Mateo 10
10
Kaseli nyɔngma kɛ enyɔ ɔmɛ
(Marko 3.13-19; Luka 6.12-16)
1Yesu tsɛ e kaseli ɔmɛ kɛ ba nɛ e ha mɛ mumi yayami ɔmɛ a nɔ he wami ke a hia mɛ nɛ a tsa hiɔ tsuaa hiɔ kɛ dengme tsuaa dengme. 2Kaseli nyɔngma kɛ enyɔ ɔmɛ a biɛhi ji nɛ ɔmɛ nɛ: Kekle nɔ ɔ, Simon nɛ a tsɛɛ lɛ Petro, kɛ e nyɛmi Andrea; Yakobo, Zebedeo bi ɔ kɛ e nyɛmi Yohane; 3Filipo kɛ Bartolomeo; Toma kɛ Mateo, onia tsulɔ ɔ; Yakobo, Alfeo bi ɔ, kɛ Lebeo nɛ a tsɛɛ lɛ Tadeo hulɔ ɔ; 4Simon Kanaanno ɔ; kɛ Yuda Iskariot nɔ nɛ ba tsɔɔ Yesu se blɔ ɔ.
Kaseli nyɔngma kɛ enyɔ ɔmɛ a tsɔmi
(Marko 6.7; Luka 9.1-16)
5Kikɛmɛ a nimli nyɔngma kɛ enyɔ nɛ ɔmɛ Yesu tsɔ, nɛ e fa mɛ ke: “Nyɛ ko gu majeli a bimɛ ɔmɛ a ngɔ, nɛ nyɛ ko sɛ Samariabi ɔmɛ a ma ko mi hulɔ; 6se mohu nyɛɛ ya Israel we tohi nɛ laa amɛ a ngɔ? 7Se nɛ nyɛ yaa nɛ ɔ, nyɛɛ fiɛ de ke: ‘Hiɔwe matsɛ yemi ɔ su si ta.’ 8Nyɛ tsa hiɔtsɛmɛ, nyɛ ha tsitsɛmɛ a he nɛ tsɔ, nyɛ tle ni gbogboehi a si, nyɛɛ hia mumi yayamihi; yaka nyɛ na, yaka nyɛ ngɔ ha! 9Nyɛ ko hɛɛ sika tsu loo sika hiɔ loo kaplɛ ngɛ nyɛ mlɛ mi fimi nihi a mi; 10jeha nɛ ɔ hu, nyɛ ko hɛɛ blɔ hiami kotoku loo hiɔwe tade enyɔ, loo tokotahi; loo dɛma tso tete, pse ni tsulɔ ɔ e ngma sa lɛ.
11“Nɛ ma tsuaa ma aloo kɔpe tsuaa kɔpe mi nɛ nyɛ maa sɛ ɔ, nyɛ bi nɔ nɛ sa si ngɛ lejɛ ɔ, nɛ nyɛ ya to lejɛ ɔ kɛ yaa su be nɛ nyɛ maa je. 12Nɛ ke nyɛ ngɛ we ɔ mi sɛe ɔ nyɛ nga we ɔ. 13Nɛ ke we ɔ sa a, nyɛ ha nyɛ he jɔmi ɔ nɛ ba e nɔ; se ke e sɛ́ ɔ, lɛɛ nyɛ he jɔmi ɔ nɛ kpale ba nyɛ ngɔ ekohu. 14Nɛ ke nɔ ko he we nyɛ nɛ e bui nyɛ munyu ɔmɛ a tue ɔ, ke nyɛ ngɛ jamɛ a we ɔ loo ma a mi jee ɔ, rnyɛ blɛ nyɛ nane he bunyuku ɔ. 15Niinɛ, i ngɛ nyɛ dee ke: E be wae ha Sodom kɛ Gomora zugba a ngɛ kojomi ligbi ɔ nɔ kaa jamɛ a ma a.”
Yiwami nɛ maa ba
(Marko 13.9-13; Luka 12.12-17)
16“Oʼɛ, i ngɛ nyɛ hsɔe kaa jijɔhi ngɛ ogbeteehi a kpɛti; lɔ ɔ he ɔ nyɛ hɛ mi nɛ tɛ kaa sinɔhi, nɛ nyɛɛ pee kpoo kaa okpohi. 17Nyɛ hɛ nɛ hi nyɛ he nɔ ngɛ nimli a he; ejakaa a maa ngɔ nyɛ kɛ maa ya guahi a mi nɛ a maa fia nyɛ kpa ngɛ a kpe he ɔmɛ; 18nɛ ganɔhi kɛ matsɛmɛ a hɛ mi tete po a kɛ nyɛ maa ya ngɛ ye he, konɛ a kɛ ye odase ha mɛ kɛ majeli ɔmɛ. 19Se ke a ngɔ nyɛ kɛ ho ɔ, nyɛ ko hao nyɛ he ngɛ bɔ nɛ loo nɔ́ nɛ nyɛ ma de he; se a maa ngɔ nɔ nɛ nyɛ ma de ɔ ngɔ ha nyɛ ngɛ jamɛ a ngmlɛfia a mi nɔuu? 20Ejakaa pi nyɛ ji ninɛmɛ nɛ ngɛ munyu ɔ tue ɔ, se mohu nyɛ tsɛ ɔ mumi ɔ lɛ ngɛ munyu tue ngɛ nyɛ mi.
21“Nyɛmi maa ngɔ nyɛmi ngɔ ha gbenɔ, nɛ tsɛ maa ngɔ bi ngɔ ha, nɛ bimɛ maa te si ngɔ wo a fɔli nɛ a ma ha nɛ a gbe mɛ. 22Nɛ nihi tsuo maa nyɛ nyɛ ngɛ ye biɛ ɔ he; se nɔ nɛ hɛɔ mi kɛ pii si ɔ, lɛ ji nɔ nɛ a ma he e yi wami? 23Se ke a ngɛ nyɛ yi mi wae ngɛ ma nɛ ɔ mi ɔ, nyɛɛ tu fo kɛ ya ekpa mi; se niinɛ, i ngɛ nyɛ dee ke: Nyɛ be Israel ma amɛ tsuo nya gbee loko Nɔmlɔ Bi ɔ maa ba.
24“Kaselɔ pa we e tsɔɔlɔ, nɛ jeha nɛ ɔ hu nyɔguɛ pa we e nyɔmtsɛ. 25E hiɛ kaa kaselɔ maa pee kaa e tsɔɔlɔ, nɛ nyɔguɛ hu maa pee kaa e nyɔmtsɛ. Ke a tsɛ wetsɛ ɔ Beelzebul ɔ, e webi ɔmɛ lɛɛ si enyɛmɛ a be mɛ tsɛe ja?”
Nɔ nɛ sa gbeyeyemi
(Luka 12.2-7)
26“Lɔ ɔ he ɔ nyɛ ko ye mɛ gbeye; ejakaa nɔ́ ko nɔ́ ko be nɛ a bu nɔ nɛ a be nɔ tlee nɛ a laa we nɔ́ ko nɛ a be lee. 27Nɔ́ nɛ i ngɛ nyɛ dee ngɛ diblii mi ɔ, nyɛ de ngɛ la hɛ mi; nɛ nɔ́ nɛ i woɔ nyɛ tue mi nɛ i deɔ nyɛ ɔ, nyɛɛ fiɛ ngɛ tsuhi a yi mi. 28Nɛ nyɛ ko ye ninɛmɛ nɛ gbee nɔmlɔ tso ɔ nɛ a nyɛ we klaa a nɛ a gbe ɔ gbeye; se mohu nyɛɛ ye nɔ nɛ nyɛɛ klaa a kɛ nɔmlɔ tso ɔ tsuo hɛ mi kpataa ngɛ gehena mi ɔ gbeye. 29Anɛ otokliihi enyɔ ɔ pi pɛsɛwa nɛ a juaa nɛ a heɔ lo? Se a ti nɔ kake be zugba nɔe, ja e je nyɛ tsɛ ɔ dɛ mi. 30Se nyɛ yi bwɔmi po ɔ a kane kulaa. 31Lɔ ɔ he ɔ nyɛ ko ye gbeye; nyɛ he jua wa hluu pe otokliihi babauu.”
Kristo biɛtawomi ngɛ nimli a hɛ mi
(Luka 12.8-9)
32“Lɔ ɔ he ɔ, nɔ tsuaa nɔ nɛ gbaa mi woɔ ye ta ngɛ nimli a hɛ mi ɔ, imi hu ma gba mi ma mo e ta ngɛ Tsaatsɛ nɛ ngɛ hiɔwe ɔ hɛ mi. 33Se nɔ tsuaa nɔ nɛ kuaa mi ngɛ nimli a hɛ mi ɔ, imi hu ma kua lɛ ngɛ ye tsɛ nɛ ngɛ hiɔwe ɔ hɛ mi.”
Pi hejɔmi se klaate
(Luka 12.51-53; 14.26-27)
34“Nyɛ ko susu kaa i ba nɛ ma ba ha he jɔmi nɛ ba zugba a nɔ; pi he jɔmi hami nɛ i ba, se klaate mohu. 35Ejakaa i ba nɛ ma ba ha bi nɛ te si kɛ si e tsɛ, kɛ bi yo hu kɛ si e nyɛ, kɛ nganyɛ hu kɛ si e nganyɛ. 36Nɛ nɔ nitse we mi bimɛ ma plɛ e henyɛli.
37“Nɔ nɛ dɔɔ e tsɛ loo e nyɛ he pe mi ɔ, e sɛ́ mi; nɛ nɔ nɛ dɔɔ binyumu loo biyo he pe mi ɔ e se sɛ́ mi. 38Nɔ nɛ wo we e seumi tso kɛ nyɛɛ we ye se ɔ, e sɛ mi? 39Nɔ nɛ baa e klaa yi ɔ, e maa laa lɛ; nɛ nɔ nɛ laa e klaa ngɛ ye he ɔ, e nine maa su nɔ.”
Hiɔwomi
(Marko 9.41)
40“Nɔ nɛ heɔ nyɛ ɔ, e heɔ mi; nɛ nɔ nɛ heɔ mi ɔ, e heɔ nɔ nɛ tsɔ mi ɔ. 41Nɔ nɛ heɔ gbalɔ ngɛ gbalɔ biɛ mi ɔ, gbalɔ hiɔwo e ma na; nɛ nɔ nɛ heɔ dalɔ ngɛ dalɔ biɛ mi ɔ, dalɔ hiɔwo e ma na. 42Nɛ nɔ tsuaa nɔ nɛ ma ha ni tsɔwi nɛ ɔmɛ a ti nɔ kake nyu hɔ tsimi kake pɛ nɛ e nu ngɛ kaselɔ biɛ mi ɔ, niinɛ, i ngɛ nyɛ dee ke e hiɔwo be lɛ fɔe gblegbleegblee.”
လက်ရှိရွေးချယ်ထားမှု
Mateo 10: DAN77
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Dangme New Testament © United Bible Societies, 1977.
