Macce 10
10
1Ƴutta, a ɓeeɗukka taalubeeciŋ ɗe ndaŋkiyaah na kanak ci (12), a onnda ɓa hatil ne ɓa wirɗee kosaay ci na ɓeenduk ci jen, a nammba ɓa on hatil ne ɓa aañee jiiniici na hoolaaɗiiki ca hoolaaɗi.
2Cii ceɗ tiik ciŋ Apootar#10:2 apootar : ɓeɗ taalubeeci ndaŋkiyaah na kanak (12) ci Yeesu kooɗee ne ɓa hunee na ɗe, te ŋ mirndaani, ɓeɗ a woos ŋ adinaani jen ne ɓa paysoh Yegɗohiŋ Muci. "Apootar" tokis ɓoyi woosu. Te, ŋ Fiis ciŋ Ambtiɗohi Asi raakiɗ ɓi ɓo' wiiriis, ɓi ɓeeɗkohsee tiikeem. ci ndaŋkiyaah na kanak ci (12) : Kockoh ŋ Simong yi teeku Piyeer, na Andare taambɗoh ce ; Saak na Saaŋ, kuɓuuciŋ Sebede ; 3Filip na Bartalemi ; Tomaa na Macce juuti'ohi ; Saak kuɓkiŋ Alfe, na Tade ; 4Simong yi nikee Selot#10:4 Selot : a yi ɓoyi waaɗ kur ce po a ƴutiɗ ne a hiñohiɗa. na Yudaa Iskaryot yi wor ɗe.
5Ɓeem ɓeɗ nikee ndaŋkiyaah na kanak ci (12) Yeesu tuuƴe, a eɗta ɓa dengkoh cii an : « Kinaat kaɗ ŋ kur ciŋ ɓooɓi nikɗi Yawuut te kinaat aas ŋ kur ciŋ Samari#10:5 Samari : ɓi Samari na Yawuut ca kerhiɗoheeɗi ; ɓa heeftiɗohee heeftiɗoh, ɓa sangtiɗohha. ; 6waaye kaɗaat ŋ mbaal ci muuƴiɗ ci ɓaah ŋ cuuɓiŋ Israayel. 7Ɗisik nu ɗu taamb ŋ waasi ɗah, woyaat ɓooɓi ne Nguuriŋ-Ɗafki reɓiɗ. 8Wirɗaat kosaayiɗ ci, hultiɗaat kaaniɗ ci, aañaat jiiniici, ɗu wiriɗ ɓooɓi kosaay kosaay ki na oɓse faan po ɓa nik ɓo' hooliɗ. Ɗu rahsiɗ te ɗu wirindɗi, kon eɗohaat te kinaat wirndiɗuk.
9Kinaat ɓayndoh ali kopor, wa urus haa, wa haalis haa, wa hanjar loƴaah haa, 10kinaat ɓayndoh saak ɓaaɓoha, kinaat ɓayndoh kulɓa kanak wala ñafaɗ wala ndooɗ, laam ɓoyi na pangke joyiɗ rahas kañam kiŋ ɗe. 11Kur nu ɗu aasoh ɗah, meeksohaat po ɗu inah ɓoyi teyɗuk ɗu daliɗ, ɗu nik ŋ kahan ce po mbaɗna ɗu cootan. 12Ɗu aasee kahna ɗah, kañɗohaat ; 13nik ne kahna yeyyoo'iɗ ɗu daliɗ ɗah, jamiŋ ɗu nikaat nga, waaye wa yeyyooɗi ɗu ɗah, kaɗaat na jamiŋ ɗu.
14Ɗu dalɗuuɗi, ɗu sikɗukuuɗi ɗah, pulaat kahneem wala kur keem, ɗu faris merhey miŋ kot ciŋ ɗu. 15Ñam na woyee ɗu wa te wa keeh, ŋ mbehaŋ atteena, e ɓi kur keem uupan miskiɗ ɓi Sodom na Gomor.#Camba 18:16–19:29
Miskiɗ ci na hee rahse taalubeeci
16Mi yii tuuƴ ɗu findi mbaal ŋ ɗooƴ gat ɓaakoɓ ; yunkaat findi iiñ, ɗu soos findi banuut. 17Wortukaat ɓooɓi, ɓa hey ɗu ambe, ɓa ɓay ɗu ŋ ngelohaaci te ɓa hey ɗu laɓɗuke leraw ŋ sinaagog ciŋ ɓa ; 18ɗu hey ɓayse ŋ fiki ɓi goornoor na ɓi buur saguuso. Ineem hey tahe po ɗu min ndo seede ŋ fikiiɓa na fiki ɓooɓi nikɗi Yawuut. 19Waaye ɓa ɓayee ɗu ɗah, kinaat jaahiɗ ŋ findi ɗu woyohan na ini ɗu woyan, ɗu hey eɗse ŋ saasi saasi ini ɗu woyan. 20Laam, e ɗu woyan haa, a Fuuɗsiŋ Baabiŋ ɗu, a yi woyan taamboh nga ɗu.
21Ɓo' hey ambɗuke taambɗoh ce ne a apu, baabu hey ambɗuke kuɓkiŋ ɗe ne a apu, ɓi komaaki hey nike sangiɗ ciŋ ɓooɓi rim ɓa, ɓa apɗuk ɓa. 22Ɓooɓi jen hey ɗu sange saguuso ; waaye ɓoyi na hee ndengɗuke muñ po ŋ reehɗohaana hey mucɗasse. 23Ɗu tumsee miskiɗ ŋ kur kii ɗah, saandohaat ŋ kur wiiriis. Ñam na woyee ɗu wa te wa keeh, ɗu reehɗanɗi kur ci nik ŋ Israayel te Kuɓkiŋ ɓoyi hayɗi.
24Taalubeeni uupɗi yak ɓoyi na jangɗee ɗe te ñaami uupɗi yak heɗ ce. 25Taalube mand na ɓoyi na jangɗee ɗe ɗah, wa doyiɗ ɗe. Ñaam na heɗ ce nam mand ɗaa. Nik ne ɓa teekiɗ heɗ kahni Belsebul#10:25 Belsebul : wa ɓaah ŋ tiik ciŋ Seytaani. ɗah, moo ɓooɓiŋ kahni teeksan na ?
26Mbaa kinaat ɓa neek. Laam in nu ɗembɗu ɗah, wa hey teeɓohse te in nu ɗemb ɗah, wa hey inhasse. 27In nu ŋ woo na ɗu na wek ɗah, woyaata noh cong te in nu ɗu moondɗu ŋ nof ɗah, leehkaata ŋ ɗafuk taɓah ci.
28Kinaat nup ɓi na ape faan te ɓa minɗi ap ruuh. Nupaat Yi min ambsoh faan na ruuh jen a sooƴiɗ ca ŋ yongkaaha yakka. 29Sel ƴin kanak na toonohseeɗi daram yino dong e ? Moona deey, yino na keeneeɗi nga ca te Baabiŋ ɗu yegɗaa. 30Te ini kaɗ nga ɗu, a inhiɗ sah findi find ciŋ haf ciŋ ɗu hend. 31Kon kanaat neƴƴoh ! E ɗu uupiɗ juuk sel njiriñ.
32Ɓo' nu woo ŋ fiki ɓooɓi ne a ɓaah nga so ɗah, ŋ hey name woo ŋ fiki Baabiŋ ngo yi nik ŋ Eel ci ne ɓoyeem ɓaah nga so. 33Waaye ɓo' nu taasuk ko ŋ fiki ɓooɓi ɗah, ŋ hey ɗe name taasuk ŋ fiki Baabiŋ ngo yi nik ŋ Eel ci.
34Kinaat liiɓ ne ŋ hay ne ŋ ɓay jam ŋ Adina ; ŋ ɓayɗi jam, ŋ ɓay hiñoh. 35Laam, findi Fiis ci woyoha, hayiŋ ngo hey tahe po
“ ɓo' sang baab ce,
komaaki ɓitiɓ sang yaay ce,
kilook sang payum ce ɓitiɓ.
36Sangiɗ ciŋ ɓoyi nikan ɓi kahan ɓa. ” #Miise 7:6
37Ɓo' nu waaɗ baab ɓa mbaa yaay ɓa waaɗi uup wi a waaɗ to ɗah, a yeyyooɗi so te ɓo' nu waaɗ kuɓkiŋ ɗe ƴaar mbaa ɓitiɓ waaɗi uup wi a waaɗ to ɗah, a yeyyooɗi so. 38Ɓo' nu ɓayɗi kurwaani a joy daaƴohu, a ñaakee nga so ɗah, a yeyyooɗi so. 39Ɓo' nu waaɗ kipes kiŋ ɗe ɗah, a hey wa ñake, te ɓo' nu ñak kipes kiŋ ɗe saguuso ɗah, a hey raake kipes ki.
40Ɓo' nu teyɗuk ɗu ŋ kahan ce ɗah, a teyɗuk ko, te ɓo' nu teyɗuk ko ɗah, a teyɗuk Yi woos so. 41Ɓo' nu teyɗuk woosuuɗ ŋ kahan ce sagu ini a nik woosuuɗ ɗah, a rahsan aaf woosuuɗ, te ɓo' nu teyɗuk ɓo' yurhiɗ sagu ini ɓoyeem nik ɓo' yurhiɗ ɗah, a rahsan aaf ɓo' yurhiɗ. 42Te yaa nu eɗ ɓo' yino ŋ ɓooɓi ƴissuutɗuuɗ ci, ali nik ne wa pot masuɓ soosiɗ ne a an, sagu ini a nik taalube ɗah, ñam na woyee ɗu wa te wa keeh, ɓoyeem ñakanɗi aafu nga. »
လက်ရှိရွေးချယ်ထားမှု
Macce 10: YM
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc
