a ṭan a, hemi hmun thleng hian, Judai ram khaw tinah zirtîrin mi zawng zawng a chawk hnawk ṭhîn a ni,” tiin an bei lehzual sauh va.

Heroda hnênah Isua an hruai

6Tin, Pilatan chu chu a hriatin, chu mi chu Galili rama mi a nih leh nih loh a zâwt a. 7Tichuan, Heroda biala mi a ni tih a hriat veleh Heroda hnênah a tîr ta a; chûng lai chuan ani pawh chu Jerusalem khuaah a awm bawk a.

8Tin, Herodan Isua a hmuh chuan a lâwm êm êm a; a chanchin a hriat avângin, hmân ata tawh hmuh a duh hle rêng a, a thilmak tih eng emaw tal hmuh pawh a beisei a. 9Tin, thu tam tak a zâwt a; nimahsela, a eng mah chu a chhâng si lo. 10Tin, puithiam lalte leh lehkhaziaktute chuan dingin nasa takin an hêk chiam a. 11Tin, Heroda leh a sipaite chuan Isua an hmusit a, nuihza siam nân an hmang a; tin, puan ropui tak sintîrin Pilata hnênah a tîr leh ta a. 12Tin, chumi ni tak chuan Heroda leh Pilata chu an inngeih ta a; chumi hma zawng chuan an intai ṭhîn a ni.

Thi tûrin Isua an ti

(Mt 27.15-26; Mk 15.6-15; Joh 18.39—19.16)

13Tin, Pilatan puithiam lalte, hotute, mi zawng zawngte a ko khâwm a, 14an hnênah, “ ‘Mite a tikhawlo,’ tiin he mi hi ka hnênah in rawn hruai kha a ni a; tin, ngai rawh u, in hmaah ka chhuahchhâl a, in hêkna thûah khân he mi chungah hian eng mah sual ka hmu lo a ni; 15Heroda pawhin a hmu hek lo; kan hnênah a rawn tîr leh ta mai a nih hi; ngai rawh u, thihna khawp meuhvin eng mah a ti lo ve. 16Chutichuan, ka vêl ang a, ka chhuah mai dâwn a ni,” a ti a. #23.16: Kutziak bu ṭhenkhatah chuan châng 17 thu,“Kût nîah chuan mi pakhat anmahni a chhuahsak ngei tûr a ni si a,” hi a chuang.

18Nimahsela, rual takin an au va, “He mi hi chu tiboral la, Barabba kha min chhuahsak zâwk rawh,” an ti a. 19(Chu mi chu khawpuia helna eng emaw avâng leh, tual a thah avânga tân ina tâng a ni.) 20Pilata erawh chuan Isua chu chhuah a duh a, an hnênah thu a sawi leh a. 21Nimahsela, an au va, “Kraws-ah khêngbet rawh, kraws-ah khêngbet rawh,” an ti a. 22Tin, ani chuan a vawi thumnaah an hnênah, “Engah maw? He mi hian eng nge a tihsual ni? Thihna khawp meuh a chungah eng mah ka hmu lo; chutichuan, ka vêl ang a, ka chhuah mai dâwn a ni,” a ti a. 23Anni erawh chuan aw ring takin kraws-a khêngbet tûrin an ngên lui hrâm a. Tin, an aw chuan a vau dai ta a.

24Tin, Pilata chuan an ngen anga ti tûrin thu a titlu ta a. 25Helna leh tualthah avânga tân ina tâng an dîl kha a chhuah a; Isua erawh chu an duh duha tihah a pe ta a.

Kraws-ah Isua an khêng bet

(Mt 27.32-44; Mk 15.21-32; Joh 19.17-27)

26Tin, an hruai bo laiin Simona, Kurini khuaa mi, ram lam ata lo kal an man a, Isua hnung lama pu tûrin a chungah kraws chu an nghat a.

27Tin, mi narân leh hmeichhia, âwm chûma ṭap ṭap, mipui tam takin an zui a. 28Isua erawh chuan an lam a hawi a, “Jerusalem fanute u, min ṭah suh u, nangmahni leh in fate tân ṭap rawh u. 29Ngai teh u, a ni a lo la thleng ang, chûng nîah chuan, ‘Hmeichhe chingte, nau pai ngai lohna pumte, nau hnêk ngai loh hnutête chu a eng a thâwl e,’ an la ti ang. 30Chutih hunah chuan miten tlâng hnênahte, ‘Min delh rawh,’ an la ti ang a; mual hnênahte, ‘Min khuh rawh,’ an la ti ang. #Hos 10.8; Thup 6.16 31Thing hring maha hetiang an tih chuan, a rovah chuan eng ti takin ti ang maw?” a ti a.

32Tin, a hnênah mi dang pahnih, mi sual, tihhlum tûrin an hruai ve a.

33Tin, ‘Lu ruh’ an tih hmun chu an thlenin, chutah chuan kraws-ah an khêngbet a, mi sualte nên, a ding lamah pakhat, a vei lamah pakhat.

34Tin, Isuan, “Ka Pa, anni hi ngaidam rawh; an thiltih hi an hre lo a nih hi,” a ti a.

Tin, a silhfênte chu an insemin ṭhum an vâwr a. #Sam 22.18 35Tin, vântlângho chuan dingin an thlîr a. Tin, hotute pawhin, “Mi dang mah a tidam ṭhîn alâwm; Pathian thlan Krista a nih tak zet chuan amah pawh intidam ang hmiang,” tiin an tiel a. #Sam 22.7 36Tin, sipaite pawhin amah chu nuihza siam nân an hmang a, a hnênah an lo kal a, zu thûr an pe a, #Sam 69.21 37“Juda-te lal i nih zet chuan, intidam rawh,” an ti a. 38Tin, a chung lamah chuan, “He Mi hi Juda-te Lal a ni,” tiin lehkha a awm.

39Tin, an mi sual khai pakhat chuan Isua a hau va, “Krista chu i ni lo vem ni? Intidam la, keini pawh min tidam ta che,” a ti a. 40Nimahsela, pakhat chuan chhân pahin a zilhhau va, “Pathian meuh pawh i hlau na nge? Thuhmun rengin an hrem che hi. 41Keini zawng hrem zia rêng kan ni; kan thiltih man chauh hmu kan nih hi; he mi hi zawngin eng mah a tisual si lo,” a ti a. 42Tin, “Isu, i ram i thlen hunah mi hre reng ang che,” a ti a. 43Tin, ani chuan a hnênah, “Tihtak meuhvin ka hrilh a che, vawiinah hian ka hnênah Paradis-ah i awm ve ang,” a ti a.

Isua a thi ta

(Mt 27.45-56; Mk 15.33-41; Joh 19.28-30)

44Tin, chawfâk hun lai a lo ni a, chumi achin behliang mun hun thlengin khawvêl a lo thim ta vek a, 45ni êng a reh ta a; tin, Pathian biak in puanzâr chu a laiah a lo thlêr ta a.#Ex 26.31-33. 46Tin, Isua aw ring takin a au va, “Ka Pa, i kutah ka thlarau ka kawltîr e,” a ti a. Tin, chu chu a tih zawhin a thlarau a thlah ta a.#Sam 31.5.

47Tin, sipai za hotu chuan thil awmzia chu a hmuhin, “He mi hi mathei lovin mi fel tak a ni phawt mai,” tiin Pathian a fak ta a. 48Tin, chu ennawm chu thlîr tûra mipui rawn inkhâwm zawng zawngte chuan, thil awmziate chu an hmuhin, an âwmte chûm chûmin an haw leh ta a. 49Tin, a hmêlhriatte zawng zawng leh hmeichhia, Galili ram aṭanga rawn zuitute chu, chûng thil chu thlîrin hla takah an ding a. #Lk 8.2-3

Isua phûm thu

(Mt 27.57-61; Mk 15.42-47; Joh 19.38-42)

50Tin, ngai teh, mi pakhat a hming Josefa, rorêltu, mi ṭha tak, fel tak a awm, 51(an rorêl leh an thiltih pawh kha a remti lo rêng a ni) Juda-te khua Arimathai-a mi a ni a, Pathian ram a beisei ṭhîn a. 52Chu mi chu Pilata hnênah a kal a, Isua ruang a dîl a. 53Tin, a la thla a, puan zai sînin a tuam a, thlân, lung ker kuak, tu mah la zalh ngai lohnaah a zalh a. 54Tin, chumi ni chu Inrinni a ni a, Chawlhni a ni lek lek tawh si a. 55Tin, hmeichhia, Galili ram aṭanga a hnêna lo kalte khân an zui zêl a, thlân leh a ruang zalh zia chu an hmu a. 56Tin, an haw leh a, englo rimtuite leh hriak rimtuite an siam a. #Ex 20.10; Deut 5.14

လက်ရှိရွေးချယ်ထားမှု

LUKA 23: MIZOVBSI

အရောင်မှတ်ချက်

မျှဝေရန်

ကူးယူ