Semtilbu 4
4
Cain le Abel Pen
1Chuin Adam chun a-inneipi Eve chu akitimat pin ahile, amanun nao avopmin, Cain ahingin, chule amanun, Pakaiya konin pasal khat kaneitai, ati. 2Chuin amanun anaopa Abel ahing kitnin ahi. Chuin Abel chu kelngoi vah-in apangin, ahin Cain vang chu loulhou natongin apangin ahi. 3Chuin khonung phasah-in, Cain'in alhosoh alouga chu ahin choijin, Pakai henga atohtan ahi. 4#Heb 11:4. Chuin Abel jong chun akelngoihon asoh masapen lah-a athaopen chu ahin choijin ahi. Chuin Pakai chu Abel le athilto-a chun alung lhaijin ahi. 5Ahin Cain le athilto chunga vang alung lhai tapon ahi. Chuphat nin Cain chu alungsa talheh jengin, chule amai athim jengtan ahi. 6Chuin Pakaiyin Cain jah-a, Ibola nalungsat ham? Chule ibola namai thima ham? 7Nangman phatah-a nabola ahile, nangma sanlouva naum dehding ham? Ahin phatah-a nabol lou vangle, chonsetnin kot bula nachang jinge. Chule angaichat chu nangma-a ding ahin, hijongle nangman ama chunga vai nahom ding ahi, ati.
8 #
Matt 23:35; Luk 11:51; 1 Jhn 3:12. Chuin Cain'in anaopa Abel chu akihoulimpin; chuin ahitin ahi, amani gamlah-a aumpet lhonin, Cain chu anaopa Abel chunga achun, athat tai.
9Chuin Pakaiyin Cain jah-a, nanaopa Abel hoija umham? ati. Chuin aman, kahepoi; keima kanaopa ching beh kahim? ati.
10 #
Heb 12:24. Chuin aman, Ipi nabol hitam? Nanaopa thisan aw chu leisetna konin kahengah ahung pengdoh-e. 11Chule tun nakhutna kona nanaopa thisan choplutna leisetna kona nangma kigaosap ma nahitai. 12Nangman lei nalaija na natoh tengle, nangma-a dinga ahina banga ga ahinsepdoh tahlou ding; nangma leiset chunga jamlele leh vahlele mi nahiding ahi, ati.
13Chuin Cain'in Pakai jah-a, Ka talen mat hi kathoh jou kal val ahitai. 14Vetan, nangman tunin leiset chunga konin neinodoh tan; chule nangma maikoh-a kona selmanga umding kahitai; chule keima leiset chunga ajamlele leh vahle-le kahiding ahitan; chule hung hiti ding ahi, keima eimu mu-a chun eithading ahitai, ati.
15Chuin Pakaiyin ajah-a, Hijeh chun koihile Cain that chan chu, ajat sagi-a achunga phu kilading ahi, ati. Chuin koiman ama amua atha louna dingin, Pakaiyin Cain chunga chun melchihna akoitan ahi. 16Chuin Cain Pakai angsunga konin apotdoh-in, Eden solama Nod Gama achengtai.
Cain Chilhah ho
17Chuin Cain'in a-inneipi akitimatpin ahile, amanu agaijin Enoch ahingin ahi. Chuin aman khopi khat asemin, achapa min dungjuijin khopi chu Enoch asahtai 18Chuin Enoch chun Irad ahingin; Irad chun Mehujael ahingin; Mehujael'in Methushael ahingin; chule Methushael'in Lamech ahingin, ahi. 19Chuin Lamech chun jini akipuijin: khatnu min chu Adah ahin, khat joh nu min chu Zillah ahi. 20Chuin Adah chun Jabal ahingin; ama chu pon in'a chenghole gancha vulteho bulpipa ahi. 21Chule anaopa min chu Jubal ahin; amachu saiging le gosem mut teho jouse bulpipa ahi. 22Chule Zillah'in jong Tubal-Cain ahingin; ama chu sum-eng le thih manchah semho hila pang ahi.Chule Tubal-Cain sopinu chu Naamah ahi.
23Chuin Lamech chun ajiteni jah-a chun,
Adah le Zillah ka-aw ngai lhonin,
nangni Lamech inneipi teni, kathusei ngailhonin.
Ajehchu mikhat eimavo jeh-in kathatnin,
chule gollhang khat eisuhkhah jeh-in kathatnin ahi.
24 #
Matt 18:22. Cain chunga ajat sagi-a phu kilading ahile,
tahbeh-a Lamech chunga sagi mun somsagi vei kilading ahi, ati.
Seth le Enosh
25Chuin Adam'in a-inneipi chu akitimatpi kitnin ahile, amanun chapa khat ahingin, amin Seth asahtai. Ajehchu amanun, Cain'in atha Abel khel chun, Pathen'in chikhai ding khat eipetai, ati. 26Chuin Seth amatah jong chun chapa khat ahingin, amin Enosh asah tai. Hiche-a pat chun mihem ten Pakai min akoupan taovin ahi.
လက်ရှိရွေးချယ်ထားမှု
Semtilbu 4: THADBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Thadou Kuki CL (Re-edited) Bible - Pathen Thutheng BU
Copyright © 2015 by The Bible Society of India
Used by permission. All rights reserved worldwide.